Santiago 4:16 - Triqui de San Juan Copala

¹⁶ Tza̱j ne̱ soj me se aꞌmii xta̱ꞌ ndoꞌo soj, ne̱ chiꞌi̱i̱ ndoꞌo vaa nu̱ꞌ nana̱ xta̱ꞌ aꞌmii soj ado̱nj.

Santiago 4:16 ပူးပေါင်းရင်းမြစ်များ

1 Corintios 5:6

Ne chiha̱nꞌ uxrá vaa ga̱a aꞌmii xta̱ꞌ soj maꞌ. Neꞌen soj se vaa do̱j tzínꞌ levadura ꞌyaj naraa nana̱ rque noco̱o ndoꞌo cunj ado̱nj. Ne̱ ase vaa levadura rihaan cunj yoꞌ roꞌ, da̱nj vaa o̱rúnꞌ síí ꞌyaj cacunꞌ rihaan soj, ne̱ dan me se quiri̱ꞌ queꞌe̱e̱ soj, quiꞌya̱j o̱rúnꞌ síí tumé cacunꞌ ꞌni̱j scaꞌnúj soj ado̱nj.

Santiago 3:14

Tza̱j ne̱ sese xco̱j ruva̱a̱ rá soj, ne̱ sese me ina̱nj rá soj quiri̱i̱ taꞌngaꞌ soj rihaan tuviꞌ soj, ga̱a ne̱ se̱ guun caꞌmi̱i̱ xta̱ꞌ soj cata̱j soj se vaa síí acaj cuentá avii raa̱ me soj a̱ maꞌ. ꞌO̱ se né si̱j acaj cuentá me síí ꞌyaj da̱nj maꞌ.

1 Juan 2:16

ꞌO̱ se rihaan chumii̱ nihánj vaa ndoꞌo se me rá nee̱ man yuvii̱ quiꞌya̱j yoꞌ do̱ꞌ, vaa ndoꞌo se me rá yuvii̱ ni̱ꞌyaj yuvii̱ do̱ꞌ, vaa ndoꞌo rasu̱u̱n ꞌyaj uun xta̱ꞌ nimán yuvii̱ do̱ꞌ, tza̱j ne̱ né ra̱su̱u̱n cavii rihaan Rej níꞌ Yaꞌanj me nu̱ꞌ nij rasu̱u̱n vaa da̱nj maꞌ. ꞌO̱ se na̱nj rasu̱u̱n ma̱n rihaan chumii̱ nihánj me nij rasu̱u̱n yoꞌ na̱nj ado̱nj.

Apocalipsis 18:7

Dan me se caꞌmii xta̱ꞌ ndoꞌo chumanꞌ yoꞌ, ne̱ nanoꞌ ndoꞌo chumanꞌ yoꞌ se sa̱ꞌ ga̱a̱ rihaan yoꞌ, ne̱ cheꞌé dan quiꞌya̱j ndoꞌo soj sayuun nda̱a caꞌnga̱j maꞌa̱n nimán chumanꞌ yoꞌ, quiꞌya̱j soj, ne̱ nda̱a queꞌe̱e̱ nda̱a cúú man yoꞌ, quiꞌya̱j soj, ga̱a ne̱ xri̱ꞌ ndoꞌo rá chumanꞌ yoꞌ á. Dan me se uun rá chumanꞌ yoꞌ a: “Ma̱ꞌanj me chana̱ reiná uun chij ya̱, ne̱ ne chuꞌvij maꞌ. Né cha̱na̱ caviꞌ nica̱ mej, ne̱ se̱ quiránꞌ ꞌu̱nj sayuun daj chiha̱a̱ míj maꞌ”, taj chumanꞌ yoꞌ a.