Santiago 1:9 - Triqui de San Juan Copala

⁹ Ne̱ soj si̱j nique̱, tza̱j ne̱ ga̱a̱ niha̱ꞌ rá soj cheꞌé se si̱j avii sa̱ꞌ rihaan Yaꞌanj me soj ado̱nj.

Santiago 1:9 ပူးပေါင်းရင်းမြစ်များ

San Lucas 1:52

Nij síí rii taꞌngaꞌ roꞌ, caꞌnéj Yaꞌanj suun raꞌa nij soꞌ na̱nj ado̱nj. Ne̱ nij síí noco̱ꞌ roꞌ, guun nij soꞌ síí rii taꞌngaꞌ naca̱, quiꞌyaj Yaꞌanj na̱nj á.

San Lucas 10:20

Tza̱j ne̱ taj cheꞌé gu̱un niha̱ꞌ rá soj cheꞌé se uno nij nana̱ chre̱e rihaan soj maꞌ. Tana̱nj a̱ gu̱un niha̱ꞌ ya̱ rá nimán soj cheꞌé se a̱j cachrón Yaꞌanj se‑chuvi̱i soj rej xta̱ꞌ ado̱nj ―taj Jesús rihaan vaꞌnu̱j chiha̱a̱ chuvi̱j (72) nij soꞌ a.

San Lucas 14:11

ꞌO̱ se xa̱ꞌ síí me rá ti̱cavii sa̱ꞌ man maꞌa̱n ni̱ꞌyaj yuvii̱, tza̱j ne̱ quiri̱ꞌ soꞌ, ne̱ gu̱un naꞌa̱j soꞌ ado̱nj. Ne̱ xa̱ꞌ síí ꞌyaj nica̱ꞌ nimán, tza̱j ne̱ cavi̱i̱ sa̱ꞌ soꞌ ni̱ꞌyaj yuvii̱ ado̱nj ―taj Jesús rihaan nij síí fariseo do̱ꞌ, rihaan nij síí naquiꞌyaj cu̱u stucua̱nj Moisés do̱ꞌ a.

San Lucas 9:48

ga̱a ne̱ cataj Jesús rihaan nij soꞌ a: ―Me maꞌa̱n ꞌo̱ síí aráj cochro̱j ne̱ aꞌmii sa̱ꞌ soꞌ ga̱ ꞌo̱ xnii leꞌe̱j nihánj cheꞌé se‑chu̱vií ꞌu̱nj, ne̱ adi̱ꞌ ma̱ꞌanj me aráj cochro̱j ne̱ aꞌmii sa̱ꞌ soꞌ ga̱ vaa na̱nj ado̱nj. Dan me se síí aꞌmii sa̱ꞌ ga̱ ꞌu̱nj me se né o̱rúnꞌ ꞌu̱nj me aꞌmii sa̱ꞌ soꞌ ga̱ maꞌ. Ma̱an Yaꞌanj ya̱ síí caꞌnéé mán ꞌu̱nj me aráj cochro̱j ya̱ soꞌ ne̱ aꞌmii sa̱ꞌ ya̱ soꞌ ga̱ vaa na̱nj ado̱nj. ꞌO̱ se síí nica̱ꞌ doj rihaan ta̱ranꞌ soj roꞌ, me síí vaa se uun doj rihaan ta̱ranꞌ soj a ―taj Jesús rihaan nij síí tucuꞌyón snana̱ soꞌ a.

Romanos 8:17

Cheꞌé dan vaa güii rque̱ ndoꞌo Yaꞌanj se sa̱ꞌ rihaan níꞌ ga̱ Cristó, ne̱ ꞌo̱ cuya̱a̱n ga̱a̱ se sa̱ꞌ rihaan Cristó ga̱ níꞌ a. Veé dan me cheꞌé se ranꞌ níꞌ sayuun nda̱a vaa quiranꞌ Cristó roꞌ, cheꞌé dan cavi̱i̱ sa̱ꞌ níꞌ ga̱ soꞌ, ne̱ niꞌndaj ya̱ veꞌé ga̱a̱ níꞌ ga̱ soꞌ vaa güii ado̱nj.

