Mika 4:1 - MUKANDA WA MYIDI MUKULU

¹ Dituku nedifike, didi mukuna, muaba udibu base nzubu wa Mvidi Mukulu, upita mikuna mikuabu yonsu. Nebaushindike bikole. Bisamba bia bantu nebipuilemu bia bungi.

Mukanda wa Nzambi Dihungila Dikulukulu ne Dihungila Dihia-dihia 2003

¹ Mu matuku alualua mukuna wa nsubu wa Yehowa neujadikibue bu mukuna wa ha mutu ha mikuna minene, neubandishibue ha mutu na mikuna mikese; ne ba mu bisamba bionso nebabuelemu.

Mika 4:1 ပူးပေါင်းရင်းမြစ်များ

Genese 49:1

Yakobe kubikila bana bende bonsu, ubambila ne: — Semenayi pabuipi, unumanyishe malu adi mua kunuenzekela matuku adi kumpala aa.

Genese 49:10

Nsesu wa bukalenga neashale mu diku dia Yuda. Dikombu dia bumfumu nedishale kudi ndelanganyi yende, too ne pafika muena bukalenga, udi bantu bonsu ne bua kutumikila.

Misambu 110:3

Bantu badi bamanye mvita bikole badi baya nebe bua kukufila, dituku diudi usangisha bena mvita bebe. Bansongalume bebe badi bavue kuudi pa mikuna ya tshijila, bu mudi dima dipatuka pa kubundubundu.

Misambu 22:27

Ndi mbikila bapela, badie buukute! Bantu badi batendelela Mvidi Mukulu, nebamutumbishe, balale panu, baboboke!

Misambu 48:1

Musambu wa mu mukanda wa misambu wa bena Kora.

Misambu 86:9

Wakafuka bisamba bionsu, nebifike bua kukukukuila, ne kukutumbisha wewe Maweja-Nangila.

Yeshaya 27:13

Dituku adi, muadi munene wa mpungi neumvuike. Nenku bonsu bavua bajimine mu bena Ashure, nansha bavua batangalaka mu Ejipitu, nebafike. Nebatue binu kumpala kua Maweja-Nangila, pa mukuna wa tshijila, udi mu Yerushalayime.

Yeshaya 43:6

Nengambile badi ku mutu ne: ‘Nubalekele, bapingane kuabu.’ Nengambile badi kuinshi ne: ‘Kanukandamanyi nabu to.’ Nufike ne bana banyi ba balume, badi ku mutu kuaka. Nufike ne bana banyi ba bakaji, badi ku ndekelu kua buloba.

Yeshaya 49:6

Yeye kungambila ne: “Kabiena bikumbana bua wikale muena mudimu wanyi anu bua kujula tshisamba tshia Yakobe, ne bua kupingaja kundi bena Izrayele badi bashale ne muoyi. Kadi ndi mukuteke kabidi butoke bua bukua bisamba, bua umone mua kupandisha bantu too ne ku ntengu ya buloba.”

Yeshaya 54:2

Diundisha munda mua ntenta webe, sakidila bilamba, ubivungulule. Kutangidi bungi bua biudi utula. Lepesha mionji ya kusuika nayi ntenta. Popela milonda bikole mu buloba.

Yeshaya 56:7

nembabikidishe bua babande pa mukuna wanyi wa tshijila. Nembasankishe ne disanka dinene, mu nzubu wanyi wa kutendelela. Nenganyishe ne muoyi muimpe milambu mishilangane ikalabu bandambula pa tshilambuilu. Bualu nzubu wanyi, nebamuinyike ne: Muaba udi bantu ba mu matunga onsu batendelela.”

Yirmeya 16:19

— Maweja-Nangila, wewe udi umpesha bukole. Wewe udi undama. Mu tshikondu tshia dikenga, ndi mua kunyemena kuudi. Bantu ba bisamba bikuabu nebafike kuudi wewe, bafuma ku nshikidilu wa buloba. Diba adi nebambe ne: “Bankambua betu bavua anu ne mvidie ya dishima. Mvidie yabu ivua anu lupepele, kayivua mua kuambuluisha muntu nansha umue.

Yirmeya 26:18

— Mu tshikondu tshia Izkiya, mukalenga wa bena Yuda, muvua muambi mukuabu, dina diende mMika, wa mu Mereshete. Uvua muambile bantu bonsu ba mu Yuda ne: Maweja-Nangila wa bukole buonsu udi wamba ne: “Siyone neikale bu budimi budibu babundulula. Yerushalayime neashale bu mu dikolu. Mukuna, muaba udi nzubu wa Mvidi Mukulu, newikale bu ditu.”

