2 Bakalenga 21:14 - MUKANDA WA MYIDI MUKULU

¹⁴ Bantu bena Izrayele bikale bashale, tshiakuikala nabu ne bualu to. Nembafile ku bumfumu bua baluishi babu. Baluishi abu, nebapawule bintu bionsu bia bena ditunga diabu.

Mukanda wa Nzambi Dihungila Dikulukulu ne Dihungila Dihia-dihia 2003

¹⁴ Nengumushe difuka dia buhianyi buanyi didi dishale, nendifile mu bianza bia bantu badi nʼadi lukuna; bobo nebalue bambudibue ne bahaudibue kudi bena lukuna bonso;

2 Bakalenga 21:14 ပူးပေါင်းရင်းမြစ်များ

2 Bakalenga 17:18

Ke Maweja-Nangila kufikila bena Izrayele munda. Kavua musue kubamona kumpala kuende to. Anu tshisamba tshimue tshia bena Yuda ke tshivua tshishala tshilamate Maweja-Nangila.

2 Bakalenga 17:19

Kadi, bena Yuda kutombokela kabidi Maweja-Nangila, kubenga meyi a Maweja-Nangila Mvidi Mukulu wabu. Kulondabu bilele bivuabu babueje mu bukalenga bua bena Izrayele.

2 Bakalenga 17:20

Nanku, Maweja-Nangila kubenga bena Izrayele bonsu, kubafila mu bianza bia bakengeshanganyi bua kubafuisha bundu. Pashishe kubipataye, kubatuma kule.

2 Bakalenga 17:23

Pashishe, Maweja-Nangila kavua musue kabidi bena Izrayele kumpala kuende to. Kubipataye, kubatuma ku Ashure. Ke muaba utshidibu too ne mpindiewu. Bionsu ebi bivua bienzeka bua kukumbaja diyi dia Maweja-Nangila divua bambi, bantu bende, bamba.

2 Bakalenga 19:4

Mukalenga wa bena Ashure mmutume mulombodi wa beledi ba mukalenga maluvu, bua kupenda Mvidi Mukulu wa muoyi. Eyowa, ndi njinga bua Maweja-Nangila Mvidi Mukulu webe umvue bipendu bionsu ebi, anyoke muntu uvua umupenda! Wewe, lombaku Maweja-Nangila, wakuile bantu bende badi bashala aba.”

2 Bakalenga 21:13

Nembutule Yerushalayime, bu mumvua mubutule Samariya ne bena diku dia Akabe. Meme nenshiye Yerushalayime munda mutupu, anu bu mudibu basukula dilonga, pashishe, badibuikija.

2 Bakalenga 21:15

Nengenze bionsu ebi, bualu biangatshile dituku dindi mupatule bankambua babu mu Ejipitu too ne mpindiewu, bantu banyi badi anu banufikisha munda, benza malu andi mubenge!’ ”

2 Bakalenga 23:27

Ke Maweja-Nangila kuamba ne: — Bu mumvua mumane kubenga kale bua kumona bantu ba mu bukalenga bua Izrayele kumpala kuanyi, ke mundi kabidi mbenga bua kumona bantu ba mu bukalenga bua Yuda kumpala kuanyi. Ndi musue kubenga Yerushalayime, tshimenga tshimvua musungule. Ndi musue kubenga kabidi ne nzubu wa Mvidi Mukulu ewu umvua mumane kulaya bua kusombamu.

2 Bakalenga 24:2

Pashishe, Maweja-Nangila kutumina Yowakime bena buenzayi ba bena Babilone, ba bena Arame, ba bena Mowabe ne ba bena Amone, bua banyangakaje buloba bua bena Yuda bu muvua bambi bambe mu dina dia Maweja-Nangila.

2 Kulondolola 15:2

Kuyaye kumonangana ne Asa bua kumuambila ne: — Mukalenga Asa ne nuenu bonsu bena Yuda, ne bena Binyamine, nunteleje! Maweja-Nangila neikale nenu anu panuikala bamuitabe. Nuenu bamukebe, nenumupete. Nuenu bamubenge, yeye kabidi neanubenge.

