1 KORINTUS 3:10 - Susula Malalaok Hehelu Palak Ma Hehelu Beuk

¹⁰ No Manetualain fe au malela ka de, au da'dileo ndolu uma malelaina, de au tao basa uma ndia fanderen na so, boema hataholi fe'ek nde nafofo'a uma ndia neu fanderen ndia lai na. Hataholi a esa-esak, muse taoafik matalolole, tao leo beek fo nafofo'a uma ndia neu fanderen ndia lain.

1 KORINTUS 3:10 ပူးပေါင်းရင်းမြစ်များ

2TAWARIKH 2:12

Kokoa-kikiok neu Israel Manetualain fo Manamakadada'dik lalai ma daebafak-ka! Ana fe Dauk ana manek esa manatee tenok nanseli baite dodole da'uk, ma malelak, de besak ia ana bei sanga enok fo napadedeik uma esa ba'eneu Manetualain ma ba'eneu ndia uma manen-na.

KELUARAN 36:4

Boema basa tuka fo manatao-no'i tatao-nono'ik ndia,

AMSAL 12:8

Hataholi-a nanakoa-nanakiok, nandaa no manatee-tenon-na; hataholi nananakadadaek-ka, nandaa no nggoa-panganan-na.

AMSAL 9:1

Manatee-tenok-ka napadede'ik-na uma, ma ana tao natetetu dii kahitun-nala.

PENGKHOTBAH 12:9

Manadudu'a-dodook ndia dodole maneu ma manatee-tenok. Hu ndia de, nanoli malelak lala'en-na neu Manetualain anan-nala. Nanoli dede'a nakandandaak makadotok boema ana fola ndoon-na.

DANIAL 12:3

Basa mauli-malangan manatee-tenok-kala, neukose landela-lasa'a sama leo lalai-a mangale'don-na. Ma ba'eneu sila fo lanoli hataholi makadotok soaneu tao-no'i hata malole, ndoos ma matetuk-ka, neukose landela-lasa'a sama leo nduuk-kala losa dodoon-na.”

ZAKHARIA 4:9

nae, “Zerubabel pe'da basa Au Umang-nga batu makasososan-na so, de neukose ana tao nakababasak uma ndia lala'en-na. Metema, dede'ak ndia ana da'di soona, neukose Au anang-ngala bubuluk, lae Au nde adenu o, fo Zakharia neu leo sila neu.

MATEOS 24:45

Boema Yesus kokolak seluk nae, “Metema leondiak soona, malalau-maoono bee ka nde mana lilinekak ma manatee teno ka? Ndia nde tua na so'un da'di malangan neu malalau-maoono fe'e kala, fo ela ana fes la'a-linu la'e fai na.

MATEOS 7:24

“Naa, ba'eneu see fo namanene Au dede'a-kokolang ia boema ana tao tungan, soona hataholi ndia sama na leo hataholi malela ka napadedeik uma na nai batu lain.

LUKAS 11:35

Hu ndia de, manea matalolole fo boso nalosak mangale'dok manai emi ndia ana da'di makahatuk.

LUKAS 21:8

Yesus nae, “Manea matalolole leona, fo boso nalosak ala ke'dindiu la emi. Hataholi ba'u ka neukose ala mai no ala pake Au na'de nga fo lafa'da lae, ‘Au nde Ndia!’ ma ‘Fai na losa so.’ Tehu emi boso tungas.

HATAHOLI 18:27

Basa boema Apolos dodoo nae, sanga neu leo Akhaya neu. Boema hataholi kamahehelek manai Efesu sala sulak fe tolanoo kamahehelek manai Akhaya la susulak fo ala sipok Apolos. De lelek fo Apolos losa Akhaya boema, tutulu-fafalin nananitak masosoa-ndandaak ba'eneu hataholi fo hu ka nde Manetualain susue-lalain de lamahele Yesus so.

ROMA 1:5

Manetualain fe au baba'e-babatik, fo au da'di Lamatua ka ana manatungan, fo ela au alalau-aoono Kristus ma hela-nole basa hataholi lala'ena, fo ela lamahele ma ala tunga.

ROMA 12:3

Manetualain fe basa baba'e-babatin neu au so. Hu ndia de au anoli-afa'da emi basa-basa mala fo boso mamatutua-mamadedema ao ina ma ba'u lenaheni emi aoina ma baba'u na. Te ela leo been-na, emi mete aoina mala no dale nakaloe-nakadaek; esa-esak mete aoina na tunga be'ibalakaik fo Manetualai fe neun, hu ka nde namahele Yesus.

ROMA 15:15

Tehu la'eneu dede'a kikisa kala, au balataa emi no mahelek nai susulak ia dalek, nanahu Manetualain ba'ebati fe au bela-ba'uk ndia.

