Yoshua 1:5 - MUKANDA WA MYIDI MUKULU

⁵ Matuku onsu autshidi panu ne muoyi aa, muntu kena mua kukupita bukole to. Meme nengikale nebe, bu mumvua ne Moshe. Kashidi tshiendelele tshiena nkulekela. Nenkuambuluishe misangu yonsu.

Mukanda wa Nzambi Dihungila Dikulukulu ne Dihungila Dihia-dihia 2003

⁵ Kakuena muntu udi mua kuimana ku mpala kuebe tô matuku onso autshidi ne muoyo; nengikale nʼebe bu munakadi ne Mose; tshiena ukulekela, tshiena nkushiya nkayebe.

Yoshua 1:5 ပူးပေါင်းရင်းမြစ်များ

Genese 39:2

Maweja-Nangila uvua ne Yozefe, umututshisha diakalenga. Yozefe kusomba ku nzubu kua mfumuende, muena Ejipitu.

1 Bakalenga 1:37

Alame Shelomu bu nuwuaye mukulame wewe. Atumbishe bukalenga bua Shelomu, buikale ne lumu bupite buebe wewe Davide!

1 Bakalenga 11:38

Wewe muteleje bionsu bingikala nkuambila, wewe mulonde njila ungikala nkuleja, wewe mungenzele bimpe, wewe mutumikile meyi anyi ne mikenji yanyi bingakupesha, bu muvua muntu wanyi Davide utumikila, nengikale nebe kashidi. Ndi nkulaya ne: ndelanganyi yebe neishale mu bukalenga kashidi anu bu mudi ndelanganyi ya Davide ishala mu bukalenga. Meme nenkupe bisamba bia bena Izrayele dikumi,

1 Bakalenga 6:13

Meme nensombe mu nzubu ewu munkatshi mua bantu banyi bena Izrayele kashidi. Tshiena mua kubalekela to.

1 Bakalenga 8:57

Mpindiewu, ndi ndomba Maweja-Nangila Mvidi Mukulu wetu, bua ikale netu bu nuwuaye ne bankambua betu. Maweja-Nangila, kutulekedi to. Ikale anu utuambuluisha.

1 Kulondolola 28:20

Pashishe Davide kuamba kabidi ne: — Muananyi, kolesha muoyi, utantamane. Tuadija mudimu ewu. Kutshinyi, kuzakadi! Maweja-Nangila Mvidi Mukulu wanyi kena ukulekela to. Udi nebe, ubambuluisha too ne muwajikija mudimu ewu wa nzubu wende.

Misambu 46:11

Udi wamba ne: “Lekelayi mvita! Numanye ne: Meme ke Mvidi Mukulu: Ndi ku mutu kua bisamba ne kua buloba bujima!”

Ekesode 3:12

Mvidi Mukulu kumuandamuna ne: — Meme ndi nebe. Ndi nkupa tshimanyinu tshidi tshileja ne: Meme ke udi mukutume. Wewe mumane kupatula bena Izrayele mu ditunga dia Ejipitu, nenuntendelele pa mukuna wa Sinayi ewu.

Yeshaya 42:16

Kadi nendudike bantu banyi, batshivua bashale bampofu, mu njila udibu katshia kabayi bayile. Nenkudimune miidima, yenze munya, bua bantu bende bimpe. Ndi ndandakaja miaba idi biina. Ke bindi musue kuenza. Nembikumbaje, tshiyi ndekela.

Yirmeya 1:8

Kutshinyi bantu aba to, bualu ndi nebe bua kukusungidila. Ke bivua Maweja-Nangila mungambile.

Danyele 11:16

Kadi udi ufika, ubuela mu ditunga, neenze mudiye musue. Bualu kakuakuikala muntu udi mua kumutuila nkanana. Pajikijaye kubutula miaba yonsu idiye upitshila, neabanze mu ditunga didi dipite buimpe.

Matayi 28:20

Nubalongesha kabidi mua kukumbaja bionsu bimvua munuambile. Manyayi ne: Meme nengikale nenu matuku onsu, too ne ku ndekelu kua bidimu.

Rome 8:31

Tshituambe kabidi ntshinyi? Padi Mvidi Mukulu mutue ku tshietu, udi mua kubibenga kabidi nnganyi?

Rome 8:37

Kadi bionsu abi tudi mua kubitshimuna kashidi ku bukole bua uvua mutuleje mudiye utunanga.

