Rome 13:4 - MUKANDA WA MYIDI MUKULU

⁴ Bualu bamfumu badi bakuatshila Mvidi Mukulu mudimu, bua kukusaka ku dienza dia malu mimpe. Kadi paudi wenza malu mabi, wabatshina! Bidi bimpe bua bamfumu bapete bumfumu bua kunyoka bantu. Ke mudibu bakuatshila Mvidi Mukulu mudimu, bua kuleja tshiji tshidiye ulekela badi benza bibi.

Mukanda wa Nzambi Dihungila Dikulukulu ne Dihungila Dihia-dihia 2003

⁴ Bualu bua makokeshi yonso udi muena mudimu wa Nzambi kûdi bua kukuvuishila buimpe. Kadi biwenza bibi, utshine; bua yeye kena utuala muele wa nvita hatuhu. Udi biandi muena mudimu wa Nzambi, udi musombuedi wandi bua kuvuisha tshishi kudi udi wenza bibi.

Rome 13:4 ပူးပေါင်းရင်းမြစ်များ

1 Bakalenga 10:9

Maweja-Nangila Mvidi Mukulu webe atumbe. Uvua mukusungule bua wikale mukalenga wa bena Izrayele! Bualu Maweja-Nangila mmunange bena Izrayele kashidi. Ke padiye mukuteke mukalenga wabu bua kubaludika mu njila wa malu mimpe.

2 Kulondolola 19:6

Kuambilaye bandumbulula abu ne: — Nuenze mudimu wenu bimpe. Kanuena nulumbuluisha mu dina dia bantu to, kadi mu dina dia Maweja-Nangila. Yeye mene neikale nenu panudi nukosa nsambu.

Nsumuinu 16:14

Padi mukalenga ufika munda, udi mua kufikisha muntu ku lufu. Kadi muntu wa lungenyi udi umutuyisha.

Nsumuinu 20:2

Mudibu batshina nyama wa ntambue udi ukungula, ke mudibu ne bua kutshina mukalenga udi mufike munda. Muntu udi ujula tshiji tshia mukalenga udi udikebela njiwu.

Nsumuinu 20:26

Mukalenga wa meji udi utandula benji ba bibi. Udi ubanyoka kayi ubafuila luse to.

Nsumuinu 20:8

Pikala mukalenga musombe ukosa nsambu, udi utandula musangu umue muena dishima.

Yeshaya 1:17

Kadi enzayi malu makane, ambuluishayi bantu bua benzelangane bimpe, nukandike badi bakengesha bantu bakuabu. Vulukayi muana nshiye, bua apete tshidiye ne bua kupeta. Akuilayi mukaji mukamba.”

Yirmeya 5:28

Bena Izrayele badi badiunda bikole, mubidi wabu mmusenene. Kadi badi anu benza malu mabi, kabayi bapungila. Kabena bakosa nsambu pa yoyi, kabena bakuila bana ba nshiya mu bilumbu biabu, bua bamone mua kubinga. Kabena bambuluisha bapele, bua bapete bidibu ne bua kupeta.

Yezekiyele 22:27

Balombodi benu badi bashipangana anu bua kunema, bu mudi nyama ya lonji ishipa nyama, iyipandabipese bipese.

Yezekiyele 25:14

Bantu banyi bena Izrayele nebasombuele bena Edome mu dina dianyi. Bena Izrayele nebabanyoke bikole, mushindu udi tshiji tshianyi tshilomba. Bena Edome nebalonge mudibu ne bua kuntshina. Meme Maweja-Nangila Mvidi Mukulu, ndi njadika bualu abu.”

Mika 3:9

Ndi nnubela nuenu, bamfumu ba ndelanganyi ya Yakobe, ne bakoshi ba nsambu ba bena Izrayele. Nudi nubenga kuenza malu mimpe, nukosa bilumbu bibi.

Rome 12:19

Balunda banyi, kanudisombuedi. Kadi nuanyishe amu bua Mvidi Mukulu aleje bantu tshiji tshiende. Bualu Mukanda wa tshijila udi wamba ne: “Meme Maweja-Nangila, nensombuele. Nembapingajile bubi buvuabu benze.”

Rome 13:6

Ke panudi nufuta bitadi, bualu bena mbulamatadi badi babilambuisha badi bakuatshila Mvidi Mukulu mudimu, bakeba kukumbaja bimpe mudimu wabu ewu.

1 Tesalonike 4:6

Mu bualu ebu, muntu kadingi muntu nende, kamuenzedi bibi. Tukadi bamane kunuambilambila, banubele bikole ne: Mfumu neanyoke badi benza malu a nanku.

Yoshua 20:5

Padi musombuedianganyi ulondakaja uvua mushipangane awu, too ne mu tshimenga tshia kunyemena, bena mu tshimenga kabena mua kufila muntu awu kudi musombuedi to. Bualu uvua mushipangane awu uvua mushipe muntu mu mpukapuka; kabivua bua lukinu to.

Yoshua 20:9

Bimenga ebi bavua babisungula bua bena Izrayele ne benyi badi munkatshi muabu banyemenemu. Nanku pavua muntu ushipangana mu mpukapuka, udi mushipangane awu uvua unyema mumusombuedi anu mushindu ewu. Nanku kabawa mua kushipa muntu awu, kabayi banji kumulumbuluisha kudi bena Izrayele to.

1 Petro 2:14

Nutumikile balombodi bende ba matunga, badiye mufume bua kunyoka badi benza bibi, kabidi bua kutua badi benza bimpe makumbu.