Hechos 5:39 - Triqui de San Juan Copala

³⁹ Tza̱j ne̱ sese Yaꞌanj me síí rqué snana̱ nij soꞌ, ne̱ sese ꞌyaj nij soꞌ se‑su̱u̱n Yaꞌanj, ne̱ daj chiha̱a̱ míj se̱ caꞌanj niꞌya̱ snana̱ nij soꞌ quiꞌya̱j soj maꞌ. Sese da̱nj gu̱un quiꞌya̱j nij soj, ne̱ síí unuꞌ ga̱ maꞌa̱n Yaꞌanj me nij soj ado̱nj ―taj síí cuꞌna̱j Gamaliel cuno ꞌó nij síí uun chij rihaan nij yuvii̱ israelitá a. Dan me se cuchumán rá nij soꞌ snana̱ síí cuꞌna̱j Gamaliel yoꞌ,

Hechos 5:39 ပူးပေါင်းရင်းမြစ်များ

San Mateo 16:18

Ne̱ cuano̱ nihánj me se cata̱j xnaꞌanj ꞌu̱nj rihaan so̱ꞌ se vaa ya̱ Pedró cuꞌna̱j so̱ꞌ, cheꞌé se ase vaa yuvej na̱j tacóó veꞌ roꞌ, vaa so̱ꞌ, ne̱ síí nucua̱j ndoꞌo nimán mé so̱ꞌ ado̱nj. Cheꞌé dan, ase vaa ꞌyaj nii uneꞌ nii veꞌ xráá yuvej roꞌ, da̱nj ga̱a̱ qui̱ꞌyáj, cune̱ꞌ ꞌu̱nj man xꞌneꞌ nij síí noco̱ꞌ manj, se vaa gu̱un nucua̱j rá nij soꞌ mán so̱ꞌ na̱nj ado̱nj. Ne̱ se̱ quiꞌyaj canaán se ꞌyaj aviꞌ yuvii̱ man xꞌneꞌ nij síí noco̱ꞌ manj a̱ maꞌ.

San Lucas 21:15

ꞌO̱ se ma̱ꞌanj me síí rque̱ nana̱ cu̱u cavi̱i̱ tuꞌva soj na̱nj á. Ne̱ taj síí gu̱un nucua̱j quiꞌya̱j canaán rihaan snana̱ soj maꞌ.

Hechos 11:17

Dan me se sese cuya̱a̱n vaa se lu̱j quiꞌyaj Yaꞌanj cheꞌé nij soꞌ nda̱a vaa quiꞌyaj soꞌ cheꞌé maꞌa̱n níꞌ si̱j amán rá niꞌya̱j man Jesucristó Si̱j ꞌNi̱j Raꞌa man níꞌ, ne̱ asa̱ꞌ caꞌve̱e ca̱ráán ꞌu̱nj chrej rihaan Yaꞌanj se vaa se̱ quiꞌyaj soꞌ se vaa me rá soꞌ quiꞌya̱j soꞌ, rá soj ga̱ ―taj Pedró rihaan nij síí israelitá noco̱ꞌ man Jesús a.

Hechos 23:9

Dan me se caguáj ndoꞌo cunuda̱nj nij síí uun chij yoꞌ, ne̱ canicunꞌ taꞌa̱j nij síí fariseo ata̱ suun naquiꞌyaj cu̱u stucua̱nj Moisés, ne̱ caꞌmii canó tuviꞌ nij soꞌ ga̱ nij síí saduceo, cataj nij soꞌ a: ―Nuviꞌ cacunꞌ tumé síí nihánj, rá núj maꞌ. ꞌO̱ se caꞌve̱e se a̱j caꞌmii ꞌo̱ nimán rihaan soꞌ caꞌve̱e se a̱j caꞌmii ꞌo̱ se‑mo̱zó Yaꞌanj rihaan soꞌ caꞌve̱e na̱nj á ―taj nij soꞌ, caꞌmii nacaj nij soꞌ man Pabló a.

Hechos 6:10

tza̱j ne̱ ne caꞌve̱e quiꞌya̱j canaán snana̱ nij soꞌ rihaan snana̱ Esteban a̱ maꞌ. ꞌO̱ se racuíj ndoꞌo Nimán Yaꞌanj man Esteban, ne̱ cavii ndoꞌo nana̱ cu̱u raa̱ soꞌ, quiꞌyaj Nimán Yaꞌanj a.

Hechos 7:51

’Dan me se nichra̱j ndoꞌo rá soj, ne̱ né si̱j niha̱ꞌ rá xca̱j cuentá cheꞌé tucuáán sa̱ꞌ me soj maꞌ. Tana̱nj niga̱nj naquiꞌyaj ꞌe̱e̱ soj man soj rihaan Nimán Yaꞌanj ado̱nj. Ase vaa quiꞌyaj xi̱i soj roꞌ, da̱nj ꞌyaj gue̱e̱ maꞌa̱n soj uún na̱nj á.

Hechos 9:5

Ga̱a ne̱ xnáꞌanj Saulo man síí caꞌmii rihaan soꞌ, cataj soꞌ a: ―Señor, me síí mé so̱ꞌ ga̱ ―taj soꞌ, xnáꞌanj soꞌ a. Ga̱a ne̱ síí caꞌmii rihaan soꞌ cataj a: ―ꞌU̱nj roꞌ, me Jesús, ne̱ ꞌyaj ndoꞌo so̱ꞌ sayuun manj ado̱nj.

1 Corintios 1:25

Dan me se nda̱ꞌ se nana̱ snúú rmaꞌa̱n me nana̱ rqué Yaꞌanj, rá taꞌa̱j nij yuvii̱, tza̱j ne̱ né na̱na̱ snúú rmaꞌa̱n me nana̱ yoꞌ maꞌ. ꞌO̱ se avii doj raa̱ Yaꞌanj rihaan nij yuvii̱ na̱nj ado̱nj. Ne̱ nda̱ꞌ se ninaj ndoꞌo Yaꞌanj, rá taꞌa̱j nij yuvii̱, tza̱j ne̱ ne ninaj Yaꞌanj maꞌ. ꞌO̱ se Yaꞌanj roꞌ, me síí nucua̱j ndoꞌo doj rihaan nij yuvii̱ nucua̱j ndoꞌo ado̱nj.

1 Corintios 10:22

Cheꞌé se síí sa̱ꞌ me Yaꞌanj, ne̱ nano̱ꞌ níꞌ da̱j quiꞌya̱j níꞌ, ga̱a ne̱ caꞌma̱an rá Yaꞌanj ni̱ꞌyaj Yaꞌanj man níꞌ naꞌ. Taj maꞌ. Sese da̱nj quiꞌya̱j níꞌ, ne̱ se̱ guun nucua̱j níꞌ nani̱i̱ níꞌ rihaan soꞌ a̱ maꞌ.