Romanos 5:9 - Triqui de San Juan Copala

⁹ Cuano̱ me se a̱j cunuu sa̱ꞌ nimán níꞌ rihaan Yaꞌanj, cheꞌé se cayanj ton man Cristó ga̱a caviꞌ soꞌ, ne̱ cheꞌé dan neꞌen níꞌ se vaa ti̱nanii Cristó man níꞌ rihaan sayuun quiꞌya̱j Yaꞌanj güii cuya̱nj rá Yaꞌanj ni̱ꞌyaj Yaꞌanj man yuvii̱ tumé cacunꞌ ado̱nj.

Romanos 5:9 ပူးပေါင်းရင်းမြစ်များ

San Juan 5:24

’Ya̱ ya̱ cata̱j xnaꞌanj ꞌu̱nj rihaan soj cuano̱ se vaa síí uno snana̱j ne̱ amán rá niꞌya̱j man síí caꞌnéé manj roꞌ, soꞌ me síí vaa iꞌna̱ꞌ nimán rihaan Yaꞌanj nu̱ꞌ cavii nu̱ꞌ caꞌanj, ne̱ se̱ quiꞌyaj Yaꞌanj sayuun man soꞌ maꞌ. ꞌO̱ se tanáj xco̱ soꞌ rej ya̱nj yaníj nimán soꞌ ga̱ Yaꞌanj ne̱ catúj soꞌ rej vaa iꞌna̱ꞌ nimán soꞌ rihaan Yaꞌanj a.

Romanos 1:18

A̱j cataj xnaꞌanj Yaꞌanj si̱j nicu̱nꞌ xta̱ꞌ rihaan níꞌ se vaa uyanj uxrá rá Yaꞌanj niꞌya̱j Yaꞌanj cunuda̱nj se chiꞌi̱i̱ ꞌyaj nij yuvii̱, ne̱ me rá Yaꞌanj xca̱j nij yuvii̱ cuentá da̱j vaa soꞌ, ne̱ cheꞌé dan quiꞌyaj Yaꞌanj da̱j a̱ rasu̱u̱n ma̱n rihaan chumii̱ nihánj ni̱ꞌyaj yuvii̱ a. A̱j neꞌen yuvii̱ rasu̱u̱n, ne̱ xcaj nij yuvii̱ cuentá da̱j vaa Yaꞌanj, tza̱j ne̱ ina̱nj cacunꞌ ꞌyaj nij yuvii̱, ne̱ cheꞌé dan taj se ꞌyáꞌ cuno̱ nij yuvii̱ nana̱ ya̱ a̱ maꞌ. Cheꞌé dan me uyanj rá Yaꞌanj niꞌya̱j Yaꞌanj man nij yuvii̱ a.

Romanos 5:1

Dan me se amán rá níꞌ neꞌen níꞌ Yaꞌanj, ne̱ cheꞌé dan navij cacunꞌ tumé níꞌ, ne̱ cunuu sa̱ꞌ nimán níꞌ rihaan Yaꞌanj, ne̱ cheꞌé dan me ne chuꞌviꞌ níꞌ ya̱j, cheꞌé se a̱j naꞌmii sa̱ꞌ níꞌ ga̱ Yaꞌanj quiꞌyaj Jesucristó Si̱j ꞌNi̱j Raꞌa man níꞌ ado̱nj.

Romanos 5:10

Nda̱ꞌ se síí ta̱j riꞌyunj man Yaꞌanj me níꞌ ga̱a rque̱, tza̱j ne̱ caꞌnéé Yaꞌanj Taꞌníí Yaꞌanj cavi̱ꞌ soꞌ cheꞌé yuvii̱, ne̱ guun tuvi̱ꞌ níꞌ ga̱ Yaꞌanj, quiꞌyaj soꞌ a. Ne̱ cunuu iꞌna̱ꞌ uún Cristó, ne̱ cheꞌé dan neꞌen níꞌ se vaa ya̱ nani̱i̱ níꞌ rihaan sayuun ne̱ cavi̱i̱ sa̱ꞌ níꞌ vaa güii ado̱nj.

Romanos 8:1

Ya̱j me se daj chiha̱a̱ míj se̱ cutaꞌ Yaꞌanj cacunꞌ xráá níꞌ si̱j uun rcuaꞌa̱a̱n ga̱ Cristó Jesús maꞌ.

Romanos 8:30

Ga̱a ne̱ canacúún Yaꞌanj man níꞌ, ga̱a ne̱ cunuu sa̱ꞌ níꞌ rihaan Yaꞌanj, quiꞌyaj Yaꞌanj, ga̱a ne̱ ya̱ niꞌndaj ya̱ veꞌé ga̱a̱ níꞌ, quiꞌya̱j maꞌa̱n Yaꞌanj ado̱nj.