2 Corintios 6:10

Ne̱ nanó rá núj cheꞌé sayuun, tza̱j ne̱ niha̱ꞌ rá núj rihaan Yaꞌanj uún a. Ne̱ síí nique̱ me núj, tza̱j ne̱ avii sa̱ꞌ doj queꞌe̱e̱ ndoꞌo yuvii̱, ꞌyaj núj a. Ne̱ taj siꞌyaj núj, tza̱j ne̱ cunuda̱nj chumii̱ nihánj me siꞌyaj núj a.

Filipenses 3:14

ꞌO̱ se rquee̱ uxrá ꞌu̱nj ꞌo̱ no̱coj man Cristó Jesús, ne̱ caꞌna̱ꞌ güii quiꞌya̱j canaán ꞌu̱nj, ne̱ cavi̱i̱ sa̱ꞌ ꞌu̱nj, quiꞌya̱j Yaꞌanj, ne̱ nacu̱nj Yaꞌanj manj cavi̱i̱ ꞌu̱nj rej xta̱ꞌ, cheꞌé se ꞌu̱nj me síí noco̱ꞌ man Cristó Jesús ado̱nj.

Filipenses 3:3

Ne̱ xa̱ꞌ níꞌ, tza̱j ne̱ ino̱ ꞌyaj níꞌ a. ꞌO̱ se síí ya̱ cunuu sa̱ꞌ rihaan Yaꞌanj me níꞌ, ne̱ ina̱nj Nimán Yaꞌanj nocoꞌ níꞌ ga̱a ꞌyaj níꞌ se‑su̱u̱n Yaꞌanj ado̱nj. Ne nucua̱j rá níꞌ man maꞌa̱n níꞌ se vaa cavi̱i̱ sa̱ꞌ níꞌ cheꞌé se vaa cutaꞌ nii taꞌngaꞌ nee̱ man níꞌ do̱ꞌ, se vaa ꞌyaj maꞌa̱n níꞌ do̱ꞌ maꞌ. Tana̱nj niha̱ꞌ rá níꞌ nataꞌ níꞌ se vaa Cristó Jesús me síí ꞌyaj caꞌve̱e cavi̱i̱ sa̱ꞌ níꞌ ado̱nj.

1 Pedro 2:9

Xa̱ꞌ soj, tza̱j ne̱ si̱j narii Yaꞌanj me soj, ne̱ xrej uun chij ya̱ nu̱u̱ rihaan Yaꞌanj me soj, ne̱ xꞌneꞌ nij síí cunuu sa̱ꞌ nimán uun chij Yaꞌanj rihaan me soj ado̱nj. Cheꞌé se me rá Yaꞌanj nata̱ꞌ soj cheꞌé se sa̱ꞌ uxrá quiꞌyaj soꞌ roꞌ, cheꞌé dan narii soꞌ man soj ado̱nj. Dan me se si̱j noco̱ꞌ tucuáán rmi̱ꞌ me soj ga̱a naá, tza̱j ne̱ canacúún Yaꞌanj man soj xca̱j soj cuentá, ne̱ cuna̱j uxrá vaa stucua̱nj Yaꞌanj tucuáán noco̱ꞌ soj cuano̱ na̱nj á.

Apocalipsis 2:9

Neꞌén ꞌu̱nj da̱j vaa sayuun ranꞌ nij soj si̱j ma̱n chumanꞌ Esmirna, ne̱ neꞌén ꞌu̱nj se vaa nique̱ ndoꞌo soj ado̱nj. Tza̱j ne̱ rihaan Yaꞌanj me se síí ruꞌvee me ya̱ soj ado̱nj. Ne̱ vaa nij síí tuꞌva rmaꞌa̱n taj se vaa yuvii̱ israelitá me nij soꞌ, tza̱j ne̱ né si̱j israelitá me ya̱ nij soꞌ maꞌ. Ma̱an xꞌneꞌ síí tucuꞌyón snana̱ Síí Chre̱e me nij soꞌ na̱nj á. Ne̱ neꞌén ꞌu̱nj se vaa aꞌmii nij soꞌ nana̱ nij cheꞌé soj ado̱nj.