Hechos 26:18 - Triqui de San Juan Copala

¹⁸ cheꞌé rej naxra̱ꞌ rihaan nij soꞌ ne̱ xca̱j nij soꞌ cuentá qui̱ꞌyáá so̱ꞌ ado̱nj. Ga̱a ne̱ ta̱náj xco̱ nij soꞌ rej rmi̱ꞌ rej uun chij Síí Chre̱e rihaan nij soꞌ, ne̱ ca̱nica̱j nij soꞌ rihaan Yaꞌanj rej ranga̱ꞌ rej gu̱un nucua̱j nij soꞌ xca̱j nij soꞌ cuentá a. Ga̱a ne̱ caꞌve̱e navi̱j nu̱ꞌ cacunꞌ tumé nij soꞌ, ne̱ caꞌve̱e cavi̱i̱ sa̱ꞌ nij soꞌ ga̱ nij síí cunuu sa̱ꞌ nimán rihaan Yaꞌanj, sese cuchuma̱n rá nij soꞌ ni̱ꞌyaj nij soꞌ mán ꞌu̱nj, qui̱ꞌyáá so̱ꞌ á”, taj Síí ꞌNi̱j Raꞌa man níꞌ rihanj a.

Hechos 26:18 ပူးပေါင်းရင်းမြစ်များ

San Mateo 4:10

Ga̱a ne̱ cataj xnaꞌanj Jesús rihaan Síí Chre̱e a: ―Naxu̱u̱n yaníj so̱ꞌ mán so̱ꞌ, Síí Chre̱e. ꞌO̱ se Danj Yaꞌanj taj a: “Rihaan Yaꞌanj Si̱j ꞌNi̱j Raꞌa man níꞌ cara̱a̱ gue̱e̱ so̱ꞌ, ne̱ rihaan o̱rúnꞌ soꞌ cu̱nuû so̱ꞌ na̱nj á.” Da̱nj taj Danj Yaꞌanj ado̱nj ―taj Jesús rihaan Síí Chre̱e a.

San Mateo 4:16

yuvii̱ ya̱nj rej yoꞌ me se cachéé nij soꞌ rej rmi̱ꞌ, tza̱j ne̱ chugu̱u̱n ndoꞌo queneꞌen nij soꞌ a. Yuvii̱ ya̱nj rej aráán scachu̱nꞌ se ꞌyaj aviꞌ yuvii̱ roꞌ, rangaꞌ rihaan nij soꞌ ado̱nj, da̱nj vaa cachrón Isaías ga̱a naá a.

San Lucas 1:77

ne̱ so̱ꞌ quiꞌya̱j xca̱j nij síí canoco̱ꞌ man Yaꞌanj cuentá se vaa caꞌve̱e navi̱j cacunꞌ tumé nij soꞌ, ne̱ caꞌve̱e nani̱i̱ nij soꞌ rihaan sayuun a.

San Lucas 1:79

Ga̱a ne̱ xa̱ꞌ tuviꞌ níꞌ síí ne acaj cuentá do̱ꞌ, xa̱ꞌ tuviꞌ níꞌ síí chuꞌviꞌ ndoꞌo se vaa cavi̱ꞌ nij soꞌ do̱ꞌ, tza̱j ne̱ cuchugu̱u̱n rihaan nimán nij soꞌ, ga̱a ne̱ xca̱j nij soꞌ cuentá, ga̱a ne̱ nari̱ꞌ ta̱ranꞌ níꞌ da̱j quiꞌya̱j níꞌ, ne̱ cunu̱u xe̱j nimán níꞌ ado̱nj, taj Zacarías rihaan taꞌníí soꞌ a.

San Lucas 2:32

Ase vaa yaꞌan chuguu̱n ga̱a̱ soꞌ ti̱haa̱n soꞌ stucua̱nj so̱ꞌ rihaan nij yuvii̱ yaníj, ne̱ sa̱ꞌ uxrá caꞌmi̱i̱ nii cheꞌé núj, se‑chuma̱nꞌ so̱ꞌ si̱j israelitá, quiꞌya̱j uún soꞌ na̱nj ado̱nj, taj Simeón rihaan Yaꞌanj a.

