San Mateo 21:44 - Triqui de San Juan Copala

⁴⁴ Ne̱ yuvej yoꞌ me se ase vaa yuvej yoꞌ vaa ꞌu̱nj, ne̱ ase vaa yuvii̱ acoꞌ cheꞌé yuvej yoꞌ vaa yuvii̱ naꞌvej rá cuno̱ rihaan ꞌu̱nj, ne̱ uxrá quira̱nꞌ nij soꞌ sayuun na̱nj ado̱nj. Ne̱ ase vaa yuvii̱ quinij yuvej yoꞌ xráá roꞌ, vaa nij yuvii̱ quiꞌya̱j uxrá ꞌu̱nj sayuun man na̱nj ado̱nj ―taj Jesús a.

San Mateo 21:44 ပူးပေါင်းရင်းမြစ်များ

1 Pedro 2:8

Ne̱ taj uún Danj Yaꞌanj a: Caco̱ꞌ cheꞌé yuvii̱, quiꞌya̱j yuvej yoꞌ, ne̱ naxru̱ꞌ yuvii̱ a, taj ꞌó nana̱ no̱ rihaan Danj Yaꞌanj a. Ne̱ nij síí ne amán rá niꞌya̱j man Cristó me se cheꞌé se ne cuno̱ nij soꞌ snana̱ Yaꞌanj roꞌ, cheꞌé dan naxru̱ꞌ nij soꞌ ne̱ quiri̱ꞌ nij soꞌ a. Dan me se caꞌnéé raꞌa Yaꞌanj man nij soꞌ quira̱nꞌ nij soꞌ da̱nj na̱nj ado̱nj.

Romanos 9:33

ꞌO̱ cuya̱a̱n vaa nana̱ aꞌmij ga̱ nana̱ aꞌmii Danj Yaꞌanj cheꞌé Jesucristó, ne̱ dan me se ga̱a naá cataj Yaꞌanj a: Ni̱ꞌyaj so̱ꞌ á. A̱j cunéꞌ ꞌu̱nj ꞌo̱ yuvii̱ chumanꞌ Sion, ne̱ ase vaa ꞌo̱ yuvej vaa soꞌ, nucua̱j ndoꞌo soꞌ a. Naxru̱ꞌ yuvii̱, quiꞌya̱j yuvej yoꞌ, ne̱ gu̱un naꞌa̱j nij yuvii̱ queneꞌe̱n nij yuvii̱ man soꞌ, tza̱j ne̱ sese cuchuma̱n rá ꞌo̱ soꞌ queneꞌe̱n soꞌ man síí cunéꞌ ꞌu̱nj, ne̱ se̱ guun naꞌa̱j soꞌ maꞌ. Tana̱nj cavi̱i̱ sa̱ꞌ soꞌ ado̱nj. Da̱nj caꞌmii Yaꞌanj cheꞌé Jesucristó a.

San Lucas 20:18

Ne̱ ase vaa yuvej yoꞌ vaa ꞌu̱nj, ne̱ ase vaa yuvii̱ acoꞌ cheꞌé yuvej yoꞌ vaa yuvii̱ naꞌvej rá cuno̱ rihaan ꞌu̱nj, ne̱ uxrá quira̱nꞌ nij soꞌ sayuun na̱nj ado̱nj. Ne̱ ase vaa yuvii̱ quinij yuvej yoꞌ xráá vaa nij yuvii̱ qui̱ꞌyáá ꞌu̱nj sayuun man na̱nj ado̱nj ―taj Jesús a.

San Mateo 27:25

Ga̱a ne̱ cataj nij yuvii̱ rihaan soꞌ a: ―Veé maꞌa̱n núj do̱ꞌ, maꞌa̱n taꞌníí núj do̱ꞌ, me síí tu̱mé cacunꞌ se vaa cavi̱ꞌ soꞌ na̱nj ado̱nj ―taj nij yuvii̱ yoꞌ a.

