San Mateo 5:7 - Triqui de San Juan Copala

⁷ ’Cavi̱i̱ sa̱ꞌ ta̱ranꞌ nij síí ꞌe̱e̱ rá man tuviꞌ ado̱nj. ꞌO̱ se cunu̱u ꞌe̱e̱ rá Yaꞌanj man maꞌa̱n nij soꞌ, ne̱ taj sayuun quira̱nꞌ nij soꞌ, quiꞌya̱j Yaꞌanj a̱ maan ado̱nj.

San Mateo 5:7 ပူးပေါင်းရင်းမြစ်များ

San Marcos 11:25

Ne̱ ga̱a nicunꞌ soj achíín niꞌya̱j soj rihaan Yaꞌanj, ne̱ sese vaa cacunꞌ quiꞌyaj ꞌo̱ soꞌ rihaan soj, ne̱ cara̱a̱ xꞌnaa soj cheꞌé cacunꞌ tumé tuviꞌ soj, ga̱a ne̱ caꞌve̱e tinavi̱j Rej soj síí nicu̱nꞌ xta̱ꞌ cacunꞌ tumé maꞌa̱n soj ado̱nj.

San Lucas 6:35

’Dan me se ga̱a̱ ꞌe̱e̱ rá soj man nij síí ta̱j riꞌyunj niꞌya̱j man soj, ne̱ quiꞌya̱j soj se lu̱j rihaan nij soꞌ, ne̱ ra̱cuíj soj saꞌanj man yuvii̱, ne̱ se̱ guun rá soj naca̱j uún soj se‑saꞌa̱nj soj maꞌ. Vaa güii, ne̱ narque̱ uxrá Yaꞌanj se sa̱ꞌ man soj, ne̱ taꞌníí Yaꞌanj Si̱j Uun Chij Doj gu̱un soj ga̱a na̱nj ado̱nj. ꞌO̱ se Yaꞌanj me síí ꞌyaj se lu̱j rihaan nda̱a síí ne neꞌen me se me se lu̱j do̱ꞌ, rihaan nda̱a síí chiꞌi̱i̱ do̱ꞌ ado̱nj.

Romanos 11:30

Dan me se asino ya̱a̱n ne cuno̱ nij soj si̱j yaníj rihaan Yaꞌanj maꞌ. Tza̱j ne̱ ne cuchuma̱n rá nij yuvii̱ israelitá ni̱ꞌyaj nij soꞌ man Yaꞌanj, ne̱ cheꞌé dan cunuu ꞌe̱e̱ rá Yaꞌanj man soj a.

1 Corintios 7:25

Cata̱j xnaꞌanj ꞌu̱nj rihaan nij soj cheꞌé nij chana̱ ya̱a̱n a. Né su̱u̱n caꞌneꞌ Síí ꞌNi̱j Raꞌa man níꞌ rihaan níꞌ me nana̱ nihánj, tza̱j ne̱ cunuu ꞌe̱e̱ rá Síí ꞌNi̱j Raꞌa man níꞌ manj, ne̱ cheꞌé dan cata̱j xnaꞌanj ꞌu̱nj rihaan soj da̱j me raj, ne̱ caꞌve̱e gu̱un nucua̱j rá soj man nana̱ nihánj nana̱ cata̱j xnaꞌanj ꞌu̱nj rihaan soj a.

2 Corintios 4:1

Dan me se cunuu ꞌe̱e̱ rá Yaꞌanj man núj, ne̱ caꞌneꞌ soꞌ suun rihaan núj caꞌmi̱i̱ natáj núj, ne̱ cheꞌé dan ne riꞌ rá núj caꞌmi̱i̱ natáj núj snana̱ Yaꞌanj maꞌ.

Efesios 4:32

Dan me se veꞌé quiꞌya̱j soj rihaan tinúú soj á. Ga̱a̱ ꞌe̱e̱ rá soj ni̱ꞌyaj soj tinúú soj á. Neꞌen soj se vaa tinavij Yaꞌanj cacunꞌ tumé níꞌ, cheꞌé se caviꞌ Cristó cheꞌé níꞌ a. Cheꞌé dan no̱ xcúún ya̱ soj cara̱a̱ xꞌnaa soj ni̱ꞌyaj soj tinúú soj ado̱nj.

Colosenses 3:12

Dan me se narii Yaꞌanj man soj canoco̱ꞌ soj man soꞌ, ne̱ cunuu sa̱ꞌ nimán soj rihaan Yaꞌanj, ne̱ ꞌe̱e̱ rá Yaꞌanj man soj, ne̱ cheꞌé dan cunu̱u ꞌe̱e̱ rá soj tuviꞌ soj chugua̱nj. Dan me se ga̱a̱ sa̱ꞌ nimán soj, ne̱ ga̱a̱ nica̱ꞌ nimán soj, ne̱ se̱ guun yuva̱a̱ soj man tuviꞌ soj maꞌ. Tana̱nj ga̱a̱ ina̱j nimán soj na̱nj á.

1 Timoteo 1:13

Asino ya̱a̱n me se qui̱j uxrá caꞌmii ꞌu̱nj cheꞌé Cristó, ne̱ quiꞌyaj ndoꞌo ꞌu̱nj sayuun man nij síí noco̱ꞌ man soꞌ, ne̱ caꞌmii xta̱ꞌ ꞌu̱nj niꞌya̱j ꞌu̱nj man soꞌ, tza̱j ne̱ queneꞌen Cristó se vaa cheꞌé se ne queneꞌe̱n yá ꞌu̱nj da̱j vaa soꞌ roꞌ, cheꞌé dan ne cuchuma̱n rá ꞌu̱nj ni̱ꞌyaj ꞌu̱nj man soꞌ a. Tza̱j ne̱ cunuu ꞌe̱e̱ rá Cristó manj, ne̱ ne quiꞌya̱j soꞌ sayuun manj maꞌ.

