Hechos 5:14 - Triqui de San Juan Copala

¹⁴ Cuchumán rá queꞌe̱e̱ ndoꞌo nij snóꞌo do̱ꞌ, nij chana̱ do̱ꞌ, niꞌya̱j nij soꞌ man Jesús Si̱j ꞌNi̱j Raꞌa man níꞌ, ne̱ cheꞌé dan guun ri̱i̱ doj nij yuvii̱ noco̱ꞌ man soꞌ a.

Hechos 5:14 ပူးပေါင်းရင်းမြစ်များ

Hechos 11:24

ꞌO̱ se síí sa̱ꞌ nimán me Bernabé, ne̱ nu̱u̱ ndoꞌo Nimán Yaꞌanj nimán soꞌ, ne̱ síí nucua̱j ndoꞌo rá man Yaꞌanj me uún soꞌ a. Dan me se guun ri̱i̱ doj yuvii̱ canocoꞌ man Síí ꞌNi̱j Raꞌa man níꞌ a.

Hechos 2:41

Cheꞌé dan me nij síí cuchumán rá snana̱ soꞌ roꞌ, cataꞌ ne nij soꞌ, ne̱ güii yoꞌ me se canocoꞌ naca̱ vaꞌnu̱j míj yuvii̱ man Jesús ta̱ꞌ asuun a.

Hechos 2:47

Ne̱ cataj nij soꞌ se vaa sa̱ꞌ uxrá quiꞌyaj Yaꞌanj cheꞌé nij soꞌ, ne̱ caꞌmii sa̱ꞌ cunuda̱nj nij yuvii̱ ya̱nj chumanꞌ Jerusalén niꞌya̱j nij yuvii̱ man nij soꞌ a. Ne̱ da̱j a̱ güii cunuu chre̱ꞌ doj síí va̱j nani̱i̱ rihaan sayuun ga̱ nij soꞌ, quiꞌyaj Síí ꞌNi̱j Raꞌa man níꞌ a.

Hechos 22:4

Ne̱ quiꞌyaj ndoꞌoj sayuun man nij yuvii̱ noco̱ꞌ Se‑Chre̱j Jesús, ne̱ guun ndoꞌo raj cavi̱ꞌ nij soꞌ a. Dan me se snóꞌo do̱ꞌ, chana̱ do̱ꞌ, numíj, ne̱ caxríj ꞌu̱nj tagaꞌ man nij soꞌ a.

Hechos 4:4

Tza̱j ne̱ queꞌe̱e̱ ndoꞌo nij síí cuno snana̱ ro̱j soꞌ roꞌ, cuchumán rá nana̱ yoꞌ, ne̱ veé da̱nj quisíj ꞌu̱nꞌ míj snóꞌo canocoꞌ man Jesús ta̱ꞌ asuun a.

Hechos 6:7

Dan me se chaꞌnuu̱ uxrá snana̱ Yaꞌanj, ne̱ guun ri̱i̱ ndoꞌo doj nij síí tucuꞌyón snana̱ Jesús chumanꞌ Jerusalén yoꞌ, ne̱ nda̱a queꞌe̱e̱ uxrá nij xrej israelitá cuchumán rá snana̱ Jesús ne̱ cuno rihaan Jesús a.

Hechos 8:12

Dan me se ga̱a nataꞌ Felipé snana̱ Yaꞌanj nana̱ sa̱ꞌ cheꞌé da̱j vaa uun chij Yaꞌanj do̱ꞌ, nana̱ cheꞌé se‑chuvi̱i Jesucristó do̱ꞌ, ne̱ cuchumán rá nij yuvii̱ nana̱ yoꞌ, ne̱ cataꞌ ne snóꞌo do̱ꞌ, chana̱ do̱ꞌ, cheꞌé Jesucristó a.

Hechos 8:3

Tza̱j ne̱ síí cuꞌna̱j Saulo me se síí ta̱j riꞌyunj man xꞌneꞌ nij síí noco̱ꞌ man Jesús me soꞌ, ne̱ quiꞌyaj ndoꞌo soꞌ sayuun man nij soꞌ a. Dan me se cuchiꞌ soꞌ veꞌ ya̱nj ꞌo̱ ꞌo̱ nij síí noco̱ꞌ man Jesús, ne̱ taꞌaa soꞌ man nij soꞌ, ne̱ dan me se nu̱ꞌ snóꞌo nu̱ꞌ chana̱ nu̱ꞌ taꞌaa soꞌ, ne̱ caxríj soꞌ tagaꞌ man nij soꞌ a.

