Hechos 9:17 - Triqui de San Juan Copala

¹⁷ Dan me se caꞌanj Ananías, ne̱ catúj soꞌ rá veꞌ yoꞌ, ne̱ cutaꞌ raꞌa soꞌ raa̱ Saulo, ne̱ cataj soꞌ a: ―Jesús Si̱j ꞌNi̱j Raꞌa man níꞌ caꞌnéé manj caꞌna̱j rihaan so̱ꞌ nihánj, tinu̱j. Ne̱ soꞌ roꞌ, me síí queneꞌén so̱ꞌ ga̱a va̱j so̱ꞌ chrej ga̱a caꞌnáꞌ so̱ꞌ nihánj á. Ne̱ me rá soꞌ curuvi̱ꞌ uún rihaan so̱ꞌ ne̱ cara̱a ndoꞌo Nimán Yaꞌanj nimán so̱ꞌ ado̱nj ―taj Ananías rihaan soꞌ a.

Hechos 9:17 ပူးပေါင်းရင်းမြစ်များ

San Mateo 19:13

Ga̱a ne̱ nica̱j nij yuvii̱ man nij xnii leꞌe̱j caꞌnaꞌ nij yuvii̱ rihaan Jesús a. Me rá nij yuvii̱ cuta̱ꞌ Jesús raꞌa soꞌ raa̱ nij xnii leꞌe̱j, ne̱ cachi̱nj niꞌya̱j soꞌ rihaan Yaꞌanj cheꞌé nij xnii leꞌe̱j yoꞌ a. Tza̱j ne̱ caxríj yuva̱a̱ nij síí tucuꞌyón snana̱ Jesús man nij yuvii̱ yoꞌ a.

San Marcos 5:23

ga̱a ne̱ rquee̱ uxrá soꞌ man Jesús, ne̱ dan me se cataj soꞌ a: ―Taꞌníj chala̱ cunii roꞌ, ranꞌ ndoꞌo noꞌ, ne̱ da̱j doj cavi̱ꞌ noꞌ, ne̱ me rá ꞌu̱nj cuchi̱ꞌ so̱ꞌ veꞌ tucuaj, ne̱ cuta̱ꞌ so̱ꞌ raꞌá so̱ꞌ raa̱ noꞌ cheꞌé yan nahu̱un sa̱ꞌ noꞌ, ne̱ se̱ caviꞌ noꞌ, qui̱ꞌyáá so̱ꞌ maꞌ ―taj Jairo rihaan Jesús a.

San Marcos 6:5

Ne̱ ne gu̱un nucua̱j Jesús quiꞌya̱j soꞌ a̱ doj suun sa̱ꞌ noco̱o chiháán soꞌ, ma̱an se do̱j síí ranꞌ me se cutaꞌ soꞌ raꞌa soꞌ raa̱ ne̱ nahuun sa̱ꞌ nij soꞌ, quiꞌyaj soꞌ a.

San Lucas 1:41

Nu̱ꞌ cuno Elisabet nana̱ caꞌmii Mariá, ne̱ nu̱ꞌ güéj neꞌej rque noꞌ a. Dan me se caraa Nimán Yaꞌanj nimán Elisabet,

San Lucas 1:67

Caraa Nimán Yaꞌanj nimán rej Juan síí cuꞌna̱j Zacarías, ne̱ cataj soꞌ a:

San Lucas 1:76

Ne̱ xa̱ꞌ ma̱ꞌán so̱ꞌ, tza̱j ne̱ guún so̱ꞌ síí nata̱ꞌ snana̱ Yaꞌanj Si̱j Uun Chij Doj, rej. Asino so̱ꞌ gu̱un cheꞌe̱ caꞌmi̱i̱ natáj, ga̱a ne̱ caꞌna̱ꞌ Síí Qui̱ꞌnij Raꞌa man níꞌ ado̱nj. Dan me se cunu̱u nica̱ nimán yuvii̱, qui̱ꞌyáá so̱ꞌ, ne̱ cara̱yaꞌa̱nj yuvii̱ ni̱ꞌyaj yuvii̱ man síí caꞌna̱ꞌ qui̱ꞌnij raꞌa man níꞌ, qui̱ꞌyáá so̱ꞌ,

San Lucas 15:30

Tza̱j ne̱ nihánj me se namán taꞌníí so̱ꞌ síí chá nu̱ꞌ siꞌyáá so̱ꞌ ga̱a chéé soꞌ ga̱ nij chana̱ niha̱ꞌ rá, ne̱ ticavíꞌ so̱ꞌ scúj leꞌe̱j ramii cheꞌé soꞌ a”, taj síí chava̱ꞌ yoꞌ rihaan rej soꞌ a.

