San Marcos 9:25 - Triqui de San Juan Copala

²⁵ Dan me se queneꞌen Jesús se vaa cunánj ndoꞌo yuvii̱ caꞌna̱ꞌ nij yuvii̱ rej nicu̱nꞌ soꞌ, ne̱ cheꞌé dan nucua̱j caꞌmii Jesús rihaan nana̱ chre̱e yoꞌ a: ―Rihaan so̱ꞌ na̱na̱ chre̱e quiꞌyaj yaꞌmi̱i ne̱ quiꞌyaj soꞌo̱ man xnii nihánj aꞌmij, ne̱ aꞌnéꞌ ꞌu̱nj suun rihaan so̱ꞌ se vaa cu̱riha̱nj so̱ꞌ cuaj nimán soꞌ cuano̱, ne̱ daj chiha̱a̱ míj se̱ catúj uún so̱ꞌ nimán soꞌ a̱ maꞌ ―taj Jesús a.

San Marcos 9:25 ပူးပေါင်းရင်းမြစ်များ

San Mateo 12:22

Guun naá do̱j, ga̱a ne̱ caꞌnaꞌ yuvii̱ rihaan Jesús, ne̱ nica̱j nij yuvii̱ man ꞌo̱ síí yaꞌmi̱i aráán rihaan nu̱u̱ nana̱ chre̱e nimán a. Ne̱ nahuun nu̱ꞌ soꞌ, quiꞌyaj Jesús, ne̱ naxraꞌ rihaan soꞌ, ne̱ caꞌmii soꞌ ado̱nj.

San Mateo 17:18

Ga̱a ne̱ caꞌneꞌ Jesús suun rihaan nana̱ chre̱e nu̱u̱ nimán xnii se vaa ta̱náj yoꞌ man xnii a. Ga̱a ne̱ curiha̱nj nana̱ chre̱e nimán xnii, caꞌanj yoꞌ, ne̱ veé ma̱an orá dan nahuun sa̱ꞌ xnii yoꞌ a.

San Marcos 9:15

Ne̱ nu̱ꞌ queneꞌen nij yuvii̱ man Jesús, ne̱ nu̱ꞌ caꞌanj ndoꞌo rá nij yuvii̱, ne̱ cunánj nij yuvii̱ nda̱a rej va̱j Jesús caꞌmi̱i̱ nij soꞌ ga̱ soꞌ a.

San Marcos 9:24

Nu̱ꞌ caꞌmii Jesús da̱nj, ne̱ nu̱ꞌ caguáj rej xnii, cataj soꞌ a: ―Amán rá ꞌu̱nj niꞌya̱j ꞌu̱nj Yaꞌanj á. Ra̱cuíj so̱ꞌ manj cuchuma̱n doj raj, rugua̱nj ―taj soꞌ rihaan Jesús a.

San Marcos 9:26

Ga̱a ne̱ caguáj nana̱ chre̱e, ne̱ guun snu̱j ndoꞌo xnii naxruꞌ xnii, quiꞌyaj nana̱ chre̱e, ne̱ dan me se curiha̱nj nana̱ chre̱e nimán xnii yoꞌ a. Ga̱a ne̱ ase vaa síí caviꞌ roꞌ, da̱nj vaa xnii, naj xnii rihaan yoꞌóó, ne̱ queꞌe̱e̱ ndoꞌo yuvii̱ cataj se vaa ya̱ ya̱ caviꞌ soꞌ a.

