Santiago 2:18 - Triqui de San Juan Copala

¹⁸ Tza̱j ne̱ taꞌa̱j nii cata̱j rihaan tuviꞌ se vaa so̱ꞌ me se síí amán rá niꞌya̱j man Yaꞌanj mé so̱ꞌ, ne̱ ꞌu̱nj nihánj me se síí ꞌyaj se sa̱ꞌ rihaan Yaꞌanj mé ꞌu̱nj, cata̱j nii chugua̱nj. Tza̱j ne̱ xca̱j so̱ꞌ cuentá, ne̱ asa̱ꞌ caꞌve̱e queneꞌe̱n yuvii̱ se vaa síí amán rá niꞌya̱j man Yaꞌanj mé so̱ꞌ, sese nuviꞌ a̱ ꞌó se sa̱ꞌ ꞌyáá so̱ꞌ ga̱. Tza̱j ne̱ ꞌu̱nj nihánj me se cheꞌé se sa̱ꞌ ꞌyáá ꞌu̱nj roꞌ, cheꞌé dan neꞌen yuvii̱ se vaa síí amán rá niꞌya̱j man Yaꞌanj mé ꞌu̱nj chugua̱nj.

Santiago 2:18 ပူးပေါင်းရင်းမြစ်များ

Romanos 14:23

Tza̱j ne̱ sese ne neꞌen ꞌó soꞌ sese caꞌve̱j Yaꞌanj cha̱ soꞌ ꞌo̱ rasu̱u̱n niꞌ, sese se̱ caꞌvej Yaꞌanj cha̱ soꞌ niꞌ, ne̱ se̱ chá soꞌ maꞌ. Sese cha̱ soꞌ, ne̱ tumé soꞌ cacunꞌ rihaan Yaꞌanj cheꞌé se ne amán rá soꞌ se vaa aꞌvej Yaꞌanj cha̱ soꞌ, ma̱an se chá maꞌa̱n soꞌ, ne̱ cheꞌé dan tumé soꞌ cacunꞌ ado̱nj. Veé da̱nj ina̱nj vaa nu̱ꞌ se vaa quiꞌya̱j níꞌ nanj á. Sese ne amán rá níꞌ se vaa aꞌvej rá Yaꞌanj quiꞌya̱j níꞌ ꞌo̱ rasu̱u̱n, ne̱ sese quiꞌya̱j níꞌ da̱nj, ne̱ tu̱mé níꞌ cacunꞌ rihaan Yaꞌanj na̱nj ado̱nj.

Romanos 3:28

Dan me se cuchuma̱n rá yuvii̱ ni̱ꞌyaj yuvii̱ man Cristó, ne̱ navi̱j cacunꞌ xráá yuvii̱ yoꞌ a. Taj se ꞌyaj nda̱ꞌ se quiꞌyaj ndoꞌo yuvii̱ se sa̱ꞌ maꞌ. Ma̱an se ina̱nj cheꞌé Cristó navij cacunꞌ xráá yuvii̱ na̱nj ado̱nj. Dan me nana̱ guun ya̱ rá níꞌ cuno níꞌ ado̱nj.

Romanos 4:6

ꞌO̱ cuya̱a̱n vaa nana̱ aꞌmij nihánj ga̱ nana̱ caꞌmii rey cuꞌna̱j David ga̱a naá ga̱a cataj xnaꞌanj David se vaa niha̱ꞌ rá yuvii̱ tinavij maꞌa̱n Yaꞌanj cacunꞌ xráá, tza̱j ne̱ né cheꞌe̱ se sa̱ꞌ ꞌyaj nij yuvii̱ me tinavij Yaꞌanj cacunꞌ xráá nij soꞌ maꞌ. Cataj David a:

Romanos 8:1

Ya̱j me se daj chiha̱a̱ míj se̱ cutaꞌ Yaꞌanj cacunꞌ xráá níꞌ si̱j uun rcuaꞌa̱a̱n ga̱ Cristó Jesús maꞌ.