San Lucas 15:32

Tza̱j ne̱ vaa cheꞌé gu̱un niha̱ꞌ rá níꞌ cheꞌé se namán tinúú so̱ꞌ, rej. ꞌO̱ se tinúú so̱ꞌ roꞌ, ase vaa ꞌo̱ síí caviꞌ gaa soꞌ rihanj, tza̱j ne̱ nihánj me cunuu iꞌna̱ꞌ uún soꞌ a. Ne̱ ase vaa ꞌo̱ síí caꞌanj niꞌya̱ gaa soꞌ rihanj, tza̱j ne̱ cuano̱ nihánj me se a̱j narij man soꞌ na̱nj ado̱nj”, taj rej síí chava̱ꞌ yoꞌ rihaan soꞌ a ―taj Jesús a. Veé da̱nj quisíj cuentó nanó Jesús rihaan nij soꞌ a.

San Lucas 2:11

ꞌO̱ se cuanꞌ me se caꞌngaa ꞌo̱ Síí Ti̱nanii man Yuvii̱ rihaan Sayuun chumanꞌ chiháán rey cuꞌna̱j David, ne̱ neꞌej yoꞌ roꞌ, me Síí Caꞌnéé Yaꞌanj, ne̱ Si̱j Qui̱ꞌnij Raꞌa man níꞌ me soꞌ ado̱nj.

Hechos 10:36

A̱j neꞌen nij soj nana̱ sa̱ꞌ caꞌnéé Yaꞌanj rihaan núj si̱j israelitá se vaa veꞌé naca̱j Yaꞌanj man núj cheꞌé se vaa quiꞌyaj Jesucristó cheꞌé núj, ne̱ Jesucristó roꞌ, me Síí ꞌNi̱j Raꞌa man cunuda̱nj yuvii̱ ado̱nj.

Hechos 13:3

Ga̱a ne̱ tocoꞌ nij soꞌ xꞌnaa man maꞌa̱n nij soꞌ, ne̱ cachíín niꞌya̱j ndoꞌo nij soꞌ rihaan Yaꞌanj, ga̱a ne̱ cutaꞌ nij soꞌ raꞌa nij soꞌ raa̱ ro̱j soꞌ, ga̱a ne̱ caꞌnéé nij soꞌ man ro̱j soꞌ caꞌa̱nj nata̱ꞌ ro̱j soꞌ snana̱ Jesús rihaan yuvii̱ a.

Hechos 13:52

Ne̱ nij síí noco̱ꞌ man Jesucristó ya̱nj chumanꞌ Antioquía yoꞌ me se ꞌo̱ guun niha̱ꞌ uxrá rá nimán nij soꞌ, ne̱ ꞌo̱ nu̱u̱ Nimán Yaꞌanj nimán nij soꞌ a.

Hechos 19:6

Ga̱a ne̱ cutaꞌ Pabló raꞌa soꞌ raa̱ nij soꞌ, ne̱ nanij Nimán Yaꞌanj catúj soꞌ nimán nij soꞌ, ne̱ caꞌmii nij soꞌ xnaꞌánj naca̱, ne̱ nataꞌ nij soꞌ nana̱ rqué Yaꞌanj rihaan maꞌa̱n nij soꞌ nata̱ꞌ nij soꞌ a.

Hechos 2:4

Ne̱ caraa ndoꞌo Nimán Yaꞌanj nimán ta̱ranꞌ nij soꞌ, ga̱a ne̱ guun cheꞌe̱ nij soꞌ caꞌmii nij soꞌ xnaꞌánj ino̱ vaa, nda̱a vaa caꞌvee caꞌmi̱i̱ ꞌo̱ ꞌo̱ nij soꞌ quiꞌyaj Nimán Yaꞌanj a.

Hechos 21:20

Ne̱ ga̱a cuno nij síí chij snana̱ Pabló, ne̱ cataj nij soꞌ se vaa sa̱ꞌ uxrá quiꞌyaj Yaꞌanj ga̱ nij síí yaníj a. Ga̱a ne̱ cataj nij tuvi̱ꞌ Jacobo rihaan Pabló a: ―A̱j neꞌén so̱ꞌ se vaa queꞌe̱e̱ míj tuviꞌ níꞌ si̱j israelitá amán rá niꞌya̱j man Jesucristó, tinu̱j. Ne̱ nij soꞌ roꞌ, me síí ya̱nj uxrá quiꞌya̱j nu̱ꞌ nda̱a vaa taj stucua̱nj Moisés a.

