Rome 12:8 - MUKANDA WA MYIDI MUKULU

⁸ Udi ne dipa dia kukolesha bakuabu ku muoyi, abakoleshe. Udi ne dipa dia kupa bakuabu bilenga bidiye nabi, abipeshangane ne kalolu konsu. Udi ulombola, alombole ne muoyi muimpe. Udi wambuluisha bakengi, abambuluishe ne musangelu.

Mukanda wa Nzambi Dihungila Dikulukulu ne Dihungila Dihia-dihia 2003

⁸ Musengeledi alamate kudi disengelela diandi, muntu udi ufila bintu, abifile ne mutshima mulelela; udi ukokesha, akokeshe ne disuminyina; udi ulesha luse, aluleshe ne disanka.

Rome 12:8 ပူးပေါင်းရင်းမြစ်များ

Genese 18:19

Ndi mumusungule bua alongeshe bana bende ne ndelanganyi yende mikenji yanyi, bua babikumbaje bikale bantu bakane. Bobu bakumbaje bionsu ebi, meme Maweja-Nangila nengenzele Abrahame bionsu bindi mumulaye.

Misambu 112:9

Udi upesha bapele bintu tshipapa, Mvidi Mukulu udi umuanyisha matuku onsu. Bukole buende ne butumbi bidi bivulangana.

Misambu 37:21

Muntu mubi udi usomba tshintu, kayi utshipingaja. Kadi muntu muakane udi ne luse, wambuluisha bakuabu.

Nsumuinu 22:9

Muntu udi wenzelangana bimpe, Mvidi Mukulu neamuele lupemba, bualu tshiende tshiakudia udi wabanyangana ne bapele.

Muambi 11:6

Ke paudi mua kukuna dinda too ne dilolu kuyi wikisha. Bualu kuena mumanye kuwapetela tshintu, nansha ku mudimu wa dinda nansha wa dilolu, nansha ku yonsu ibidi.

Muambi 9:10

Ukuate mudimu, usanke ne bionsu biudi mua kupeta. Bualu ku bajangi kuwaya kabena benzaku mudimu, kabena belanganaku meji, kabena bamanya malu, kabena bela meji mene to.

Yeshaya 32:5

Muntu mupote kabakumuangata kabidi ne mushinga to. Muntu wa tshidingidingi kabakumuteka kabidi mulongu wa bantu ba nsongu.

Yeshaya 32:8

Kadi muntu wa kalolu, udi wela meji amu a kalolu, udi ukumbaja kabidi malu a kalolu.

Yeshaya 64:5

Tudi bonsu bantu babi, katuena bakanyine kukukuatshila mudimu. Tudi bu tshintu tshipia mikiya. Nansha mianda mimpe ituvua tuenza, idi kabidi mikuatshike muendi bu tshilamba tshidi ne makeji a mashi. Bualu bua bilema bietu, tudi bu mabeji mume a mutshi, adi lupepele luambula luya nawu.

Matayi 25:40

Mukalenga neabandamune ne: “Ndi nnujadikila bulelela ne: bilenga bionsu binuvua benzele umue wa ku bana betu bakese aba, ke meme unuvua babienzele.”

Bienzedi 11:23

Ufika, kumonaye muvua Mvidi Mukulu mukumbaje mudimu ne dinanga munkatshi mua bena ditaba. Nanku kusankaye, ubabela bonsu bua bananukile ne muoyi mukole, bitabe Mfumu.

Bienzedi 13:12

Mulombodi wa tshidila umona bivua bienzeka abi, kuitabaye. Bivuabu bamulongesha bualu bua Mfumu, bivua bimutua ku muoyi bikole.

Bienzedi 13:15

Bantu bamane kubala mukanda wa Mikenji ne wa Bambi, bamfumu ba nzubu wa kutendelela kubalomba ne: — Bana betu, panuikala ne imue miaku ya kukolesha nayi bantu ku muoyi, nudi mua kuakula mpindiewu.

Bienzedi 15:32

Yuda ne Silase bavua bambi. Nanku kuakulabu mukungulu mule, bua kukolesha bana betu ku muoyi, kubasamba kabidi.

Bienzedi 20:2

Kupitshilaye munkatshi mua ditunga adi, wenda ukolesha bena ditaba ku muoyi ne malongesha mavule. Pashishe kuyaye mu ditunga dia bena Ngreke.

Bienzedi 20:28

Dimukayi! Nudilame bimpe, nulame Tshisumbu tshia mikoku, tshidi Mueyelu wa Tshijila munupe. Nukube Tshisumbu tshia bena ditaba, tshidi Mvidi Mukulu mupete ku lufu lua muanende mulela.

Bienzedi 4:36

Ke muvua muena Levi mukuabu, mulelela mu tshidila tshia Shipre, dina diende Yozefe, uvua bapostolu binyike ne: Bamabase (mmomumue ne: musambianganyi),

Rome 12:13

Ambuluishayi bana benu ne bidibu bakengela. Akidilayi bimpe badi bafika ku nzubu yenu.

Rome 13:6

Ke panudi nufuta bitadi, bualu bena mbulamatadi badi babilambuisha badi bakuatshila Mvidi Mukulu mudimu, bakeba kukumbaja bimpe mudimu wabu ewu.

1 Korente 12:28

Nanku mu Tshisumbu tshia bena ditaba, Mvidi Mukulu mmuteke bonsu pa muaba wabu: bangabanga bapostolu, pashishe bambi, balonda kudi balongeshi; kunyima kudi benji ba malu a dikema, kudi badi ne bukole bua kuondapa babedi, nansha badi bambuluisha bakuabu, nansha badi balombola bantu nabu, ne badi bakula miakulu idi bantu kabayi bamanye.

