San Juan 8:26 - Triqui de San Juan Copala

²⁶ Vaa ndoꞌo nana̱ no̱ xcúnj caꞌmi̱j cheꞌé soj, ne̱ no̱ xcúún uxraj ya̱ caꞌne̱ꞌ ꞌu̱nj cacunꞌ cheꞌé soj na̱nj á. Dan me se síí caꞌnéé manj, tza̱j ne̱ ina̱nj nana̱ ya̱ aꞌmii soꞌ, ne̱ ina̱nj nana̱ caꞌmii soꞌ cunoj me nana̱ taj xnaꞌanj ꞌu̱nj rihaan soj si̱j ma̱n rihaan chumii̱ nihánj ado̱nj ―taj Jesús rihaan nij soꞌ a.

San Juan 8:26 ပူးပေါင်းရင်းမြစ်များ

San Juan 15:15

’Rej rihaan níꞌ me se se̱ cataj ꞌu̱nj se vaa se‑mo̱zó ꞌu̱nj me soj a̱ maꞌ. ꞌO̱ se mozó me se ne neꞌen soꞌ da̱j ꞌyaj síí ꞌni̱j raꞌa man soꞌ maꞌ. Xa̱ꞌ soj, tza̱j ne̱ a̱j cataj ꞌu̱nj se vaa tuvij me soj, cheꞌé se a̱j cataj xnaꞌanj ꞌu̱nj rihaan soj nu̱ꞌ se vaa cataj Réj Yaꞌanj rihanj ado̱nj.

San Juan 16:12

’Dan me se vaa uxrá doj chrej me raj cata̱j xnaꞌanj ꞌu̱nj rihaan soj, tza̱j ne̱ se̱ guun nucua̱j soj cuno̱ soj chrej yoꞌ cuano̱ a̱ maꞌ.

San Juan 17:8

ꞌO̱ se cataj xnaꞌanj ꞌu̱nj nu̱ꞌ nana̱ rqué so̱ꞌ manj rihaan nij soꞌ, ne̱ cuno nij soꞌ a. Ne̱ neꞌen ya̱ nij soꞌ se vaa cavii ꞌu̱nj rihaan so̱ꞌ, ne̱ amán rá nij soꞌ se vaa caꞌnéé so̱ꞌ manj rihaan chumii̱ nihánj a.

San Juan 18:20

Ga̱a ne̱ cataj Jesús rihaan nij soꞌ a: ―ꞌU̱nj roꞌ, caꞌmii ranga̱ꞌ rihaan cunuda̱nj nij yuvii̱ a. Nu̱ꞌ güii tucuꞌyón ꞌu̱nj snana̱j rá veꞌ tucuꞌyón níꞌ stucua̱nj Moisés do̱ꞌ, rej ya̱nj nuvií noco̱o do̱ꞌ, ne̱ yoꞌ me rej nuu chre̱ꞌ ta̱ranꞌ nij yuvii̱ israelitá a. Ne̱ taj va̱j nana̱ ne caꞌmi̱i̱ yuve̱ ꞌu̱nj maꞌ.

San Juan 3:11

Ya̱ ya̱ cata̱j xnaꞌanj ꞌu̱nj rihaan so̱ꞌ se vaa xa̱ꞌ núj, tza̱j ne̱ cheꞌé ina̱nj se vaa neꞌen núj aꞌmii núj ne̱ cheꞌé se vaa queneꞌen núj nataꞌ núj ado̱nj. Tza̱j ne̱ ne amán rá nij soj nana̱ aꞌmii núj maꞌ.

San Juan 7:16

Cheꞌé dan cataj Jesús rihaan nij soꞌ a: ―Xa̱ꞌ tucuáán tucuꞌyón ꞌu̱nj, tza̱j ne̱ né tu̱cuáán cavii raá ꞌu̱nj me nihánj maꞌ. ꞌO̱ se stucua̱nj Yaꞌanj síí caꞌnéé manj me tucuáán nihánj chugua̱nj.

San Juan 7:28

Cheꞌé dan sca̱ꞌ ndoꞌo caꞌmii Jesús ga̱a tucuꞌyón soꞌ man nij yuvii̱ rej ya̱nj nuvií noco̱o, ne̱ cataj soꞌ a: ―Neꞌen soj manj, ne̱ neꞌen soj me rej cavii ꞌu̱nj na̱nj ado̱nj. Tza̱j ne̱ ne caꞌna̱ꞌ ma̱ꞌanj maꞌ. ꞌO̱ se ya̱ aꞌmii síí caꞌnéé manj, tza̱j ne̱ ne neꞌen uxrá soj man soꞌ a̱ maꞌ.

San Juan 8:25

Cheꞌé dan xnáꞌanj nij soꞌ man Jesús, cataj nij soꞌ a: ―Me síí mé so̱ꞌ ga̱ ―taj nij soꞌ, xnáꞌanj nij soꞌ man Jesús a. Ga̱a ne̱ cataj Jesús rihaan nij soꞌ a: ―A̱j cataj xnaꞌanj ꞌu̱nj rihaan soj asino ya̱a̱n me si̱j mej ado̱nj.

San Juan 8:27

Tza̱j ne̱ ne queneꞌe̱n nij soꞌ se vaa caꞌmii Jesús cheꞌé Rej soꞌ Yaꞌanj si̱j caꞌnéé man Jesús a̱ maꞌ.

San Juan 8:40

Tza̱j ne̱ cuano̱ nihánj me se nanoꞌ soj da̱j quiꞌya̱j soj ne̱ cavi̱ꞌ ꞌu̱nj, ne̱ ꞌu̱nj me síí cataj xnaꞌanj rihaan soj nu̱ꞌ nana̱ ya̱ cataj xnaꞌanj Réj Yaꞌanj rihanj ado̱nj. Dan me se ino̱ uxrá vaa ꞌyaj soj ga̱ Abraham ado̱nj.

2 Corintios 1:18

Da̱j se vaa ya̱ vaa Yaꞌanj roꞌ, da̱nj ya̱ vaa snana̱ núj, ne̱ né taꞌa̱j nana̱ “caꞌve̱e” do̱ꞌ, taꞌa̱j nana̱ “se̱ caꞌvee” do̱ꞌ, me nana̱ caꞌmii núj maꞌ.