Romanos 9:19

Vaa yuvii̱ cata̱j a: “Cheꞌé dan, me cheꞌé utaꞌ Yaꞌanj cacunꞌ xráá yuvii̱ ga̱. ꞌO̱ se ina̱nj se me rá Yaꞌanj quiꞌya̱j níꞌ ꞌyaj níꞌ á.” Da̱nj cata̱j taꞌa̱j yuvii̱ a.

1 Corintios 13:2

Caꞌve̱e se veꞌé ndoꞌo natáꞌ ꞌu̱nj nana̱ rqué Yaꞌanj manj do̱ꞌ, caꞌve̱e se neꞌenj nu̱ꞌ nana̱ sa̱ꞌ yuve̱ tihaa̱n Yaꞌanj rihaan yuvii̱ do̱ꞌ, caꞌve̱e se sa̱ꞌ uxrá avii raj do̱ꞌ, caꞌve̱e se amán uxrá raj niꞌya̱j ꞌu̱nj man Yaꞌanj do̱ꞌ, caꞌve̱e se gu̱un nu̱cuáj natuna̱ ꞌu̱nj rej nicu̱nꞌ ꞌo̱ quij xca̱a̱n cheꞌé se amán uxrá raj niꞌya̱j ꞌu̱nj man Yaꞌanj do̱ꞌ, tza̱j ne̱ sese ne ꞌe̱e̱ raj tuvij, ne̱ taj se gúnꞌ mán ꞌu̱nj ga̱a a̱ maꞌ.

2 Corintios 5:17

Me maꞌa̱n yuvii̱ amán rá niꞌya̱j man Cristó roꞌ, nuu sa̱ꞌ nimán soꞌ ꞌyaj Yaꞌanj a. Ne̱ síí amán rá roꞌ, se̱ guun rá uún soꞌ quiꞌya̱j soꞌ nda̱a vaa quiꞌyaj soꞌ ga̱a rque̱ maꞌ. ꞌO̱ se síí acaj naca̱ cuentá me soꞌ ado̱nj.

2 Corintios 7:1

Dan me se nu̱ꞌ nana̱ nihánj nana̱ caꞌmii ya̱ Yaꞌanj ga̱a naá roꞌ, caꞌmii Yaꞌanj nana̱ yoꞌ rihaan níꞌ, tinu̱j, nocoj. Cheꞌé dan quiri̱i̱ yaníj níꞌ man cunuda̱nj se chiꞌi̱i̱ quiꞌyaj níꞌ asi̱j rque̱ do̱ꞌ, man cunuda̱nj se chiꞌi̱i̱ ma̱n nimán níꞌ do̱ꞌ, ne̱ ga̱a̱ cu̱j nimán níꞌ á. Ne̱ rquee̱ níꞌ cunu̱u sa̱ꞌ nimán níꞌ, cheꞌé se uxrá aráj cochro̱j níꞌ rihaan Yaꞌanj á.

Gálatas 5:6

Xa̱ꞌ níꞌ si̱j noco̱ꞌ man Cristó Jesús me se taj se ꞌyaj sese quita̱j taꞌngaꞌ man níꞌ, taj se ꞌyaj sese se̱ quitáá taꞌngaꞌ man níꞌ, rá Yaꞌanj maꞌ. Tana̱nj me rá Yaꞌanj cuchuma̱n rá níꞌ ni̱ꞌyaj níꞌ man Cristó, ne̱ cheꞌé dan ga̱a̱ ꞌe̱e̱ rá níꞌ ni̱ꞌyaj níꞌ man tinúú níꞌ ado̱nj.

1 Timoteo 1:5

ꞌO̱ se aꞌnéꞌ ꞌu̱nj suun yoꞌ rihaan so̱ꞌ cheꞌé se me rá ꞌu̱nj ga̱a̱ ꞌe̱e̱ rá níꞌ tuviꞌ níꞌ á. Sese naruvii nimán níꞌ, ne̱ sese taj cacunꞌ tumé níꞌ rá níꞌ, ne̱ sese amán ya̱ rá níꞌ niꞌya̱j níꞌ Yaꞌanj, ne̱ caꞌve̱e ga̱a̱ ꞌe̱e̱ rá níꞌ ni̱ꞌyaj níꞌ tuviꞌ níꞌ ado̱nj.