1 Tesalonicenses 2:16

Dan me se me rá núj nata̱ꞌ núj snana̱ Yaꞌanj rihaan soj si̱j yaníj cheꞌé yan nani̱i̱ soj rihaan chrej chiꞌi̱i̱ do̱ꞌ, rihaan sayuun do̱ꞌ a. Tza̱j ne̱ aráán ndoꞌo nij síí israelitá yoꞌ chrej rihaan núj, ne̱ guun noco̱o uxrá cacunꞌ quita̱j xráá nij soꞌ nu̱ꞌ cavii nu̱ꞌ caꞌanj ado̱nj. Cheꞌé dan ꞌo̱ caꞌmaan rá Yaꞌanj niꞌya̱j Yaꞌanj man nij soꞌ, ne̱ yu̱u̱n cheꞌe̱ quiranꞌ nij soꞌ sayuun, quiꞌyaj Yaꞌanj na̱nj ado̱nj.

San Mateo 26:24

ꞌO̱ se taj Danj Yaꞌanj se vaa caꞌa̱nj ꞌu̱nj cavi̱ꞌ ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ ne̱ ya̱ da̱nj qui̱ránꞌ ꞌu̱nj ado̱nj. Tza̱j ne̱ nique̱ ndoꞌo síí ta̱cuachén manj rihaan nij síí ta̱j riꞌyunj manj na̱nj á. Quira̱nꞌ uxrá soꞌ sayuun na̱nj á. Snóꞌo yoꞌ me se sese ne caꞌnga̱a̱ soꞌ, ne̱ cavii sa̱ꞌ soꞌ doj asuun tza̱j ado̱nj ―taj Jesús a.

San Juan 19:11

Ga̱a ne̱ cataj Jesús rihaan soꞌ a: ―Sese né Yaꞌa̱nj me síí cuneꞌ mán so̱ꞌ ca̱tá so̱ꞌ suun nihánj, ne̱ ne gu̱un nu̱cuáá so̱ꞌ qui̱ꞌyáá so̱ꞌ a̱ doj rasu̱u̱n asuun tza̱j maꞌ. Cheꞌé dan síí tacuachén manj rihaan so̱ꞌ me síí tumé doj cacunꞌ rihaan so̱ꞌ ado̱nj ―taj Jesús rihaan Pilató yoꞌ a.

San Mateo 21:43

Cheꞌé dan cuano̱ nihánj me se cata̱j xnaꞌanj ꞌu̱nj rihaan nij soj se vaa caꞌne̱ꞌ rá Yaꞌanj ga̱ yan uun chij soꞌ rihaan nij soj, ne̱ cune̱ꞌ soꞌ man ꞌó nij yuvii̱ gu̱un chij soꞌ rihaan, ne̱ veꞌé quiꞌya̱j ꞌó nij yuvii̱ yoꞌ nu̱ꞌ se vaa me rá Yaꞌanj quiꞌya̱j nij soꞌ na̱nj á.

San Mateo 21:45

Dan me se cuno nij xrej ata̱ suun noco̱o cuno nij síí fariseo cuno cuentó nanó Jesús, ne̱ xcaj nij soꞌ cuentá se vaa cheꞌe̱ maꞌa̱n nij soꞌ me cuentó nanó Jesús a. Ase vaa nij síí nu̱u̱ tumé naa̱ vaa maꞌa̱n nij soꞌ niꞌya̱j Jesús a.

San Lucas 2:34

ne̱ cachíín niꞌya̱j Simeón rihaan Yaꞌanj se vaa quiꞌya̱j Yaꞌanj se lu̱j ga̱ ro̱j ni̱ca̱ José a. Ga̱a ne̱ cataj soꞌ rihaan Mariá a: ―Ni̱ꞌyaj so̱ꞌ á. Cuneꞌ Yaꞌanj man neꞌej nihánj cheꞌé rej cavi̱i̱ sa̱ꞌ uxrá queꞌe̱e̱ tuviꞌ níꞌ si̱j israelitá, quiꞌya̱j soꞌ, tza̱j ne̱ queꞌe̱e̱ tuviꞌ níꞌ tuna̱, quiꞌya̱j uún soꞌ ado̱nj. Dan me se caꞌnéé Yaꞌanj man soꞌ cheꞌé rej xca̱j yuvii̱ cuentá cheꞌé Yaꞌanj, tza̱j ne̱ caꞌmi̱i̱ chiꞌi̱i̱ nii ni̱ꞌyaj nii man soꞌ ado̱nj.