ROMA 15:20

Au dale hihii nga nde, tui-benga Manetualain Hala Malole na nai mamanak fo nai bee, hataholi a beita namanene la'eneu Kristus. Nana au ta nau apadedeik au ue-le'ding neu fanderen fo hataholi fe'ek nde tao nana, lain fa.

1 KORINTUS 3:11

Nana Manetualain mesa kana nde tao Yesus Kristus da'dileo fanderen kisak soaneu uma ndia; de ta hapu fanderen fe'ek fa.

1 KORINTUS 9:2

Leomae hataholi fe'e kala, ala ta nau manaku au da'dileo hataholi nadedenuk fa, tehu emi manaku dede'ak ndia! Nana emi maso'dam da'dileo hataholi kamahehele ka nde bee na, ana dadi buti neme au ue-osang buna-boan da'dileo hataholi nadedenuk esa.

2 KORINTUS 10:15

Ami ta koa-kio ami aoina ma hu ka nde hataholi fe'ek fo manai dae too deak ue-le'din, fo Manetualain naketun basan soaneu ami so. Nasafali na, ami mahele nai dae too fo Manetualain naketun soaneu ami, ma ami mamahena mae emi boetai mamahele neu Kristus, fo ela ami hapu tao tatao-nono'i matuaina seluk nai emi tala'da.

EFESUS 2:20

Emi nananafofo'ak nai netes fo Lamatua ka hataholi nadedenu nala lo nabi la, lafofo'a ka lain, fo Kristus Yesus nde da'di batu nete sa.

KOLOSE 1:29

Hu ka nde dede'ak ndia de, au puse laipana nai lau-ono ka dalek. Au alalau-aoono unik be'i-balakaik fo Kristus fen neu au lala'e na. Be'i-balakaik ndia, henuk no Manetualain koasa na, nai au so'da nga dalek.

KOLOSE 4:17

Ma mafa'da Arkhipus fo, “Ana tao nakababasak ndia bela-ba'un, soaneu nalalau-naoono Lamatua ka.”

1 TESALONIKA 3:2

ami madenu ita tolanon Timotius ne'i. Timotius ia, Manetualain malalau-maoonon esa, fo nalalau-naoono sama-sama no ami, soaneu ami tui-benga Hala Malole la'eneu Kristus. Ami madenu Timotius ne'i fo natetea-nahehele emi, fo ela emi boetai mamahele seluk neu Kristus.

1 TIMOTIUS 4:16

Manea o ao ina ma, ma manea o nanoli ma boe. Ela leo been-na, o lilineka mahele nai basa dede'ak sila la dalek, nana no enok ndia, neukose o moo hataholi fo lamanene o nanoli mala, hapu so'dak.

2 TIMOTIUS 2:15

Ela leo bee na, o sanga enok te'e-te'e, fo Manetualain manaku o da'dileo hataholi fo nandaa da'di Ndia malalau-maoonon. Sanga enok, fo o boso bii-mae o tatao-nono'im ndia, fo ela o nanoli ma, nandaa no nanoli ndoos fo maneme Manetualai na mai a.

YAKOBIS 3:1

Tolano-tolanoo ngala lemin! Boso hataholi ba'u ka nai emi dalek, nau da'di mesen. Nana ela emi bubuluk te, laketu-lala'di hataholi mana da'di mese nala soona, bela na lena heni hataholi fe'e kala.

1 PETRUS 4:11

Hataholi mana manduku-malosak hala ka, muse nanduku-nalosak halak maneme Manetualai na mai; hataholi mana malalau-maoono hataholi fe'e ka, muse nalalau-naoono ninik be'i balakaik maneme Manetualai na mai, fo ela nai basa dede'ak lala'e na dalek, Manetualain nananamatutua-namadedemak tunga Yesus Kristus. Ndia nde mana koasa ma nandaa nana namatutua-namadedemak losa dodoo na. Amin.

2 PETRUS 3:15

Bole tafa'da tae, Lamatua ka ta hae lai namanasa ita ndia nde bee na, Ana fe ita fai loak soaneu ita tuka tei-sale dale, fo daenga ita hapu so'da ka. Paulus, fo ita tolanoo susue na, ana sulak fe emi susulak nae leondia boe. Manetualain fen dudu'a-aafi manatee tenok, de ana sulak susulak ndia.

NINITAK 21:14

Tembo kota ndia nananafofo'ak nai batu netes sanahulu dua lain. Nai batu netes sila la lain, nanasulak Bi'ilopo Ana ndia hataholi nadedenu kasanahulu dua nala na'de nala.

NINITAK 21:19

Kota ndia batu nete nala nanapainotek ninik batu poemata mata-matak lala'ena. Batu netes makasososa ka, nanataok neme batu baiduri, kadua neme batu nilam, katelu neme batu yakut, ka ha neme batu zamrud,