Misambu 37:28

Bualu Maweja-Nangila kena ulekela bantu bende, mmusue ne: bonsu benzelangane bimpe. Benji ba bibi nebabutuke kashidi, ndelanganyi yabu neijimine.

Misambu 74:1

Kasala ka mu mukanda wa misambu ya Asafe. Mvidi Mukulu wanyi, udi mutubenge kashidi bua tshinyi? Udi mutulamine tshiji bua tshinyi? Tuetu bikale mikoku ya mu tshikumbi tshiebe?

Yeshaya 10:6

Meme kubatuma bua kuluisha tshisamba tshidi tshimbenga. Meme kubambila bua kubunda tshisamba tshidi tshimfikisha munda. Meme kuanyisha bua biibe, bapawule bantu aba, babadiatakaje bu bitotshi bia mu njila.

Yirmeya 12:7

Ndi nshiya nzubu wa tshijila, uvua nzubu wanyi meme. Ndi mbenga bantu bavua banyi. Ndi mfila mu bianza bia baluishi babu, bantu bamvue munange ne muoyi wanyi mujima.

Yirmeya 19:7

Muaba ewu nempangishe bena Izrayele ne bena Yuda, bua kabakumbaji tshidibu bela meji. Nemfile bantu aba kudi baluishi babu badi kabayi ne luse. Nenganyishe bua bitalu biabu babizokole kudi nyunyi ya mikanku, babidie kudi nyama ya mibuabua.

Yirmeya 23:33

Maweja-Nangila kuambila Yirmeya ne: — Padi muambi, mutuangaji, nansha muntu mukuabu, ukukonka ne: “Maweja-Nangila udi wamba bishi, bujitu budiye uteka pambidi petu mbujitu kaayi,” umuandamune ne: “Maweja-Nangila udi wamba ne: Nuenu mene nudi bujitu bundi meme ne bua kuambula! Kadi nembuitshikije panshi.”

Yirmeya 44:27

Nennutumine dikenga. Tshiena nnutumina kabidi disanka to. Bena Yuda badi basombe kabidi mu Ejipitu nebafue bonsu, too ne wa ndekelu, ku mvita nansha ku tshiyole tshia nzala.

Muadi 1:10

Baluishi mbapawule bubanji buende buonsu. Yerushalayime mmudimuene muvua bantu ba bisamba bikuabu babuele mu nzubu wa Mvidi Mukulu wende. Ke bantu bauvua wewe Maweja-Nangila mukandike bua kababuedi muaba webe wa kutendelela.

Muadi 1:5

Baluishi bende mbamupite bukole. Badi bamutshimuna mbasombe talalaa. Maweja-Nangila ke udi ukengesha Siyone, bualu malu ende mabi adi a bungi. Badi bamutshimune badi basaka bana bende, baya nabu mu bupika.

Muadi 5:20

Neutupue muoyi, neutubenge matuku onsu atutshidi ne muoyi panu anyi?

Lewitiki 26:17

Nennukengeshe. Baluishi benu nebanutshimune, banutshimbakaje. Nenudinyemene, kakuyi muntu unuipata.

Amosa 5:2

Izrayele nnsongakaji udi mufue, tshitalu tshiende tshitshidi panshi. Kakujuka kabidi to. Mbamulekele pa buloba buende: muntu nansha umue kena umujula!

Dielulula 28:25

Maweja-Nangila neambuluishe baluishi benu bua banutshimune. Panuikala bayile njila umue bua kubaluisha, nenubanyeme, nupingane mu njila muanda mutekete mishilangane. Bakalenga bonsu ba pa buloba nebatshine, pamonabu bionsu bidi binuenzekela.

Dielulula 28:48

Maweja-Nangila neanutumine baluishi, banukuate ku bupika. Nenukenge ne nzala ne nyota, nupanga ne tshilamba tshia kuvuala. Maweja-Nangila neanuambuishe mukoolu wa tshiamu tshia bujitu pa makaya, too ne panuabutuka bonsu.

Dielulula 31:17

Nanku nembafikile munda, mbalekela, bua babakengeshe bikole kudi bisamba bikuabu. Nebajadike mudi makenga aa abenzekela, bualu meme Mvidi Mukulu tshiena kabidi munkatshi muabu.