San Juan 18:37 - Triqui de San Juan Copala

³⁷ Ga̱a ne̱ xnáꞌanj Pilató man soꞌ, cataj soꞌ a: ―Cheꞌé dan síí nica̱j suun rey mé so̱ꞌ naꞌ. Ya̱ naꞌ ―taj Pilató, xnáꞌanj soꞌ man Jesús a. Ga̱a ne̱ cataj Jesús rihaan soꞌ a: ―Ya̱ uxrá vaa nana̱ caꞌmii ma̱ꞌán so̱ꞌ se vaa si̱j nica̱j suun rey mej á. Ne̱ nihánj me cata̱j xnaꞌanj ꞌu̱nj rihaan so̱ꞌ me cheꞌé caꞌngaa ꞌu̱nj ne̱ me cheꞌé caꞌnáꞌ ꞌu̱nj rihaan chumii̱ nihánj ado̱nj. Dan me se caꞌnáꞌ ꞌu̱nj cata̱j xnaꞌanj ꞌu̱nj nana̱ ya̱ rihaan yuvii̱ a. Ne̱ cunuda̱nj nij síí uno nana̱ ya̱ roꞌ, uno nana̱ aꞌmij ado̱nj ―taj Jesús rihaan Pilató a.

San Juan 18:37 ပူးပေါင်းရင်းမြစ်များ

San Mateo 26:64

Ga̱a ne̱ cataj Jesús rihaan soꞌ a: ―Ya̱ vaa nana̱ caꞌmii ma̱ꞌán so̱ꞌ ado̱nj. Ne̱ vaj a̱ doj cata̱j xnaꞌanj ꞌu̱nj rihaan so̱ꞌ se vaa nda̱a ya̱j queneꞌe̱n soj manj Si̱j Caꞌnéé Yaꞌanj Ni̱caj Yuꞌunj man Yuvii̱, ne̱ queneꞌe̱n soj se vaa quita̱j ꞌu̱nj rej nuva̱ꞌ Yaꞌanj ne̱ ni̱caj ꞌu̱nj se‑nucua̱j soꞌ gu̱un chij ꞌu̱nj ado̱nj. Ne̱ queneꞌe̱n uún soj se vaa caꞌna̱ꞌ uún ꞌu̱nj rihaan chumii̱ nihánj, ne̱ quita̱j ꞌu̱nj xráá ngaa xta̱ꞌ caꞌna̱j ado̱nj ―taj Jesús rihaan xrej ata̱ suun noco̱o doj yoꞌ a.

San Mateo 27:11

Dan me se canicunꞌ Jesús rihaan síí nica̱j suun gobernador cuꞌna̱j Pilató, ne̱ xnáꞌanj Pilató man Jesús, cataj soꞌ a: ―So̱ꞌ me síí nica̱j suun rey uun chij rihaan nij yuvii̱ israelitá naꞌ ―taj soꞌ, xnáꞌanj soꞌ man Jesús a. ―Veé ya̱ nda̱a vaa cataj so̱ꞌ roꞌ, veé da̱nj vaa na̱nj á ―taj Jesús rihaan soꞌ a.

San Marcos 14:62

Ga̱a ne̱ cataj Jesús rihaan soꞌ a: ―Veé da̱nj vaa ya̱ na̱nj ado̱nj. Ne̱ queneꞌe̱n soj se vaa quita̱j ꞌu̱nj rej nuva̱ꞌ Yaꞌanj ne̱ ni̱caj ꞌu̱nj se‑nucua̱j soꞌ gu̱un chij ꞌu̱nj á. Ne̱ queneꞌe̱n uún soj se vaa caꞌna̱ꞌ uún ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ rihaan chumii̱ nihánj, ne̱ quita̱j ꞌu̱nj xráá ngaa xta̱ꞌ caꞌna̱j ado̱nj ―taj Jesús a.

San Marcos 15:2

Ga̱a ne̱ xnáꞌanj Pilató man Jesús a: ―So̱ꞌ me síí nica̱j suun rey uun chij rihaan nij yuvii̱ israelitá naꞌ ―taj soꞌ a. ―Veé ya̱ nda̱a vaa cataj so̱ꞌ roꞌ, veé da̱nj vaa na̱nj á ―taj Jesús rihaan soꞌ a.

