Nsumuinu 6:17 - MUKANDA WA MYIDI MUKULU

¹⁷ mesu a ditambisha, ludimi lua muena dishima, bianza bidi bishipa bantu badi kabayi ne tshilumbu,

Mukanda wa Nzambi Dihungila Dikulukulu ne Dihungila Dihia-dihia 2003

¹⁷ mesu adi ne dihetu, ludimi ludi lushima, ne bianza bidi bimatshiha mashi a badi kabayi ne tshilumbu hanshi,

Nsumuinu 6:17 ပူးပေါင်းရင်းမြစ်များ

2 Bakalenga 21:16

Mukalenga Menashe uvua mushipe bantu bapite bungi, bavua kabayi ne bualu to. Tshimenga tshia Yerushalayime tshijima, tshivua ne mashi mapite bungi. Bubi ebu, badi babusangisha kabidi ku buenzayi bonsu budi Menashe muenze, bua kufikisha bena Yuda ku dienza malu adi Maweja-Nangila mubenge.

2 Bakalenga 24:4

bualu uvua mushipe bantu bapite bungi bavua kabayi ne bualu to, muele mashi mapite bungi panshi mu Yerushalayime. Ke muvua Maweja-Nangila kayi musue kufuila bena Yuda kabidi luse to.

Misambu 10:4

Muntu mubi udi wela mpala mulu, wamba ne: “Mvidi Mukulu kena unyoka muntu. Kenaku mene.” Ke meji onsu adi muntu mubi wela.

Misambu 101:5

Nempuwishe bantu badi bajana bakuabu mu musokoku. Tshiena mua kubuikidila bantu badi bapetula bakuabu, ne badi baditambisha.

Misambu 131:1

Musambu wa bena ngendu udi mu mukanda wa misambu ya Davide. Maweja-Nangila, tshiena ne ditambisha, mesu anyi ki nga muena ditambisha. Tshiena nkeba butumbi, nansha malu adi mampite.

Misambu 18:27

Badi ne muoyi mutoke, udi ubaleja muoyi muimpe, ubenga ba muoyi mubi.

Misambu 31:18

Maweja-Nangila, ndi nkutendelela, nanku kumfuishi bundu. Bundu mbua bantu badi kabayi bakuitaba. Bapuwe, bapueke mu kandondu ka bafue.

Misambu 5:6

Kuena musue kumona bena kapeja. Udi ukina bonsu badi benzela bakuabu bibi.

Misambu 5:7

Wewe udi ubutula bena dishima, ubenga badi bashipa bantu, nansha badi babadinga.

Nsumuinu 1:11

padibu bakuamba ne: “Vuaku, tuye kualamina bantu mu njila bua kubashipa, tubajikidile, tubabunde, nansha bobu kabayi batuenzele bibi.

Nsumuinu 1:16

Bualu badi bipatshila bua kuenza malu mabi. Badi baluijakaja bua kuela mashi a bantu panshi.

Nsumuinu 12:22

Maweja-Nangila udi udiwula bena dishima. Kadi udi wanyisha badi bamba malu pa wowu.

Nsumuinu 14:5

Muntu udi ujadika bualu ne diyi dimue, kena ushima. Muntu udi ujadika bualu ne meyi meyi, mmuena dishima.

Nsumuinu 16:5

Maweja-Nangila udi udiwula bantu badi baditambisha. Bushuwa neabanyoke kamuyi mpata.

Nsumuinu 17:7

Muaku wa kanemu kawena ukumbanyina muntu mupote; kadi dishima kadiena dikumbanyina muntu udi ulombola bantu.

Nsumuinu 21:4

Mpala wa kapeja ne muoyi wa ditambisha ke bidi bileja bubi bua muena lonji.

Nsumuinu 26:28

Udi ushiminyina muntu malu, udi umukina. Muena mpala ibidi udi ufila bantu ku kabutu.

Nsumuinu 28:17

Muntu mushipe muntu nende, neaye kudiela mu dijimba. Bantu kabamupumbishi bua kuenza nanku to.

Nsumuinu 30:13

Bantu bakuabu badi batangila bantu nabu ne kapeja, badiela mulu.

Nsumuinu 6:16

Kudi malu asambombu adi Maweja-Nangila ubenga, adiye udiwula kashidi:

Yeshaya 1:15

Panudi nuolola bianza bienu kulu bua kuntendelela, ndi mbuikila ku mesu bua tshimonyi. Nansha nuenu nuntendelela misangu ne misangu, tshiena musue kunuteleja to. Bualu bianza bienu bidi ne mashi a bantu tente.

Yeshaya 2:11

Muena ditambisha neiname panshi. Muena kapeja, nebamupuekeshe. Dituku diadia nebamanye ne: amu Maweja-Nangila nkayende udi ne bukole.

Yeshaya 3:16

Maweja-Nangila udi wamba ne: “Bakaji ba mu Yerushalayime badi ne ditambisha. Badi benda bela mitu mulu, bakenzakana kabayi bundu, benda balunduka badisua, badidisha nkanu yabu ya ku mikolu.”

Yeshaya 3:9

Bu mudibu bakosa nsambu ne kansungansunga, nebabafunde ku tshilumbu. Bu muvua bantu ba mu tshimenga tshia Sodome benza, ke mudi bena Yuda benza buenzavi, munda munya, kabayi babusokoka. Eyowa, mbena diakabi, bualu badi badilongoluela kabutu kabu!

Yirmeya 26:15

Kadi nuenu banshipe, numanye ne: nudi bashipe muntu udi kayi ne bualu. Nanku nebanunyoke bualu buanyi, nuenu ne bantu bonsu badi basomba mu tshimenga etshi. Bualu Maweja-Nangila mmuntume menemene bua kunuambila malu onsu aa.

Yowanane 8:44

Diabolu ke tatuenu. Nudi basue kuenza bidi tatuenu ujinga. Biangatshile ku tshibangidilu uvua mushipianganyi. Katshia ki mmuanji kushala mu bulelela, bualu bulelela kabuena munda muende. Padiye wamba malu a dishima, malu awu ke adi munda muende, bualu udi mudingianganyi, kabidi tatuende wa dishima.

Dielulula 19:10

Mushindu ewu mu ditunga dinuapeta kudi Maweja-Nangila Mvidi Mukulu wenu adi, kabakushipamu muntu uvua mushipe muntu nende mu mpukapuka. Nuenu bamushipe, nenuikale ne tshilumbu bua lufu lua muntu ewu.

Dielulula 27:25

“Muntu yonsu udi wangata makuta a mabuejila bua kushipa muntu udi kayi ne bualu, asangane muena tshibawu kuenza anyi?” Bonsu ne: “Enze!”

1 Petro 5:5

Nuenu kabidi bansonga, nutumikile bakulumpe. Kadi nuenu bonsu nudipuekeshe, nuambuluishangane. Bualu mbafunde mu Mukanda wa tshijila ne: “Mvidi Mukulu udi uluisha bena ditambisha. Kadi udi wambuluisha ne disanka badi badipuekesha.”

Didimanyisha 22:15

Kadi bantu badi batombokela Mvidi Mukulu, benza malu a majimbu, benza malu a bundu, bashipianganyi, batendeledi ba nwidie, ne bonsu badi bashimangana ku miaku nansha ku ngenzelu, kabakubuela mu tshimenga!