San Lucas 11:14

Dan me se quirii Jesús ꞌo̱ nana̱ chre̱e yaꞌmi̱i nimán ꞌo̱ snóꞌo, ne̱ ga̱a curiha̱nj nana̱ chre̱e, ne̱ caꞌmii síí yaꞌmi̱i ado̱nj. Ne̱ caráyaꞌa̱nj uxrá nij yuvii̱ queneꞌen nij soꞌ se vaa quiꞌyaj Jesús,

San Lucas 4:35

Ga̱a ne̱ canica̱j Jesús caxríj yuva̱a̱ soꞌ man nana̱ chre̱e nu̱u̱ nimán snóꞌo yoꞌ, ne̱ cataj soꞌ a: ―Dínj tuꞌvá so̱ꞌ cu̱riha̱nj so̱ꞌ cuaj nimán síí nihánj á ―taj Jesús rihaan nana̱ chre̱e yoꞌ a. Ne̱ tinaxruꞌ nana̱ chre̱e man snóꞌo rihaan nij yuvii̱, ga̱a ne̱ curiha̱nj nana̱ chre̱e nimán snóꞌo, tza̱j ne̱ ne quira̱nꞌ chiꞌii̱ snóꞌo a̱ maꞌ.

San Lucas 4:41

Ne̱ queꞌe̱e̱ nij síí ranꞌ roꞌ, curiha̱nj nana̱ chre̱e nimán uún, ne̱ caguáj nij nana̱ chre̱e yoꞌ, ne̱ cataj nij soꞌ se vaa Taꞌníí Yaꞌanj me Jesús a. Tza̱j ne̱ nucua̱j caꞌmii Jesús rihaan nij nana̱ chre̱e, ne̱ ne caꞌve̱j Jesús caꞌmi̱i̱ nij soꞌ nana̱ vaa da̱nj a. ꞌO̱ se queneꞌen nij soꞌ se vaa Si̱j Caꞌnéé Yaꞌanj Ti̱nanii man Yuvii̱ rihaan Sayuun me Jesús a.

San Lucas 9:42

Dan me se ga̱a ꞌnaꞌ xnii, ne̱ nu̱ꞌ snúú xnii, ne̱ naxruꞌ xnii, quiꞌyaj nana̱ chre̱e yoꞌ, tza̱j ne̱ caꞌneꞌ Jesús suun rihaan nana̱ chre̱e se vaa cu̱riha̱nj yoꞌ nimán xnii a. Dan me se curiha̱nj nana̱ chre̱e yoꞌ nimán xnii, ne̱ nahuun sa̱ꞌ xnii, quiꞌyaj Jesús, ne̱ nagoꞌ Jesús man xnii rihaan rej xnii a.

Hechos 16:18

Dan me se guun queꞌe̱e̱ güii quiꞌyaj noꞌ da̱nj, ga̱a ne̱ guun rmi̱i̱ Pabló, quiꞌyaj noꞌ, ne̱ cheꞌé dan canica̱j soꞌ caꞌmii soꞌ rihaan nana̱ chre̱e nu̱u̱ nimán noꞌ, cataj soꞌ a: ―Nihánj me se cheꞌé se‑chuvi̱i Jesucristó aꞌnéꞌ ꞌu̱nj suun rihaan so̱ꞌ se vaa cu̱riha̱nj so̱ꞌ nimán chana̱ nihánj á ―taj Pabló rihaan nana̱ chre̱e yoꞌ a. Ga̱a ne̱ nu̱ꞌ curiha̱nj nana̱ chre̱e nimán noꞌ a.

Judas 1:9

Tza̱j ne̱ nda̱a síí cuꞌna̱j Migueé síí ꞌni̱j raꞌa man nu̱ꞌ nij se‑mo̱zó Yaꞌanj roꞌ, ga̱a naá ga̱a caviꞌ Moisés ne̱ canó tuviꞌ Migueé ga̱ Síí Chre̱e cheꞌé cúú man Moisés, ne̱ ne quisi̱j rá Migueé caꞌmi̱i̱ soꞌ nana̱ nij rihaan Síí Chre̱e maꞌ. Ma̱an se cataj Migueé rihaan Síí Chre̱e a: “Yaꞌanj Si̱j ꞌNi̱j Raꞌa man níꞌ me síí caxri̱i̱ yuva̱a̱ mán so̱ꞌ ado̱nj”, cataj Migueé a.