San Lucas 24:45

Ga̱a ne̱ guun nucua̱j nij soꞌ xcaj nij soꞌ cuentá cheꞌé nu̱ꞌ Danj Yaꞌanj, quiꞌyaj soꞌ,

San Lucas 24:47

Ga̱a ne̱ vaa cheꞌé caꞌmi̱i̱ natáj nii se vaa cheꞌé se‑chuvi̱i Síí Caꞌnéé Yaꞌanj Ti̱nanii man Yuvii̱ rihaan Sayuun roꞌ, no̱ xcúún yuvii̱ ca̱nica̱j nimán yuvii̱ ne̱ ta̱náj yuvii̱ chrej chiꞌi̱i̱, ne̱ tinavi̱j Yaꞌanj cacunꞌ tumé nij soꞌ a. Asino ya̱a̱n vaa cheꞌé caꞌmi̱i̱ natáj nii chumanꞌ Jerusalén, ga̱a ne̱ caꞌmi̱i̱ natáj nii rihaan ta̱ranꞌ nij xꞌneꞌ yuvii̱ ino̱ vaa stucua̱nj ado̱nj.

San Lucas 4:18

Ya̱nj Nimán Yaꞌanj nimán ꞌu̱nj, ne̱ cheꞌé dan narii Yaꞌanj manj caꞌa̱nj caꞌmi̱i̱ natáj ꞌu̱nj nana̱ sa̱ꞌ rihaan nij síí nique̱ a. Caꞌnéé Yaꞌanj manj caꞌmi̱i̱ natáj ꞌu̱nj rihaan nij síí ꞌni̱j tagaꞌ cata̱j ꞌu̱nj se vaa cu̱riha̱nj nij soꞌ cache̱e̱ u̱u̱n nij soꞌ a. Ne̱ caꞌnéé Yaꞌanj manj ra̱cuíj ꞌu̱nj man nij síí tuchri̱i naxra̱ꞌ rihaan nij soꞌ, ne̱ caꞌnéé Yaꞌanj manj ra̱cuíj ꞌu̱nj man nij síí ranꞌ sayuun uún na̱nj á.

San Juan 17:17

Qui̱ꞌyáá so̱ꞌ se vaa cunu̱u sa̱ꞌ nimán nij soꞌ cheꞌé nana̱ ya̱ noco̱ꞌ nij soꞌ á. ꞌO̱ se snana̱ so̱ꞌ me nana̱ ya̱ ado̱nj.

San Juan 3:19

Dan me se nihánj me cacunꞌ tumé nij síí quira̱nꞌ sayuun yoꞌ a. ꞌO̱ se a̱j caꞌnaꞌ Jesús rihaan chumii̱ nihánj, ne̱ ase vaa ꞌo̱ yaꞌan chuguu̱n vaa soꞌ a. Tza̱j ne̱ caranꞌ ina̱nj rá nij síí ma̱n rihaan chumii̱ nihánj cache̱e̱ nij soꞌ rej rmi̱ꞌ, ne̱ ne caꞌve̱j rá nij soꞌ nichru̱nꞌ nij soꞌ rihaan yaꞌan chuguu̱n yoꞌ a. ꞌO̱ se chiꞌi̱i̱ ndoꞌo vaa se quiꞌyaj nij soꞌ ado̱nj.

San Juan 4:10

Ga̱a ne̱ cataj Jesús rihaan noꞌ a: ―Sese xcaj so̱ꞌ cuentá cheꞌé se lu̱j quiꞌya̱j Yaꞌanj cheꞌé so̱ꞌ ne̱ sese queneꞌén so̱ꞌ me síí achíín na mán so̱ꞌ cuano̱, ne̱ cachíín so̱ꞌ na ꞌyaj vaa iꞌna̱ꞌ yuvii̱ man soꞌ coꞌo̱ so̱ꞌ, ne̱ rqué soꞌ na yoꞌ coꞌo so̱ꞌ tza̱j ado̱nj ―taj Jesús rihaan chana̱ yoꞌ a.

