Hébreux 9:14 - New Testament in Mitsogo

¹⁴ Okô mbe nzina yanyama dimaba na ngudi nane, tambô tasani ngudi diôtéani dindé gô nzina yaJésus‐Christ. Amaadeekeda amuene ôgondoku agébé n’oési. Nzina yedi digôgéda mianga miamitéma miasô n’anyô gômbe mikebanganô na ésima ébévani ésangamana ngudi yasô. Na vane tôngaba na ngudi gôéyanzéa Nzambé Kumu amonyo.

Hébreux 9:14 ပူးပေါင်းရင်းမြစ်များ

Matthieu 12:28

Me nanôbeenda mbe nakuséda édidi ébévani te gô ngudi yaGédidi SaNzambé. Tambô kôngédani mbe ôkumu aNzambé ômasuma na gôndé anye.

Matthieu 16:16

Simon Pierre amamôaabéa mbe: Ewe te Christ, ône amatômu na Nzambé. Ewe te Muana ANzambé, angô Kumu amonyo.

Matthieu 20:28

Béyé me Muana Amôma, vamaviga me tsivutéé mogo mami gôétôma oma. Ivô namatôma na namabanda na mogo mami. Nameetsa memuene monyo ami ngu na g’ôwa, te môvanô gôéoboo oma ayekani.

Matthieu 7:11

Buéyé anye oma abévani, nômenya éétsa ananyô yôma éamisôba ?tambô na Tétanyô ône andé g’ôba, asangootéa éétsa anye yôma éamisôba gôndé anye nômôdukani‐a?

LUC TSANGO EAMOSOBA EMATENDA 1:74

Mabégôme te mbe tôkusédu gô tsina angudi yavingi asô n’anyô. Te mbe tôngayanzéa Nzambé gébé na gomo amôma.

LUC TSANGO EAMOSOBA EMATENDA 12:24

Bononi nyoyi diveea gô ngongo. Nyoeye dine disagaaba tsaga, na disakuéga migônô. Disakata môyakô gô papa na disasuéga môyakô gô gétada. Ivô Nzambé abôngôa nyoeye dine. ?N’anye, na nyoeye, ône ootéa na tsoongo va mbene aNzambé indaa? Te anye oma.

LUC TSANGO EAMOSOBA EMATENDA 12:28

Nzambé aatéda éétété na mabunza magô pindi gô mônongo waô ônyepani, na éangô éndé éapitsi épo. Mene éngabéku gô soto. Tambô gôndé anye oma ?Nzambé asangootéa éaatéda anye éamisôba-a? Gô mane moongôa Nzambé éyanza, paga yanyô dipo.

LUC TSANGO EAMOSOBA EMATENDA 4:18

Gédidi SaKumu Nzambé géndéké gôndé me. Amasevôa me gôétsua Tsangône yedi Eamôsôba na gôndé misuga. Amatôma me gôédôngéda mitéma mindé gô panda. Amatôma me gôénigôa géobogeo sedi na gôndé asi tsôgôô. Amatôma me gôépôéda miso masi pogu, ôbiia. Amatôma me gôénzeegeda ane andé gô tsina otômu akumu édagani.

Jean 3:34

One amatômu na Nzambé avovo te mane maNzambé gôébégô Nzambé, ône asaba na guma eetsa oma Gédidi sedi gésaba n’okana.

Mayanzame 1:2

ngu na nyee ômatômbu angô na Nzambé na g’ôba. N’egébataka na g’ôba, Jésus te amamana éétsa mitômamie na ndongiye gôndé aneengi edi, ane amasevou na amatômu na amuene Jésus. Amavovo n’ahngô te gô ngudi yaGédidi SaNzambé.

Mayanzame 10:38

Nômookô gamakudéga Nzambé Gédidi Sedi na gôndé Jésus môsi Nazareth, gôémôétsa ényanga. Nôsabômu gamakénga Jésus gô tsengene nyetso. Amayanza mabégô manyônganéôni. Na amadôngéda ane amadigaa gô tsina otômu ayabédé. Gôébégô Nzambé asiaaganéké n’edi.

Mayanzame 14:15

Akasô, oma n’asô ?Nayee nôéndéa we nane? We abaé tôndé oma gandé anye. We tônôtsuéa Tsangô Eamôsôba éaJésus-Christ. Tônôtévéda mbe aaganani na mbumbaye yanyô disaba na tsoongo. Géngôgani na gôndé Nzambé, Kumu amonyo. Angô amakana tsina n’oba na mubu na éetso éndé wangô.

