San Lucas 22:37 - Triqui de San Juan Copala

³⁷ ꞌO̱ se vaa nana̱ no̱ rihaan Danj Yaꞌanj taj a: “Cataj nii se vaa si̱j ꞌyaj cacunꞌ me soꞌ a”, taj Danj Yaꞌanj cheꞌé ꞌu̱nj, ne̱ vaa cheꞌé quisi̱j ya̱ nu̱ꞌ nana̱ cheꞌej a. ꞌO̱ se da̱j doj quisi̱j se vaa ꞌyáá ꞌu̱nj rihaan chumii̱ nihánj na̱nj ado̱nj ―taj Jesús rihaan nij soꞌ a.

San Lucas 22:37 ပူးပေါင်းရင်းမြစ်များ

San Marcos 15:27

Ga̱a ne̱ cachrón nij tanuu man yavíj snóꞌo rihaan yavíj rcutze̱, ne̱ síí itu̱u̱ me ro̱j soꞌ a. Dan me se nicu̱nꞌ ꞌo̱ soꞌ rej nuva̱ꞌ Jesús, ne̱ nicu̱nꞌ ꞌó soꞌ rej nichru̱un Jesús a.

San Marcos 15:28

Ne̱ veé da̱nj quisíj ya̱ nu̱ꞌ nana̱ no̱ rihaan Danj Yaꞌanj nana̱ taj ya̱ da̱j gu̱un a. Ne̱ taj nana̱ yoꞌ a: “Guun rá nii se vaa ꞌo̱ tuviꞌ nij síí tumé cacunꞌ me soꞌ, rá nii a”, taj snana̱ Yaꞌanj yoꞌ a.

San Lucas 18:31

Dan me se nica̱j Jesús chuvi̱j nij síí tucuꞌyón snana̱ soꞌ caꞌanj soꞌ, ne̱ cataj soꞌ rihaan nij soꞌ a: ―Ni̱ꞌyaj soj á. Va̱j níꞌ chumanꞌ Jerusalén, ne̱ asa̱ꞌ cuchiꞌ níꞌ, ne̱ quisi̱j ya̱ nu̱ꞌ nana̱ cachrón nij síí nataꞌ snana̱ Yaꞌanj ga̱a naá cheꞌé ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ a.

San Lucas 22:22

ꞌO̱ se xa̱ꞌ ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱, tza̱j ne̱ caꞌa̱nj ꞌu̱nj cavi̱ꞌ ꞌu̱nj nda̱a vaa cataj xnaꞌanj maꞌa̱n Yaꞌanj a. Tza̱j ne̱ nique̱ ndoꞌo síí ta̱cuachén manj rihaan nij síí ta̱j riꞌyunj manj na̱nj á. Quira̱nꞌ uxrá soꞌ sayuun ado̱nj ―taj Jesús rihaan nij soꞌ a.

San Lucas 22:36

Ga̱a ne̱ cataj Jesús rihaan nij soꞌ a: ―Ya̱j me se sese vaa xnánj soj do̱ꞌ, se‑vito̱ soj do̱ꞌ, ne̱ ni̱caj soj caꞌa̱nj soj á. Ne̱ sese taj yan vaj neê espadá rihaan soj, ne̱ quira̱a̱n soj ꞌo̱ taneê soj neê espadá á. Ne̱ sese nuviꞌ saꞌanj rihaan ꞌo̱ nij soj, ne̱ vaa cheꞌé cutuꞌve̱e̱ soꞌ se‑ro̱to̱ soꞌ, ne̱ quira̱a̱n soꞌ neê espadá ado̱nj.

San Lucas 22:52

Xa̱ꞌ nij xrej ata̱ suun noco̱o do̱ꞌ, tanuu uun chij rihaan nij tanuu israelitá tumé nuvií do̱ꞌ, nij síí uun chij rihaan nij yuvii̱ israelitá do̱ꞌ, tza̱j ne̱ síí caꞌnaꞌ ta̱ꞌaa man Jesús me nij soꞌ, ne̱ cataj Jesús rihaan nij soꞌ a: ―Me cheꞌé ꞌnaꞌ neê espadá ꞌnaꞌ chruun ꞌnaꞌ ga̱ soj ga̱. Síí itu̱u̱ mé ꞌu̱nj, rá soj naꞌ.

San Lucas 23:32

Ne̱ nica̱j nij tanuu man yavíj síí tumé cacunꞌ, caꞌanj nij soꞌ rej cavi̱ꞌ ro̱j soꞌ ga̱ Jesús a.

San Lucas 24:27

Ga̱a ne̱ dan me se guun cheꞌe̱ soꞌ caꞌmii soꞌ cheꞌé snana̱ síí cuꞌna̱j Moisés do̱ꞌ, cheꞌé snana̱ cunuda̱nj nij síí nataꞌ snana̱ Yaꞌanj do̱ꞌ, ga̱a ne̱ cataj xnaꞌanj soꞌ rihaan ro̱j soꞌ da̱j taj nu̱ꞌ Danj Yaꞌanj cheꞌé maꞌa̱n soꞌ a.

San Juan 10:35

Dan me se sese maꞌa̱n Yaꞌanj cataj se vaa nij síí caꞌmii snana̱ soꞌ me yaꞌanj uún, ga̱a ne̱ daj chiha̱a̱ míj se̱ caꞌvee ta̱náj xco̱ níꞌ snana̱ Yaꞌanj nana̱ no̱ rihaan yanj ga̱a maꞌ.

San Juan 17:4

’Dan me se a̱j quiꞌyáj nu̱ꞌ suun caꞌnéꞌ so̱ꞌ rihanj, ne̱ cheꞌé dan a̱j sa̱ꞌ uxrá caꞌmii nij yuvii̱ ma̱n rihaan chumii̱ nihánj cheꞌé so̱ꞌ na̱nj ado̱nj.

2 Corintios 5:21

A̱ ꞌó cacunꞌ ne tumé Cristó maꞌ. Tza̱j ne̱ naraa Yaꞌanj nu̱ꞌ cacunꞌ tumé níꞌ xráá maꞌa̱n Cristó, ne̱ quiranꞌ Cristó sayuun cheꞌé cacunꞌ yoꞌ, ne̱ cheꞌé dan caꞌve̱e cunu̱u sa̱ꞌ ya̱ níꞌ rihaan Yaꞌanj cheꞌé se si̱j noco̱ꞌ man Cristó me níꞌ ado̱nj.

Gálatas 3:13

Ga̱a naá cataj Yaꞌanj se vaa cano̱ uxrá sayuun xráá nij síí ne uno nu̱ꞌ stucua̱nj Moisés, tza̱j ne̱ tinanii Cristó man níꞌ rihaan sayuun yoꞌ cheꞌé se cata̱ soꞌ cacunꞌ tumé níꞌ do̱ꞌ, sayuun no̱ xráá níꞌ do̱ꞌ, ga̱a caviꞌ soꞌ rihaan rcutze̱ a. No̱ nana̱ nihánj rihaan Danj Yaꞌanj a: “Daj a̱ yuvii̱ noco̱ꞌ va̱j rihaan ꞌo̱ chruun me síí quiriꞌ nimán rihaan Yaꞌanj a.”