Taata a me aviidi me byosi ŋa myoho mya me. A huli na muutu wu uyaba Mwana ni na, tso a ni Taata ve. Na muutu a hayaba Taata ni na, tso a ni Mwana ve, na huli nde wuna ka wu Mwana atondi usaangula lo.»
Mwana tangu hoole, me a humbwemba mu tsi ve, me upfutaha huli we Taata. Ka uto ti bo, bo bali ba tsi. We wu li wa ngidi, keelese bo itwadi na we, we wu li itwadi na me. Mana bo baba muutu mumosi, we bu we na me lili muutu mumosi.
Ŋa me mbeedi na bo, me akeelisi itwadi hya bo na we, we wu li itwadi na me. Me akalana bo, na tso muutu mumosi mu bo a hanyambana ve, vengo muutu mumosi wu baanenge mu unyambana, mana ma baasonehe mu Mabuuku ma Ngidi matswiha.
Nzambi asyenuli nde mu matwala ma nde, abyalisi nde we Pfumu na Muyobili. Nzambi hasiidi buuna, mana bisu Isereli basobo mbiili a bo, na bayaka nyahulili masumu ma bo.
Buuna, nduhi a Pfumu a bisu Yisu sa bayusa mu toni a benu. Na sa bayuusa benu mu toni a nde. Hiina sa hiba iliimbu hya hyese hya Nzambi a bisu na Pfumu a bisu Yisu Kristo.
Mu toni ati, Taata Nzambi ava nde likinzu na muyusu, ŋa ndaha a nde yi yapali hutso mayidu ma muyusu yaleeli: «Wunuwu ni Mwana a me wu litondo, wu li mu usa kinya a me yoosi.»