Yirmeya 3:17

Bualu tshikondu atshi, nebinyike Yerushalayime ne: “Nkuasa wa bukalenga bua Maweja-Nangila.” Bisamba bionsu nebisangile mu Yerushalayime bua kuntumbisha. Nebalekele tshitunu tshivuabu natshi tshia kuenza buenzayi bu bantu bapale.

Yirmeya 31:12

Nebafike pa mukuna wa Siyone, bela mbila ya disanka. Nebaleje mpala wa disanka, pamonabu bionsu bidibu bapeta kudi Maweja-Nangila: ntete ya kuenza bukula, maluvu mapiamapia, mafuta mimpe, mikoku, mbuji ne ngombe. Nebikale bu budimi budi ne mayi ntavule. Nebapete bionsu bidibu nabi dikenga.

Yirmeya 48:47

“Kadi dituku dikuabu, ditunga dia Mowabe nedipete kabidi diakalenga kundi. “Meme Maweja-Nangila ndi njadika bualu ebu.” Ke muvua Maweja-Nangila mukose tshilumbu tshia bena Mowabe nanku.

Yezekiyele 38:16

Neufike bua kuluisha bantu banyi bena Izrayele. Neubuikile ditunga diabu bu mudi divuba dibuikila buloba. Nebienzeke kunyima kua matuku a bungi. Nenkutume wewe Ngoge bua kuluisha bena mu ditunga dianyi, bua bantu ba mu matunga a bende bamanye ne: ndi Mvidi Mukulu wa tshijila. Nembaleje malu onsu aa bualu wewe newikale muntu wanyi.

Yezekiyele 40:2

Meme kumvua muvua Mvidi Mukulu ungambula, uya nanyi mu ditunga dia Izrayele. Uvua munteke mu katongobela ku mukuna mupite bule. Mu tshibandabanda tshia mukuna, luseke lua kuinshi kuatshi, muvua nzubu miasa mifuanangane ne tshimenga.

Yezekiyele 43:12

Ke mukenji munene udi utangila nzubu wa Mvidi Mukulu: miaba yonsu idi inyungulula nzubu pa katongabela ka mukuna, ke miaba ya tshijila menemene.

Danyele 10:14

Mpindiewu ndi mufike bua kukujinguluila malu adi ne bua kukuata bena tshisamba tshiebe mu matuku adi kumpala. Ke bualu bukuabu butshidi Mvidi Mukulu ukuleja bua matuku adi kumpala.’

Danyele 2:28

Kadi mu diulu mudi Mvidi Mukulu, udi umanyisha bantu malu masokome. Yeye ke udi mukumanyishe wewe mukalenga Nebukadnesare malu adi ne bua kuenzeka matuku atshidi kumpala. Kadi tshiuvua mulote ntshietshi.

Danyele 2:35

Nenku diakamue tshiamu tshifiike, dima, tshiamu tshikunze, tshiamu tshitoke tshia mushinga mukole, ne tshiamu tshia mpawungi, kusunsukabi, kuenza lupuishi ludi lupepele lupepula, mudi bisote bipepuka mu tshikondu tshidibu bapepula ntete. Lupepele kupepula bionsu, kaluyi lushiya kantu ka lupingu nansha kamue. Kadi dibue divua didikume ku lupingu adi kuenzadi mukuna munene, uvua muwuje buloba bujima.

Danyele 2:44

“Mu matuku adi bakalenga aba mu bumfumu, Mvidi Mukulu wa mu diulu neajule bukalenga bukuabu budibu kabayi mua kubutula nansha musangu umue. Tshisamba tshikuabu katshiena mua kuangata bukalenga abu nansha. Bukalenga abu nebubutule makalenga onsu adi mabudianjidile. Nebuashidishe, kadi bobu nebujalame kashidi.

Danyele 7:14

Kumupeshabu bukokeshi, butumbi ne bukalenga bua bantu ba matunga onsu, ba bisamba bionsu ne ba miakulu yonsu. Bukokeshi buende nebushale kashidi, kabuena bujika. Bukalenga buende kabuena bufue.

Danyele 7:18

Kunyima kuabu tshisamba tshia tshijila tshia Mvidi Mukulu, Muena kulu, netshiangate bukalenga. Netshibulame kashidi.’

Danyele 7:22

Kadi muntu kufika, kuhingisha tshisamba tshia tshijila tshia Mvidi Mukulu, Muena kulu. Pakakumbana diba, tshisamba tshia tshijila kudiatshi bukalenga.

