Tite 3:5 - MUKANDA WA MYIDI MUKULU

⁵ ke Yeye kusungidila, ki mbua midimu mimpe ituvua benze, kadi anu bua luse luende. Uvua mutusungidile, bualu bavua bafume mu mayi, batulele tshiakabidi, batupeshe muoyi mupiamupia kudi Mueyelu wa Tshijila.

Mukanda wa Nzambi Dihungila Dikulukulu ne Dihungila Dihia-dihia 2003

⁵ kembua midimu ya mu buakane ituakenza nkayetu, kadi bu mudi luse luandi wakatusungila, bualu bua diuvua dia kuedibua kua tshiakabidi ne bua mitshima mihia-mihia yakatuhabo kudi Nyuma Muimpe,

Tite 3:5 ပူးပေါင်းရင်းမြစ်များ

Yobe 15:14

Muntu udi udiamba ne tshiena ne mikiya anyi? Udi mua kuamba ne tshiena ne bualu nnganyi?

Yobe 25:4

Muntu udi mua kubinga kumpala kua Mvidi Mukulu anyi? Muntu wa pa buloba udi mua kuikala muakane kumpala kua Mvidi Mukulu anyi?

Yobe 9:20

Nansha meme mubinge, neampishe, nansha meme mulumbulule bishi ne bishi, neamfundile tshibawu, tshiyi ne bualu.

Misambu 130:7

Bena Izrayele, Tekemenayi Maweja-Nangila, bualu udi muimpe, udi mua kunusungidila mishindu yonsu.

Misambu 143:2

Ndi muena mudimu webe, kungashi tshilumbu, bualu kakuena muntu muakane ku mesu ebe.

Misambu 51:10

Ungambile muudi mumfuile luse, bua ngende kabidi ne musangelu. Nansha wewe mumane kunzaza, nensanguluke.

Misambu 62:12

Misangu mivule nkadi mumvue diyi dia Mvidi Mukulu, diamba ne: “Bukole buonsu budi amu kundi.”

Misambu 86:15

Kadi wewe, Maweja-Nangila, Mvidi Mukulu udi ufuila bantu luse, wa lutulu, muwule tente ne buimpe, ulama malaya ebe,

Misambu 86:5

Maweja-Nangila wewe udi muakane, udi ne muoyi wa kufuila bantu luse, ne wa kupesha badi bakubikila bintu.

Yeshaya 57:12

Kadi meme nensokoluele bantu bubi bua bionsu biudi muenze. Mvidie yebe ayi kayakukupetesha kantu nansha kamue.

Yezekiyele 36:25

Nennupumuine mayi matoke pambidi penu bua kunumusha mikiya. Eyowa, nennumushe bubi buenu buonsu, ne bukoya bunuvua bapete pa kutendelela mvidie mikuabu.

Mika 7:18

Kakuena mvidie nansha umue, udi mukufuane wewe Maweja-Nangila. Udi ufuila bantu bebe badi bashala ne muoyi luse, kuyi musue kuvuluka kashidi bilema biabu. Kuena ulama tshiji matuku onsu. Disanka diebe didi amu dia kutunanga, kutuenzela bimpe.

Matayi 3:11

Meme ndi nnutua mu mayi bua nukudimune nsombelu wenu. Kadi udi undonda panyima, neanutue mu Mueyelu wa Tshijila ne mu kapia. Yeye udi ne bukole, mumpite meme. Meme tshiena mukumbane nansha bua kumukopola bisabata biende.

Luke 1:50

Ku ndelanganyi ne ndelanganyi muoyi wende mulenga udi kudi bonsu badi bamunemeka.

Luke 1:54

Uvua muambuluishe bena Izrayele, bantu bende. Kavua mupue muoyi dinanga divuaye mubanange nadi,

Luke 1:72

Uvua mulaye bua kuenzela bankambua betu bimpe. Kavua mupue muoyi ndondu wa tshijila uvuaye mutue nabu.

Luke 1:78

Bualu Mvidi Mukulu wetu udi wa luse ne wa muoyi mulenga. Neatutumine butoke bua mulu, bufuanangane ne diba didi dipatuka.

Rome 11:14

Bualu ndi ntekemena kujula lubabu kudi bena kuetu, bua nansha bamue ba kudibu bamone mua kupeta lupandu.

Rome 11:6

Uvua mubasungule, bualu uvua mubanange. Kavua mubasungule bua midimu ivuabu benze nansha. Tshianana, luse luende kaluvua luse menemene to.

Rome 12:2

Kanulondi bidi bena panu benza. Kadi nuanyishe bua Mvidi Mukulu ashintulule meji enu onsu, bua nuikale bantu bapiabapia. Nenku nenujingulule bidi Mvidi Mukulu musue, bidi bimpe, bimulengelela, bidi biakane tshishiki.

Rome 3:20

Kakuena muntu udi mua kubinga ku mesu kua Mvidi Mukulu, bualu muntu nansha umue kena ukumbaja bidi mikenji yamba. Mikenji idi yambuluisha amu bantu bua bamanye muyuabu benze malu mabi.

Rome 3:28

Bualu tudi tuitaba ne: Mvidi Mukulu udi ubingisha muntu bualu bua ditaba diende, ki mbua padiye ukumbaja mikenji nansha.

