San Juan 7:19 - Triqui de San Juan Copala

¹⁹ Nocoꞌ soj stucua̱nj Yaꞌanj rqué síí cuꞌna̱j Moisés rihaan soj, tza̱j ne̱ a̱ ꞌó soj ne uun nucua̱j canoco̱ꞌ nu̱ꞌ tucuáán yoꞌ a̱ maꞌ. Cheꞌé dan me cheꞌé nanoꞌ soj da̱j quiꞌya̱j soj, ne̱ cavi̱ꞌ ꞌu̱nj ga̱ ―taj Jesús rihaan nij síí uun chij rihaan nij yuvii̱ israelitá a.

San Juan 7:19 ပူးပေါင်းရင်းမြစ်များ

San Mateo 12:14

Dan me se curiha̱nj nij síí fariseo rá veꞌ yoꞌ, ne̱ caꞌanj nij soꞌ rej yaníj, ne̱ nuchruj ra̱a̱ ta̱ranꞌ nij soꞌ da̱j ga̱a̱ quiꞌya̱j nij soꞌ ne̱ cavi̱ꞌ Jesús a.

San Mateo 21:38

Tza̱j ne̱ queneꞌen nij síí tumé naa̱ man taꞌníí síí xna̱a̱, ne̱ cataj nij soꞌ a: “Síí nihánj me síí gu̱un síí xna̱a̱ naa̱ nihánj vaa güii na̱nj ado̱nj. Cheꞌé dan ticavi̱ꞌ níꞌ man soꞌ, ne̱ gu̱un xna̱a̱ maꞌa̱n níꞌ man naa̱ nihánj chugua̱nj”, taj nij soꞌ rihaan tuviꞌ nij soꞌ a.

San Marcos 11:18

Cuno nij xrej ata̱ suun noco̱o do̱ꞌ, nij síí naquiꞌyaj cu̱u stucua̱nj Moisés do̱ꞌ, da̱j caꞌmii Jesús, ga̱a ne̱ nanoꞌ uxrá nij soꞌ da̱j quiꞌya̱j nij soꞌ ne̱ caꞌve̱e cavi̱ꞌ Jesús a. ꞌO̱ se chuꞌviꞌ nij soꞌ niꞌya̱j nij soꞌ man Jesús, cheꞌé se caꞌanj ndoꞌo rá cunuda̱nj nij yuvii̱ cuno nij yuvii̱ tucuáán tucuꞌyón Jesús a.

San Marcos 3:4

Ga̱a ne̱ xnáꞌanj Jesús man nij síí fariseo yoꞌ a: ―No̱ xcúún níꞌ ra̱cuíj níꞌ man tuviꞌ níꞌ güii naránj rá níꞌ naꞌ, ase no̱ xcúún níꞌ quiꞌya̱j chiꞌi̱i̱ níꞌ man tuviꞌ níꞌ xa̱ꞌ. No̱ xcúún níꞌ ti̱nanii níꞌ man tuviꞌ níꞌ rihaan sayuun güii naránj rá naꞌ, ase ni̱ꞌyaj u̱u̱n níꞌ cavi̱ꞌ soꞌ xa̱ꞌ ―taj Jesús rihaan nij soꞌ a. Tza̱j ne̱ dínj tuꞌva nij soꞌ a.

San Marcos 3:6

Ga̱a nu̱ꞌ curiha̱nj nij síí fariseo yoꞌ, ne̱ cunuu chre̱ꞌ nij soꞌ ga̱ nij síí noco̱ꞌ man síí cuꞌna̱j Herodes, ne̱ nuchruj ra̱a̱ ta̱ranꞌ nij soꞌ da̱j ga̱a̱ quiꞌya̱j nij soꞌ ne̱ cavi̱ꞌ Jesús a.

San Juan 1:17

ꞌO̱ se rqué Yaꞌanj stucua̱nj Moisés rihaan xi̱i níꞌ ga̱a naá, tza̱j ne̱ Jesús Si̱j Caꞌnéé Yaꞌanj Ti̱nanii man Yuvii̱ rihaan Sayuun me síí tacuachén se lu̱j do̱ꞌ, nana̱ ya̱ do̱ꞌ, rihaan níꞌ a.

San Juan 10:39

Cheꞌé dan guun rá uún nij soꞌ ta̱ꞌaa nij soꞌ man Jesús, tza̱j ne̱ nanii soꞌ rihaan nij soꞌ a.

San Juan 11:53

Dan me se ma̱an güii dan me se guun cheꞌe̱ nij síí fariseo do̱ꞌ, nij xrej ata̱ suun noco̱o do̱ꞌ, nuchruj ra̱a̱ nij soꞌ da̱j quiꞌya̱j nij soꞌ, ga̱a ne̱ cavi̱ꞌ Jesús a.

San Juan 5:16

Cheꞌé dan guun rá nij síí uun chij yoꞌ quiꞌya̱j nij soꞌ sayuun man Jesús, cheꞌé se güii naránj rá nij soꞌ me güii nahuun sa̱ꞌ snóꞌo yoꞌ, quiꞌyaj Jesús a.