Dielulula 20:1

Nuenu baye kuluangana mvita ne bantu badi ne tubalu, kabidi ne matempu a mvita, nansha ne baluishi bapite bena mvita benu ku bungi, kanubatshinyi to. Bualu Maweja-Nangila Mvidi Mukulu wenu, uvua munupatule mu Ejipitu, udi munkathi muenu.

Dielulula 20:4

Maweja-Nangila Mvidi Mukulu wenu udi nenu. Neanuluile mvita ayi, bua nuenu kubatshimuna!”

Dielulula 31:23

Pashishe Maweja-Nangila kukolesha Yoshuwa, muana wa Nune, ku muoyi, umuambila ne: “Kutshinyi, kuzakadi. Wewe neufikishe bena Izrayele mu ditunga dia Kenaane dimvua mubalaye. Meme nengikale nebe.”

Dielulula 4:31

Nanku bumudi Maweja-Nangila Mvidi Mukulu wenu ununanga, kakunulekela, kakunubutula to. Neavuluke ndondu uvuaye mutue ne bankambua benu.

Dielulula 7:24

Maweja-Nangila neafile bakalenga babu kunudi. Nenubabutule bonsu, kabayi babavuluke kabidi pa buloba. Muntu nansha umue kakunutuila nkanana. Nebabutuke bonsu.

2 Timote 4:17

Kadi Mfumu uvua pabuipi nanyi. Uvua munkoleshe mu maboku, bua mmone mua kukobola Lumu lua Disanka amu mudilu, kulumvuija bantu bonsu ba bisamba bikuabu. Mvidi Mukulu mmumpandishe mukana mua nyama wa ntambue.

Ebrewu 13:5

Mu nsombelu wenu, kanuikadi ne lukuka lua biuma. Nusanke ne binudi nabi, bualu Mvidi Mukulu mmuambe ne: “Tshiena nkulekela, tshiena nkushiya nkayebe nansha kakese.”

Yoshua 1:17

Netutumikile diyi diebe menemene, bu mutuvua tutumikila dia Moshe. Maweja-Nangila Mvidi Mukulu webe neikale nebe bulelela, bu muvuaye ne Moshe.

Yoshua 1:9

Ndi mumane kukuambila ne: kolesha muoyi, kutshinyi, kuzakadi, kutekeshi mu maboku. Bualu meme, Maweja-Nangila Mvidi Mukulu webe, nengikale nebe konsu kuudi uya.

Yoshua 10:8

Maweja-Nangila kuambila Yoshuwa ne: — Kubatshinyi to. Ndi mbafila kuudi. Muntu nansha umue kakukupita bukole to.

Yoshua 21:44

Maweja-Nangila kubapesha ditalala ku mikalu yabu yonsu, bu muvuaye mumane kulaya bankambua babu. Bobu kutshimuna baluishi babu bonsu ku bukole bua Maweja-Nangila. Kakuvua muntu nansha umue uvua mua kupita bena Izrayele ku bukole to.

Yoshua 3:7

Maweja-Nangila kuambila Yoshuwa ne: — Biangatshile ku lelu, ndi njadika bumfumu buebe ku mesu kua bena Izrayele bonsu. Nebamanye ne: ndi nebe, bu mumvua ne Moshe.

Yoshua 6:27

Maweja-Nangila uvua ne Yoshuwa. Lumu lua Yoshuwa luvua lutangalaka ditunga dijima.

Balombodi 2:18

Misangu yonsu ivua Maweja-Nangila utumina bena Izrayele mulombodi, Maweja-Nangila nkayende uvua ku luseke lua mulombodi awu. Nanku Maweja-Nangila ke uvua usungidila bena Izrayele mu bianza bia baluishi, matuku onsu avua mulombodi awu ne muoyi. Maweja-Nangila uvua ufuila bena Izrayele luse, pavua-bu badila, banyingalala bua mushindu uvuabu babakengesha kudi baluishi babu.

Balombodi 6:16

Ke Maweja-Nangila kumuambila ne: — Nengikale nebe. Nanku neushipe bena Madiyane, bu bikale amu muntu umue.

1 Samuele 10:7

Pikala bionsu ebi bienzeka, wewe neujadike bulelela ne: Mvidi Mukulu udi nanyi. Nanku, biangatshile tshikondu atshi, wikale wenza bionsu biudi mumone ne: mbikumbane.