Mayanzame 15:9

Nzambé asatatôa Ajuif n’ane asaba Ajuif. Amagôgéda mitéma miaô gômeetsahngô Jésus miangô gébé na paga.

Romains 1:20

Menyani mbe ngudi yaNzambé, dine disaba n’ebandô na disaba n’ekôdéô, na étsimama éedi éetso ésienanô va mbeego. Ivô bandôa vamakana Nzambé tsinane, ngudiye n’etsimamee éedi émeenanô gô mane mamayanza angô. Te gô éne mbe oma angoongôa émenya angô. Nzambé Kana. T’ebandô môma asaba na mitayi gôévovo mbe: ?Nzambé andé gôni? Me tsamôena.

Romains 1:4

Ivô gôndé Gédidi SaNzambé, tétedi te Nzambé. Vamakundugangô va gatse ane amawani, ngudi yaTétedi dimatubéda mbe Jésus te Muana ANzambé.

Romains 11:12

Gékôbage sAjuif gémakoga géka ébégô éamôsôba gôényepeda édidie éoma muetso. Gômasugédu Ajuif te avo oma amadugu ôkitie gô édidie éaô. Okô mbe gô gékôba sAjuif avo amanyepedu, tambô na gô géobogeo sAjuif éngootéa ényepa.

Romains 11:24

Anye nôsibôtu gô éongo éAjuif, nôndé môtabé ovendo. Na ômakeedu g’ôveendo gôénanégu gô môkuba osagu. Nôsibôtu g’ôsagu. Géé Ajuif te ane amabôtu g’ôsagu. Vamakeedu ahngô gakeedu môtabé, ésangadaga gôénikéa énanéga ahngô gô étungue éaô.

Romains 6:13

Nômbiadeekeda éeme éayôtô yanyô gôéyanza mabégô mabévani. Kabaga kumu éebéva ayanza na éangô gô mane medi mabévani. Ivô deekedani anyene na gôndé Nzambé, anye nômakunduga g’ôwa gôéba n’edi monyovo. Itsani anyene gôéyanzéa Nzambé gômbe amuene angayanza na éeme éanyô éne ényôngéô angô.

Romains 6:22

Ivô ndéô nedué nôndé nômoobou gô mabégô mabévani. Na nôndé avéga akôô aJésus gôéyanzéa Nzambé. Tsoongone yanyô te môdigédi ômagôgéani ônyôngéô Nzambé. V’ékôdéôe angô te monyo ôsakôdéakani.

I Corinthiens 15:45

Endé te gatônigôu na Matendeo MaNzambé mbe: Mômane amapanga Adam, amavangô sôma gévégumani. Na Adamene amôyusumédu te Gédidi SaNzambé gétôétsa monyo.

II Corinthiens 5:21

Jésus‐Christ asibaké n’ebéva ivô Nzambé amakoa angô aka môbévi gô ébévee éasô n’anyô. Wa n’anyô dôta tôsibaké n’etsimama ivô Nzambé amakoa we tôka tômatsimamédu gô étsimamee éaJésus.

II Corinthiens 6:16

?Eba ôkumédu Nzambé ôngavamba na mbumba ditoko Nzambé nayee? Gôébégô wa n’anyô tôndéké eba aNzambé ône ôdôngani. Amuene Nzambé amavovo mbe: Nandé n’ebami, nadigaa va gatse omami. Me te Nzambé éaô, ahngô dôta te anami.

Galatie 2:19

Gôébégô éamigemie mine ékegea te nane. Me namayôhu gôébégô éamiangô buta mbe naba monyovo na Nzambé. Vamakomedu Christ va gésumu sowa te na me muetso.

Ephésiens 2:5

Vamabaka édidi éasô n’anyô égébaka gô évitsi éowa gôébégô éamabégô masô n’anyô mabévani, Nzambé gô étondo éedi amakundua we gôéba deo noo monyovo na Christ. Tômoobou te gô ngeba ditôenanô na Nzambé.

