1 KORINTUS 1:8 - Susula Malalaok Hehelu Palak Ma Hehelu Beuk

⁸ Neukose Kristus nde nanea matan emi losa mate'e na; fo ela nai lelek Ana falima'in te, Ana ta hapu na emi masala-masingok fa.

1 KORINTUS 1:8 ပူးပေါင်းရင်းမြစ်များ

MAZMUR 37:17

Nana neukose, Manetualain helu la'di hataholi mangalauk-ka, koasan-na, tehu nasulu-nahapa hataholi malole-a.

MAZMUR 37:28

Nana Manetualain sue-lai tatao-nono'ik fo malole, ma ndoos ma matetuk-ka, hataholi fo, ana lilineka neun-na, Ana ta po'ilotak-kana doi-doso fa. Ana nasulu-nahapas losa dodoon-na, tehu hataholi mangalauk-ka tititi-nonosin, neukose nanatao namopo-namatek.

LUKAS 17:24

Sama na leo ndela sa nandela nai lalai, fo nasa'a neme pedak leo pedak neu soona, mahani te Ana Hataholi ka heheo-hihilun nai fai mamai na leondiak boe.

LUKAS 17:30

Mahani te heheo-hihilun leondiak, nai lelek Ana Hataholi ka nananatu'duk.

ROMA 14:4

See emi ia, de nalosa emi muse maketu-mala'di hataholi fe'ek ata na? Fafa'kama ata ndia tu'u do fo'a boeo, ata ndia tua na ito-aton ndia. Ma memak ata ndia neukose napadeik natetu, nanahu Lamatua ka nabe'i fen napadeik natetu.

ROMA 16:25

Kokoa-kikiok neu Manetualain! Nanuu koasa fo natetea-nahehele emi namahehele ma, nandaa no Manetualain Hala Malolen fo au tui-bengan la'eneu Yesus Kristus. Au tui-benga halak ndia nandaa no hata fo Manetualain nafa'da ka: fo nde la'eneu Manetualain dale tutu'un fo teu netek eli la, hataholi a beita bubulu kana fa.

ROMA 8:19

Basa daebafa ka lala'ena lahiik lanseli fai na losa leona, fo Manetualain natu'du ana nala nde see.

1 KORINTUS 3:13

Hataholi a esa-esak ue osan neukose nananitak nai faik fo Kristus fafali ma'i na. Nana neu faik ndia te, neukose ha'i nde tao na hataholi a esa-esak ue osan nananitak. Neukose ha'i nde fola ma naketu ue osak sila matea-mahelen.

1 KORINTUS 5:5

emi muse fe hataholi ndia leo Nitu neu, fo ela hataholi ndia ao paa na nakalulutuk, fo no enok ndia, dula dale na hapu so'dak, nai lelek fo Lamatua ka fali ma'in.

2 KORINTUS 1:13

Fo ami sulak fen neu emi a nde bee na, ka'da la'eneu dede'a-dede'ak fo emi hapu lees ma malela kana. Besak ia, emi ta malelak ami no matetu na fa, tehu au amahena mahani te neukose te'e-te'e emi malelak ami. No enok ndia, mahani te neu lelek Lamatuak Yesus fai mamai na te, neukose emi dale ma namatua neu ami, sama leo ami boeo dale ma namatua neu emi.

2 KORINTUS 1:21

Manetualain mesa kana nde tao na ami ma emi tatea-tahele da'di esa to Kristus. Ndia boeo nde hele heheli ita soaneu aoina na.

EFESUS 5:27

No enok ndia, Kristus tao na hataholi kamahehelek sila, lapadeik no matua-mademan ma matetu-mandaak nai mata na, fo ta hapu bu'u-ba'ek do bu'u-ba'e esa boen.

FILIPI 1:10

No enok ndia, emi hele malelak bee ka nde malole, ma emi so'da ma balisi neme sala-singo ka mai do neme kalaak bee ka mai boe, nai Faik fo Kristus fali ma'i na.

