1 Korente 1:20 - MUKANDA WA MYIDI MUKULU

²⁰ Nanku tshidi muena meji, nansha muntu udi mulonge mikanda, nansha muedianganyi wa mpata wa panuapa, mua kuamba kabidi ntshinyi? Mvidi Mukulu mmumane kuleja ne: meji a bena panu mbupale!”

Mukanda wa Nzambi Dihungila Dikulukulu ne Dihungila Dihia-dihia 2003

²⁰ Muena meshi udi hanyi? Mufundi udi hanyi? Muena mpata wa mu tshikondo etshi udi hanyi? Nzambi kakavuisha meshi a ba ha buloba mahote, anyi?

1 Korente 1:20 ပူးပေါင်းရင်းမြစ်များ

2 Samuele 15:31

Kuambilabu Davide ne: Akitofele udi munkatshi mua bantu badi ku luseke lua Absalome, bakeba mua kuangata bukalenga. Ke Davide kuamba ne: “Maweja-Nangila ndi nkusengelela ne: ngenyi yonsu idi Akitofele ufila, ikale ya budingidingi, kayiyi mimpe to”

2 Samuele 16:23

Tshikondu atshi, mubelu onsu uvua Akitofele ubela muntu, bavua bauteleja amu bu diyi dia Mvidi Mukulu mene. Nansha Davide nansha Absalome bavua bateleja ngenyi ayi, bayikumbaja.

2 Samuele 17:14

Absalome ne bena Izrayele kuamba ne: — Lungenyi lua Ushayi nduimpe lupite lua Akitofele! Maweja-Nangila ke uvua muenze bua babenge lungenyi lua Akitofele luvua luimpe. Bualu Maweja-Nangila uvua musue kukengesha Absalome.

2 Samuele 17:23

Akitofele umona ne: kabena bitabe lungenyi luende, kusuikaye biseba bia kusomba pa nyama wende wa mpunde, kupinganaye mu tshimenga tshia Ngilo, nuwuaye musombela. Kulayaye bena nzubu wende, pashishe kudiowaye. Kumujikabu mu lukita lua tatuende.

Yobe 12:17

Mvidi Mukulu, udi wendesha ku makasa kutupu bavua balombola ditunga. Udi ujimija lungenyi lua bantu bavua balumbuluila bantu nabu.

Yobe 12:20

Udi upuwisha bavua bamanye mua kufila lungenyi. Bantu bakulakaje, udi ubanyenga meji avuabu nawu.

Yobe 12:24

Udi utshimbisha bamfumu ba matunga, ubatambakajija mu tshipela kamuyi njila.

Yeshaya 33:18

Neuvuluke bowa buuvua nabu kale. Neukonke ne: “Bantu benyi bavua babala bajadika bungi bua milambu, ituvua bafile, badi penyi? Bavua bakenketa bimenga bietu, bituvua bakoleshe ne bimana, bepi?”

Yeshaya 44:25

Kadi mpindiewu malu onsu, adi bena mbuku bamba, ndi ngakudimuna a patupu. Bonsu badi bamanyisha malu atshidi kumpala, ndi mbapangisha malu abu. Ndi mbenga meji a bena meji, ndi ndeja mudi meji abu a bantu batshimbakane.

Yeshaya 53:1

Wa kutudi uvua mua kuitaba bualu, budibu batuambila mpindiewu, nnganyi? Wa kutudi uvua mua kuela meji a ne: Maweja-Nangila nealeje bukole buende nanku, nnganyi?

Yirmeya 10:7

Nanku bantu bonsu badi ne bua kukunemeka, wewe mukalenga wa bisamba bionsu bia pa buloba. Bualu bukalenga buonsu mbuebe wewe. Munkatshi mua bena meji bonsu ba pa buloba, munkatshi mua bakalenga bonsu, kamuena mukuabu bu wewe.

Matayi 13:22

Ntete idi ipona mu mitshi ya meba, ke badi bumvua muaku wa Mvidi Mukulu. Kadi disumpakana dia malu a bukua panu, ne mutshima wa biuma bia panu, bidi bikutakaja muaku, biupangisha mua kukuama bimuma.

