Osheya 10:14 - Mukanda wa Nzambi Dihungila Dikulukulu ne Dihungila Dihia-dihia 2003

¹⁴ Nunku diyoyo nedijuke munkatshi mua bana benu, misoko yenu yonso ya ngumbu ya nvita neyibutudibue, bu muakashiha Shalamana Bete-âbela mu dituku dia nvita; bakatshibula bamamu ne bana bakalelabo diatshimue.

MUKANDA WA MYIDI MUKULU

¹⁴ Nanku, diyoyi dia mvita, nediumvuike munkatshi muenu. Bimenga bienu bionsu, bivuabu bakoleshe ne bimana, nebabiupule, anu muvua mukalenga Shalmane mupule Bete-Arbele, muzaze bamamu musangu umue ne bana bavuabu balele.

Osheya 10:14 ပူးပေါင်းရင်းမြစ်များ

Genese 32:11

Ndi nkutendekena ne, Unsungile mu bianza bia mukuluʼanyi Esau, ndi mmutshina ne yeye nealue kunshiha ne bamamu ne bana.

2 Bakalenga 17:16

Bakabenga mikenji yonso yakabambila Yehowa, Nzambi wabo, bakadienzela mpingu ya tshiamu tshiakafulabo, tuana tua ngombe tubidi mene mene; bakadienzela Bashela, bakatendelela bintu bionso bia mu diulu, bakakuatshila Bâla mudimu kabidi.

2 Bakalenga 17:3

Shalamanese, mukelenge wa Ashû, wakaluangana nʼandi; Hoshea wakalua muntu wandi, wakamulambula milambu.

2 Bakalenga 18:33

Munga nzambi wa mu bisamba bikuabo wakusungila buloba buandi mu bianza bia mukelenge wa Ashû, anyi?

Yeshaya 17:3

Nebumushile Efelayima musoko wandi wa lumbu wakadi tshieyemenu tshiandi mu nvita, nebumushile Damaseke bukelenge buandi; ne bantu ba mu Sulia batshidi bashalamu ne muoyo nebikale bu butumbi bua Bena Isalele.

Yeshaya 33:14

Bantu babi ba mu Siona badi batshina; lukanku luakukuata badi kabayi bitabusha Nzambi. Muntu kai wa munkatshi muetu udi mua kushikama hehi ne kadilu kadi kashidisha? Muntu kai udi mua kushikama hehi ne kahia kadi kosha tshiendelele?

Yirmeya 13:14

Yehowa udi wamba ne, Nembatutakashangane, batatu ne bana babo hohamue; tshiena mbafuila luse, tshiena mbasungila, luse kaluena lunkuata bua bualu buabo, kakuena tshintu tshidi mua kunkanda bua meme kubabutula.

Yirmeya 48:41

Nebahite misoko yandi bukole, nebanyenge misoko idi ne ngumbu ya mabue; mitshima ya bena bukitu ba mu Moaba neyikale bu mutshima wa mukashi udi ne didinyenga dia ha kuleleye.

Osheya 10:15

Nuenu Bena Isalele, nebanuenzele nunku bualu bua bunene bua bubi buenu; hatshiabu, mukelenge wa Isalele neabutudibue kabutu.

Osheya 13:16

Bena Samalea nebahishibue bualu bua bakutombokela Nzambi wabo. Nebafue ku muele wa nvita, bana babo batekete nebakoshibue bituha, ne bakashi babo badi ne mafu nebahandibue.

Amosa 3:14

mu dituku dinatumina Bena Isalele makenga bua malu mabi abo, nenshihe bioshelu bia Betele; nebakose nsengu ya ku tshioshelu ne neyihone hanshi.

Amosa 3:8

Nyama wa ntambue udi mukungule; nganyi udi kayi utshina? Yehowa Nzambi udi wamba dî diandi; muprofete kai udi kayi udiambila bantu?

Amosa 9:5

Bualu bua Yehowa, Nzambi wa misumba, nyeye udi ulenga buloba tshianza ne budi buvingutuka, ne bonso badi bashikamehu badi basa muadi. Buloba buonso budi bubanda bu mudi musulu wa Nile ubanda, budi buhueka kahidi, bu mudi musulu wa Ejipitu uhueka.

Mika 5:11

Nenshihe misoko minene ya mu buloba buenu, nenshimbule ngumbu yenu yonso ya nvita.

Nahume 3:10

Kadi bakaya nʼandi kukuabo, wakabuela biandi mu buhika Bakashiha bana bandi batekete mu misesu yonso, bakelela bantu bandi baneme nshobo, bakasuika bantu bandi ba butumbi ne nkanu.

Nahume 3:12

Ngumbu yebe ya mata neyikale bu mitshi ya nfigi idi ne tumuma tubobe, bianyungishabo mitshi, tumuma didi dihona mukana mua mundi udi ne nzala.

Abakuke 1:10

Badi bahetula bakelenge, badi baseka bakokeshi. Badi baseka ngumbu yonso ya nvita; bualu bua badi bela mishiki ya buloba bua kubandilahu bua kuhita musoko bukole.