1 Timoteo 1:16

Tza̱j ne̱ cunuu ꞌe̱e̱ rá Cristó Jesús niꞌya̱j soꞌ manj, cheꞌé se guun rá Cristó Jesús se vaa xca̱j ꞌó nij síí cuchuma̱n rá ni̱ꞌyaj man soꞌ cuentá se vaa canoco̱ꞌ nij soꞌ man Cristó Jesús, ne̱ xꞌne̱e̱ cacunꞌ xráá nij soꞌ, ne̱ caꞌve̱e ca̱yáán nij soꞌ ga̱ soꞌ nu̱ꞌ cavii nu̱ꞌ caꞌanj ado̱nj.

Hebreos 4:16

Cheꞌé se xrej me soꞌ cheꞌé níꞌ roꞌ, cheꞌé dan se̱ cuchuꞌviꞌ níꞌ a̱ doj maꞌ. Tana̱nj nichru̱nꞌ níꞌ rihaan chrej sa̱ꞌ, ga̱a ne̱ caꞌve̱e cunu̱u ꞌe̱e̱ rá Yaꞌanj man níꞌ, ne̱ asa̱ꞌ ꞌnaꞌ sayuun rihaan níꞌ, ne̱ caꞌve̱e cata̱ꞌ tuꞌva níꞌ man soꞌ, ne̱ naca̱j soꞌ man níꞌ rihaan sayuun chugua̱nj. Dan me se ya̱ cunu̱u ꞌe̱e̱ rá Yaꞌanj man níꞌ, ne̱ asa̱ꞌ quiranꞌ níꞌ sayuun, ne̱ quiꞌya̱j soꞌ se lu̱j ga̱ níꞌ ado̱nj.

Hebreos 6:10

ꞌO̱ se né si̱j chiꞌi̱i̱ me Yaꞌanj maꞌ. Si̱j vaa nica̱ rá me Yaꞌanj, ne̱ ꞌo̱ cu̱nuû rá Yaꞌanj ta̱ranꞌ nij suun sa̱ꞌ quiꞌyaj soj ga̱a canocoꞌ soj man soꞌ na̱nj á. Ne̱ ꞌo̱ cu̱nuû rá Yaꞌanj se vaa ꞌyaj soj cheꞌé se aráj cochro̱j soj rihaan soꞌ na̱nj chugua̱nj. Dan me se quiꞌyaj uxrá soj suun racuíj man nij síí noco̱ꞌ man Cristó ga̱a rque̱, ne̱ ꞌo̱ da̱nj ꞌyaj ya̱ soj na̱nj ado̱nj.

Santiago 2:13

ꞌO̱ se asa̱ꞌ caꞌne̱ꞌ Yaꞌanj cacunꞌ cheꞌé yuvii̱, ne̱ se̱ gaa ꞌe̱e̱ rá Yaꞌanj ni̱ꞌyaj Yaꞌanj man síí ne ꞌe̱e̱ rá man tuviꞌ maꞌ. Tza̱j ne̱ se niꞌya̱nj rá me se yoꞌ me quiꞌya̱j canaán rihaan sayuun ado̱nj.

Santiago 3:17

Tza̱j ne̱ síí nica̱j tucuáán sa̱ꞌ cavii rihaan Yaꞌanj me se ꞌo̱ vaa sa̱ꞌ nimán soꞌ, ne̱ cheꞌé dan ꞌo̱ chij yáán soꞌ, ne̱ ne unuꞌ soꞌ ga̱ yuvii̱ maꞌ. ꞌO̱ lu̱j aꞌmii soꞌ ga̱ tuviꞌ soꞌ, ne̱ ne naquiꞌyaj soꞌo̱ soꞌ xréé soꞌ ga̱a aꞌmii tuviꞌ soꞌ ga̱ soꞌ maꞌ. ꞌE̱e̱ uxrá rá soꞌ niꞌya̱j soꞌ tuviꞌ soꞌ, ne̱ ina̱nj se sa̱ꞌ ꞌyaj soꞌ, ne̱ ꞌo̱ cuya̱a̱n veꞌé ꞌyaj soꞌ rihaan nu̱ꞌ nij yuvii̱, ne̱ ꞌyaj soꞌ nu̱ꞌ nda̱a vaa taj soꞌ a. Veé síí ꞌyaj nu̱ꞌ nihánj me síí nica̱j ya̱ tucuáán sa̱ꞌ cavii rihaan Yaꞌanj chugua̱nj.

1 Pedro 2:10

Dan me se ga̱a naá me se né yuvi̱i̱ ꞌni̱j raꞌa Yaꞌanj me soj, tza̱j ne̱ ya̱j me se soj me síí ꞌni̱j raꞌa Yaꞌanj a. Ga̱a naá me se ne ꞌe̱e̱ rá Yaꞌanj niꞌya̱j soꞌ man soj, tza̱j ne̱ ya̱j me se cunuu ꞌe̱e̱ rá Yaꞌanj niꞌya̱j soꞌ man soj ado̱nj.