Ekesode 24:4 - MUKANDA WA MYIDI MUKULU

⁴ Moshe kufunda meyi onsu a Maweja-Nangila mu mukanda. Kujukaye dinda dionsu, kuasaye tshilambuilu kuinshi kua mukuna. Kujulaye kabidi makunji a mabue manene dikumi ne abidi. Tshisamba tshionsu tshia bena Izrayele tshivua ne dikunji diatshi.

Mukanda wa Nzambi Dihungila Dikulukulu ne Dihungila Dihia-dihia 2003

⁴ Mose wakafunda mei onso a Yehowa mu mukanda, wakabika ne dinda dionso, wakasa tshioshelu kuinshi kua mukuna, ne mabue manene dikumi ne abidi bu bungi bua bisamba bia Bena Isalele.

Ekesode 24:4 ပူးပေါင်းရင်းမြစ်များ

Genese 12:7

Maweja-Nangila kumuenekela kabidi Abrame, umuambila ne: “Ditunga edi nendipeshe ndelanganyi yebe.” Abrame kuashila Maweja-Nangila tshilambuilu muaba mene uvua Maweja-Nangila mumumuenekele.

Genese 28:18

Yakobe kubika dinda dionsu, kuimanyika dibue divuaye musangike ku mutu adi, kudifita manyi ku lusongu, bua dikale dia tshijila.

Genese 28:22

Dibue dindi muimanyike edi ndia tshijila. Nedikale nzubu wa Mvidi Mukulu. Nenkupingajile tshia dikumi tshimue tshia bintu bionsu biudi mumpeshe.

Genese 31:45

Nanku Yakobe kuimanyika dibue bu tshivulukilu tshia ndondu wabu.

1 Bakalenga 11:30

Muambi Akiya kupanda tshinkutu atshi bipese dikumi ne bibidi.

1 Bakalenga 18:31

Kuangataye mabue dikumi ne abidi, bilondeshile bisamba dikumi ne bibidi bia ndelanganyi ya Yakobe. (Yakobe ewu ke uvua Maweja-Nangila muambile ne: “Kutuadija mpindiewu, nebakubikile ne: Izrayele.”)

Ezela 6:17

Mu tshibilu atshi, bavua balambula nyama ya ngombe milume lukama, mbuji ya mikoku ya bimpanga nkama ibidi, bana ba mikoku nkama inayi, kabidi ne mbuji ya mpumbu dikumi ne ibidi, mbuji umue uvua mufume ku tshisamba tshionsu tshia bena Yuda, bua Mvidi Mukulu afuile bena Izrayele bonsu luse.

Nehemya 10:1

Bua malu onsu avua matuenzeke, tuetu bena Izrayele, tuetu kumyuangana kushindika bualu, kubufunda mu mukanda. Bamfumu, bena Levi, ne batuangaji betu, kufunda mena abu mu mukanda awu, kutua tshitampi.

Ekesode 17:14

Maweja-Nangila kuambila Moshe ne: — Funda bualu ebu mu mukanda, bua bantu babuvuluke. Umanyishe Yoshuwa ne: meme nembutule bena Amaleke bonsu. Muntu nansha umue kakubavuluka kabidi to.

Ekesode 17:15

Ke Moshe kuashila Maweja-Nangila tshilambuilu, kutshinyika dina ne: “Maweja-Nangila ke dibendela dianyi.”

Ekesode 21:1

— Mikenji mikuabu iudi mua kuambila bena Izrayele idi nunku:

Ekesode 24:7

Pashishe, kubalaye ne diyi dikole mukanda wa meyi a ndondu uvua Maweja-Nangila mutue ne bantu. Bantu bonsu kuitaba ne: — Netuenze bionsu bidi Maweja-Nangila muambe.

Ekesode 28:21

Mabue awu, ikale dikumi ne abidi, bungi bua bana ba Yakobe. Dina dia muana yonsu dikale difunda pa dibue bu mudi tshitampi. Mabue awu, neikale tshimanyinu tshia bisamba dikumi ne bibidi bia bena Izrayele.

Ekesode 34:27

Maweja-Nangila kuambila Moshe ne: — Ufunde bionsu bindi mukuambile ebi, bualu ke bidi bijadika ndondu undi mutue nebe ne bena Izrayele bonsu.

Yeshaya 19:19

Dituku adi, munkatshi mua ditunga dia Ejipitu, nemuikale tshilambuilu tshijidila mu dina dia Maweja-Nangila. Ku mikalu ya ditunga nebimanyike dibue bua kunemeka Maweja-Nangila.

Lewitiki 24:5

“Wangate bukula, wenze mikata dikumi ne ibidi, mukata onsu wikale ne bujitu bua kilo isambombu.

Dibadika 17:2

— Ambila mutuangaji Elazare, muana wa Arone, ne: upatule mbabula idi mu kapia, utangalaje makala aye kule! Mbabula eyi nya tshijila.

Luke 22:30

Nuenu nenudie, nunue ku mesa anyi mu Bukalenga buanyi. Nenusombe mu nkuasa ya bumfumu bua kukosa nsambu ya bisamba dikumi ne bibidi bia bena Izrayele.

Ngalate 2:9

Yakobe, Petro, ne Yowanane, bavua bantu banemeka bu balombodi banene, bavua bitabe ne: Mvidi Mukulu mmumpeshe mudimu ewu wa pa buawu. Nanku meme ne Bamabase, bavua batuele muoyi, batukuate ku tshianza, bua kuleja mutudi tukuata nabu mudimu wa momumue. Ke tuetu bonsu pamue kumvuangana nabu ne: meme ne Bamabase, netuye kukuatshila bisamba bikuabu mudimu, bobu nebakuatshile bena Yuda mudimu.

Dielulula 31:9

Moshe kufunda mikenji ya Mvidi Mukulu, kuyipesha batuangaji, ndelanganyi ya bena Levi, bavua ne mudimu wa kuambula mushete uvua ne mikenji ya ndondu. Kuyipeshaye kabidi bakulu ba bena Izrayele.

Yoshua 4:20

Yoshuwa kuimanyika mu Ngilgale mabue dikumi ne abidi, avuabu bambule mu musulu wa Yardene.

Yoshua 4:5

ubambila ne: — Pitayi kumpala kua mushete wa Maweja-Nangila Mvidi Mukulu wenu. Nubuele munkatshi mua musulu wa Yardene. Muntu yonsu wa kunudi ambule dibue dia muaba awu, aditeke pa makaya ende. Nanku tshisamba tshionsu tshia bena Izrayele netshikale ne diatshi dibue.

Didimanyisha 21:14

Bavua bashikike tshimana tshia tshimenga pa mabue dikumi ne abidi. Bavua bafunde pa mabue apu mena a bapostolu dikumi ne babidi ba Muana wa mukoku.