San Lucas 22:70

Ga̱a ne̱ xnáꞌanj cunuda̱nj nij soꞌ man Jesús, cataj nij soꞌ a: ―Cheꞌé dan me Taꞌni̱j Yaꞌanj mé so̱ꞌ, rá so̱ꞌ naꞌ ―taj nij soꞌ rihaan soꞌ a. Ga̱a ne̱ cataj Jesús rihaan nij soꞌ a: ―Veé ya̱ nda̱a vaa cataj soj roꞌ, veé da̱nj vaa na̱nj á ―taj soꞌ a.

San Lucas 23:3

Ga̱a ne̱ xnáꞌanj Pilató man Jesús a: ―So̱ꞌ me síí nica̱j suun rey uun chij rihaan nij yuvii̱ israelitá naꞌ ―taj soꞌ, xnáꞌanj soꞌ man Jesús a. ―Veé ya̱ nda̱a vaa cataj so̱ꞌ roꞌ, veé da̱nj vaa na̱nj á ―taj Jesús rihaan soꞌ a.

San Juan 1:14

Ga̱a ne̱ guun snana̱ Yaꞌanj yoꞌ yuvii̱, ne̱ cayáán soꞌ scaꞌnúj níꞌ, ne̱ queneꞌen núj se vaa niꞌndaj ya̱ sa̱ꞌ veꞌé vaa soꞌ, cheꞌé se o̱rúnꞌ Taꞌníí Rej soꞌ Yaꞌanj me soꞌ a. Ne̱ soꞌ me se uxrá ꞌyaj soꞌ se lu̱j do̱ꞌ, aꞌmii soꞌ nana̱ ya̱ do̱ꞌ ado̱nj.

San Juan 1:17

ꞌO̱ se rqué Yaꞌanj stucua̱nj Moisés rihaan xi̱i níꞌ ga̱a naá, tza̱j ne̱ Jesús Si̱j Caꞌnéé Yaꞌanj Ti̱nanii man Yuvii̱ rihaan Sayuun me síí tacuachén se lu̱j do̱ꞌ, nana̱ ya̱ do̱ꞌ, rihaan níꞌ a.

San Juan 14:6

Ga̱a ne̱ cataj Jesús rihaan soꞌ a: ―Ma̱ꞌanj me guun chrej rihaan soj, ne̱ ma̱ꞌanj me nana̱ ya̱ cuno̱ soj, ne̱ ma̱ꞌanj me síí quiꞌya̱j ga̱a̱ iꞌna̱ꞌ nimán soj ado̱nj. Sese se̱ caꞌvej rá ꞌo̱ soꞌ canoco̱ꞌ soꞌ manj, ne̱ daj chiha̱a̱ míj se̱ cuchiꞌ soꞌ rihaan Réj Yaꞌanj a̱ maꞌ.

San Juan 3:32

Ne̱ aꞌmii soꞌ cheꞌé se vaa queneꞌen soꞌ rej xta̱ꞌ do̱ꞌ, cheꞌé nana̱ cuno soꞌ rej xta̱ꞌ do̱ꞌ, ne̱ taj va̱j síí amán rá snana̱ soꞌ maꞌ.

San Juan 7:17

Dan me se sese me rá ꞌo̱ soꞌ cuno̱ soꞌ rihaan Yaꞌanj, ne̱ xca̱j soꞌ cuentá ase tucuáán avii raá ꞌu̱nj me tucuáán tucuꞌyón ꞌu̱nj naꞌ, ase stucua̱nj Yaꞌanj me tucuáán yoꞌ xa̱ꞌ.

San Juan 8:14

Ga̱a ne̱ cataj Jesús rihaan nij soꞌ a: ―Nda̱ꞌ se ma̱ꞌanj me síí aꞌmii cheꞌej, tza̱j ne̱ ya̱ vaa snana̱j na̱nj á. ꞌO̱ se neꞌenj me rej cavij, ne̱ neꞌenj me rej caꞌa̱nj ꞌu̱nj ado̱nj. Ne̱ xa̱ꞌ soj, tza̱j ne̱ ne neꞌen soj me rej cavij ne neꞌen soj me rej caꞌa̱nj ꞌu̱nj a̱ maꞌ.

San Juan 8:45

’Ne̱ xa̱ꞌ ꞌu̱nj, tza̱j ne̱ cheꞌé se nana̱ ya̱ aꞌmij rihaan soj, cheꞌé dan ne amán rá soj uno soj snana̱j a̱ maꞌ.

