Jeremia 23:14 - Tshwa Bible

¹⁴ Kanilezi hi ka vaprofeti va Jerusalema nzi wonile a zilo zo tshisa nguvu: Vona va maha wuoswi, va hemba mawunwa; Va tiyiseta a mawoko ya vamahi va kubiha, Lezaku kasi ku nga hunzuluki ni munwe kubiheni kakwe. A ka mina va fanana ni Sodoma, Ni vaaki va Jerusalema va kota Gomora. Gen. 13:13; Deut. 32:32; Ezek. 13:22

Jeremia 23:14 ပူးပေါင်းရင်းမြစ်များ

Genesisi 13:13

Kanilezi a vanhu va le Sodoma va wa bihile, va wa onha nguvu mahlweni ka Jehova.

Genesisi 18:20

Jehova i te ngalo: Kota lezi a huwa ga le Sodoma na Gomora gi nga ga hombe, ni lezaku a zionho zabye za tshisa;

Genesisi 19:24

zonake Jehova i lo nisa a solufa ni nzilo hehla ka Sodoma ni Gomora, zita hi ka Jehova le tilweni. Deut. 29:23; Isa. 13:19; Lu. 17:29

Genesisi 19:25

I lo hetisa leyo miti ni nkova wontihe, ni vontlhe va akileko ka leyo miti, hi lezi zi kulako misaveni.

Isaya 9:15

A hloko hi masingalakati ni vadzunzekileko, Kanilezi a vaprofeti va profetako mawunwa i nkila.

Jeremia 14:14

Jehova i lo nzi hlamula, aku: A vaprofeti va profeta mawunwa vitweni ga mina. A nzi va rumangi, a nzi va layangi; a nzi wulawulangi nchumu kabye. Va profeta ka nwina a miwoniso ya mawunwa ni kuvumba, a zilo za mahala za kukhohlakala ka timbilu tabye.

Jeremia 18:13

Hikwalaho Jehova i ngalo: Wutisani xikari ka matiko loku a hi kona a nga ngazwa a zakunghahi. A nhwana wa Israeli i mahile xilo xo tshisa nguvu.

Jeremia 20:16

A munhu loye ngha a fanana ni miti Leyo Jehova a yi hahlulako na a nga yi tsetsi. Ngha yena azwa tihuwa laha mixweni, Ni huwa ya yimpi laha hlikanhini; Gen. 19:24; Lu. 17:29; Juda 7

Jeremia 23:17

Va kanela hi kusimamisilweko a ka lava va nzi kanyisako, vaku: Jehova i ngalo: Mu ta tshameka khwatsi. Ni ka vontlhe va fambako hi kunonoha ka timbilu tabye, vaku: Gi nga tata khombo hehla ka nwina!

Jeremia 23:22

Loku va wa yimile hubyeni ya mina, ngha va tivisile a vanhu va mina a timhaka ta mina, va va hunzulusa ndleleni yabye yo biha, ni ka zimaho zabye zo biha.

Jeremia 23:32

Ina, nza vukela lava va profetako miloro ya mawunwa, ku wula Jehova, loku va yi hlawutela va hambukisa a vanhu va mina hi mawunwa yabye ni kubyabyatsa kabye. Kasi mina a nzi va rumangi, hambu ni ku va laya; a va vuni nchumu ka lava vanhu, ku wula Jehova.

Jeremia 29:21

Jehova wa tiyimpi, a Nungungulu wa Israeli i ngalo xungetano ha Ahabi a nʼwana Kolaya, na Zedekia a nʼwana Maaseya, lava va mu profetelako mawunwa vitweni ga mina: Langata, nzi ta va nyikela canjeni ga Nebukadnezzare, hosi ya Babuloni; yena i ta va daya mahlweni ka nwina.

Jeremia 29:23

Hakuva va mahile wupumbu lomu ka Israeli, va bhaya ni vasati va vaakelwane, ni ku wulawula timhaka ta mawunwa vitweni ga mina, leti nzi nga va layangiko. Mina nza zi tiva, niku nzi mboni, ku wula Jehova.

Jeremia 36:2

Ti tekele a bhuku u tsala tontlhe timhaka leti nzi ku byelileko ha Israeli na Juda, ni xungetano hi wontihe matiko, a kusukela a siku lego nzi nga wulawula na wena a masikwini ya Josia kala nyamutlha lezi.

Jeremia 49:18

Khwatsi hi kuhahlulwa ka Sodoma ni Gomora, ni miti ya kona ya lomu kusuhani, ku wula Jehova, ku nga ha aki munhu kona, ge hambu a nʼwana wa munhu a luvela kona. Gen. 19:24; Jer. 50:40

Mikosi 4:6

Hakuva a xionho xa nhanyana wa tiko ga mina xa hombe ku hunza xionho xa Sodoma, Loyi a nga lobyiswa hi xitshuketi, na a nga tlhatekiwangi mandla ya munhu.

Ezekieli 13:16

va nga vona vaprofeti va ka Israeli, lava va profetako hi Jerusalema, va wona miwoniso ya kurula, kasi lezo a ku na kurula, ku wula Hosi Jehova.

Ezekieli 13:19

Mu nzi nyenyezisile xikari ka vanhu va mina hi kota ya macanja ya mavele, ni zipanzana za xibaba, na mu daya a mihefemulo leyi yi nga faneliko kufa, mu ponisa a mihefemulo leyi yi nga faneliko ku hanya, na mu kari mu hemba ka vanhu va mina lava va ingisako mawunwa.

