Danyele 11:40 - MUKANDA WA MYIDI MUKULU

⁴⁰ “Mu tshikondu tshia ku nshikidilu, mukalenga wa ditunga dia kuinshi neabangulule mvita. Kadi mukalenga wa ditunga dia ku mutu neamupishe ne matempu a mvita, ne badi babanda pa nyama ya tubalu, kabidi ne matu mavule a mvita. Neabuele mu matunga mashilangane ne bena mvita bende. Neasambuke mikalu, bu mudi mayi a musulu apasalala.

Mukanda wa Nzambi Dihungila Dikulukulu ne Dihungila Dihia-dihia 2003

⁴⁰ Mu matuku a kunshikidilu mukelenge wa ku Sude neamubunde; mukelenge wa ku nôde nealue kumuluisha bu nvunde, muikale ne makalu a nvita ne badi benda ha nyima ha tubalu tua nvita ne mu matu a bungi; neabuele mu matunga a bungi, uhita bu mudi musulu wa mai uhasalala.

Danyele 11:40 ပူးပေါင်းရင်းမြစ်များ

Yeshaya 21:1

Badi bamanyisha malu adi atangila Babilone, “Tshipela tshidi ku musulu.” Muena lukuna udi utumina ku tshipela, ku ditunga didi dikuatshisha bantu bowa, amu mudi mvunde ukosolola tshipela tshia Negebe.

Yeshaya 5:28

Mikete yatshi idi minona bimpe, mata adi mamana kunana. Tubalu tuatshi, tudi ne bikonu bikole bu mabue. Nkata ya matempu atshi, idi inyema lubilu mifuane mvunde.

Yeshaya 66:15

Tangilayi Maweja-Nangila udi ufika mu kapia. Matempu ende a mvita adi afika bu mvula wa tshipupu. Maweja-Nangila mmuwule ne kanyinganyinga, udi ufika bua kujikija tshiji tshiende, kukumbaja mu ndimi ya kapia bivuaye muambile bantu ne mikanu.

Yirmeya 4:13

Monayi mubishi udi ubanda, bu mavuba a mvula wa tshipupu. Matempu ende a mvita adi anyema lubilu bu mvunde. Nyama yende ya tubalu idi inyema mipite nyunyi wa tshiminyi ku lubilu. Tuajiminyi, tuabutuku!

Yezekiyele 38:4

Nenkuele nkanu ku binyanganyanga bua mmone mua kuya nebe kundi musue. Nenkupatule mu ditunga diebe, wewe ne tshiluilu tshiebe tshijima, ne nyama yebe ya tubalu, ne babandi ba pa nyama yebe ya tubalu, badi batuala bimpe, ne bisumbu bia bungi bia bena mvita bebe badi bambula ngabu ne miele ya mvita.

Yezekiyele 38:9

Kadi wewe Ngoge Mubaluishe ne tshiluilu tshiebe, kabidi ne bantu ba mu bisamba bikuabu baudi nabu. Neubuele ne mvita mu ditunga diabu ne lubilu bu lua mvula wa tshipupu. Newikale bu matuba adi abuikila ditunga diabu.

Danyele 11:10

“Bana ba balume ba mukalenga wa mu ditunga dia ku mutu Mbadilongolole ku mvita. Nebasangishe bena mvita bapite bungi. Umue wa kudibu neaye ne bena mvita bende. Neasambuke mikalu ne lubilu bu lua musulu wa mayi udi upasalala. Pashishe papinganaye mu ditunga diende, nealuishe tshimenga tshia baluishi tshivuabu bakoleshe ne bimana.

Danyele 11:11

Mukalenga wa ditunga dia kuinshi, neafike munda. Nealuishe mukalenga wa ditunga dia ku mutu. Awu nealongolole bena mvita tshisumbu tshinene. Kadi Mbamutshimune kudi mukalenga wa ditunga dia kuinshi.

Danyele 11:13

Mukalenga wa ditunga dia ku mutu neakunguje tshisumbu tshia bena mvita tshitambe tshia kumpala ku bunene. Papita bidimu bikese, neapingane ne tshisumbu tshinene tshia bena mvita, tshikale ne bintu bia bungi bia kuluangana nabi.

Danyele 11:22

Kakuena tshiluilu tshidi mua kumutshimuna. Neabutule biluilu bionsu. Neashipe kabidi mukalenga wa bena tshisamba tshia ndondu.

Danyele 11:25

“Mudimanye mudiye ne bukole kabidi ne bukitu, neaye ne tshisumbu tshinene tshia bena mvita bua kuluisha mukalenga wa ditunga dia kuinshi. Mukalenga ewu neasangane nende, ne bena mvita ba bungi, ne ba bukole bupite. Kadi kakunutuila nkanana. Bualu nebamuluishe ne budimu.

Danyele 11:35

Bantu ba bungi nebafue munkatshi mua bantu ba meji. Lufu luabu nelumbushe mikiya ya bantu. Nelubalengeje, lubatokeshe too ne pafika tshikondu tshia ku nshikidilu wa malu. (Bualu tshikondu tshia ku nshikidilu ki ntshianji kufika.)

Danyele 11:39

Nealuangane ne bimenga bionsu ne diambuluisha dia mvidie muenyi awu. Neatumbishe bantu bonsu badi bitaba mvidie ewu. Neabapeshe bumfumu ku mutu kua bantu ba bungi. Neabapeshe kabidi maloba bu kalumbandi.

Danyele 11:7

Muntu umue wa mu diku diende neapingane mu bukalenga bua tatuende. Neaye kuluisha bena mvita ba mukalenga wa ditunga dia ku mutu mu tshimenga tshiende tshikolesha ne bimana. Neabatshimune.

Danyele 12:4

“ ‘Wewe Daniyele, ulame malu aa munda. Kuambidi muntu malu a mu mukanda ewu padi diba dia ku nshikidilu kadiyi dianji kufika. Pashishe bantu ba bungi nebaubale. Lungenyi luabu ne luvulangane.’

Danyele 12:9

Kungandamunaye ne: ‘Daniyele, kupampakanyi nansha. Ulame miaku eyi bimpe too ne diba dia nshikidilu.

Danyele 8:17

Ngabriyele kusemena pabuipi nanyi. Pakafikaye, bowa bukole kunkuata. Meme kutua mpala panshi. Kadi kungambilaye ne: ‘Daniyele, udi anu muntu, umanye ne: Mvidi Mukulu udi mukuleje malu a ku nshikidilu wa bidimu.’

Abakuke 3:14

Udi utubula mitu ya bamfumu ba baluishi betu, ubapingajila mikete ivuabu bakebe kutuasa. Bavua bafika ne lubilu bu mvunde, benda bela mbila ya disanka, bajinga kututangalaja, nansha kutuzaza miaba ituvua basokomene.

Zekâya 9:14

Maweja-Nangila neamueneke, ku mutu kua bantu bende. Mukete wende neuye bu muele wa mvula. Maweja-Nangila Mvidi Mukulu, neele mpungi, neafike munkatshi mua mvunde, udi ufuma kuinshi kua ditunga.

Didimanyisha 16:12

Mutumibue muisambombu kuitshikija dikopu diende pa musulu munene wa Perate. Musulu kuuma, bua bakalenga badi batumina luseke ludi diba dipatukila bapete muaba wa kusabukila.

Didimanyisha 9:16

Kummanyishabu bungi bua basolayi bavua babanda pa tubalu: bavua bitotu nkama ibidi.