2 Samuele 18:17 - MUKANDA WA MYIDI MUKULU

¹⁷ Kuambulabu tshitalu tshia Absalome, kutshimansha mu tshiina tshinene tshiwa mu ditu amu. Pashishe kunguijabu mushiki munene wa mabue pa tshitalu atshi. Diba adi, bena mvita ba Absalome kunyema, muntu yonsu kuya ku nzubu kuende.

Mukanda wa Nzambi Dihungila Dikulukulu ne Dihungila Dihia-dihia 2003

¹⁷ Bakangata Abashaloma, bakamuha mu lubuebue lunene luakadi muitu, bakamungushila mushiki munene wa mabue; Bena Isalele bonso bakanyema muntu ne muntu ku ntenta wandi.

2 Samuele 18:17 ပူးပေါင်းရင်းမြစ်များ

2 Samuele 19:5

Kadi, mukalenga Davide uvua anu mubuikile tshilamba ku mesu, udila anu kudila, wamba ne: — Eyi, Absalome wanyi, eyi muananyi Absalome, muananyi, eyi muananyi.

2 Samuele 19:8

Juka mpindiewu, udikoleshe. Uye kusamba bena mvita bebe bua kupetabu bukole. Wewe kuyi muye kudibu, ndi nditshipa mu dina dia Maweja-Nangila ne: muena mvita nansha umue kena mua kukuenzela mudimu kabidi dituku nansha dimue to. Nanku, wewe neupete dikenga dikole, dipite makenga onsu audi mumane kukenga, biangatshile ku buana buebe.

2 Samuele 19:9

Ke mukalenga Davide kuya kusomba pabuipi ne tshiibi tshia ku tshimenga. Kumanyishabu bena mvita bonsu bualu abu. Kufikabu bonsu muaba uvua mukalenga Davide. Bena mvita ba Absalome bavua bamane kunyema. Muntu yonsu wa kudibu uvua muye ku nzubu kuende.

2 Samuele 20:1

Mu Ngilgale, muvua muntu mukuabu mutshimbakane, muena Binyamine, dina diende Sheba, muana wa Bikri. Sheba uvua wela mpungi, wamba ne: — Davide katuena nende bualu to, katuena basue kulonda muana wa Ishayi to! Bena Izrayele, pinganayi ku nzubu yenu!

2 Samuele 20:22

Mukaji kuya kudi bana babu, kubabela bimpe. Nanku kukosabu mutu wa Sheba, kuwimanshilabu Yowabe. Yowabe kuelesha mpungi. Diakamue bena mvita bonsu kumukabu. Kupinganabu kuabu. Yowabe kupingana kudi mukalenga Davide mu Yerushalayime.

2 Bakalenga 14:12

Bena mvita ba bena Izrayele, kutshimuna bena mvita ba bena Yuda. Bena mvita ba bena Yuda bonsu kunyema, kupingana kuabu.

2 Bakalenga 8:21

Nanku, Yorame kuya ku Sayire ne matempu ende a mvita onsu. Kadi mundankulu mua butuku, mukalenga Yorame ne balombodi ba matempu ende a mvita, kudipandila njila munkatshi mua bena Edome bavua babanyungulula, kusambuka. Bena mvita ba bena Yuda kunyema, kuya kuabu.

Nsumuinu 10:7

Muntu udi unemeka Mvidi Mukulu badi bamuvuluka ne disanka, kadi nansha dina mene dia bantu babi badi badipua muoyi.

Dielulula 21:20

Pafikabu nende, nebambile bakulu abu ne: “Muanetu ewu mmututombokele. Udi utupepeja, kena utumvuila to. Mmusue amu kuenza malu mabi ne kunua maluvu.”

Dielulula 21:21

Diba adi, bantu bonsu ba mu tshimenga atshi, nebamuase mabue, bamushipa. Pumvua bena Izrayele binudi bamuenzela, nebatshine. Kabakuenza kabidi buenzayi ebu to. Ke munudi mua kujikija buenzayi munkatshi mua bena Izrayele nanku.

Yoshua 10:27

Ku dilolu Yoshuwa kutuma diyi bua batulule bitalu abi. Kubitululabu, kubimansha mu lubinga muaba uvua bakalenga abu basokome. Kujibikilabu mabue manene ku lubinga alu. Mabue awu atshidiku too ne ku lelu.

Yoshua 7:26

Pashishe kuimanyikabu mushiki wa mabue pambidi pa Akane. Mabue awu atshidipu too ne mpindiewu. Ke padibu babikila muaba awu ne lelu ne: tshibandabanda tshia Akore. Bionsu abi bimane kuenzeka, tshiji tshia Maweja-Nangila kutuya.

Yoshua 8:29

Pashishe kuelabu mukalenga wa Ayi kulu kua mutshi, kumowabu. Tshitalu tshiende kushala ku mutshi aku too ne ku dilolu. Pambi diba kubuela, Yoshuwa kutuma diyi bua batutete tshitalu atshi. Bavua batshimansha pabuipi ne tshiibi tshia tshimenga tshia Ayi. Pashishe kungujilabu mushiki wa mabue pa tshitalu atshi. Mabue awu atshidipu too ne ku lelu.

1 Samuele 4:10

Bena Peleshete kuluangana ne bena Izrayele. Bena Peleshete kupita bena Izrayele bukole. Bena Izrayele kunyema kupingana kuabu. Bavua bashipe bena mvita ba bena Izrayele bapite bungi, binunu makumi asatu.