San Juan 4:14

Tza̱j ne̱ síí coꞌo̱ na rque̱ ꞌu̱nj nihánj me se daj chiha̱a̱ míj se̱ canacoo̱ uún soꞌ na yoꞌ a̱ maꞌ. Ase vaa rej veꞌé uxrá avii na roꞌ, da̱nj ga̱a̱ nimán soꞌ, ne̱ cu̱nuû uxrá se lu̱j nimán soꞌ, ne̱ ga̱a̱ iꞌna̱ꞌ soꞌ ga̱ Yaꞌanj nu̱ꞌ cavii nu̱ꞌ caꞌanj, quiꞌya̱j na rque̱j ado̱nj ―taj Jesús rihaan chana̱ yoꞌ a.

San Juan 8:12

Ga̱a ne̱ cataj uún Jesús rihaan nij xrej ata̱ suun noco̱o do̱ꞌ, rihaan nij síí fariseo do̱ꞌ a: ―Ase vaa yaꞌan chuguu̱n vaa ꞌu̱nj rihaan soj si̱j ma̱n rihaan chumii̱ nihánj ado̱nj. Dan me se síí noco̱ꞌ manj roꞌ, se̱ cachéé soꞌ rej rmi̱ꞌ maꞌ. ꞌU̱nj roꞌ, me yaꞌan chuguu̱n cache̱e̱ ga̱ soꞌ, ne̱ xca̱j soꞌ cuentá me rej vaj soꞌ, qui̱ꞌyáj, ne̱ cheꞌé dan ga̱a̱ iꞌna̱ꞌ ya̱ nimán soꞌ nu̱ꞌ cavii nu̱ꞌ caꞌanj ado̱nj ―taj Jesús rihaan nij soꞌ a.

San Juan 9:39

Ga̱a ne̱ cataj Jesús a: ―Caꞌnáꞌ ꞌu̱nj rihaan chumii̱ nihánj cheꞌé se no̱ xcúún ꞌu̱nj caꞌne̱ꞌ ꞌu̱nj cacunꞌ cheꞌé yuvii̱ ado̱nj. Dan me se xa̱ꞌ nij síí ne neꞌen, tza̱j ne̱ queneꞌe̱n nij soꞌ, qui̱ꞌyáj a. Ne̱ xa̱ꞌ nij síí guun rá se vaa a̱j quisíj xcaj nij soꞌ cuentá, tza̱j ne̱ ase vaa síí aráán rihaan roꞌ, da̱nj ga̱a̱ nij soꞌ, ne̱ se̱ caꞌvee xca̱j nij soꞌ cuentá maꞌ ―taj Jesús a.

San Juan 9:5

Tza̱j ne̱ cuano̱ nihánj me se va̱j ꞌu̱nj rihaan chumii̱ nihánj, ne̱ ase vaa yaꞌan chuguu̱n roꞌ, da̱nj vaa ꞌu̱nj rihaan chumii̱ nihánj ado̱nj ―taj Jesús rihaan nij síí tucuꞌyón snana̱ soꞌ a.

Hechos 10:43

Ne̱ cunuda̱nj nij síí nataꞌ snana̱ Yaꞌanj ga̱a naá roꞌ, cataj xnaꞌanj nij soꞌ cheꞌé Jesús yoꞌ, ne̱ cataj nij soꞌ se vaa cheꞌé se‑chuvi̱i soꞌ me se tinavi̱j Yaꞌanj cacunꞌ tumé cunuda̱nj nij síí amán rá niꞌya̱j man Jesús a ―taj Pedró rihaan nij tuvi̱ꞌ Cornelió a.