San Juan 8:46

A̱ ꞌó soj se̱ caꞌvee quiri̱ꞌ cacunꞌ cuta̱ꞌ xráj a̱ maꞌ. Ina̱nj nana̱ ya̱ aꞌmij rihaan soj na̱nj ado̱nj. Me cheꞌé ne amán rá soj cuno̱ soj snana̱j ga̱.

San Juan 8:47

ꞌO̱ se síí noco̱ꞌ ya̱ man Yaꞌanj me síí uno snana̱ Yaꞌanj ado̱nj. Tza̱j ne̱ né si̱j noco̱ꞌ man Yaꞌanj me soj a̱ maꞌ. Cheꞌé dan ne uno soj a̱ maan ado̱nj ―taj Jesús rihaan nij yuvii̱ israelitá a.

1 Timoteo 6:13

Neꞌén so̱ꞌ se vaa Yaꞌanj me síí quiꞌyaj vaa iꞌna̱ꞌ cunuda̱nj rasu̱u̱n, ne̱ neꞌén so̱ꞌ da̱j quiꞌyaj Cristó Jesús ga̱a canicunꞌ soꞌ rihaan síí nica̱j suun Poncio Pilató, se vaa nataꞌ ya̱ soꞌ cheꞌé suun cata̱ soꞌ a. Ne̱ cuno̱ Yaꞌanj cuno̱ Cristó cuno̱ chrej narqué ꞌu̱nj nihánj mán so̱ꞌ á.

1 Pedro 1:22

Dan me se uno soj snana̱ Yaꞌanj nana̱ ya̱, ne̱ cheꞌé dan cunuu sa̱ꞌ nimán soj, ne̱ cheꞌé dan no̱ xcúún soj ga̱a̱ ꞌe̱e̱ rá soj man tuviꞌ soj ado̱nj. Se̱ cataj rmaꞌa̱n soj se vaa ꞌe̱e̱ rá soj man tuviꞌ soj maꞌ. Ya̱ ga̱a̱ ꞌe̱e̱ ndoꞌo rá soj man tuviꞌ soj á.

1 Juan 2:21

Né cheꞌe̱ se ne neꞌen soj nana̱ ya̱ me cachrón ꞌu̱nj nana̱ nihánj naya̱a̱ soj maꞌ. Tana̱nj achrón ꞌu̱nj nana̱ nihánj cheꞌé se si̱j neꞌen nij nana̱ ya̱ me soj, ne̱ a̱j neꞌen soj se vaa ino̱ doj vaa nana̱ ne̱ ga̱ nana̱ ya̱ nana̱ noco̱ꞌ níꞌ ado̱nj.

1 Juan 3:14

ꞌO̱ se cheꞌé se cunuu ꞌe̱e̱ rá níꞌ man tinúú níꞌ roꞌ, cheꞌé dan neꞌen níꞌ se vaa a̱j tanáj xco̱ níꞌ chrej chiꞌi̱i̱ chrej quiꞌya̱j cavi̱ꞌ níꞌ, ne̱ a̱j cunuu sa̱ꞌ nimán níꞌ, ne̱ caꞌve̱e ca̱yáán níꞌ ga̱ Yaꞌanj ado̱nj. Ne̱ síí ne ꞌe̱e̱ rá man tuviꞌ me se adi̱ꞌ se vaa nij síí caviꞌ roꞌ, vaa nij soꞌ na̱nj ado̱nj.

1 Juan 3:19

Dan me se sese quiꞌya̱j níꞌ da̱nj, ne̱ queneꞌe̱n níꞌ se vaa si̱j noco̱ꞌ ya̱ nana̱ ya̱ me níꞌ, ne̱ dan me se gu̱un ya̱ ya̱ rá nimán níꞌ rihaan Yaꞌanj ado̱nj.

1 Juan 4:6

Tza̱j ne̱ síí ya̱ noco̱ꞌ man Yaꞌanj me níꞌ, ne̱ nij síí neꞌen man Yaꞌanj roꞌ, uno nij soꞌ snana̱ níꞌ ado̱nj. Ne̱ xa̱ꞌ síí ne nocoꞌ man Yaꞌanj, tza̱j ne̱ ne uno nij soꞌ snana̱ níꞌ a̱ maꞌ. Cheꞌé dan neꞌen níꞌ me síí nu̱u̱ Nimán Yaꞌanj nimán, ne̱ neꞌen níꞌ me síí nu̱u̱ nana̱ tihaꞌ yuꞌunj nimán chugua̱nj.