Ephésiens 5:2

Gononi ga étondoe émabaka na Christ, éne émanyôngéô angô wa n’anyô. Gô étondoe éedi ameetsa monyo edi gôéyôu ôgondoku gôndé wa n’anyô. Gabutima môtutue ogondoku ôyôani, te gabutima na va mbene aNzambé mbônga éamôsôba éetondo éaChrist na ôwedi. Na amuene anyôngéô.

1 Thessaloniciens 1:9

Muetso anigôana gamakeneanye we vamatsiga we na gôndé anye. Anigôa gamaviianye mbumbaye ngima gôégéngôga na gôndé Nzambé mbe nômôyanzéa, angô Nzambé apie Kumu amonyo.

I Timothée 1:17

Tôkumédéni, na tôneegedeni gédundé Kumu asô n’anyô amôbô na môbô, ône amawani, na aseenanôni, angô Nzambé ésaba na gégoni. Amen.

I Timothée 3:15

Eébéyée nane, ôkô nadingi éviga na gôndé éwe, gésangô gegé génganigôa éwe gatôdigaa wa n’anyô asi ebee ôtômu na Nzambé. Ebee ôtômu na Nzambé te mbumu éedi, angô Kumu amonya. Angô te éengô, môsipédine amabégô mapie.

Tite 2:14

Amaadeekeda amuene gôéwa gôndé wa n’anyô, gôéyuua we gô mabégô metso mabévani na gôégôgéda we mbe tôngaba omedi, asi évambevo n’edi. Na mbe tôngaba na gényônga na môvinéné gôéénda mane mamisôba.

Hébreux 1:3

Jésus te gévede gévôni gétanédu n’obébayi ôtubéda ôndômba aNzambé. Gandéké Nzambé, te gandé Muanedi. Asumbéda tsina n’oba n’ogie wedi angudi. Vamamana angô égôgéda oma gô ébévee éaô amadigaa g’ôba gô géeyo gémôgôô te gésa senyanga éaNzambé, Kumu angudi yetso.

Hébreux 10:10

Gôébégô Jésus‐Christ amadugéda éne émanyôngéô Nzambé. Wa n’anyô tôgôgédu mabégô metso mabévani g’ôgondokue ômadeekedangô, te ôtô edi amuene kukepo gôndé muetso.

Hébreux 10:12

Géé amuene Christ amadeekeda ôgondoku ôvo amôbô na môbô, gôénôtôa môma ébévee éedi. Vamamanangô éadeekeda amadigaa gô géeyo gémôgôô saNzambé.

Hébreux 10:2

Ane amaneegeda Nzambé gô mônongo ône, mbe amagôgéduku kukepo gô ébévee éaô ahngô mbe ahsiniké éyanza ébégô ébévani ta n’evo, na mbe asiômbé édeekeda ôgondokue.

Hébreux 10:22

Tambô tôweséni na gôndé Nzambé na mitéma miamavôma. Na tômôétsa mitéma gébé na paga gô mabégô medi metso. Buedi mbe mitéma miasô n’anyô mibaké mimagôgéani kabaga mianga miamitéma miasô mibéva. Na buéyé na yôtô yasô n’anyô diôvôu na meba masaba na mbugé na tsengesenge.

Hébreux 11:21

Jacob ameetsa Nzambé môtémedi wetso gébé na paga. Amakuméda Nzambé na ameetsa mate gôndé anamôgôô amuanedi Joseph. Te vamabaka Jacob aka gôéwa na amasipa gô môtungee wedi.

Hébreux 13:12

T’ebandô amuene Jésus amawa gô kôbangô amôsenge. Te gôégôgéda oma gô ngudi yanzina yedi.

Hébreux 3:12

Me, môtendine agésangôge egé, nanôevéda mbe: Wemani mitéma mianyô, anye ana aTéta agô mbumu éaNzambé. Kabaga mine mianyô dôta midenganô n’ebéva na paga gôénôtongéda gôdagôda na Nzambé, Kumu amonyo.

Hébreux 6:1

Mabégô mamapanga mameekédu môma mokumu aNzambé tômanéni mangô gôéwesea na gô mavo. Tôtsôpéni mane magô mbene. Môsaayi eba asangoonôa édigaa g’ôbôga ôtévo. Na wa n’anyô te mônongovo. Tômani ésiga ôbôgee, angô te meekédume mamapanga. Na mangô te mbe môma asangoongôa ényepeda amuene gôékoa môtémedi gôéba wene mônongo. Na mbe môma eetsa Nzambé môtémedi wetso gétsumé angô paga.