San Juan 5:18

Cheꞌé dan doj a̱ nanoꞌ nij soꞌ da̱j quiꞌya̱j nij soꞌ, ga̱a ne̱ caꞌve̱e cavi̱ꞌ Jesús a. ꞌO̱ se né cheꞌe̱ ina̱nj se ne ꞌyaj Jesús tucuáán noco̱ꞌ nij soꞌ cheꞌé güii naránj rá nij soꞌ me guun rá nij soꞌ cavi̱ꞌ Jesús maꞌ. ꞌO̱ se cheꞌé se cataj soꞌ se vaa Rej maꞌa̱n soꞌ me Yaꞌanj, cheꞌé dan guun doj rá nij soꞌ cavi̱ꞌ Jesús na̱nj ado̱nj. Dan me se ase vaa Yaꞌanj vaa maꞌa̱n soꞌ, taj soꞌ a.

San Juan 5:45

Se̱ guun rá soj se vaa ꞌu̱nj me síí cuta̱ꞌ cacunꞌ xráá soj rihaan Réj Yaꞌanj maꞌ. ꞌO̱ se vaa síí cuꞌna̱j Moisés, ne̱ nucua̱j ndoꞌo rá soj man soꞌ se vaa caꞌve̱e cavi̱i̱ sa̱ꞌ soj rihaan Yaꞌanj quiꞌya̱j soꞌ, tza̱j ne̱ maꞌa̱n Moisés me síí cuta̱ꞌ cacunꞌ xráá soj ado̱nj.

San Juan 7:1

Quisíj caꞌmii Jesús nu̱ꞌ nana̱ dan, ga̱a ne̱ cachéé Jesús estadó Galilea a. ꞌO̱ se ne caꞌve̱j rá soꞌ cache̱e̱ soꞌ estadó Judea, cheꞌé se nanoꞌ nij síí uun chij rihaan nij yuvii̱ israelitá man soꞌ, ne̱ ticavi̱ꞌ nij soꞌ man Jesús, rá nij soꞌ a.

San Juan 7:25

Cheꞌé dan cataj taꞌa̱j nij síí ya̱nj chumanꞌ Jerusalén a: ―Ne̱ si̱j nihánj roꞌ, né si̱j nanoꞌ nii ticavi̱ꞌ nii man me soꞌ naꞌ.

Hechos 7:38

’Ne̱ Moisés me síí va̱j ga̱ cunuda̱nj nij yuvii̱ israelitá rej tacaan, ne̱ va̱j soꞌ ga̱ síí caꞌnéé Yaꞌanj síí nataꞌ rihaan soꞌ rej quij cuꞌna̱j Sinaí a. Va̱j soꞌ ga̱ nij xi̱i níꞌ, ne̱ cuno soꞌ nana̱ ꞌyaj vaa iꞌna̱ꞌ nimán níꞌ, cheꞌé rej ta̱cuachén soꞌ nana̱ yoꞌ nda̱a rihaan níꞌ a.

Gálatas 3:19

Dan me se sese da̱nj vaa, ga̱a ne̱ me cheꞌé rqué Yaꞌanj stucua̱nj Moisés, rá soj ga̱. Rqué Yaꞌanj tucuáán yoꞌ rihaan Moisés cheꞌé cacunꞌ tumé yuvii̱, ne̱ me rá Yaꞌanj canoco̱ꞌ yuvii̱ tucuáán yoꞌ nda̱a se caꞌna̱ꞌ taꞌníí taꞌnij siꞌno̱ Abraham síí cuꞌna̱j Cristó rihaan chumii̱ nihánj a. Ga̱a ne̱ soꞌ roꞌ, me síí quiꞌya̱j ndoꞌo se lu̱j cheꞌé yuvii̱, nda̱a vaa cataj Yaꞌanj rihaan Abraham ga̱a naá a. Tza̱j ne̱ se‑mo̱zó Yaꞌanj me nij síí cataj xnaꞌanj tucuáán yoꞌ rihaan Moisés, ga̱a ne̱ cataj xnaꞌanj soꞌ tucuáán yoꞌ rihaan nij yuvii̱ a.

Gálatas 6:13

Dan me se ataꞌ taꞌngaꞌ man nij soꞌ, tza̱j ne̱ ne nocoꞌ sa̱ꞌ maꞌa̱n nij soꞌ stucua̱nj Moisés maꞌ. Tza̱j ne̱ ina̱nj me rá nij soꞌ cata̱ꞌ taꞌngaꞌ man soj, ga̱a ne̱ caꞌmi̱i̱ xta̱ꞌ nij soꞌ cata̱j nij soꞌ se vaa cataꞌ taꞌngaꞌ man soj quiꞌyaj maꞌa̱n ya̱ nij soꞌ, cheꞌé se rquee̱ nij soꞌ man soj, cata̱j nij soꞌ a.