San Mateo 28:9 - Triqui de San Juan Copala

⁹ Ne̱ ma̱an orá dan nariꞌ tuviꞌ maꞌa̱n Jesús ga̱ ro̱j chana̱ yoꞌ, ne̱ cataj soꞌ a: ―Rangaꞌ na̱nj á ―taj Jesús rihaan ro̱j noꞌ a. Ga̱a ne̱ cuchiꞌ ro̱j chana̱ yoꞌ rihaan Jesús, ne̱ caꞌanj ca̱yáán ru̱j ro̱j noꞌ rihaan soꞌ, ne̱ taꞌaa ro̱j noꞌ tacóó Jesús, ne̱ caráj gue̱e̱ ro̱j noꞌ rihaan Jesús a.

San Mateo 28:9 ပူးပေါင်းရင်းမြစ်များ

San Mateo 14:33

Ga̱a ne̱ caráj gue̱e̱ nij síí ma̱n rque rihoo rihaan Jesús, ne̱ cataj nij soꞌ a: ―Ya̱ ya̱ Taꞌni̱j Yaꞌanj mé so̱ꞌ ado̱nj ―taj nij soꞌ a.

San Mateo 23:7

Ne̱ niha̱ꞌ rá nij soꞌ ga̱a veꞌé aꞌmii yuvii̱ ga̱ nij soꞌ ga̱a chéé nij soꞌ yuꞌvee, ne̱ niha̱ꞌ rá nij soꞌ cata̱j yuvii̱ Síí uun chij rihaan nij soꞌ a.

San Mateo 28:10

Ga̱a ne̱ cataj Jesús rihaan ro̱j chana̱ a: ―Se̱ cuchuꞌviꞌ ro̱j so̱j maꞌ. Ma̱an se caꞌa̱nj ro̱j so̱j cata̱j xnaꞌanj ro̱j so̱j rihaan nij tinúú ꞌu̱nj se vaa cavi̱i̱ nij soꞌ caꞌa̱nj nij soꞌ nda̱a estadó Galilea, ne̱ nda̱a yoꞌ queneꞌe̱n nij soꞌ manj á ―taj Jesús rihaan ro̱j chana̱ yoꞌ a.

San Mateo 28:17

Ga̱a ne̱ queneꞌen nij soꞌ man Jesús, ne̱ caráj gue̱e̱ nij soꞌ rihaan soꞌ, tza̱j ne̱ ne gu̱un ya̱ rá taꞌa̱j nij soꞌ se vaa ya̱ ya̱ Jesús me soꞌ a̱ maꞌ.

San Mateo 28:8

Veé dan, ne curiha̱nj ro̱j chana̱ caꞌanj ro̱j noꞌ a. Veé ro̱j noꞌ cuchuꞌviꞌ, ne̱ veé ro̱j noꞌ guun niha̱ꞌ rá uún a. Veé dan me se cunánj ndoꞌo ro̱j noꞌ, cata̱j xnaꞌanj ro̱j noꞌ rihaan nij síí tucuꞌyón snana̱ Jesús nu̱ꞌ se vaa queneꞌen ro̱j noꞌ do̱ꞌ, nu̱ꞌ nana̱ cataj xnaꞌanj se‑mo̱zó Yaꞌanj rihaan ro̱j noꞌ do̱ꞌ a.

San Lucas 1:28

Ga̱a ne̱ dan me se cuchiꞌ se‑mo̱zó Yaꞌanj rihaan Mariá, ne̱ cataj soꞌ a: ―Ra̱cuíj Yaꞌanj mán so̱ꞌ á. ꞌO̱ se quiꞌyaj ndoꞌo Yaꞌanj se lu̱j cheꞌé so̱ꞌ, ne̱ ꞌo̱ yáán Yaꞌanj ga̱ so̱ꞌ ado̱nj. Sa̱ꞌ doj avii uruún so̱ꞌ rihaan cunuda̱nj nij chana̱, ꞌyaj Yaꞌanj a ―da̱nj cataj se‑mo̱zó Yaꞌanj rihaan Mariá a.

