Kolose 2:18 - MUKANDA WA MYIDI MUKULU

¹⁸ Kanuteleji muntu udi unudiwula, wamba ne: meme ndi ndipuekesha, ndi ntendelela batumibue; Mvidi Mukulu udi undeja malu. Muntu wa nanku udi uditambisha patupu, wela amu meji a bantu.

Mukanda wa Nzambi Dihungila Dikulukulu ne Dihungila Dihia-dihia 2003

¹⁸ Muntu kanunyengi bukenshi buenu bualu bua kudihuekesha kuandi kudiye udisunguila, ne kukukuila kuandi kua banjelo, ne dilamata diandi dia mu bikena kumona, mûshibue hatuhu ku meshi andi a mubidi,

Kolose 2:18 ပူးပေါင်းရင်းမြစ်များ

Genese 3:13

Maweja-Nangila Mvidi Mukulu kuebeja mukaji ne: — Tshiwenzedi nanku ntshinyi? Mukaji kuandamuna ne: — Nyoka mmundinge, meme panyi kudia tshimuma.

Yobe 38:2

Wewe udi nganyi? Muudi wela mpata pa malu andi ndongesha mbishi? Muudi wakula pa malu audi kuyi mujingulule mmunyi?

Yeshaya 57:9

Udi udilaba mafuta, udiela ne manananshi a mupuya muimpe, bua kuya kutendelela mvidie Meleke. Uvua mutume bantu mutantshi mule ne mikenji. Wewe kubatuma too ne ku muaba wa bafue.

Yezekiyele 13:3

Meme Maweja-Nangila Mvidi Mukulu, ndi ngamba ne: Dikenga nedikuate bambi batshimbakane aba! Badi balonda amu lungenyi luabu bobu, baleja bantu malu a dishima.

Danyele 11:38

Pa muaba wayi neatendelele mvidie wa bimenga bikolesha, mvidie udi bankambua bende kabayi bamanye. Nealambule mvidie ewu tshiamu tshia mpawungi, tshiamu tshitoke tshia mushinga mukole, mabue a mushinga mukole, ne bintu bikuabu bia mushinga.

Dibadika 25:18

Bavua banuenzela bibi ne muoyi wa lukinu, mu tshilumbu tshia ku Peyore ne mu tshia Kozbi, muana wa mfumu wa bena Madiyane, ufuile mu tshipupu tshivua tshienzeka bua ditendelela dia mvidie wa ku Peyore.

Matayi 24:24

Bualu baKristu ba dishima ne bambi ba dishima nebamueneke. Nebenze bishima binene, ne malu a dikema, bifuane mua kudinga bantu mene badi Mvidi Mukulu musungule, bu biobi mua kuenzeka.

Rome 1:25

Badi bumusha bulelela budi butangila Mvidi Mukulu, bapingaja dishima. Badi batendelela bintu bidi Mvidi Mukulu mufuke, babikuatshila mudimu, pa mutu pa kutendelela Mubifuki, kumuenzela Yeye nkayende mudimu. Yeye mene atumbe kashidi! Amene.

Rome 16:18

Bualu bantu ba mushindu ewu kabena bakuatshila Kristu Mfumu wetu mudimu, kadi amu difu diabu! Badi bamanye mua kuakula bimpe, balongesha ne miaku ya lubombu. Ke mudibu badinga bantu badi ne lungenyi lutekete.

1 Korente 13:4

Udi unanga udi ne lutuulu, udi ne muoyi wa kalolu, kena ne lubabu, kena uditemba, kena uditambisha.

1 Korente 3:3

bualu nutshidi nusomba bu bantu ba panu. Nudi nubabangana, nutandangana. Ke bidi bileja ne: nudi bantu ba panu, nuenza amu bidi bantu bakuabu bonsu benza.

1 Korente 4:18

Bamue ba kunudi bayua badiela mulu, bela meji ne: Polu kakufika kuetu bua kumonangana netu.

1 Korente 4:6

Bana hetu, mu bionsu ebi mvua mutele Apolose, muditele kabidi, amu bu bilejilu bua kunulongesha. Mvua musue bua nujingulule tshidi lusumuinu elu luamba ne: “Nuitabe amu bidibu bafunde.” Muntu nansha umue wa kunudi kena mua kutumbisha mulongeshi umue, kudiwula mukuabu.

1 Korente 8:1

Tuyayi ku lukonku lunuvua bangele bua minyinyi ivuabu balambule mvidie: Ndi ngitaba binudi nuamba ne: “Bonsu tudi bamanye malu.” Kadi dimanya edi didi diela muntu mulu. Amu dinanga didi dibakolesha mu ditaba.