Tito 2:7

Ne̱ ma̱ꞌán so̱ꞌ roꞌ, veꞌé qui̱ꞌyáá so̱ꞌ nu̱ꞌ suun sa̱ꞌ, ne̱ queneꞌe̱n nij tinúú níꞌ da̱j ꞌyáá so̱ꞌ, ga̱a ne̱ cuya̱a̱n quiꞌya̱j nij soꞌ ga̱ so̱ꞌ á. Ina̱nj tucuáán ya̱ tu̱cuꞌyón so̱ꞌ á. Ne̱ guún so̱ꞌ ꞌo̱ síí niꞌya̱nj aꞌmii a.

Hebreos 11:31

Dan me se cheꞌé se amán rá chana̱ niha̱ꞌ rá ga̱ chii, chana̱ cuꞌna̱j Rahab niꞌya̱j noꞌ Yaꞌanj roꞌ, cheꞌé dan ne cavi̱ꞌ noꞌ ga̱ ꞌó nij síí ma̱n chiháán noꞌ síí ne caꞌve̱j rá cuno̱ rihaan Yaꞌanj maꞌ. Ma̱an se veꞌé nacaj noꞌ man ro̱j síí israelitá síí caꞌanj ni̱ꞌyaj yuve̱ da̱j vaa nu̱ꞌ chiháán noꞌ, ne̱ ne quiꞌya̱j noꞌ sayuun man ro̱j soꞌ a.

Hebreos 11:33

Dan me se cheꞌé se amán rá nij soꞌ niꞌya̱j nij soꞌ Yaꞌanj roꞌ, cheꞌé dan quiꞌyaj canaán nij soꞌ rihaan síí nica̱j suun rey do̱ꞌ, caꞌneꞌ sa̱ꞌ nij soꞌ cacunꞌ cheꞌé yuvii̱ do̱ꞌ, quiriꞌ nij soꞌ se vaa cataꞌ tuꞌva Yaꞌanj quiri̱ꞌ ya̱ nij soꞌ do̱ꞌ, guun nucua̱j nij soꞌ caráán nij soꞌ tuꞌva chuvaa̱ do̱ꞌ,

Hebreos 11:6

Tza̱j ne̱ síí ne amán rá niꞌya̱j man Yaꞌanj roꞌ, daj chiha̱a̱ míj se̱ caranꞌ rá Yaꞌanj ni̱ꞌyaj Yaꞌanj man soꞌ a̱ maꞌ. ꞌO̱ se síí me rá cuchi̱ꞌ rihaan Yaꞌanj roꞌ, no̱ xcúún soꞌ cuchuma̱n rá soꞌ se vaa ya̱ vaa Yaꞌanj, ne̱ na̱ruꞌvee maꞌa̱n Yaꞌanj rihaan nij síí nano̱ꞌ ya̱ man Yaꞌanj na̱nj á.

Santiago 2:14

Cuno̱ soj caꞌmi̱j, tinu̱j, nocoj. Sese taj ꞌo̱ soꞌ se vaa amán rá soꞌ niꞌya̱j soꞌ Yaꞌanj, tza̱j ne̱ ne ꞌyaj soꞌ a̱ doj se lu̱j rihaan tuviꞌ soꞌ, ne̱ caꞌve̱e nani̱i̱ soꞌ rihaan sayuun ne̱ cavi̱i̱ sa̱ꞌ soꞌ, rá soj naꞌ. Taj maꞌ.

Santiago 3:13

Sese vaa taꞌa̱j soj síí acaj cuentá ne̱ avii ndoꞌo raa̱ soj, rá soj, ne̱ veꞌé ina̱nj quiꞌya̱j soj si̱j vaa da̱nj rá rihaan tuviꞌ soj, ne̱ xca̱j tuviꞌ soj cuentá se vaa cheꞌé se avii raa̱ soj roꞌ, cheꞌé dan síí na̱j nimán me soj, ne̱ cheꞌé dan me veꞌé ina̱nj ꞌyaj soj a.