Hébreux 7:16

One amôbaé aseengédu gô ngudi yamôma gô éyanzee éamôdeekedi adigondoku na éamôsungéyi oma. Ameengédu gô éyanzee éne gô ngudi yamonyo amôbô na môbô.

Hébreux 7:27

Jésus asagono na adeekedi adigondoku ambeego. Asadeekeda pitsi yetso ôgondoku gô mabégô mabévani maamuene na gô mabégô mabévani moma muetso gameenda akedi va mbeego. Amadeekeda Nzambé ôgondoku ôvôni te kukepo. Ogondokue ône te ôtôe aamuene Jésus.

Hébreux 9:12

Christ ône amasevou na Nzambé ameengéa kukepo gôndé muetso gô tungu ééndô mbe, tsongo éadisambô édigaa Nzambé. Asiingéé na nzina yataba vo dine yapagasa gôédeekeda Nzambé yangô. Ameengéa gôédeekeda nzinaye yedi amuene gôétôoboo môbô na môbô.

Hébreux 9:26

Mbe émabaka nane, Christ mbe ameengéa kuka diyekani bandôa gômakanô tsina n’oba. Menyani mbe, vamawesea ndéône mbe tsengene émabungana, Christ amatsiga kukepo gôndé muetso gôéadeekeda amuene ôgondoku gôébusua ébévee éoma muetso.

Hébreux 9:7

Ivô gô eba amôbaé ava ngenge gômeengéa te pene adeekedi adigondoku amuene. Ameengéa gô môpumovo kukepo. Ameengéa gône amatsua nzina yanyama gôédeekeda yangô na gôndé Nzambé. Amaduka kokoo gô mabégô mabévani maamuene, na mane moma muetso mamayanzahngô g’ôdungé.

Hébreux 9:9

Dine te ndongi ditôongu deo noo. Ndongiye te mbe, dibiia diitsa môma na gôndé Nzambé na dôta nzina yanyama dideekedu na gôndé Nzambé disaba na ngudi yeôvôa môtémee wetso amôma, ône abuta éneegeda Nzambé gô gésôgage géne.

I Pierre 1:19

Ivô anye nômoobou n’osunu ôvôni anzina yaChrist. Andé ga éndombo ésaba éagékonzo na ésaba n’evisô.

I Pierre 2:22

Angô asiindé ta n’ebévani évo. Gô mônyedi gôsikusé ébégô éoboe ta n’evo.

I Pierre 2:24

Angô amatsua ébévee éasô n’anyô g’ôtô edi va gésumu sowa gômbe tôngagono na nzumbi géyanzédô mabévani. Ivô tôngaba na monyo gôéyanza étsimama. Gô ngudi yapôta yedi, anye nômadôngédu.

I Pierre 3:18

Christ amuene amawa ôwa ôvo gô ébévee éetso. Angô môma amatsimamani amawa gôndé oma abévani. Oweedi ôbuéda wa n’anyô na gôndé Nzambé. Oma amayôha angô g’ôtô. Nzambé amakundua angô gô ngudi yaGédidi sedi.

I Pierre 4:2

Bandôa deo noo môma nône asadigaa gô manyima mamôtéma ômabôtu na ôtô amôma. Ivô gô ndéône égébakangô va tsina adigaa ganyôngéô Nzambé.

I Jean 1:7

Okô tôndé gô gévede, gandé amuene Nzambé andé gô gévede, vane tôndé na vitoo wéene na wéene. Na nzina yaJésus, Muana ANzambé ditôgôgédaka ébévee éetso.

I Jean 3:5

Nôsabômu mbe Jésus‐Christ amaviga gôénôtôa gôndé môma na môma ébévee éedi. Gôndé angô Jésus, gôsaba ébégô ébévani ta n’evo.

Gétsutsuéô 1:5

Nôédiia dôta te gôndé Jésus‐Christ. Angô mbangi éaNzambé ésapatakani. Angô Jésus te Muana ANzambé amapanga ébôtuni. Na angô amapanga ékunduga g’ôwa andé na monyo amôbô na môbô. Jésus te Kumu akumu yetso ditôma va tsina. Angô atônyôngéô. Amawa gôétôoboo gô ébévee éasô n’anyô.