Hechos 13:47

ꞌO̱ se Yaꞌanj Si̱j ꞌNi̱j Raꞌa man níꞌ me síí caꞌneꞌ suun rihaan núj quiꞌya̱j núj da̱nj ado̱nj. Dan me se cataj Síí ꞌNi̱j Raꞌa man níꞌ a: A̱j cunéꞌ ꞌu̱nj mán so̱ꞌ se vaa guún so̱ꞌ yaꞌan chuguu̱n rihaan nij síí yaníj ne̱ caꞌve̱e xca̱j nij soꞌ cuentá, qui̱ꞌyáá so̱ꞌ, ga̱a ne̱ nani̱i̱ yuvii̱ ya̱nj chumanꞌ na̱j nu̱ꞌ rihaan chumii̱ rihaan sayuun, qui̱ꞌyáá so̱ꞌ á. Nihánj me snana̱ Yaꞌanj nana̱ cataj Yaꞌanj rihaan núj na̱nj á ―taj ro̱j soꞌ rihaan nij yuvii̱ israelitá yoꞌ a.

Hechos 15:9

Dan me se cunuu sa̱ꞌ nimán nij síí yaníj rihaan Yaꞌanj cheꞌé se cuchumán rá nij soꞌ niꞌya̱j nij soꞌ man Jesucristó, ne̱ cuano̱ nihánj me se ꞌo̱ cuya̱a̱n vaa nij soꞌ ga̱ níꞌ rihaan Yaꞌanj na̱nj ado̱nj.

Hechos 2:38

Ga̱a ne̱ cataj Pedró rihaan nij soꞌ a: ―Ca̱nica̱j nimán cunuda̱nj soj ta̱náj soj chrej chiꞌi̱i̱, ne̱ cata̱ꞌ ne soj cheꞌé se‑chuvi̱i Jesucristó Si̱j Caꞌnéé Yaꞌanj, ne̱ tinavi̱j Yaꞌanj cacunꞌ tumé soj a. Ne̱ rque̱ Yaꞌanj Nimán Yaꞌanj catu̱u̱ soꞌ nimán soj ado̱nj.

Hechos 20:21

Ne̱ ꞌo̱ xraan ina̱nj cataj xnaꞌanj ꞌu̱nj rihaan nij yuvii̱ israelitá do̱ꞌ, rihaan nij yuvii̱ yaníj aꞌmii xnaꞌánj griego do̱ꞌ, se vaa no̱ xcúún nij soꞌ ca̱nica̱j nimán nij soꞌ canoco̱ꞌ nij soꞌ man Yaꞌanj ne̱ cuchuma̱n rá nij soꞌ ni̱ꞌyaj nij soꞌ man Jesús Si̱j ꞌNi̱j Raꞌa man níꞌ a.

Hechos 20:32

’Ne̱ cuano̱ nihánj me se nucua̱j rá ꞌu̱nj man maꞌa̱n Yaꞌanj se vaa tu̱mé Yaꞌanj man soj, ne̱ nucua̱j rá ꞌu̱nj man snana̱ Yaꞌanj se vaa cuno̱ soj nana̱ yoꞌ ne̱ caꞌve̱e quiꞌya̱j ndoꞌo Yaꞌanj se lu̱j ga̱ soj a. Dan me se sa̱ꞌ doj canoco̱ꞌ soj man Yaꞌanj, quiꞌya̱j snana̱ Yaꞌanj yoꞌ, ne̱ gu̱un tuvi̱ꞌ soj ga̱ cunuda̱nj ꞌó nij síí cunuu sa̱ꞌ nimán rihaan Yaꞌanj, ne̱ caꞌve̱e quiri̱ꞌ soj xnaꞌanj niꞌya̱j cataꞌ tuꞌva Yaꞌanj ga̱a rque̱ ado̱nj.

Hechos 26:19

’Ne̱ xca̱j so̱ꞌ cuentá, rey Agripa. ꞌO̱ se ne gu̱un nichra̱j nimanj maꞌ. Tana̱nj quiꞌyáá ꞌu̱nj nu̱ꞌ nda̱a vaa cataj Jesús rihanj ga̱a curuviꞌ soꞌ rihanj rej xta̱ꞌ a.