Rome 4:5

Kadi diba didi muntu kayi wenza bualu, utekemena amu kudi Mvidi Mukulu udi ufuila bantu babi luse. Mvidi Mukulu udi umubingisha bua ditaba diende adi.

Rome 9:11

Kadi Rebeka kayi muanji kulela bana bende babidi ba balume, bana kabayi banji kuenza malu mimpe nansha mabi, Mvidi Mukulu ukavua mumane kuambila mamuabu ne: “Mukulu neakuatshile muakunyi mudimu.”

Rome 9:16

Nanku bidi muntu ujinga, nansha bidiye wenza, kabiena ne bualu. Kadi mudi amu Mvidi Mukulu nkayende udi musue kutuila bantu luse.

Rome 9:30

Nenku netuambe bishi? Bantu bavua kabayi bena Yuda, kabayi bakeba kubinga ku mesu kua Mvidi Mukulu, Mvidi Mukulu mmubabingishe kumpala kuende bua ditaba.

1 Korente 6:11

Ke muvua bamue ba kunudi kale. Kadi mbamane kunujimijila mibi yenu, banuenze bantu ba tshijila bua nuikale bantu ba Mvidi Mukulu. Mvidi Mukulu mmumane kunubingisha mu dina dia Mfumu Yezu Kristu, kabidi ku bukole bua Mueyelu wa Mvidi Mukulu wetu.

Ngalate 2:16

Kadi tudi bamanye ne: Mvidi Mukulu udi ubingisha muntu, amu bua padiye witaba Yezu Kristu, ki mbua padiye ulonda mikenji ya Moshe nansha. Ke patuvua bitabe Yezu Kristu, tuetu kabidi bena Yuda, bua Mvidi Mukulu atubingishe bualu bua ditaba dietu mu Kristu, ki mbua patuvua bakumbaje mikenji. Bualu Mvidi Mukulu kakubingisha muntu nansha umue, bua padiye ukumbaja mikenji.

Efeze 2:4

Kadi Mvidi Mukulu udi ne luse lunene, kabidi udi utunanga bikole.

Efeze 4:23

Nuikale bantu bapiabapia. Nupete ne meji mapiamapia.

Efeze 5:26

Uvua muenze nanku bua tshikale Tshisumbu tshia bantu menemene ba Mvidi Mukulu. Uvua mutshisukule, mutshitue mu mayi, muambe muaku.

Dielulula 9:5

Nanku Maweja-Nangila kena unupa ditunga edi bua buakane buenu to. Neipate bantu aba, bualu mbena buenzayi. Udi musue kabidi kukumbaja bionsu bivuaye mulaye bankambua benu, Abrahame, Izake ne Yakobe.

Kolose 3:10

Nuenu kulala muntu mupiamupia, udi udienzulula diba dionsu ku tshimfuanyi tshia Mvidi Mukulu, Mumufuki wende, bua amone mua kumumanya menemene.

2 Timote 1:9

Yeye ke udi mutusungidile, mutubikile bua tuikale bantu bende, kabiyi bua midimu mimpe ituvua benze, kadi amu mukavuaye mumane kubilongolola ku luse luende. Uvua mutupe dipa edi mu Yezu Kristu, kabayi banji kufuka bintu.

Tite 3:4

Kadi pakumueneka muoyi mulenga wa Mvidi Mukulu, Musungidi wetu, ne dinanga diende dia bantu,

Ebrewu 10:22

Nenku tusemenayi kudi Mvidi Mukulu ne muoyi umue, bashindame mu ditaba dietu, bamane kulengeja muoyi wetu ku bilema bionsu bidi kondu ketu ka munda katupisha nabi, bamane kuowesha mubidi wetu ne mayi mimpe.

Ebrewu 4:16

Nenku tusemenayi ne ditekemena dionsu ku nkuasa wa butumbi wa Mvidi Mukulu, muaba udiye utuleja ditunanga diende. Netupeteku dijimija dia mibi. Neatulejeku mudiye utunanga, bua tupete diambuluisha diba dionsu ditudi tudikengela.

Ebrewu 6:6

Kadi nansha biobi nanku, badi bapingana mu nsombelu mubi. Kabena mua kukudimuna nsombelu wabu musangu muibidi. Bualu badi bapopela Muana wa Mvidi Mukulu tshiakabidi pa mutshi mutshiamakane, banyishe bua bamupende patoke.

1 Petro 1:3

Tutumbishayi Mvidi Mukulu, Tatu wa Mfumu wetu Yezu Kristu! Bu mudiye ne luse luvule, mmutupe muoyi mupiamupia pa kubisha Yezu Kristu ku bafue. Ke mutudi mua kutekemena bikole,

1 Petro 2:10

Kale kanuvua bantu ba Mvidi Mukulu. Mpindiewu nudi bantu bende. Kale kanuvua bamanye luse lua Mvidi Mukulu. Kadi mpindiewu nudi balupete.

1 Petro 3:21

Mayi aa adi tshimfuanyi tshia mayi mudibu banutua mpindiewu bua kunusungidila. Kabena batua muntu mu mayi aa, amu bua kumusha manyanu a pambidi. Kadi badi balomba Mvidi Mukulu bua umushe mibi yonsu idi kondu kenu ka munda kanupisha. Padibu banutua mu mayi, Mvidi Mukulu udi unusungidila, bualu Yezu Kristu mmubike ku bafue,