Danyele 7:27

Nebapeshe tshisamba tshia tshijila tshia Mvidi Mukulu, Muena kulu, bukalenga, bukokeshi, ne lumu, bia makalenga onsu a pa buloba. Bukalenga bua tshisamba etshi nebushale kashidi. Makokeshi onsu a pa buloba neatshitumikile, atshienzela mudimu.’

Osheya 3:5

Pashishe, bena Izrayele nebapingane kudi Maweja-Nangila. Nebapingane kudi Mvidi Mukulu wabu, ne kudi mukalenga wabu wa ku ndelanganyi ya Davide. Matuku atshidi kumpala, bena Izrayele nebakebe Maweja-Nangila, nebamunemeke, nebatekemene bintu amu kudiye.

Mika 3:12

Nanku bualu buenu, Siyone neikale bu budimi, budibu babundulula ne lukasu. Yerushalayime neashale makolu. Mukuna wa nzubu wa Mvidi Mukulu nebaubuikile kudi tshipuka.

Zekâya 14:10

Ditunga dijima didi dinyunguluka Yerushalayime, nedishale mpata, biangatshile ku Ngeba ku mutu wa ditunga, too ne ku Rimone, kuinshi mu ditunga. Yerushalayime neikale ku mutu kua misoku idi mimunyunguluke. Tshimenga etshi netshituadije ku tshiibi tshia Binyamine, too ne ku tshiibi tshia ku Ditumba, ku muaba uvua tshiibi tshia kale, ne ku kaleya ka Ananeyele, too ne ku bikaminu bia nwinyo bia Mukalenga.

Zekâya 2:11

Nuenu bena Yerushalayime badi mu bupika ku Babilone, koleshayi, nunyeme.”

Zekâya 8:3

Ke pandi ngamba ne: Nempingane mu Yerushalayime. Nensombe mu Siyone tshiakabidi. Bantu nebinyike Yerushalayime ne: ‘Tshimenga tshidi tshilamata Mvidi Mukulu.’ Mukuna wanyi wa Siyone, nebawinyike ne: ‘Mukuna wa tshijila.’

Malaki 1:11

Meme Maweja-Nangila wa bukole buonsu, ndi njadika ne: kudi diba dipatukila too ne kudidi dibuelela bantu ba bisamba bionsu badi bannemeka. Miaba yonsu badi bangoshila musenga wa kamonya, badi bandambula milambu minkumbanyine. Bulelela, bisamba bia bende bidi binnemeka.

Bienzedi 2:17

“Mvidi Mukulu udi wamba ne: matuku a nshikidilu, nentumine muntu yonsu Mueyelu wanyi. Bana benu ba balume ne ba bakaji nebambe malu anyi. Nendeje bansonga benu malu. Banunu benu nebalote ndota.

Ebrewu 1:2

Kadi matuku a ndekelu aa, mmutuambidilewu kudi Muanende. Kudiye nkudi Mvidi Mukulu mufukile bintu bionsu. Yeye ke udi Mvidi Mukulu musungule bua apiane bintu bionsu.

2 Petro 3:3

Bangabanga numanye ne: matuku a nshikidilu nekupatuke bantu badi balonda amu majinga abu. Nebanuseke, banuebeja ne:

Didimanyisha 11:15

Pashishe mutumibue wa muanda mutekete kuela mpungi. Meyi makole kumvuika mu diulu, amba ne: “Bumfumu bua kulombola buloba budi kudi Maweja-Nangila wetu ne kudi Meshiya wende. Nebashale mu bukalenga kashidi.”

Didimanyisha 15:4

Maweja-Nangila, wabenga kukutshina nnganyi? Wabenga kukunemeka udiku anyi? Bualu Wewe nkayebe udi wa tshijila. Bisamba bionsu nebikukukuile, bualu bantu bonsu badi bamona patoke malu mimpe audi wenza.”

Didimanyisha 20:4

Pashishe meme kumona nkuasa ya butumbi. Bavua basombamu, bavua bapete bumfumu bua kulumbuluisha bantu. Meme kumona kabidi bantu bavuabu bashipe, bualu bavua bajadike malu malelela avua Yezu mumanyishe, bajadike ne muaku wa Mvidi Mukulu. Bantu aba kabavua bakukuile nyama, nansha tshimfuanyi tshiende. Kabavua babatue tshitampi tshia nyama pa mpala, nansha pa tshianza to. Kufululukabu, kudiabu bukalenga pamue ne Kristu bidimu tshinunu.