Ezekieli 22:25

Ku na ni gujeguje xikari ka vaprofeti va nga ka gona, khwatsi i nghala leyi yi dzumelako a pfimba. Vaga mihefemulo ya vanhu, va wutla titshomba ni zilo za lisima; va anzisa a tsengo wa tinoni xikari ka gona. Mika 3:11; Mar. 12:40

Hosea 6:10

Ndlwini ya ka Israeli nzi wonile zilo zo tshisa: Efraime i maha wubhayi lomo, Israeli a ti nyenyezisa. 1 Tih. 12:28; 2 Tih. 17:7

Amosi 4:11

Nzi mu lovisile khwatsi hi laha Nungungulu a nga lovisa Sodoma ni Gomora, mu lo pona ku fanana ni lihunyi li susilweko nzilweni; hambu zi hi tano, a mu hunzulukangi ka mina, ku wula Jehova. Gen. 19:24; Isa. 13:19

Mika 1:5

Zontlhe lezo zi ta maheka hi kota ya zihambunyeto za Jakobe ni zionho za yindlu ya ka Israeli, A xihambunyeto xa Jakobe xi huma kwihi? A hi le Samaria ke? Hi wahi a matshamu yo tlakuka ya ka Juda? A hi Jerusalema ke?

Mika 3:11

A tihosi ta kona ti lamula hi ku xavelelwa, a vapristi va kona va gonzisa hi ku fela nzhiho, a vaprofeti va kona va vumbela mali: kanilezi va ti seketela ha Jehova, vaku: Kasi Jehova a nga xikari ka hina ke? a kubiha a ku na ku hi wela!

Zefania 3:4

A vaprofeti va wona mbo ti kulisa, va nga tsumbekahgiko; a vapristi va wona va nyenyezisile a wutshamu ga kubasa, va byeketa nayo. Jer. 23:11, 32; Ezek. 22:26

Zakaria 13:2

Hi siku lego, ku wula Jehova wa tiyimpi, nzi ta fuvisa a mavito ya zifananiso laha tikweni, zi nga ha alakanyiwi kambe. Nzi ta hlongola a vaprofeti ni moya wu nga hlazekangiko lomu tikweni. Ezek. 30:13; Hos. 2:17; 1 Joh. 4:1

Malaki 1:1

A mhaka ya xiprofeto xa Jehova ka Israeli hi nomu wa Malaki.

Mateu 11:24

Ahemba nza wula ka wena, lezaku ku ta hehuka ka tiko ga le Sodoma hi siku ga kulamula ku hunza wena. Xip. 10:15

Deuteronome 32:32

Hakuva a xivina xabye xi huma sinyeni ya Sodoma, Ni le masinwini ya Gomora; A mauva yabye mauva ya nyongwa, Zitata za wona za bava. Ezek. 16:49

1 Timote 4:2

hi kota ya wuxengeteli ga vanhu va kanelako mawunwa, lava a livalo labye li hisilweko khwatsi hi xiketse xo hisa. Efe. 4:19

2 Pedro 2:6

I lo lamula a miti ya Sodoma ni Gomora a kuva yi lobyisiwa, yi maha khuma, a yi yimisa a kuva xikombiso ka lava va ta nga kala va nga hanyeli Nungungulu. Gen. 19:24; Mitse. 26:10

Juda 1:7

Kota Sodoma ni Gomora ni miti ya kona, leyi yi nga ti nyikela wubhayini, ni ku lanzela nyama ya hava, yi yimisilwe a kuva xikombiso, yi tsayiswa hi nzilo wa pinzukelwa.

Kuvululelwa 11:8

Ni zirumbi zabye zi ta su chanjala lomu ruweni ga muti wa hombe, lowu wu chuliwako hi moya, aku i Sodoma ni Gipite, laha Hosi yabye yi nga belelwa kona. Maheb. 13:12; Xip. 14:8; 17:1, 5

Kuvululelwa 19:20

A xihari xi lo khomiwa zinwe ni muprofeti wa mawunwa, loyi a nga maha zirewukiso mahlweni ka xona, lezi a nga khohlisa ha zona lava va nga wa amukele a xifungo xa xihari, ni lava va nga khozela a xifananiso xa xona; hi wumbiri gabye va lo hoxwa na va ha hanya lomu tiveni ga nzilo legi gi vurako hi solufa. Dan. 7:11; Xip. 13:12; 14:10; 16:13

Kuvululelwa 21:8

Kanilezi a matoya, ni vangakholwiko, ni va manyala, ni vadayi, ni zibhayi, ni valoyi, ni vakhozeli va zifananiso, ni vontlhe vahembi, va ta kuma xiavelo xabye le tiveni legi gi vurako hi nzilo ni solufa; hi kona a kufa ka wumbiri. 1 Kor. 6:9; Gal. 5:19-21; Efe. 5:5

Kuvululelwa 22:15

Lava va nga timbyana va tshamile lahandle, zinwe ni valoyi, ni zibhayi, ni vadayi, ni vakhozeli va zifananiso, ni vontlhe lava va ranzako mawunwa va tira ha wona. 1 Kor. 6:9, 10; Gal. 5:19; Kol. 3:6