Hechos 26:15

Ga̱a ne̱ taj ꞌu̱nj a: “Señor, me síí mé so̱ꞌ ga̱”, taj ꞌu̱nj, xnáꞌanj ꞌu̱nj man soꞌ a. ’Ga̱a ne̱ cataj Síí ꞌNi̱j Raꞌa man níꞌ a: “ꞌU̱nj roꞌ, me Jesús, ne̱ si̱j ꞌyáá so̱ꞌ sayuun man mej ado̱nj.

Hechos 4:31

Dan me se quisíj cachíín niꞌya̱j nij soꞌ rihaan Yaꞌanj, ga̱a ne̱ quinaa̱n nu̱ꞌ rej ma̱n nij soꞌ, ne̱ caraa ndoꞌo Nimán Yaꞌanj nimán cunuda̱nj nij soꞌ, ga̱a ne̱ ne cuchuꞌvi̱ꞌ nij soꞌ caꞌmi̱i̱ nij soꞌ snana̱ Yaꞌanj maꞌ.

Hechos 6:6

Ne̱ dan me se nica̱j nij yuvii̱ man chi̱j nij soꞌ caꞌanj nij soꞌ rihaan chuvi̱j nij síí ata̱ suun caꞌa̱nj nata̱ꞌ snana̱ Jesús rihaan yuvii̱ a. Ne̱ cachíín niꞌya̱j nij soꞌ rihaan Yaꞌanj, ga̱a ne̱ cutaꞌ nij soꞌ raꞌa nij soꞌ raa̱ chi̱j nij soꞌ cheꞌé yan ca̱ta̱ nij soꞌ suun yoꞌ a.

Hechos 8:17

Dan me se cutaꞌ raꞌa Pedró ga̱ Juan raa̱ nij síí cuchumán rá niꞌya̱j man Jesús ya̱nj Samaria, ga̱a ne̱ catúj Nimán Yaꞌanj nimán nij soꞌ a.

Hechos 9:18

Nu̱ꞌ caꞌmii soꞌ da̱nj, ne̱ nu̱ꞌ cayuu rasu̱u̱n rihaan Saulo, ne̱ ase vaa roꞌój xráá xcuaj roꞌ, da̱nj vaa se cayuu rihaan soꞌ, ne̱ curuviꞌ rihaan Saulo, ne̱ canicunꞌ caya̱ soꞌ, ne̱ cataꞌ ne soꞌ a.

Romanos 15:7

Cheꞌé dan veꞌé caꞌmi̱i̱ soj ga̱ tinúú soj ga̱a ꞌnaꞌ tinúú soj rihaan soj á. Da̱nj quiꞌyaj Cristó, veꞌé caꞌmii soꞌ ga̱ níꞌ ado̱nj. Cheꞌé dan veꞌé caꞌmi̱i̱ níꞌ ga̱ tinúú níꞌ, ne̱ veꞌé ndoꞌo caꞌmi̱i̱ tinúú níꞌ cheꞌé Yaꞌanj á.

1 Corintios 15:47

Xa̱ꞌ snóꞌo quiꞌyaj Yaꞌanj asino ya̱a̱n, tza̱j ne̱ yoꞌóó u̱u̱n guun soꞌ, tza̱j ne̱ xa̱ꞌ ꞌó snóꞌo, tza̱j ne̱ Cristó me soꞌ, ne̱ soꞌ me síí cavii rej xta̱ꞌ caꞌnaꞌ rihaan níꞌ ado̱nj.

1 Corintios 15:8

Veé dan, ga̱a ne̱ curuviꞌ uún soꞌ niꞌya̱j ma̱ꞌanj a. Síí noco̱ꞌ xcó ta̱ranꞌ nij síí queneꞌen man soꞌ mej, ne̱ ase vaa ꞌo̱ neꞌej niꞌyaꞌ vaa ꞌu̱nj rihaan nij soꞌ na̱nj á.

1 Corintios 9:1

Neꞌen soj se vaa né mo̱zó u̱u̱n mé ꞌu̱nj maꞌ. Síí cuneꞌ Jesucristó caꞌa̱nj nata̱ꞌ snana̱ soꞌ mej, ne̱ queneꞌen yá ꞌu̱nj man Jesús Si̱j ꞌNi̱j Raꞌa man níꞌ, cheꞌé suun quiꞌyáá ꞌu̱nj canocoꞌ maꞌa̱n nij soj man Síí ꞌNi̱j Raꞌa man níꞌ ado̱nj.