Hechos 26:23

Dan me se maꞌa̱n nij soꞌ cataj se vaa Síí Caꞌne̱j Yaꞌanj Ti̱nanii man Yuvii̱ rihaan Sayuun me se quira̱nꞌ soꞌ sayuun, ne̱ gu̱un soꞌ síí cunuu iꞌna̱ꞌ uún asino ya̱a̱n rihaan ꞌó nij síí caviꞌ, ne̱ nata̱ꞌ soꞌ nana̱ ya̱ rihaan nij yuvii̱ israelitá do̱ꞌ, rihaan nij yuvii̱ yaníj do̱ꞌ a ―taj Pabló rihaan rey cuꞌna̱j Agripa a.

Hechos 3:19

’Cheꞌé dan ca̱nica̱j nimán soj canoco̱ꞌ soj chrej sa̱ꞌ, ga̱a ne̱ caꞌve̱e tinavi̱j Yaꞌanj cacunꞌ tumé soj á. Ga̱a ne̱ caꞌve̱e quisi̱j güii cunu̱u cui̱j rá ta̱ranꞌ níꞌ si̱j israelitá, quiꞌya̱j Síí ꞌNi̱j Raꞌa man níꞌ a.

Hechos 5:31

Ga̱a ne̱ maꞌa̱n Yaꞌanj quiꞌyaj cavii Jesús xta̱ꞌ, ne̱ nicu̱nꞌ Jesús rej xꞌnu̱j Yaꞌanj rej nuva̱ꞌ Yaꞌanj a. Ne̱ guun Jesús Síí Uun Chij Ndoꞌo, ne̱ Síí Tinanii man Yuvii̱ rihaan Sayuun guun soꞌ, cheꞌé rej caꞌve̱e ca̱nica̱j nimán níꞌ si̱j israelitá ga̱a ne̱ navi̱j cacunꞌ tumé níꞌ ado̱nj.

Romanos 8:17

Cheꞌé dan vaa güii rque̱ ndoꞌo Yaꞌanj se sa̱ꞌ rihaan níꞌ ga̱ Cristó, ne̱ ꞌo̱ cuya̱a̱n ga̱a̱ se sa̱ꞌ rihaan Cristó ga̱ níꞌ a. Veé dan me cheꞌé se ranꞌ níꞌ sayuun nda̱a vaa quiranꞌ Cristó roꞌ, cheꞌé dan cavi̱i̱ sa̱ꞌ níꞌ ga̱ soꞌ, ne̱ niꞌndaj ya̱ veꞌé ga̱a̱ níꞌ ga̱ soꞌ vaa güii ado̱nj.

1 Corintios 1:2

ne̱ ꞌyaj núj yanj nihánj caꞌne̱j núj rihaan nij soj xꞌneꞌ nij síí noco̱ꞌ man Yaꞌanj ya̱nj chumanꞌ Corinto a. Dan me se narii Yaꞌanj man soj canoco̱ꞌ soj man Cristó Jesús, ne̱ canacúún Yaꞌanj man soj gu̱un soj síí nuu sa̱ꞌ nimán a. Ne̱ veé yanj nihánj caꞌne̱j cuchi̱ꞌ rihaan cunuda̱nj ꞌó nij síí ya̱nj me rej maꞌa̱n síí ataꞌ tuꞌva̱ se‑chuvi̱i Jesucristó Si̱j ꞌNi̱j Raꞌa man níꞌ a. Dan me se Síí ꞌNi̱j Raꞌa man nij soꞌ ne̱ Síí ꞌNi̱j Raꞌa man maꞌa̱n ya̱ níꞌ me ya̱ soꞌ a.

1 Corintios 1:30

Dan me se Yaꞌanj me síí ꞌyaj ꞌni̱j raꞌa Cristó Jesús man soj, ne̱ cheꞌé o̱rúnꞌ soꞌ avii raa̱ níꞌ do̱ꞌ, cunuu sa̱ꞌ nimán níꞌ rihaan Yaꞌanj do̱ꞌ, guun níꞌ síí sa̱ꞌ rihaan Yaꞌanj do̱ꞌ, nanii níꞌ rihaan sayuun do̱ꞌ, quiꞌyaj Yaꞌanj á.