Hechos 9:2

ne̱ naxca̱j soꞌ yanj actá rihaan xrej, ne̱ yanj actá yoꞌ roꞌ, caꞌa̱nj chumanꞌ Damasco rihaan nij síí ꞌni̱j raꞌa veꞌ tucuꞌyón nij yuvii̱ israelitá stucua̱nj Moisés a. Ne̱ taj xnaꞌanj yanj yoꞌ rihaan nij soꞌ se vaa sese nari̱ꞌ Saulo man síí noco̱ꞌ Se‑Chre̱j Jesús, ne̱ se snóꞌo se chana̱ se no̱ xcúún soꞌ nu̱míj soꞌ man nij soꞌ ne̱ caꞌa̱nj ni̱caj soꞌ man nij soꞌ nda̱a chumanꞌ Jerusalén caxri̱i̱ soꞌ man nij soꞌ tagaꞌ a.

Hechos 9:31

Veé dan me se dínj yáán cunuda̱nj nij xꞌneꞌ nij síí noco̱ꞌ man Jesús ya̱nj nu̱ꞌ estadó Judea do̱ꞌ, Galilea do̱ꞌ, Samaria do̱ꞌ a. Dan me se caráj cochro̱j ndoꞌo nij soꞌ rihaan Yaꞌanj Si̱j ꞌNi̱j Raꞌa man níꞌ, ne̱ cheꞌé dan nariꞌ nucuaj nij soꞌ, ne̱ guun ri̱i̱ ndoꞌo nij soꞌ doj, quiꞌyaj Nimán Yaꞌanj a.

Hechos 9:35

Ga̱a ne̱ queneꞌen cunuda̱nj nij síí ya̱nj chumanꞌ Lida do̱ꞌ, nij síí ya̱nj taa cuꞌna̱j Sarón do̱ꞌ, nda̱a vaa nahuun sa̱ꞌ síí cuꞌna̱j Eneas yoꞌ, ga̱a ne̱ cheꞌé dan canica̱j nimán nij soꞌ canocoꞌ nij soꞌ man Jesús Si̱j ꞌNi̱j Raꞌa man níꞌ a.

Hechos 9:42

Dan me se cuchiꞌ nana̱ cheꞌé Dorcas rihaan cunuda̱nj nij síí ya̱nj chumanꞌ Jope, ne̱ cheꞌé dan queꞌe̱e̱ nij síí ma̱n Jope cuchumán rá niꞌya̱j man Jesús Si̱j ꞌNi̱j Raꞌa man níꞌ a.

2 Corintios 6:15

Asa̱ꞌ caꞌve̱e cuya̱a̱n ga̱a̱ rá Cristó ga̱ Síí Chre̱e, rá soj ga̱. Ne̱ caꞌve̱e cuya̱a̱n ga̱a̱ rá síí noco̱ꞌ man Cristó ga̱ síí naꞌvej rá canoco̱ꞌ man Cristó, rá soj naꞌ. Taj maꞌ.

Gálatas 3:28

Ne̱ se̱ cataj soj se vaa taꞌa̱j soj me yuvii̱ israelitá ne̱ ꞌó taꞌa̱j soj me yuvii̱ yaníj maꞌ. Ne̱ se̱ cataj soj se vaa taꞌa̱j soj me mozó ne̱ ꞌó taꞌa̱j soj, né si̱j uun mozó me ꞌó taꞌa̱j soj, cata̱j soj maꞌ. Ne̱ se̱ cataj soj se vaa taꞌa̱j soj me snóꞌo ne̱ ꞌó taꞌa̱j soj me chana̱ maꞌ. ꞌO̱ se tana̱nj ase vaa o̱rúnꞌ yuvii̱ vaa ta̱ranꞌ soj, ne̱ ꞌo̱ cuya̱a̱n vaa ta̱ranꞌ soj cheꞌé se noco̱ꞌ soj man Cristó Jesús na̱nj á.