1 Timoteo 4:14

Se̱ niꞌyón so̱ꞌ suun sa̱ꞌ caꞌneꞌ Yaꞌanj rihaan so̱ꞌ güii cutaꞌ nij síí tumé sa̱ꞌ rihaan Yaꞌanj man nij yuvii̱ noco̱ꞌ man Cristó raꞌa nij soꞌ raá so̱ꞌ, ne̱ tihaa̱n naca̱ Yaꞌanj ꞌo̱ nana̱ cheꞌé se‑su̱u̱n so̱ꞌ maꞌ.

1 Timoteo 5:22

Se̱ gaa raꞌya̱nj rá so̱ꞌ cuta̱ꞌ raꞌá so̱ꞌ raa̱ me maꞌa̱n ꞌo̱ soꞌ cheꞌé yan gu̱un soꞌ síí ca̱ta̱ suun cheꞌé Yaꞌanj maꞌ. ꞌO̱ se sese si̱j tumé cacunꞌ me soꞌ, ne̱ taj cheꞌé ra̱cuíj so̱ꞌ man soꞌ gu̱un chij soꞌ maꞌ. Da̱nj ina̱nj qui̱ꞌyáá so̱ꞌ, ga̱a ne̱ se̱ gaa na̱nj tu̱mé so̱ꞌ se‑cacu̱nꞌ soꞌ a. Dan me se ꞌo̱ ina̱nj se̱ caꞌvej so̱ꞌ catu̱u̱ a̱ ꞌó se chiꞌi̱i̱ maꞌ.

2 Timoteo 1:6

Cheꞌé dan narqué ꞌu̱nj chrej mán so̱ꞌ se vaa yu̱u̱n cheꞌe̱ caꞌne̱j nimán so̱ꞌ qui̱ꞌyáá so̱ꞌ se‑su̱u̱n Yaꞌanj, nda̱a vaa rqué Yaꞌanj se nucua̱j mán so̱ꞌ, ga̱a cutaj raꞌaj raá so̱ꞌ á.

Filemón 1:16

Tza̱j ne̱ ya̱j me se se̱ guun soꞌ mozó u̱u̱n rihaan so̱ꞌ nu̱ꞌ cavii nu̱ꞌ caꞌanj ya̱j a̱ maꞌ. Tana̱nj a̱ sa̱ꞌ doj ga̱a̱ soꞌ rihaan ꞌo̱ nij mozó rihaan so̱ꞌ, ne̱ ꞌo̱ tinúú níꞌ síí ꞌe̱e̱ rá níꞌ man gu̱un soꞌ ado̱nj. ꞌO̱ se ꞌe̱e̱ uxrá raj man soꞌ, ne̱ táá a̱ so̱ꞌ, ne̱ doj a̱ ga̱a̱ ꞌe̱e̱ rá ma̱ꞌán so̱ꞌ man soꞌ na̱nj á. ꞌO̱ se si̱j ꞌyaj suun rihaan so̱ꞌ me soꞌ rihaan chumii̱ nihánj, ne̱ si̱j noco̱ꞌ man Síí ꞌNi̱j Raꞌa man níꞌ me uún soꞌ, ne̱ cheꞌé dan doj a̱ ga̱a̱ ꞌe̱e̱ ya̱ rá so̱ꞌ man soꞌ á.

Hebreos 6:2

Ne̱ a̱j nariꞌ níꞌ tucuáán se vaa cata̱ꞌ ne níꞌ do̱ꞌ, se vaa cuta̱ꞌ níꞌ raꞌa níꞌ raa̱ tinúú níꞌ do̱ꞌ, se vaa cunu̱u iꞌna̱ꞌ uún nij síí caviꞌ do̱ꞌ, se vaa caꞌne̱ꞌ Yaꞌanj cacunꞌ cheꞌé yuvii̱ da̱j quira̱nꞌ yuvii̱ nu̱ꞌ cavii nu̱ꞌ caꞌanj do̱ꞌ ado̱nj.

2 Pedro 3:15

Xca̱j soj cuentá se vaa naꞌvi̱j Yaꞌanj na̱nj cheꞌé se me rá soꞌ nani̱i̱ nij yuvii̱ rihaan chrej chiꞌi̱i̱ do̱ꞌ, rihaan sayuun do̱ꞌ chugua̱nj. Veé da̱nj taj nij nana̱ cachrón tinúꞌ Pabló rihaan yanj caꞌnéé soꞌ rihaan soj, nda̱a vaa chrej cu̱u narqué Yaꞌanj rihaan soꞌ a.