1 Korente 14:2 - Mukanda wa Nzambi Dihungila Dikulukulu ne Dihungila Dihia-dihia 2003

² Bualu bua muntu udi wakula muaku udi bantu kabai bamanye, kena wakula kudi bantu kadi udi wakula kudi Nzambi; bualu bua kakuena muntu udi unvua dî diandi; kadi mu nyuma wandi yeye udi wamba malu atshidi masokoka.

MUKANDA WA MYIDI MUKULU

² Bualu udi wakula miakulu idi bantu kabayi bamanye, kena uyukila ne bantu, kadi amu ne Mvidi Mukulu, bualu muntu nansha umue kena ujingulula bidiye wamba. Ku bukole bua Mueyelu udi wamba malu masokome.

1 Korente 14:2 ပူးပေါင်းရင်းမြစ်များ

Genese 11:7

Tuyai bietu hanshi, tutompakashe muaku wabo, nunku kabena mua kunvuangana muaku wabo kabidi.

Genese 42:23

Bobo kabakamanya ne, Yosefe wakadi ujingulula mei akadibo bambilangana, bualu bua muandamunyi wa miaku wakadiku.

2 Bakalenga 18:26

Hashishe Eleyakima, muana wa Hilekiya, ne Shebena ne Yoa bakambila Labashake ne, Tudi tukusengelela ne, Uyikile ne bantu bebe mu muaku wa Bena Sulia, bualu bua tuetu tudi baumanye; kuyikidi nʼetu mu muaku wa Bena Yuda mu matshu a bantu badi ha lumbu.

Misambu 78:2

Nembulule mukana muanyi bua kunuelela lusumuinu; nennuambile malu masokome akadiku kale.

Matayi 13:11

Yeye wakabandamuna ne, Bakanuha bienu lungenyi lua kumanya malu a bukelenge bua mu diulu adi masokoka, kadi kabakabahalu.

Marke 16:17

Bimanyinu ebi nebifile badi bitabushe: nebumushe bademon munda mua bantu mu dina dianyi; nebakule miaku mihia-mihia;

Marke 4:11

Yeye wakabambila ne, Badi banuha nuenu malu a bukelenge bua Nzambi adi masokoka, kadi badi bambila bantu ba bende malu onso mu nsumuinu;

Bienzedi 10:46

Bakabunvua bakula mu miaku mikuabo, batumbisha Nzambi. Petelo wakakonka ne,

Bienzedi 19:6

Hakabatentekesha Paulo bianza ha mitu habo, Nyuma Muimpe wakabahuekela; bakabanga kuakula mu miaku mikuabo, bamba bualu bua Nzambi.

Bienzedi 22:9

Bakadi nʼanyi bakatangila munya bulelela, kadi kabakajingulula dî dia wakadi wakula nʼanyi.

Rome 16:25

Butumbi buikale kudi Nzambi, udi ne bukole bua kunujadika bu mudi lumu luimpe luanyi ne kuamba kuanyi kua Yesu Kilisto, bu mudi dibuluibua dia bualu busokoko buakadi buhuwishibue ku bikondo bia tshiendelele;

1 Korente 12:10

mukuabo udi uhebua mua kuenza malu a kukema; mukuabo udi uhebua mua kuambila bantu bualu bua Nzambi; mukuabo udi uhebua mua kujingulula nyuma; mukuabo udi uhebua mua kuakula miaku ya bungi; ne mukuabo udi uhebua mua kujinguluila bantu miaku;

1 Korente 12:28

Ne Nzambi wakateka bakuabo mu ekelesia: ba kumudilu bapostolo, bibidi baprofete, bisatu bayishi, hashishe, malu a kukema, ne bihedi bia kuondaha, ne bakuatshishi, ne bakokeshi ba bantu bandi, ne lungenyi lua kuakula miaku ya bungi.

1 Korente 13:1

Biakula ne ndimi ya bantu ne ya banjelo, kadi bingikala tshi ne luse, nakulua bu tshiamu tshia mitaku tshidibo bakuma, anyi bu dikasa didi diakula.

1 Korente 13:2

Ne bingikala ne tshihedi tshia kuambila bantu dî dia Nzambi, ne binamanya malu onso atshidi masokoka ne lungenyi luonso, ne bingikala ne ditabusha dionso dindi mua kumusha nʼadi mikuna, kadi bingikala tshi ne luse, ndi tshianana.

1 Korente 14:16

Anyi, biwatendelela Nzambi anu ne nyuma, muntu udi munkatshi mua badi kabai ne bihedi bia Nyuma udi mumanye mua kuamba ne, Amen, munyi, hawasakidila Nzambi, hadiye kai mumanye dî diudi wamba?

1 Korente 14:26

Nunku ntshinyi, bana betu? Hanuadisangisha, muntu ne muntu udi ne musambu, udi ne diyisha, udi ne bualu buakabuluibua kudiye, udi ne muaku udibo kabai bamanye, udi ne kujingulula kua muaku. Malu onso enjibue bua kunudiundisha.

1 Korente 15:51

Monai, ndi nuambila bualu busokoka: Buonso buetu katuena tulala tulu mu lufu, kadi buonso buetu netuandamuke,

1 Korente 2:10

Kadi Nzambi wakatubuluila malu â mu Nyuma Muimpe; bualu bua Nyuma udi ukebakeba malu onso, tô ne ku malu male a Nzambi.

1 Korente 2:7

Kadi tudi tuamba meshi a Nzambi mu bualu busokoka, meshi mene akadi masokoka, akadianjila Nzambi kusungula ku mpala kua bikondo bionso bua butumbi buetu.

Efeze 6:19

ne bua bualu buanyi kabidi, bua meme kuheshibua mua kuakula hanabulula mukana muanyi ne bua meme kumanyisha bantu ne dikima bualu bua lumu luimpe busokoka.

Dielulula 28:49

Yehowa neanutumme tshisamba tshia kule kuakua ku ditunga dikuabo bu nyunyu wa mukanku; kanuena bamanye muaku wa tshisamba atshi;

Kolose 2:2

bua mitshima yabo isambibue, bobo basuikakasha ku luse tô ne ku bubanshi buonso bua kumanya kujalama kua dijingulula diabo, bua bobo bamanye bimpe bualu bua Nzambi buakadi busokoka, nKilisto mene.

1 Timote 3:16

Ne kakuena mpata ya bunene bua bualu busokoka bua buimpe bua Nzambi: Nyeye wakamueneshibua mu mubidi wa muntu, Wakabingishibua mu nyuma, Wakamuenebua kudi banjelo, Wakambibua munkatshi mua bisamba bia bende, Wakitabushibua ha buloba, Wakangatshibua mulu ne butumbi.

1 Timote 3:9

balame bualu busokoka bua ditabusha mu muoyo-mukese mutoke.

Didimanyisha 10:7

kadi mu matuku a dî dia muanjelo wa muanda mutekete, hadiye wamba kuela mpungi, mpadi bualu busokoka bua Nzambi bushika, bu mudi lumu luimpe luakambileye bahika bandi, baprofete.