Sefanya 2:9 - Mukanda wa Nzambi Dihungila Dikulukulu ne Dihungila Dihia-dihia 2003

⁹ Yehowa wa misumba, Nzambi wa Isalele mene, udi wamba ne, Bu mundi ne muoyo, Moaba neikale bu Sodoma, Bena Amona nebikale bu Amola, bu buloba bûle tente ne mpesa ne mena a luehu, bu tshihela tshia tshianana tshiendelele. Difuka dia bantu banyi nedibahaule, ba mu tshisamba tshianyi badi bashala ne muoyo nebabahiane.

MUKANDA WA MYIDI MUKULU

⁹ Meme Maweja-Nangila wa bukole buonsu, Mvidi Mukulu wa bena Izrayele, ndi nditshipa ne: bu mundi ne muoyi, ndi njadika bulelela ne: nebabutule ditunga dia bena Mowabe ne dia bena Amone, bu muvuabu babutule tshimenga tshia Sodome ne tshia Ngomore. Buloba buabu nebushale tshipela tshiendelele. Nemuikale amu meba ne bina bia luepu. Bantu banyi badi bashale ne muoyi, nebafike bua kubapawula, ne bua kukuata ditunga diabu.”

Sefanya 2:9 ပူးပေါင်းရင်းမြစ်များ

Yeshaya 11:14

Nebâuke ha diaha dia Bena Peleshete ku luseke lua wesete, ne bubidi buabo nebanyenge bintu bia bena luseke lua esete. Nebolole bianza biabo bua kukokesha Edome ne Moaba, ne Bena Amona nebatumikile mei abo.

Yeshaya 25:10

Bua tshianza tshia Yehowa netshikole ha mukuna eu, ne nebatuale Moaba hanshi hadiye mushikame, bu mudibo badiata bisonsa hanshi mu mai a diala dia tunvi tua bimuna.

Yeshaya 49:18

Bandulukaku, tangila nseke yonso, umone biebe! Bantu aba bonso badi badisangisha hohamue, badi balua kûdi. Yehowa udi wamba ne, Bu mundi ne muoyo, wewe neudiluatshishe ne buonso buabo bu tshilenga, neudijingile nʼabo bu mudi mukashi udi wamba kuya ku dibaka wenza.

Yirmeya 46:18

Mukelenge udi ne dina ne, Yehowa wa misumba, udi wamba ne, Bu mundi meme ne muoyo, mukuabo nealue bulelela bu Tabô munkatshi mua mikuna, anyi bu Kâmele udi ku muelelu wa mai manene.

Yirmeya 48:1

Bualu bua Moaba. Yehowa wa misumba, Nzambi wa Isalele, udi wamba ne, Mulau wikale kudi Nebo! Bualu bua udi munyanguke; Kîyata-ayima udi mukuatshike bundu, udi munyengibue; muaba udibo bakolesha ne bielelu bia nvita udi mukuatshike bundu, bakûtamba bukole.

Yirmeya 49:1

Bualu bua Bena Amona. Yehowa udi wamba ne, Isalele kena ne bana balume, anyi? Kena ne muhianyi wa bintu biandi, anyi? Kadi Milekoma wakumana buloba bua Gada munyi? Bantu bandi badi bashikame mu misoko yau bishi?

Yirmeya 49:18

Yehowa udi wamba ne, Bu muakadi kubutula kua Sodoma ne Amola, ne misoko yakadi hehi nʼai, kakuena muntu washikamamu, kakuena muana wa muntu watulamu.

Yirmeya 49:33

Hasô newikale muaba wa mibuabua kushikamayi, newikale tshikutu tshiendelele; kakuena muntu washikamamu, kakuena muana wa muntu washalamu.

Yirmeya 50:40

Yehowa udi wamba ne, Bu muakashiha Nzambi Sodoma ne Amola ne misoko yakadi ha buihi, nunku kakuena muntu washikamamu, kakuena muana wa muntu watulamu.

Amosa 1:13

Yehowa udi wamba dî edi ne, Bua malu mabi asatu a Bena Amona, nansha bua anai, tshiena nkudimuna dikenga dindualua kubakengesha nʼadi; bualu hua bakahanda bakashi ba mu Gilada bakadi ne mafu, bua bamanye mua kulehesha mikalu yabo.

Amosa 2:1

Yehowa udi wamba dî edi ne, Bua malu mabi asatu a Bena Moaba, nansha bua anai, tshiena nkudimuna dikenga dindualua kubakengesha nʼadi; bualu bua bakosha mifuba ya mukelenge wa Edome, yakalua luhemba.

Sefanya 2:14

Bisumbu bia nyama nebilale hanshi munkatshi muau, nyama ya mu mpata ya mishindu yonso. Mpunga tshikola ne nkese nebishikame ha mutu ha bibumba; nyunyu mikuabo bu tshihungulu ne tshikololo neyele dî mu masoso a nsubu; dibutuka nedikale mu mbelu yonso, bualu bua yeye wakamuenesha hatoke tô miaba yakalengeshabo ne mabaya a cêdre.

Sefanya 2:7

Buloba budi ku muelelu wa mai manene nebuikale bua difuka dia Bena Yuda. Nebadishilemu mikoko yabo. Butuku nebalale mu nsubu ya mu Ashekelona. Bualu bua Yehowa Nzambi wabo neahingane kudibo, neabumushe mu buhika bua kubaha diakalengele.

Sefanya 3:13

Ba mu Isalele batshidi bashala kabena benza malu mabi kabidi, kabena bamba mashimi; kabena basangana mukana muabo ludimi ludi ludinga; bualu bua nebadie ne nebalale hanshi; kakuena kuikalaku muntu wabatshinyisha.

Zekâya 2:13

Huwai ku mpala kua Yehowa, nuenu bonso ba ha buloba; bualu bua yeye wakatabala mu muaba wandi wa tshijila.

Dibadika 14:21

kadi bulelela, bu mundi ne muoyo, ne bu mudi buloba bûle tente ne butumbi bua Yehowa,

Rome 14:11

Bua badi bafunda ne, Mukelenge udi wamba ne, Bu mundi ne muoyo, muntu yonso neantuile binu hanshi, Ne ludimi luonso nelutumbishe Nzambi.

Dielulula 29:22

Mu tshihungu tshia bantu tshidi tshitua, bana benu badi banulonda ku nyima ne benyi badi bafuma ku buloba bukuabo, hatangilabo makenga akalua ku buloba abu ne masama onso adi Yehowa mubatumine

Dielulula 29:23

ne buloba buonso budi bu butue ne luehu ne bintu bioshibue, kabena bakunamu tshintu, kabena bahuolamu tshintu; ne mashinde kaena amenamu: buloba budi buikala bu kubutuka kua misoko ya Sodoma ne Amola ne Adema ne Seboima yakashiha Yehowa mu tshiji tshiandi tshikole;