Yowanane 12:31

Mpindiewu ke diba dialumbuluishabu bantu. Mpindiewu nebipate mfumu wa panuapa.

Bienzedi 17:18

Bamue balongeshi ba mu tshisumbu tshia bena Epikure, ne ba mu tshisumbu tshia bena Stowa, bavua bayukila kabidi nende. Bamue bavua bamba ne: — Tshidi muena lubuakabuaka ewu musue kuamba ntshinyi? Kadi pavua bakuabu bumvua Polu ulongesha bantu malu a Yezu ne a dibiika, bavua bamba ne: — Bidi bimueneka ne: udi ulongesha malu a mvidie ya bantu ba bisamba bikuabu.

Rome 1:20

Bualu katshia Mvidi Mukulu ufuka buloba, bilenga biende bidi kabiyi bimueneka ku mesu, — nkuamba ne: bukole buende bua tshiendelele, ne bu-Mvidi Mukulu buende, — bidi bimueneka mu midimu ivuaye muenze. Ke muaba udi bantu mua kubimanya. Nanku badi bapila ku mesu kuende.

Rome 1:22

Badi baditemba ne: tudi bena meji, kadi badi bantu bapale.

1 Korente 1:19

Ke padi Mukanda wa tshijila wamba ne: “Nembutule meji a bena meji, nembenge dimanya dia bena lungenyi.”

1 Korente 1:26

Bana hetu, nuditangile nuenu mene. Bavua Mvidi Mukulu mubikile bua kubanga tshisumbu tshienu mbanganyi? Luseke lua buntu buetu, munkatshi muenu mudi bena meji bakese, mudi badi ne bukole bakese, mudi bantu baneme amu bakese kabidi.

1 Korente 1:27

Kadi bua kufuisha bena meji bundu, Mvidi Mukulu mmusungule bidi bantu batangila bu bia bupale. Bua kufuisha badi ne bukole bundu, mmusungule bidi bantu batangila bu bidi kabiyi ne bukole.

1 Korente 1:28

Uvua musungule bantu bashadile, badibu bapetula, badibu kabayi bangata ne mushinga, bua kubutula badi badiamba ne: tudi baneme.

1 Korente 11:32

Kadi Mfumu udi utulumbuluisha, utunyoka, bua kabavu kutupisha pamue ne bantu bakuabu ba pa buloba dituku dia tshilumbuluilu.

1 Korente 2:6

Numanye ne: malu atudi tulongesha adi a meji, kadi amu bua bantu bakadi bashindame mu malu a Mvidi Mukulu. Nanku meji aa ki nga panu, nansha a bamfumu badi balombola buloba, bualu badi ne bua kubutuka.

1 Korente 2:8

Nansha umue wa ku bamfumu ba pa buloba ebu kavua mujingulule meji aa. Bu bobu baajingulule, kabavua mua kupopela Mfumu, udi wenza tshintu tshimue ne Mvidi Mukulu mu butumbi buende, pa mutshi mutshiamakane.

1 Korente 3:18

Muntu kaditshimbishi. Pikala muntu wa kunudi uditangila bu muena meji wa panuapa, adienze mupale, bua apete meji a bushuwa.

1 Korente 3:19

Bualu meji a panu adi bupale kumpala kua Mvidi Mukulu. Ke mudi Mukanda wa tshijila wamba ne: “Mvidi Mukulu udi ukuata bena meji mu buteyi bua budimu buabu.”

1 Korente 6:2

Kanuena bamanye ne: bena tshisamba tshia Mvidi Mukulu nebalumbuluishe bantu bonsu anyi? Panudi mua kulumbuluisha bonsu ba pa buloba, munukadi kanuyi mua kukosa nsambu mikese idi munkatshi muenu mbishi?

Yakobe 4:4

Nuenu nudi bantu badi babenga Mvidi Mukulu! Kanuena bamanye ne: kunanga bia panu nkubenga Mvidi Mukulu anyi? Udi unanga bia panu, udi musue kudienza muluishi wa Mvidi Mukulu.