San Mateo 16:23 - Triqui de San Juan Copala

²³ Ga̱a ne̱ canica̱j Jesús, ne̱ caꞌmii soꞌ rihaan Pedró a: ―Naxu̱u̱n so̱ꞌ mán so̱ꞌ rihanj á. Naꞌvej raj que̱neꞌenj mán so̱ꞌ maꞌ. ꞌO̱ se ase tuꞌva Síí Chre̱e roꞌ, da̱nj tuꞌvá so̱ꞌ, ne̱ aráán so̱ꞌ chrej rihanj cu̱noj rihaan Yaꞌanj na̱nj á. Da̱nj tuꞌvá so̱ꞌ, cheꞌé se ne acaj so̱ꞌ cuentá da̱j me rá Yaꞌanj ado̱nj. Ma̱an se ina̱nj acaj so̱ꞌ cuentá da̱j me rá yuvii̱ na̱nj ado̱nj ―taj Jesús rihaan Pedró a.

San Mateo 16:23 ပူးပေါင်းရင်းမြစ်များ

San Mateo 16:22

Ga̱a ne̱ quirii yaníj Pedró man Jesús, ne̱ guun cheꞌe̱ soꞌ cataj soꞌ se vaa ne nó xcúún Jesús caꞌmi̱i̱ Jesús da̱nj maꞌ. Ne̱ cataj Pedró a: ―Cunu̱u ꞌe̱e̱ rá Yaꞌanj mán so̱ꞌ, Señor. Daj chiha̱a̱ míj se̱ quiránꞌ so̱ꞌ da̱nj maꞌ ―taj Pedró rihaan Jesús a.

San Mateo 18:7

Nique̱ ndoꞌo nij síí ma̱n rihaan chumii̱ nihánj, cheꞌé se vaa yaꞌnúj uxrá rihaan nij soꞌ canoco̱ꞌ nij soꞌ chrej chiꞌi̱i̱ na̱nj á. Ne̱ ina̱nj da̱nj vaa chumii̱ nihánj, ma̱n ndoꞌo chrej chiꞌi̱i̱ canoco̱ꞌ yuvii̱ ado̱nj. Tza̱j ne̱ nique̱ síí ꞌyaj anocoꞌ yuvii̱ chrej chiꞌi̱i̱ yoꞌ na̱nj ado̱nj. ꞌO̱ se daj chiha̱a̱ míj se̱ cavii sa̱ꞌ soꞌ maꞌ.

San Mateo 4:10

Ga̱a ne̱ cataj xnaꞌanj Jesús rihaan Síí Chre̱e a: ―Naxu̱u̱n yaníj so̱ꞌ mán so̱ꞌ, Síí Chre̱e. ꞌO̱ se Danj Yaꞌanj taj a: “Rihaan Yaꞌanj Si̱j ꞌNi̱j Raꞌa man níꞌ cara̱a̱ gue̱e̱ so̱ꞌ, ne̱ rihaan o̱rúnꞌ soꞌ cu̱nuû so̱ꞌ na̱nj á.” Da̱nj taj Danj Yaꞌanj ado̱nj ―taj Jesús rihaan Síí Chre̱e a.

San Marcos 8:33

Ga̱a ne̱ canica̱j Jesús, ne̱ niꞌya̱j soꞌ man nij síí tucuꞌyón snana̱ soꞌ, ne̱ nucua̱j caꞌmii soꞌ rihaan Pedró a: ―Naxu̱u̱n so̱ꞌ mán so̱ꞌ rihanj á. ꞌO̱ se ase tuꞌva Síí Chre̱e roꞌ, da̱nj tuꞌvá so̱ꞌ asânj. Da̱nj tuꞌvá so̱ꞌ, cheꞌé se ne acaj so̱ꞌ cuentá da̱j me rá Yaꞌanj ado̱nj. Ma̱an se ina̱nj acaj so̱ꞌ cuentá da̱j me rá yuvii̱ na̱nj ado̱nj ―taj Jesús a.

San Lucas 4:8

Ne̱ canica̱j Jesús cataj Jesús rihaan Síí Chre̱e a: ―ꞌO̱ se Danj Yaꞌanj taj nana̱ nihánj a: “Rihaan o̱rúnꞌ Yaꞌanj Si̱j ꞌNi̱j Raꞌa man níꞌ cara̱a̱ gue̱e̱ so̱ꞌ, ne̱ rihaan o̱rúnꞌ soꞌ cu̱nuû so̱ꞌ rihaan ado̱nj.” Da̱nj taj Danj Yaꞌanj ado̱nj ―taj Jesús rihaan Síí Chre̱e yoꞌ a.

San Juan 6:70

Ga̱a ne̱ cataj Jesús rihaan chuvi̱j nij soꞌ a: ―Dan me se ꞌu̱nj me síí narii man chuvi̱j nij soj se vaa canoco̱ꞌ soj manj, tza̱j ne̱ ase vaa maꞌa̱n Síí Chre̱e vaa ꞌo̱ nij soj ado̱nj ―taj Jesús rihaan chuvi̱j nij soꞌ a.

Romanos 14:13

Cheꞌé dan caꞌne̱ꞌ rá níꞌ ga̱ suun utaꞌ níꞌ cacunꞌ xráá tinúú níꞌ á. Tana̱nj gu̱un ya̱ rá nij soj se vaa se̱ quiꞌyaj tinúú soj cacunꞌ, quiꞌya̱j maꞌa̱n soj a.

Romanos 14:21

Sese yuꞌva̱ꞌ cha̱ꞌ ꞌo̱ rasu̱u̱n rá tinúú so̱ꞌ, ne̱ sese se̱ chá so̱ꞌ man yoꞌ, ne̱ cuna̱j qui̱ꞌyáá so̱ꞌ á. Sese yuꞌva̱ꞌ coꞌo̱ꞌ ꞌo̱ na rá tinúú so̱ꞌ, ne̱ sese se̱ coꞌo so̱ꞌ man yoꞌ, ne̱ cuna̱j qui̱ꞌyáá so̱ꞌ á. Ta̱dó so̱ꞌ sese quira̱nꞌ tinúú so̱ꞌ cacunꞌ cheꞌé se vaa qui̱ꞌyáá so̱ꞌ á.

Filipenses 3:19

Vaa güii caca̱a̱ ndoꞌo nij soꞌ na̱nj á. Ina̱nj nee̱ man nij soꞌ aráyaꞌa̱nj nij soꞌ, tza̱j ne̱ ne nocoꞌ nij soꞌ Yaꞌanj maꞌ. Nij ꞌyaj nij soꞌ, tza̱j ne̱ ne naꞌa̱j nij soꞌ maꞌ. Tana̱nj sa̱ꞌ uxrá ꞌyaj nij soꞌ, rá maꞌa̱n nij soꞌ chugua̱nj. Ina̱nj cheꞌé rasu̱u̱n ma̱n rihaan chumii̱ nihánj nanó rá nij soꞌ na̱nj ado̱nj.

Colosenses 3:2

Dan me se nano̱ rá soj cheꞌé rasu̱u̱n ma̱n rej xta̱ꞌ, ne̱ se̱ nanó rá soj cheꞌé rasu̱u̱n ma̱n rihaan chumii̱ nihánj maꞌ.