Romanos 10:9 - Triqui de San Juan Copala

⁹ ꞌO̱ se sese caꞌmi̱i̱ yá so̱ꞌ cata̱j so̱ꞌ rihaan tuvíꞌ so̱ꞌ se vaa Jesús me Síí ꞌNi̱j Raꞌa man níꞌ, ne̱ sese gu̱un ya̱ rá nimán so̱ꞌ se vaa cunuu iꞌna̱ꞌ uún Jesús, quiꞌyaj Yaꞌanj, ga̱a caviꞌ soꞌ, ne̱ nani̱i̱ so̱ꞌ rihaan sayuun ne̱ cavi̱i̱ sa̱ꞌ so̱ꞌ a.

Romanos 10:9 ပူးပေါင်းရင်းမြစ်များ

San Lucas 12:8

’Ne̱ cata̱j xnaꞌanj ꞌu̱nj rihaan soj cuano̱ se vaa no̱ xcúún soj nata̱ꞌ ya̱ soj rihaan yuvii̱ se vaa me soj síí noco̱ꞌ manj a. Ne̱ nu̱ꞌ síí ꞌyaj da̱nj roꞌ, vaa güii, ne̱ ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ roꞌ, nata̱j rihaan nij se‑mo̱zó Yaꞌanj se vaa si̱j noco̱ꞌ manj me soꞌ a.

Hechos 16:31

Ga̱a ne̱ cataj ro̱j soꞌ a: ―Cuchuma̱n rá so̱ꞌ ni̱ꞌyaj so̱ꞌ man Jesucristó Si̱j ꞌNi̱j Raꞌa man níꞌ, ga̱a ne̱ nani̱i̱ so̱ꞌ rihaan sayuun ne̱ cavi̱i̱ sa̱ꞌ so̱ꞌ, quiꞌya̱j Yaꞌanj á. Ne̱ da̱nj ina̱nj quiꞌya̱j Yaꞌanj ga̱ nij tucua̱ soj á ―taj ro̱j soꞌ rihaan síí tumé tagaꞌ yoꞌ a.

Filipenses 2:11

ne̱ cata̱j ya̱ cunuda̱nj nij soꞌ se vaa maꞌa̱n Jesucristó me Síí ꞌNi̱j Raꞌa man níꞌ, ga̱a ne̱ queneꞌe̱n ya̱ nij soꞌ se vaa sa̱ꞌ uxrá quiꞌyaj Rej níꞌ Yaꞌanj ado̱nj.

1 Pedro 1:21

Ne̱ cheꞌé se vaa quiꞌyaj Cristó cheꞌé soj roꞌ, cheꞌé dan amán rá soj niꞌya̱j soj man Yaꞌanj cheꞌé se soꞌ me síí naquiꞌyaj iꞌna̱ꞌ man Cristó, ne̱ soꞌ me síí quiꞌyaj se vaa taj yuvii̱ se vaa niꞌndaj ya̱ sa̱ꞌ cavii Cristó a. Ne̱ cheꞌé se da̱nj quiꞌyaj Yaꞌanj roꞌ, cheꞌé dan amán rá soj niꞌya̱j soj man Yaꞌanj, ne̱ naꞌvi̱j soj quisi̱j güii cavi̱i̱ sa̱ꞌ ndoꞌo soj quiꞌya̱j soꞌ a.

Romanos 8:34

Taj va̱j yuvii̱ cuta̱ꞌ cacunꞌ xráá níꞌ si̱j narii Yaꞌanj man maꞌ. ꞌO̱ se caviꞌ Cristó cheꞌé níꞌ, ne̱ cunuu iꞌna̱ꞌ uún Cristó, ne̱ cuano̱ nicunꞌ soꞌ xꞌnúú Yaꞌanj rej nuva̱ꞌ Yaꞌanj, ne̱ maꞌa̱n soꞌ me síí achíín niꞌya̱j rihaan Yaꞌanj cheꞌé níꞌ ado̱nj.

Romanos 14:11

Dan me se Danj Yaꞌanj taj se vaa ya̱ ya̱ ca̱yáán ru̱j cunuda̱nj yuvii̱ rihaan Yaꞌanj vaa güii, ne̱ veꞌé ndoꞌo caꞌmi̱i̱ cunuda̱nj yuvii̱ cheꞌé Yaꞌanj a. Da̱nj aꞌmii Danj Yaꞌanj a.

1 Corintios 12:3

Cheꞌé dan xa̱ꞌ níꞌ si̱j noco̱ꞌ man Cristó nihánj me se ino̱ ꞌyaj níꞌ, ne̱ cheꞌé dan cata̱j xnaꞌanj ꞌu̱nj rihaan soj se vaa nda̱ꞌ se cata̱j ꞌo̱ soꞌ se vaa qui̱j ndoꞌo vaa Jesús, tza̱j ne̱ né na̱na̱ rqué Nimán Yaꞌanj rihaan soꞌ me nana̱ aꞌmii soꞌ a̱ maꞌ. Tza̱j ne̱ sese cata̱j ꞌo̱ soꞌ se vaa Síí ꞌNi̱j Raꞌa man níꞌ me Jesús, ne̱ nana̱ yoꞌ me nana̱ rqué Nimán Yaꞌanj rihaan soꞌ, dan aꞌvee aꞌmii soꞌ da̱nj ado̱nj.

