1 Bakalenga 2:22 - MUKANDA WA MYIDI MUKULU

²² Shelomu kukonka mamuende ne: — Akia! Ke wewe udi ukimina kulombela Adoniya bua angate Abishayi, muena Shuneme! Nanku, umulombele kabidi ne bukalenga, bualu mmukuluanyi! Eyowa, umulombele bukalenga. Bantu badi baditua ku tshiende, mutuangaji Abiyatare ne Yowabe, mfumu mulombodi wa bena mvita, nebasanke bikole!

Mukanda wa Nzambi Dihungila Dikulukulu ne Dihungila Dihia-dihia 2003

²² Mukelenge Solomo wakakudimuna mamu wandi ne, Udi ulombela Adoniya Abishaga, Muena Shunama, bua tshinyi? Biakane umulombele bukelenge kabidi, bualu bua yeye udi mukulu wanyi: umulombele ne Ebeyatâ muakuidi, ne Yoaba, muana wa Seluya.

1 Bakalenga 2:22 ပူးပေါင်းရင်းမြစ်များ

2 Samuele 12:8

Mvua mufile bena nzubu wa mfumuebe Shawule mu bianza biebe. Mvua mukupeshe bakaji ba mfumuebe Shawule. Meme kuteka bena Izrayele bonsu ne bena Yuda ku bumfumu buebe wewe. Bionsu abi kabivua bikumbana anyi? Meme ndi mua kukuenzela malu makuabu a bungi.

2 Samuele 16:21

Akitofele kuandamuna lukasa ne: — Bakaji bonsu badi tatuebe Davide mushiye bua kulamabu nzubu wa bukalenga, ubabuelele mu nzubu, bua ushale muena lukuna wa tatuebe Davide. Pikala bena Izrayele bonsu bumvua bualu ebu, bantu badi batue ku tshiebe nebikale ne dikima.

1 Bakalenga 1:11

Nanku, muambi Natane kuya kudi Batsheba, mamuende wa Shelomu umuambila ne: — Bushuwa ukadi mumane kumvua ne: Adoniya, muana wa Agite, mmuditeke mu bukalenga. Kadi mukalenga Davide kena mumanye bualu ebu.

1 Bakalenga 2:15

Adoniya kumuambila ne: — Udi mumanye ne: meme mvua ne bua kuangata bukalenga ebu. Kabidi bena Izrayele bonsu bavua batekemena bua meme kuikala mukalenga. Kadi bualu kuenzeka mushindu mukuabu. Muanetu Shelomu kushala mu bukalenga pa muaba wanyi. Bualu Maweja-Nangila uvua musue bua bienzeke nanku.

1 Kulondolola 3:2

Muana muisatu uvua Abshalome. Mamuende uvua Maaka, muana wa Talmayi, mukalenga wa bena Ngeshure. Muana muinayi uvua Adoniya. Mamuende uvua Agite.

1 Kulondolola 3:5

Davide kulela bana bakuabu mu tshimenga etshi: Batsheba muana wa Amiyele, kumulelela bana ba balume banayi: Shima, Shobabe, Natane ne Shelomu.

Matayi 20:22

Yezu kuandamuna ne: — Kanuena bajingulule tshinudi nulomba nansha. Dikopu dia dikenga dinganua, nudi mua kudinua anyi? Bobu kumuandamuna ne: — Tudi mua kudinua.

Marke 10:38

Yezu kubandamuna ne: — Kanuena bamanye tshinudi nulomba to. Nuenu nudi mua kunua dikopu dindi ne bua kunua meme, nansha badi mua kunutua mu mayi bu mudibu mua kuntua anyi?

Yakobe 4:3

Panudi nulomba, kanuena nupeta, bualu meji anudi nubilomba nawu, adi mabi. Nudi basue kubipeta bua kudisankisha amu nkayenu.