2 Corintios 4:4

Ne̱ xa̱ꞌ nij soꞌ, tza̱j ne̱ ne nocoꞌ nij soꞌ man Cristó maꞌ. ꞌO̱ se caráán xréé nij soꞌ, quiꞌyaj Síí Chre̱e síí noco̱ꞌ nij soꞌ man, ne̱ ne gu̱un nucua̱j nij soꞌ xca̱j nij soꞌ cuentá cheꞌé nana̱ sa̱ꞌ cheꞌé Cristó maꞌ. Ne neꞌen nij soꞌ se vaa niꞌndaj ya̱ veꞌé vaa Cristó maꞌ. Ne̱ xa̱ꞌ Cristó, tza̱j ne̱ ase vaa maꞌa̱n Yaꞌanj vaa soꞌ niꞌya̱j níꞌ man soꞌ ado̱nj.

2 Corintios 4:6

ꞌO̱ se Yaꞌanj me síí cataj se vaa chugu̱u̱n rihaan chumii̱, ne̱ da̱nj caꞌmii Yaꞌanj ga̱a naá uxrá ga̱a vaa rmi̱ꞌ rihaan chumii̱ nihánj, ga̱a ne̱ cuchuguu̱n rihaan chumii̱ nihánj, ne̱ ya̱j me se chuguu̱n nimán núj, quiꞌyaj uún Yaꞌanj á. Cheꞌé dan me guun nucua̱j núj cataj xnaꞌanj núj rihaan yuvii̱ se vaa niꞌndaj ya̱ sa̱ꞌ veꞌé vaa Yaꞌanj, ne̱ sese cuno̱ nij yuvii̱ snana̱ Cristó, ne̱ xca̱j nij soꞌ cuentá se vaa sa̱ꞌ uxrá quiꞌyaj Yaꞌanj ado̱nj.

2 Corintios 6:14

Se̱ guun gu̱un tuvi̱ꞌ soj ga̱ nij síí ne nocoꞌ man Cristó maꞌ. Se̱ guun quiꞌya̱j soj nda̱a vaa ꞌyaj nij soꞌ maꞌ. Asa̱ꞌ caꞌve̱e cuya̱a̱n ga̱a̱ rej ranga̱ꞌ ga̱ rej rmi̱ꞌ, rá soj ga̱. Cheꞌé dan, asa̱ꞌ caꞌve̱e gu̱un tuvi̱ꞌ síí me rá quiꞌya̱j sa̱ꞌ ga̱ síí me rá quiꞌya̱j cacunꞌ, rá soj ga̱.

Gálatas 2:20

Canó rcuaꞌa̱a̱n ꞌu̱nj rihaan rcutze̱ ga̱ Cristó vaa ga̱a na̱nj ado̱nj. Ya̱j me se né ꞌu̱nj me síí ya̱nj cuano̱ maꞌ. ꞌO̱ se Cristó me síí ya̱nj nimanj, ne̱ cheꞌé dan vaa iꞌna̱ꞌ ꞌu̱nj cuano̱ ado̱nj. Cheꞌé se amán rá ꞌu̱nj niꞌya̱j ꞌu̱nj man Taꞌníí Yaꞌanj roꞌ, cheꞌé dan ina̱nj nocóꞌ ꞌu̱nj man soꞌ ga̱a chéé ꞌu̱nj rihaan chumii̱ nihánj ado̱nj. Ne̱ dan me se ma̱an cheꞌé se cunuu ꞌe̱e̱ uxrá rá soꞌ mán ꞌu̱nj roꞌ, cheꞌé dan caꞌneꞌ gue̱e̱ rá soꞌ caviꞌ soꞌ rihaan rcutze̱ cheꞌé ꞌu̱nj na̱nj ado̱nj.