1 Juan 5:20

Ne̱ neꞌen níꞌ se vaa a̱j caꞌnaꞌ Taꞌníí Yaꞌanj, ne̱ caꞌvee xcaj níꞌ cuentá cheꞌé Yaꞌanj ya̱ quiꞌyaj Taꞌníí Yaꞌanj, ne̱ neꞌen níꞌ se vaa me níꞌ síí noco̱ꞌ man maꞌa̱n ya̱ Taꞌníí soꞌ Jesucristó, ne̱ Jesucristó roꞌ, maꞌa̱n Yaꞌanj ya̱ me soꞌ, ne̱ soꞌ me síí quiꞌya̱j ca̱yáán níꞌ ga̱ Yaꞌanj nu̱ꞌ cavii nu̱ꞌ caꞌanj ado̱nj.

Apocalipsis 1:4

Dan me se ꞌu̱nj si̱j cuꞌna̱j Juan me síí ꞌyaj yanj nihánj, caꞌne̱j ꞌu̱nj rihaan cunu̱ꞌ chi̱j ya̱ xꞌneꞌ nij soj si̱j ma̱n estadó Asia si̱j noco̱ꞌ man Cristó a. Dan me se me rá ꞌu̱nj quiꞌya̱j ndoꞌo Yaꞌanj quiꞌya̱j ndoꞌo Nimán Yaꞌanj quiꞌya̱j ndoꞌo Jesucristó quiꞌya̱j ndoꞌo se lu̱j ga̱ nij soj, ne̱ me rá ꞌu̱nj ga̱a̱ xe̱j nimán soj, quiꞌya̱j nij soꞌ ado̱nj. Ne̱ Yaꞌanj roꞌ, me síí nicu̱nꞌ ya̱j do̱ꞌ, síí nicu̱nꞌ asi̱j naá do̱ꞌ, síí caꞌna̱ꞌ do̱ꞌ ado̱nj. Ne̱ Nimán Yaꞌanj roꞌ, vaa gue̱e̱ ina̱nj, ne̱ chi̱j ya̱ se nucua̱j nica̱j soꞌ, ne̱ nicu̱nꞌ soꞌ rihaan xrúún Yaꞌanj chruun xlá rej rii taꞌngaꞌ Yaꞌanj ado̱nj. Ne̱ dan me se Jesucristó me síí nataꞌ nana̱ ya̱ rihaan níꞌ, ne̱ soꞌ me síí cunuu iꞌna̱ꞌ uún asino ya̱a̱n rihaan cunuda̱nj nij síí caviꞌ síí cunu̱u iꞌna̱ꞌ uún vaa güii, ne̱ uun chij soꞌ rihaan cunuda̱nj nij síí nica̱j suun rey ma̱n rihaan chumii̱ nihánj ado̱nj. Ne̱ Jesucristó me síí ꞌe̱e̱ rá man níꞌ, ne̱ a̱j tinanii soꞌ man níꞌ rihaan cacunꞌ tumé níꞌ cheꞌé ton cayanj man soꞌ ga̱a caviꞌ soꞌ a.

Apocalipsis 3:14

Ga̱a ne̱ cataj uún soꞌ rihanj a: ―Nana̱ nihánj me nana̱ cachro̱n so̱ꞌ caꞌne̱j so̱ꞌ rihaan síí caꞌnéé Yaꞌanj ni̱caj yuꞌunj man xꞌneꞌ nij síí noco̱ꞌ manj ya̱nj chumanꞌ Laodicea a: “Dan me se nana̱ nihánj me nana̱ aꞌmii ꞌu̱nj si̱j quiꞌya̱j nda̱a vaa taj nu̱ꞌ nana̱ cataj xnaꞌanj ꞌu̱nj rihaan soj a. Dan me se ꞌu̱nj me síí nataꞌ ya̱ snana̱ Yaꞌanj rihaan soj nda̱a vaa me rá Yaꞌanj qui̱ꞌyáj, ne̱ ꞌu̱nj me síí quiꞌyaj nu̱ꞌ se ma̱n rihaan chumii̱ nihánj ga̱ xta̱ꞌ ado̱nj.