FILIPI 1:6

Manetualain nde mulai tatao-nono'i malole ndia, neu emi a, de au amahele, neukose Ana tao-no'i nakandoo tatao-nono'ik ndia, losa nakababasa kana nai Kristus Yesus Fai fafali ma'i na.

KOLOSE 1:22

Tehu besak ia no Manetualain Ana na mamate na de Manetualain tao na emi tututi nanatom mon ana, malole falik. No enok ndia, emi hapu masasale matak mo Manetualain no heheo-hihilu malalaok, matetu mandaak ma sala-singo tak.

KOLOSE 2:7

ma mahuu-maoka nai Kristus dalek. Ela leo bee na emi mapadedeik emi maso'da ma neu netes esa lain, fo nde Kristus. Ela leo bee na emi boetai mamahele Kristus, tunga hata fo lanoli basan neu emi a so. Boema ela leo bee na, emi mamahoko ma moke makasi ba'u ka neu Manetualain.

1 TESALONIKA 3:13

No enok ndia, neukose Lamatua ka natetea-nahehele emi dale ma, fo emi da'di malalaok, ma emi ta masala-masingo nai ita Aman Manetualain matan, nai lelek fo ita Lamatuan Yesus, Ana mai no basa hata fo ana da'di Ndia nuu nala.

1 TESALONIKA 5:2

Nana emi bubuluk basan no mangale'dok, Lamatua ka fai mamain ndia, sama na leo nakodaa ana mai nai fai le'odae na.

2 TESALONIKA 2:2

boso no lai-laik, emi mapangamak do emi susa, nana emi mamanene hala tutui ka nae, Lamatuak Yesus fai mamai na, ana losa so. Nana fafakama tutuik ndia, ana da'di neme nabi la lafa'da ela dede'ak ndia, do fafakama ana da'di neme nanolik esa mai; do bole da'di, hataholi nggelok lafa'da lae, ami sulak hai dede'ak ndia, nai ami susulam nggelok dalek so.

2 TESALONIKA 3:3

Tehu Lamatua ka, mana lilinekak. Neukose natetea-nahehele emi, ma nasulu-nahapa emi neme Hataholi Mangalauk ndia mai.

2 TIMOTIUS 1:12

Hu ndia de, au lu'a-lepa basa doidosok ia la, tehu au amahele ahele, nanahu au bubuluk te'e-te'e, see hataholi fo au amahelek ndia. Au amahele, hata fo Ana fe basan neu au ndia, nanea nabe'in, losa Fai Mate'e ka.

2 TIMOTIUS 1:18

Boema o bubuluk basa, ana tulu-fali au ba'u ka nanseli neme Efesus so. Ela leo bee na, Lamatua ka natu'du susue-lalain neu Onesiforus, nai faik fo Lamatua ka naketu-nala'di basa hataholi daebafa ka lala'ena.

1 PETRUS 5:10

Tehu emi doidoso basa hatematak esa soona, neukose Manetualain tao na emi da'di matetu-mandaak. Neukose Ana fe emi mapadeik metetu, ma natetea-nahehele emi. Nanahu Ndia nde bee na, Manetualain fo dale susue na, ba'u na seli. Fo nalo basa emi, soaneu emi mame'da mita matua-mademan fo, mana ketu basa ta ka, tunga Kristus.

2 PETRUS 3:10

Tehu Lamatua ka Fai mamai na, neukose ana losa, sama leo nako ka. Nai faik ndia te, neukose lalai a mopo kana, no manggulu matua ina, ana da'di nai lalai, ma basa hata manai lalai a, neukose putu la'i esa kasa, boema daebafa ka no basa oe isin lala'e na, neukose mopo la'i esa kasa.

2 PETRUS 3:14

Hu ndia, tolanoo susue-lalai ngala lemin! Nai lelek fo emi mahani Faik ndia, emi muse sanga enok te'e-te'e, fo emi so'da ma malalaok ma sala-singo tak nai Manetualain matan, Boema makaboboi emi tututi-nanatom no Manetualai na fo, malole nahele.