1 Korente 14:3

Kadi muambi udi wambila bantu malu adi Mvidi Mukulu mumuambile, udi uyukila ne bantu, bua kubakolesha mu ditaba, kubatua nyama ku mikolu, ne kubasamba.

2 Korente 1:12

Tudi mua kuditemba, bualu kondu ken ka munda kadi kanjadikila ne: ndi bende panu, nangananga munkatshi muenu, ne muoyi wa didipuekesha, kanyi ndinga bann, balonde bidi Mvidi Mukulu wenza. Nanku tshivua tshindudika ki mmeji a bann nansha, kadi amu dinanga didi Mvidi Mukulu utunanga nadi.

2 Korente 11:3

Nyoka, uvua mupambule Eva ne budimu buende, ke undi ntshina. Bualu meji enu adi mua kupambuka mu njila, nuenu kulekela kunanga Kristu, kulekela kumuitaba ne muoyi umue.

2 Korente 8:12

Panudi nufila ne muoyi wa kalolu, Mvidi Mukulu neapime binudi nufila bilondeshile binudi nabi; kakubipima bilondeshile binudi kanuyi nabi.

2 Korente 9:11

Diba dionsu neavudije biuma bienu, bua numone mua kuambuluisha bakuabu ne muoyi wa kalolu. Nanku bantu ba bungi nebele Mvidi Mukulu tuasakidila, bua bintu bienu bitudi mua kubapesha.

2 Korente 9:13

Panudi nukumbaja mudimu ewu ne muoyi umue, bantu ba bungi nebatumbishe Mvidi Mukulu bualu buenu. Nebanuele tuasakidila, bua panudi nuitaba Lumu lua Disanka lua Kristu muenu muonsu, kabidi bua muoyi wa kalolu unudi nuabanyangana nabu, kabidi ne bantu bakuabu bonsu, bintu bienu.

2 Korente 9:7

Muntu yonsu afile mudiye muele meji, kayi ne muoyi mujoboke, kabayi bamuenzeje malu ku bukole. Bualu Mvidi Mukulu udi unanga udi upa ne disanka.

Efeze 6:5

Bapika, tumikilayi bamfumu benu ba panu, batshinayi, banemekayi. Enzayi nanku ne muoyi umue, bu munudi mua kuenzela Kristu.

Dielulula 15:14

Umupeshe bintu binuikala bapeta kudi Maweja-Nangila Mvidi Mukulu wenu: mikoku, mbuji, ntete ya kuenza bukula. Umupeshe kabidi ne maluvu a mvinyo.

Dielulula 16:11

Nuye ku nzubu wikale Maweja-Nangila musungule bua nuenu kumonangana nende. Muaba wa tshijila awu, nuenu bena Izrayele, nusanke ne bana benu, bena midimu benu, bena Levi, benyi banudi nabu, bana ba nshiya, ne bakaji bakamba badi munkatshi muenu.

Kolose 3:22

Nuenu bapika, tumikilayi bionsu bidi bamfumu benu ba panu bamba, ki ngamu bua kubasankisha padibu banumona. Kadi tumikilayi ne muoyi mulelela, bualu nudi nunemeka Mfumu.

1 Tesalonike 2:3

Katuvua banuitabijije bua kunubueja mu ntupakanyi. Katuvua bakebe bivua bitulengelela tuetu. Katuvua badinge muntu nansha umue.

1 Tesalonike 2:8

Bu mutuvua banunange bikole, katuvua amu ne dijinga dia kunumanyisha Lumu lua Disanka lua kudi Mvidi Mukulu. Tuvua basue kabidi kufila nansha muoyi wetu mene bualu buenu. Bualu nukavua bantu ba mushinga kutudi.

1 Timote 4:13

Unanukile kubala Mukanda wa tshijila kumpala kua bantu bonsu. Ubele bantu, ubalongeshe too ne ku difika dianyi.

1 Timote 5:17

Bakulu badi balombola bimpe Tshisumbu tshia bena ditaba, mbakumbanyine mafutu misangu ibidi, nangananga badi batata bua kumanyisha bantu muaku wa Mvidi Mukulu, kubumvuijawu.

1 Timote 6:18

Ubambile bua benze malu amu mimpe. Buabu buneme buikale mu midimu ya luse. Bikale bantu ba kalolu, badi bamanye mua kuabanyangana ne bakuabu bidibu nabi.

Ebrewu 10:25

Katulekedi bisangilu bietu bu bakuabu bakadi ne tshibidilu tshia kubenga kubuelamu. Kadi tukoleshangane ku muoyi, tuenze nanku nangananga lelu unudi numona mudi dituku dia Mfumu disemena pabuipi.

Ebrewu 13:17

Nutumikile balombodi benu, nubakokele. Bualu diba dionsu badi balame mioyi yenu, bualu Mvidi Mukulu neabalumbuluishe, neabele nkonku pa mudimu wabu. Panuikala babatumikile nebakumbaje mudimu wabu ne disanka. Tshianana nebaukumbaje ne dibungama. Abi kabiena mua kunupetesha kantu.

Ebrewu 13:22

Bana hetu, ndi nnulomba ne: nuteleje ne lutulu miaku eyi ya kunukolesha nayi ku muoyi, bualu malu andi munufundile mu mukanda ewu kaena matambe bule.

Ebrewu 13:24

Nuele balombodi benu bonsu muoyi, kabidi ne bantu bakuabu bonsu ba Mvidi Mukulu. Bana hetu ba mu Italiya badi banuela mioyi.

Ebrewu 13:7

Vulukayi balombodi benu ba kale, bavua banumanyishe muaku wa Mvidi Mukulu. Nuvuluke muvuabu basombe panu, nuvuluke lufu luabu. Nuidikije ditaba diabu.