San Mateo 24:6 - Triqui de San Juan Copala

⁶ ’Dan me se vaa güii, ne̱ queneꞌe̱n soj se vaa cunu̱ꞌ uxrá chumanꞌ ga̱ tuviꞌ chumanꞌ a. Ne̱ cuno̱ uxrá soj nana̱ se vaa unuꞌ chumanꞌ ma̱n ga̱nꞌ ga̱ tuviꞌ chumanꞌ yoꞌ a. Tu̱mé soj man soj se̱ cuchuꞌviꞌ nimán soj maꞌ. Ma̱an se vaa cheꞌé gu̱un sayuun yoꞌ rihaan chumii̱ nihánj ado̱nj. Tza̱j ne̱ asa̱ꞌ quisíj guun da̱nj, ga̱a ne̱ se̱ caꞌanj niꞌya̱ chumii̱ nihánj nu̱ꞌ orá maꞌ. ꞌO̱ se quina̱j chumii̱ nihánj doj ado̱nj.

San Mateo 24:6 ပူးပေါင်းရင်းမြစ်များ

San Mateo 2:3

Ga̱a ne̱ cuchiꞌ nana̱ yoꞌ rihaan síí nica̱j suun rey cuꞌna̱j Herodes, ga̱a ne̱ cuchuꞌviꞌ ndoꞌo soꞌ ga̱ nij síí ma̱n chumanꞌ Jerusalén a.

San Mateo 24:14

Ne̱ caꞌmi̱i̱ natáj yuvii̱ nana̱ sa̱ꞌ nihánj nana̱ cheꞌé da̱j vaa uun chij Yaꞌanj cuno̱ yuvii̱ ma̱n nu̱ꞌ chumii̱, ne̱ xca̱j cunuda̱nj nij xꞌneꞌ nij yuvii̱ ino̱ vaa stucua̱nj cuentá cheꞌé nana̱ sa̱ꞌ a. Síj ga̱a ne̱ caꞌve̱e navi̱j chumii̱ nihánj na̱nj ado̱nj ―taj Jesús rihaan nij síí tucuꞌyón snana̱ soꞌ a.

San Mateo 26:54

Tza̱j ne̱ sese da̱nj qui̱ꞌyáj, ga̱a ne̱ asa̱ꞌ caꞌve̱e quisi̱j nu̱ꞌ nana̱ no̱ rihaan Danj Yaꞌanj nana̱ taj xnaꞌanj da̱j ga̱a̱ qui̱ránꞌ ꞌu̱nj ga̱ ―taj Jesús rihaan síí nica̱j neê espadá yoꞌ a.

San Lucas 21:19

ꞌO̱ se cheꞌé se noco̱ꞌ xraan soj manj roꞌ, cheꞌé dan ꞌo̱ ga̱a̱ iꞌna̱ꞌ nimán soj nu̱ꞌ cavii nu̱ꞌ caꞌanj ado̱nj.

San Lucas 21:9

’Dan me se caꞌve̱e se cuno̱ soj nana̱ se vaa unuꞌ uxrá chumanꞌ ga̱ tuviꞌ chumanꞌ do̱ꞌ, se vaa tucuáá ndoꞌo yuvii̱ rihaan gobiernó do̱ꞌ, tza̱j ne̱ se̱ cuchuꞌviꞌ soj maꞌ. Vaa cheꞌé gu̱un sayuun yoꞌ rihaan chumii̱ nihánj asino ya̱a̱n ado̱nj. Tza̱j ne̱ asa̱ꞌ guun da̱nj, ga̱a ne̱ se̱ caꞌanj niꞌya̱ chumii̱ nihánj nu̱ꞌ orá maꞌ. ꞌO̱ se quina̱j chumii̱ nihánj doj ado̱nj ―taj soꞌ rihaan nij soꞌ a.

San Lucas 22:37

ꞌO̱ se vaa nana̱ no̱ rihaan Danj Yaꞌanj taj a: “Cataj nii se vaa si̱j ꞌyaj cacunꞌ me soꞌ a”, taj Danj Yaꞌanj cheꞌé ꞌu̱nj, ne̱ vaa cheꞌé quisi̱j ya̱ nu̱ꞌ nana̱ cheꞌej a. ꞌO̱ se da̱j doj quisi̱j se vaa ꞌyáá ꞌu̱nj rihaan chumii̱ nihánj na̱nj ado̱nj ―taj Jesús rihaan nij soꞌ a.

San Juan 14:1

Ga̱a ne̱ cataj Jesús rihaan ta̱ranꞌ nij soꞌ a: ―Caꞌne̱ꞌ rá soj ga̱ suun ꞌnaꞌ xruꞌ nimán á. Cuchuma̱n rá soj ni̱ꞌyaj soj Yaꞌanj, ne̱ cuchuma̱n rá soj ni̱ꞌyaj soj manj á.

San Juan 14:27

’Dan me se se xe̱j nu̱u̱ nimán ꞌu̱nj ta̱náj ꞌu̱nj rihaan soj, ne̱ se xe̱j nu̱u̱ nimán ꞌu̱nj rque̱j man soj, ne̱ se̱ tihaꞌ yuꞌunj ꞌu̱nj man soj nda̱a vaa ꞌyaj nij síí noco̱ꞌ se‑chre̱j chumii̱ nihánj maꞌ. Ya̱ ya̱ ga̱a̱ xe̱j nimán soj, quiꞌya̱j yá ꞌu̱nj ado̱nj. Taj cheꞌé nu̱u̱ xruꞌ nimán soj maꞌ. Se̱ cuchuꞌviꞌ nimán soj maꞌ.

2 Tesalonicenses 2:2

se vaa se̱ guun vi̱j raꞌya̱nj rá soj maꞌ. Se̱ caráyaꞌa̱nj soj nana̱ cuno soj se vaa a̱j quisíj güii caꞌna̱ꞌ uún Síí ꞌNi̱j Raꞌa man níꞌ rihaan chumii̱ maꞌ. Né na̱na̱ ya̱ me nana̱ yoꞌ maꞌ. Caꞌve̱e se nana̱ caꞌmii Nimán Yaꞌanj me yoꞌ taj nii, caꞌve̱e se da̱nj aꞌmii ꞌo̱ síí aꞌmii natáj taj nii, caꞌve̱e se nana̱ cachrón núj rihaan ꞌo̱ yanj cartá me yoꞌ taj nii, tza̱j ne̱ se̱ cuchumán rá soj maꞌ.

Apocalipsis 6:4

Ga̱a ne̱ cavii ꞌó cuayó, ne̱ cuayó mare̱e me xoꞌ a. Ga̱a ne̱ rqué nii se nucua̱j man síí ta̱j xráá cuayó yoꞌ se vaa quisi̱j cayáán dínj yuvii̱ rihaan chumii̱, quiꞌya̱j soꞌ, ne̱ ticavi̱ꞌ ndoꞌo yuvii̱ tuviꞌ yuvii̱, quiꞌya̱j soꞌ a. Ne̱ rqué nii ꞌo̱ neê espadá xi̱j rihaan soꞌ a.