San Lucas 24:52

Dan me se caráj gue̱e̱ nij soꞌ rihaan soꞌ, ga̱a ne̱ canica̱j nij soꞌ caꞌanj uún nij soꞌ nda̱a chumanꞌ Jerusalén, ne̱ guun niha̱ꞌ uxrá rá nimán nij soꞌ,

San Lucas 7:38

Ga̱a ne̱ caꞌanj ca̱yáán ru̱j noꞌ nichru̱nꞌ tacóó Jesús, ne̱ taꞌvee uxrá noꞌ, ne̱ naꞌnuꞌ noꞌ na rihaan noꞌ tacóó Jesús a. Ga̱a ne̱ ma̱an yuvé raa̱ noꞌ naꞌve noꞌ tacóó Jesús a. Cachrón tuꞌva̱ noꞌ tacóó Jesús, ga̱a ne̱ caxríj noꞌ casté gunꞌ da̱j tacóó soꞌ uún a.

San Juan 12:3

Dan me se nica̱j chana̱ cuꞌna̱j Mariá naꞌya̱nꞌ litró casté gunꞌ da̱j tuꞌve̱e̱ ndoꞌo cuꞌna̱j nardo ta̱ꞌ asuun, ne̱ caxríj noꞌ tacóó Jesús, ga̱a ne̱ yuvé raa̱ maꞌa̱n noꞌ tanacoo̱ noꞌ tacóó Jesús a. Ga̱a ne̱ nasíj totoꞌ nu̱ꞌ rá veꞌ yoꞌ, quiꞌyaj casté caxríj Mariá tacóó Jesús a.

San Juan 20:19

Dan me se rej tiꞌnuu maꞌa̱n güii cotungó yoꞌ me se caráán nij síí tucuꞌyón snana̱ Jesús nij taꞌyaa rihaan veꞌ ma̱n nij soꞌ, cheꞌé se cuchuꞌviꞌ nij soꞌ niꞌya̱j nij soꞌ nij síí uun chij rihaan nij yuvii̱ israelitá a. Ga̱a ne̱ caꞌnaꞌ Jesús, ne̱ canicunꞌ soꞌ tanu̱u̱ rej ma̱n nij soꞌ, ne̱ cataj soꞌ a: ―Ga̱a̱ dínj nimán soj á ―taj Jesús rihaan nij soꞌ a.

San Juan 20:28

Ga̱a ne̱ cataj Tomás rihaan soꞌ a: ―So̱ꞌ me Síí ꞌNi̱j Raꞌa manj, ne̱ so̱ꞌ me Taꞌanj ꞌu̱nj ado̱nj ―taj soꞌ rihaan Jesús a.

2 Corintios 13:11

Ne̱ vaa do̱j nana̱ me raj cata̱j xnaꞌanj ꞌu̱nj rihaan soj, tinu̱j, nocoj. Dan me se ga̱a̱ niha̱ꞌ ya̱ rá nimán soj á. Rquee̱ soj sa̱ꞌ doj ga̱a̱ nimán soj á. Ga̱a̱ nucua̱j rá soj quiꞌya̱j snana̱ ꞌu̱nj á. ꞌO̱ cuya̱a̱n ga̱a̱ rá nimán soj ga̱ tuviꞌ soj na̱nj á. Ga̱a̱ xe̱j nimán soj á. Ne̱ ca̱yáán Yaꞌanj si̱j ꞌyaj vaa xe̱j nimán níꞌ do̱ꞌ, si̱j ꞌyaj nuu ꞌe̱e̱ rá níꞌ tinúú níꞌ do̱ꞌ, ga̱ soj ado̱nj.

Apocalipsis 3:9

Ne̱ vaa nij síí tuꞌva rmaꞌa̱n se vaa si̱j israelitá me nij soꞌ, tza̱j ne̱ né si̱j israelitá ya̱ me nij soꞌ maꞌ. Ma̱an se síí ne̱ me nij soꞌ, ne̱ síí tucuꞌyón snana̱ Síí Chre̱e me uún nij soꞌ ado̱nj. Dan me se nago̱j man nij soꞌ rihaan soj, ne̱ cuchi̱ꞌ nij soꞌ rihaan soj, ne̱ ca̱yáán ru̱j nij soꞌ rihaan soj, ne̱ queneꞌe̱n nij soꞌ se vaa si̱j cunuu ꞌe̱e̱ raj man me soj ado̱nj.