1 Korente 9:24

Nudi bamanye bimpe ne: mu manaya bonsu badi banyema, kadi amu umue udi upeta nsala wa kalumbandi. Nanku nyemayi bikole, bua numupete.

2 Korente 11:3

Nyoka, uvua mupambule Eva ne budimu buende, ke undi ntshina. Bualu meji enu adi mua kupambuka mu njila, nuenu kulekela kunanga Kristu, kulekela kumuitaba ne muoyi umue.

2 Korente 12:20

Ndi ntshina ne: pangafika, tshiakunusangana mushindu undi musue. Tshiyi munusangane nanku, nuenu kabidi kanuakunsangana mushindu unudi basue. Bumue nensangane amu mvita ne lubabu, tshiji ne difuilakana dia mianzu, bipendu ne buakulavi, ditambisha ne buenzavi. Ke tshindi ntshina.

Efeze 4:17

Mu dina dia Mfumu, ndi nnuambila, nnujadikila se: kanuenji kabidi malu adi bantu badi kabayi bamanye Mvidi Mukulu benza, bualu badi balonda meji abu a patupu.

Efeze 5:6

Muntu kanudingi ne miaku ya bupote. Mvidi Mukulu neanyoke bantu badi benza malu mabi a nenku, babenga kumutumikila.

Filipe 3:14

Nanku ntshidi mu njila, nyema lubilu, bua mpete nsala wa kalumbandi. Nsala awu ke muoyi mupiamupia udi Mvidi Mukulu mutubikidile, bua tuupetele mu diulu kudi Yezu Kristu.

Kolose 2:23

Bushuwa mikenji eyi ya kutendelela batumibue, ya kudipuekesha, ya kukengehsa mubidi, idi imueneka bu ya meji. Kadi kayena ne mushinga nansha mukese, bualu idi isankisha amu bumuntu buetu.

Kolose 2:4

Ndi nnuambila nanku, bua muntu nansha umue kanushimi ne miaku ya budimu.

Kolose 2:8

Dimukayi bua muntu kanushimi ne malongesha a patupu a mu meji a bantu. Ke meji adi mafume ku malu adi bantu balongeshangana, ne kudi makole a mulu. Kadi kaena mafume kudi Kristu to.

1 Timote 1:7

Badi basue kuikala balongeshi ba mikenji ya Mvidi Mukulu, kadi kabena bajingulula mene miaku idibu bamba, nansha malu adibu balongesha, bajadika bikole.

1 Timote 4:1

Mueyelu wa Tshijila udi wamba patoke ne: matuku a ku nshikidilu bamue bantu nebalekele ditaba; nebitabe bena dishima; nebanyishe malongesha a mikishi mibi.

2 Petro 2:14

Badi balengamena amu bakaji badi bananga malu mabi. Kuenza malu mabi kakuena kubatonda. Badi bateya badi kabayi ne muoyi mukole. Muoyi wabu mmuibidile lukuka lua biuma. Mvidi Mukulu mmumane kubatshipa!

1 Yone 2:26

Ndi nnufundila malu aa, bua nudimukile bantu badi bakeba kunupambula mu njila.

Didimanyisha 12:9

Kuipatabu nyoka wa tshidika munene awu mu diulu. Nyoka awu ke nyoka wa kale, udibu binyika ne: diabolu, nansha Satane, udi udinga buloba bujima. Kumuimanshabu pa buloba, pamue ne batumibue bende bonsu.

Didimanyisha 13:14

Uvua upambuisha bantu ba pa buloba ku malu a dikema avuaye ne bukenji bua kuenza mu dina dia nyama wa kumpala. Kuambilaye bantu ba pa buloba, bua benze tshimfuanyi, banemekele natshi nyama uvuabu batape muele wa mvita, kadi mutshikale amu ne muoyi.

Didimanyisha 13:8

Bantu bonsu ba pa buloba nebamukukuile. Ke bonsu bavuabu kabayi bafunde mena abu, mu mukanda wa muoyi katshia bafuka buloba; ke mukanda udi Muana wa mukoku udibu bashipe nawu.

Didimanyisha 19:10

Ke meme kudiela ku makasa ende bua kumukukuila. Kadi kungambilaye ne: — Kuenji nanku to! Meme kabidi ndi amu muena mudimu bu wewe, bu bana benu badi bitaba bulelela buvua Yezu mubamanyishe. Kukuila Mvidi Mukulu nkayende! Bulelela budi Yezu ujadika, ke Mueyelu udi umanyisha bambi malu.

Didimanyisha 3:11

Nkadi mu njila. Lama muebe muonsu biudi nabi. Tshianana bakuabu nebakunyenge nsala webe wa lumu.