2 Juan 1:7

ꞌO̱ se ya̱j me se curiha̱nj ndoꞌo nij síí tihaꞌ yuꞌunj rihaan chumii̱ nihánj, ne̱ cataj nij soꞌ se vaa né si̱j guun yuvii̱ me Jesucristó a. Síí aꞌmii da̱nj me se síí tihaꞌ yuꞌunj aꞌmii nana̱ ne̱ do̱ꞌ, síí ta̱j riꞌyunj man Cristó do̱ꞌ, me soꞌ a.

San Juan 9:22

Da̱nj caꞌmii ro̱j ni̱ca̱ rej síí naxraꞌ rihaan yoꞌ cheꞌé se cuchuꞌviꞌ ro̱j soꞌ niꞌya̱j ro̱j soꞌ man nij síí uun chij rihaan nij yuvii̱ israelitá a. Dan me se a̱j guun ya̱ caꞌmii nij síí uun chij yoꞌ se vaa sese cata̱j ꞌo̱ soꞌ se vaa Si̱j Caꞌnéé Yaꞌanj Ti̱nanii man Yuvii̱ rihaan Sayuun me Jesús, ne̱ quiri̱i̱ nij soꞌ xeꞌ man síí aꞌmii da̱nj rá veꞌ tucuꞌyón nij síí israelitá stucua̱nj Moisés a.

Hechos 8:36

Dan me se ga̱a va̱j ro̱j soꞌ chrej, ne̱ cuchiꞌ ro̱j soꞌ rej nu̱u̱ do̱j na, ga̱a ne̱ cataj síí “eunuco” a: ―Ni̱ꞌyaj so̱ꞌ á. Nihánj me nu̱u̱ na á. Ne̱ caꞌve̱e cata̱ꞌ ne ꞌu̱nj naꞌ ―taj soꞌ, xnáꞌanj soꞌ man Felipé a.

Hechos 2:24

Tza̱j ne̱ cunuu iꞌna̱ꞌ uún soꞌ, quiꞌyaj Yaꞌanj, ne̱ tinanii Yaꞌanj man soꞌ rihaan sayuun se vaa caviꞌ soꞌ a. ꞌO̱ se ne caꞌve̱e yu̱u̱n cheꞌe̱ cavi̱ꞌ soꞌ daj chiha̱a̱ míj a̱ maan ado̱nj.

Hechos 2:32

’Dan me se ya̱ ya̱ cunuu iꞌna̱ꞌ uún Jesús, quiꞌyaj Yaꞌanj, ne̱ ta̱ranꞌ núj me síí queneꞌen se vaa cunuu iꞌna̱ꞌ uún soꞌ ado̱nj.

Romanos 4:24

ꞌO̱ se cheꞌé maꞌa̱n níꞌ no̱ nana̱ yoꞌ rihaan Danj Yaꞌanj uún, cheꞌé se si̱j amán rá niꞌya̱j man Yaꞌanj me níꞌ uún, ne̱ dan me se a̱j cataj Yaꞌanj se vaa si̱j sa̱ꞌ nimán me maꞌa̱n níꞌ uún ado̱nj. Ne̱ amán rá níꞌ se vaa cunuu iꞌna̱ꞌ uún Jesús Si̱j ꞌNi̱j Raꞌa man níꞌ quiꞌyaj Yaꞌanj á.

Romanos 10:10

ꞌO̱ se nimán níꞌ me se cuchuma̱n rá níꞌ ni̱ꞌyaj níꞌ Jesús, ne̱ caꞌve̱e cunu̱u sa̱ꞌ níꞌ rihaan Yaꞌanj, ne̱ tuꞌva níꞌ me se caꞌmi̱i̱ ya̱ níꞌ cata̱j níꞌ se vaa noco̱ꞌ níꞌ man Jesús, ne̱ caꞌve̱e nani̱i̱ níꞌ rihaan sayuun ne̱ cavi̱i̱ sa̱ꞌ níꞌ ado̱nj.

Romanos 14:9

Dan me se me rá Cristó ni̱caj yuꞌunj soꞌ man yuvii̱ vaa iꞌna̱ꞌ do̱ꞌ, man yuvii̱ caviꞌ do̱ꞌ, ne̱ cheꞌé dan caviꞌ soꞌ, ne̱ cunuu iꞌna̱ꞌ uún soꞌ a.

1 Juan 4:15

Ne̱ síí taj rihaan tuviꞌ se vaa Taꞌníí Yaꞌanj me Jesús roꞌ, soꞌ me síí ꞌo̱ nocoꞌ man Yaꞌanj, ne̱ ꞌo̱ ne Yaꞌanj ga̱ soꞌ chugua̱nj.