Gálatas 3:14

Nda̱a síj, ga̱a ne̱ se lu̱j cataꞌ tuꞌva Yaꞌanj rihaan Abraham roꞌ, caꞌnaꞌ se lu̱j yoꞌ nda̱a rihaan nij yuvii̱ yaníj, cheꞌé se vaa quiꞌyaj Cristó Jesús a. Dan me se ga̱a naá, ne̱ cataꞌ tuꞌva Yaꞌanj se vaa catu̱u̱ Nimán Yaꞌanj nimán níꞌ, ne̱ cuchumán rá níꞌ niꞌya̱j níꞌ man Yaꞌanj, ne̱ cheꞌé dan ya̱ da̱nj guun ado̱nj.

Gálatas 3:2

ꞌO̱ se me rá ꞌu̱nj xna̱ꞌanj ꞌu̱nj ꞌo̱ nana̱ man soj chugua̱nj: Cheꞌé se canocoꞌ nij soj stucua̱nj Moisés me catúj Nimán Yaꞌanj nimán soj naꞌ. Ase cheꞌé se amán rá soj cuno soj nana̱ sa̱ꞌ cheꞌé Cristó me catúj Nimán Yaꞌanj nimán soj xa̱ꞌ.

Efesios 1:11

Ne̱ cheꞌé Cristó me se narii Yaꞌanj man núj si̱j israelitá si̱j amán rá niꞌya̱j man Cristó, ne̱ dan me se narii soꞌ man núj cheꞌé se a̱j cuneꞌ soꞌ man núj gu̱un núj nij síí ga̱a̱ nucua̱j rá ga̱a asino ya̱a̱n man Cristó, cheꞌé rej veꞌé nata̱ꞌ núj se vaa sa̱ꞌ uxrá vaa Yaꞌanj a. Dan me se ina̱nj da̱nj guun rá Yaꞌanj quiꞌya̱j soꞌ, ne̱ soꞌ me síí avii ndoꞌo raa̱ da̱j quiꞌya̱j, ne̱ soꞌ me síí ꞌyaj nu̱ꞌ nda̱a vaa avii raa̱ soꞌ quiꞌya̱j soꞌ ado̱nj.

Efesios 1:14

ne̱ ya̱ rque̱ ndoꞌo Yaꞌanj se sa̱ꞌ man níꞌ vaa güii na̱nj ado̱nj. Dan me se rqué Yaꞌanj Nimán Yaꞌanj rihaan níꞌ tihaa̱n Yaꞌanj se vaa ya̱ naca̱j Yaꞌanj man níꞌ vaa güii, ne̱ nani̱i̱ níꞌ rihaan sayuun, cheꞌé rej cata̱j níꞌ se vaa niꞌndaj ya̱ sa̱ꞌ veꞌé vaa Yaꞌanj a.

Efesios 1:18

Dan me se sa̱ꞌ doj xca̱j soj cuentá, ne̱ queneꞌe̱n soj me cheꞌé nacúún Yaꞌanj man soj, ne̱ queneꞌe̱n soj nu̱ꞌ se vaa quiꞌya̱j Yaꞌanj cheꞌé soj, ne̱ gu̱un ya̱ rá soj se vaa vaa cheꞌé ndoꞌo nocoꞌ soj man Cristó ado̱nj. Queneꞌe̱n soj se vaa niꞌndaj ya̱ sa̱ꞌ vaa se quiꞌya̱j Yaꞌanj cheꞌé ta̱ranꞌ níꞌ si̱j noco̱ꞌ man soꞌ,

Efesios 1:7

Ne̱ cheꞌé ton cayanj man Cristó ga̱a caviꞌ soꞌ cheꞌé níꞌ roꞌ, cheꞌé dan navij cacunꞌ xráá níꞌ, cheꞌé se sa̱ꞌ uxrá vaa rá Yaꞌanj niꞌya̱j Yaꞌanj man níꞌ a.

