Ngalaatiya 2:16 - Musamu wu Mubwe

¹⁶ Bisu liyaabi ti Nzambi ni wu ubaasa ti muutu aba wu akuha mu imiinu hya nde mu Yisu Kristo. Ka a bu nde ubaaduukala Mikele mya Moose ve. Mono buni bisu Bayudaayo kaka, laamiisa imiinu mu Yisu Kristo, mana bisu liba ba baakuha mu imiinu mu nde. Bisu a lili ba baakuha ŋa busu bwa Nzambi, mu kuhisili Mikele mominimi ve. Muutu tso mumosi utwala umonehele wu akuha ŋa busu bwa Nzambi, bu nde ubaakuhasa Mikele ve.

Ngalaatiya 2:16 ပူးပေါင်းရင်းမြစ်များ

Yowani 20:31

Ka mambu ma baasonehe hutso libuuku, baasonehe mo mana benu lisa imiinu ti Yisu ni Kristo. Nde ni Mwana a Nzambi. Na bu benu luusa imiinu, benu luubaha monyi mu nduhi a nde.

Mavanga 4:12

Liyobolo ndulu mu nde lili. Mu tsi yoosi, Nzambi a hava muutu mukima ve ŋa hati la baatu, wu ufuuhasa bisu a benu.»

Looma 1:17

Ni mu buuna, Musamu wu Mubwe li mu umwese bunuubu: Nzambi ubaatsikaha butsiitsa bwa baatu, mu tangu yi bo bali mu usa hiitu mu nde, we bu baasonehe mu ma Ngidi: «Mutsiitsa uba monyi mu imiinu.»

Looma 3:30

mu toni ati, Nzambi ndulu mosi ali! Ni nde ukuhasa ba baakete mu imiinu, na ba baavelekete mu imiinu.

Looma 4:2

Tso Nzambi asiingi ti Abrahami li wu akuha mu toni mavanga, Abrahami utwala ubula mabyoho. Ka a ŋa busu bwa Nzambi ve.

Looma 4:24

Baasonehe mikuma momiina kaka mu bisu. Bisu ba buusiinga ti imiinu hya bisu hili hi hyakuha, mu toni ati libaasa imiinu mu Nzambi wu asuuli Yisu Kristo Pfumu a bisu, ŋa hati la babakwa.

Looma 8:3

Mambu ma Mikele mya Moose myakaveletwala uvanga, mu toni ikolili hi bumuutu, Nzambi avangi mo. Nde atsindihi Mwana a nde mu uba monyi mu linyutu li musunya, mana nde amaasa mukele lisumu, na uva lisumu tyembili mutso a nyutu.

Looma 9:30

Hima luleele mu tangu yi? Bunuubu: baatu ba matsi makima ba baavelesaha uba ba butsiitsa ŋa busu bwa Nzambi, baaka ba butsiitsa ŋa busu bwa nde mu imiinu;

Ngalaatiya 4:5

Mwana mo hayidi mu uyobolo ba baaba hutsina lituma li Mikele, na mu uva bisu bunyanga mu ukituha baana ba Nzambi.

Ngalaatiya 5:4

Benu ba libaasaha usungama ŋa miisu ma Nzambi, ndulu mu kuhisili Mikele, benu laamiitahuha na Kristo. Benu lamiipala mu lisyeme la Nzambi.

Filiipo 3:9

Me atsiidi buuna, mana bayabiisa me wu akangama mu nde mu butsiitsa bu imiinu mu Kristo. A mu butsitsa bwa me, bu buumata mu Mikele ve. Ka mu imiinu hi hyasiingama mu Kristo, me umba butsitsa. Ni butsiitsa bu buumata huli Nzambi.

1 Peetelo 1:2

Taata Nzambi atswamini usoolo benu, we bu huli matsimi ma nde. Nde miikitusa benu ibandu hya ngidi, mu likumbasa li Livupu la nde. Nde hasiidi buuna, mana benu lisiingala Yisu Kristo, na makila ma nde ma maapuhimi matsyemese benu. Nyaha Nzambi asyeme benu na ava benu hyenze hi hyafulala.

1 Peetelo 2:24

«Nde abiti nde mwakulu masumu ma bisu», mu nyutu a nde ŋa muti. Nde hasiidi buuna, mana bisu liba we baatu babaakwa ŋa busu bu masumu, na ubaha monyi mu ukuhasa butsiitsa. Eeye, basonehe ti: «Ni mu toni a mbuma a nde benu laabeloho.»

1 Peetelo 3:18

Ka Kristo nde mwakulu amoni pasi ya nzyeni, mu toni masumu ma baatu. Nde wa tsiitsa, mu babaaveletsiitsa, mu ubita benu huli Nzambi. Baadubi nde mu linyutu, ka Nzambi asuuli nde mu Livupu.

2 Peetelo 1:1

Ni me Simoni Peetelo, musalili na ilumbi hya Yisu Kristo. Me ndi mu utsonehele huli benu, ba lili na imiinu hya tsongo we hya bisu mu hyese hya Yisu Kristo, Nzambi na Muyobili a bisu.

1 Yowani 1:7

Ka tso bisu lili mu udyata mutso liyalala we bu nde mwakulu Nzambi ali mutso liyalala, bisu lili itwadi bana na bana. Na makila ma Mwana a nde Yisu, mali mu utsyemese bisu mu masumu moosi.