Efesios 2:13

Tza̱j ne̱ nda̱ꞌ se asino ya̱a̱n yáán ga̱nꞌ soj ga̱ Yaꞌanj, tza̱j ne̱ ya̱j me se quinichrunꞌ soj rihaan Yaꞌanj cheꞌé ton cayanj man Cristó na̱nj ado̱nj.

Efesios 2:3

Ne̱ ase vaa ꞌyaj nij yuvii̱ vaa da̱nj roꞌ, da̱nj quiꞌyaj gue̱e̱ ta̱ranꞌ níꞌ ga̱a rque̱, ne̱ quiꞌyaj níꞌ cacunꞌ ga̱ nij soꞌ, ne̱ quiꞌyaj níꞌ ina̱nj se me rá nee̱ man níꞌ quiꞌya̱j níꞌ a. Ina̱nj se cavii raa̱ maꞌa̱n níꞌ quiꞌyaj níꞌ, ne̱ yuvii̱ caꞌmaan rá Yaꞌanj niꞌya̱j Yaꞌanj man me níꞌ ga̱a rque̱ a. Ne̱ ase vaa nij yuvii̱ chéé rihaan chumii̱ nihánj cuano̱ roꞌ, taꞌngaꞌ da̱nj vaa níꞌ ga̱a rque̱ ado̱nj.

1 Tesalonicenses 1:10

ne̱ naꞌvi̱j soj caꞌna̱ꞌ uún maꞌa̱n Jesús Taꞌníí Yaꞌanj rej xta̱ꞌ a. Ne̱ soꞌ roꞌ, me síí cunuu iꞌna̱ꞌ ya̱ uún quiꞌyaj Yaꞌanj ga̱a caviꞌ soꞌ, ne̱ ti̱nanii Jesús man níꞌ rihaan sayuun asa̱ꞌ quisíj güii quiꞌya̱j uxrá Yaꞌanj sayuun man nij síí tumé cacunꞌ ado̱nj.

Hebreos 9:14

ga̱a ne̱ táá a̱ ton man Cristó, ne̱ sa̱ꞌ doj vaa yoꞌ rihaan nu̱ꞌ nij rasu̱u̱n yoꞌ na̱nj chugua̱nj. Dan me se taj a̱ doj cacunꞌ tumé Cristó maꞌ. ꞌO̱ se nicu̱nꞌ Nimán Yaꞌanj nu̱ꞌ cachén nu̱ꞌ caꞌnaꞌ ne̱ nu̱ꞌ cavii nu̱ꞌ caꞌanj, ne̱ cayáán soꞌ ga̱ Cristó, ne̱ cheꞌé dan rqué Cristó man maꞌa̱n soꞌ rihaan Yaꞌanj chugua̱nj. Cheꞌé dan me doj a̱ cunu̱u sa̱ꞌ nimán níꞌ, quiꞌya̱j ton man Cristó, ne̱ navi̱j cacunꞌ tumé níꞌ cheꞌé se chiꞌi̱i̱ quiꞌyaj níꞌ asi̱j rque̱ doj a. ꞌO̱ se daj chiha̱a̱ míj se̱ cavii sa̱ꞌ níꞌ, quiꞌya̱j se ꞌyaj maꞌa̱n níꞌ maꞌ. Tza̱j ne̱ ya̱j roꞌ, quiꞌya̱j níꞌ nu̱ꞌ rasu̱u̱n rej rihaan níꞌ, ne̱ canoco̱ꞌ ina̱nj níꞌ man Yaꞌanj si̱j vaa iꞌna̱ꞌ ya̱j na̱nj á.

Hebreos 9:22

Dan me se ina̱nj ton me se vaa achiin cheꞌé rej nahu̱un sa̱ꞌ queꞌe̱e̱ uxrá rasu̱u̱n rihaan Yaꞌanj, taj stucua̱nj Moisés a. Ne̱ sese nuviꞌ ton, ne̱ se̱ tinavij Yaꞌanj cacunꞌ tumé yuvii̱ maꞌ.

1 Juan 1:7

Tza̱j ne̱ sese chéé níꞌ rej chuguu̱n sa̱ꞌ rej va̱j maꞌa̱n Yaꞌanj, ne̱ veꞌé sa̱ꞌ mán ta̱ranꞌ níꞌ, ne̱ navi̱j nu̱ꞌ cacunꞌ tumé níꞌ, quiꞌya̱j ton cayanj man Jesús Taꞌníí Yaꞌanj ga̱a caviꞌ soꞌ cheꞌé níꞌ, ne̱ ꞌo̱ cunu̱u sa̱ꞌ nimán níꞌ ado̱nj.