1 Tesalonika 2:12 - Musamu wu Mubwe

¹² Bisu laahwadisi benu, laabombisili benu na laayelisi benu mu ubaaba na mbiili yi yafwana ŋa busu bwa Nzambi. Nde wu li mu uteele benu mu ukoto mu ipfumu hya nde na mu muyusu a nde.

1 Tesalonika 2:12 ပူးပေါင်းရင်းမြစ်များ

Looma 8:28

Bisu liyaabi ti pasi bisiha bibaavangama mu libwe la ba baatondo Nzambi, na ba nde hateele we bu huli kesili a nde.

Looma 8:30

Baatu ba Nzambi hatswamini usoolo, nde ateeli kaka bo. Ba nde hateeli, nde akitusi bo kaka ba butsiitsa ŋa busu bwa nde, ba nde hakitusi ba butsiitsa, nde aviidi bo kabu li muyusu a nde.

Ngalaatiya 5:16

Ni mu buuna, me ndi mu undeele bu: Nyahani Livupu libaatuma idiingu hya benu. Tso lisidi buuna, benu alubwesingala tso hole, lituma li mapeyu ma musunya ve.

Filiipo 1:27

Pasi bu buuyiila, dyataani we bu hwayelemene na Musamu wu Mubwe wa Kristo. Tso me nzidi, tso me pelinza, me mbanzuha babaaleele ti, benu laavangama mu matsimi mamosi, na lili mu usala itwadi mu mutima mumosi, mu ulwanila Musamu wu Mubwe wu bisu laayaki.

1 Tesalonika 4:1

Hutsyelele, benu laayihi huli bisu mbiili yi benu lafwana uba na yo mu ubaamwese Nzambi kinya. Eye, benu laaka na mbiili moyiina. Ka bunuubu, bisu livondi na litumi benu mu ubaafulala usa buuna mu nduhi a Yisu. Vangaani bu hwafulala maana!

1 Tesalonika 4:12

Buuna, ba baavele ba Kristo buuyusa mbiili a benu, na benu a libaakwamisa bana mu pasi dyambu li limiitala benu.

1 Tesalonika 5:24

Wu li mu uteele benu li wu akuha, nde sa atswihasa maana moosi.

2 Tesalonika 1:10

Maana sa mavangama ŋa nde huya mu uyaka muyusu ŋa hati la ba nde boosi. Ba bali mu usa imiinu mu nde, sa baba hutso a kimwili na minywa bwasi. Benu sa liba ŋa hati la bo, mu toni ati benu laasa imiinu mu ndongisili a bisu.

2 Timoteho 1:9

Nde ni wu ayobolo bisu, na wu ateele bisu mu mbila ya ngidi, a mu toni mavanga ma bisu mamabwe ve, ka mu toni a kesili a nde mwakulu na mu toni bubwe bwa nde. Nde asa bisu kolo-kolo a nde mu Yisu Kristo, tswamina mbandili a tangu.

1 Peetelo 2:9

Ka benu, benu lili ibandu hibaasoolo, buli li banganga ba Nzambi ba Pfumu, buli li laatsyeme. Tso Nzambi hamiibaha benu, ni mu toni ati, benu liyaabisa mavanga ma maasyenoho. Nzambi hapalisi benu mu piipidi, nate mu ukotese benu hutso liyalala la nde la kimwili.

1 Peetelo 3:9

A lifutala lilibi mu lilibi ve, tso ituhi mu ituhi ve. Ka futalaani bunuubu: «Nyaha Nzambi asyeme benu!» Mu toni ati, ni muliina Nzambi hateele benu, mana benu liyaka lisyeme.

1 Peetelo 5:10

Benu sa libwemono pasi mwana a tangu hoole. Ka Nzambi wu ubaamwese hyese hya nde hyosi, amiiteele benu mu ukoto hutso muyusu a nde wu bilima na bilima, mu itwadi hya na Yisu Kristo. Nde mwakulu sa atelemese benu, nde sa ahwadisa benu, sa ava benu mifudi, nde sa asusa benu ŋa yulu ibeene hi hyavangama.

2 Peetelo 1:3

Nzambi mu matwala ma nde, ava bisu byosi bi byakuha mu idiingu hya bisu, mu ukangama mu nde. Pfumu ayabisi bisu wuuna wu ateele bisu, mu muyusu na bubwe bwa nde.

1 Yowani 2:6

woosi wu ubaaleele ti nde akwilala mu Nzambi, afwana kaka ubaadyata we bu Yisu Kristo hakadyata.

3 Yowani 1:6

Baatu mobaana, baata imbangi mu litondo la we ŋa busu bu libundu loosi. Kolo-kolo a we! Kumbasa bo we bu hwafwana ŋa busu bwa Nzambi, mu byosi bi bo bali na byo nzala mu mudyenge a bo.