Efesios 2:8

Dan me se xca̱j nij soj cuentá se vaa ina̱nj cheꞌé se lu̱j quiꞌyaj Yaꞌanj cheꞌé soj me nanii soj rihaan chrej chiꞌi̱i̱ do̱ꞌ, rihaan sayuun do̱ꞌ á. Dan me se ma̱an cheꞌé se amán rá soj niꞌya̱j soj man soꞌ me cavii sa̱ꞌ soj ado̱nj. Né maꞌa̱n soj me síí ꞌyaj aꞌvee avii sa̱ꞌ soj maꞌ. Ma̱an se Yaꞌanj racuíj man soj dan aꞌvee avii sa̱ꞌ soj na̱nj ado̱nj.

Efesios 4:18

ne̱ ne uun nucua̱j nij soꞌ xca̱j sa̱ꞌ nij soꞌ cuentá a̱ maꞌ. Se̱ cavii sa̱ꞌ nimán nij soꞌ, quiꞌya̱j Yaꞌanj maꞌ. Ma̱an se quira̱nꞌ nij soꞌ sayuun cheꞌé se síí niꞌyo̱n me nij soꞌ ne̱ nichra̱j ndoꞌo nimán nij soꞌ ado̱nj.

Efesios 5:11

Ne̱ se̱ guun gu̱un tuvi̱ꞌ soj ga̱ nij síí chiꞌi̱i̱ ne acaj cuentá, ne̱ se̱ quiꞌyaj soj rasu̱u̱n taj se gúnꞌ ga̱ nij soꞌ a̱ maꞌ. Tana̱nj a̱ ti̱haa̱n soj man nij síí ꞌyaj da̱nj se vaa rasu̱u̱n nij ꞌyaj nij soꞌ á.

Efesios 5:14

ꞌO̱ se yaꞌan chuguu̱n me se ya̱ ruviꞌ nu̱ꞌ nij rasu̱u̱n ꞌyaj yaꞌan ado̱nj. Cheꞌé dan taj nana̱ nihánj a: Nari̱i̱ soj nej, si̱j otoj scaꞌnúj nij xnangá, ne̱ na̱xagaa soj, canicu̱nꞌ caya̱ soj, ne̱ Cristó me síí chugu̱u̱n rihaan soj á, taj nana̱ yoꞌ a.

Efesios 5:8

Asi̱j rque̱ roꞌ, ase vaa nij síí chéé rej rmi̱ꞌ roꞌ, da̱nj vaa maꞌa̱n soj, ne̱ nuviꞌ cuentá nica̱j soj maꞌ. Tza̱j ne̱ ya̱j roꞌ, canocoꞌ soj man Síí ꞌNi̱j Raꞌa man níꞌ, ne̱ cheꞌé dan ase vaa síí chéé rej ranga̱ꞌ roꞌ, da̱nj vaa soj, nica̱j ndoꞌo soj cuentá, ne̱ cheꞌé dan veꞌé quiꞌya̱j soj ga̱a chéé soj rihaan chumii̱ nihánj na̱nj á.

Efesios 6:12

Da̱nj quiꞌya̱j níꞌ cheꞌé se nij síí unuꞌ ga̱ níꞌ me nij nana̱ chre̱e uun chij rihaan chumii̱ nihánj do̱ꞌ, nij nana̱ chre̱e nica̱j suun do̱ꞌ, nij nana̱ chre̱e rii taꞌngaꞌ rihaan rej rmi̱ꞌ ma̱n rihaan chumii̱ nihánj do̱ꞌ, nij xꞌneꞌ ri̱i̱ nana̱ chre̱e chéé rej xta̱ꞌ do̱ꞌ ado̱nj.

2 Timoteo 2:26

Ga̱a ne̱ caꞌve̱e xca̱j nij soꞌ cuentá, ga̱a ne̱ nani̱i̱ nij soꞌ rihaan Síí Chre̱e a. ꞌO̱ se tihaꞌ yuꞌunj Síí Chre̱e man nij yuvii̱, ne̱ taꞌaa soꞌ man nij soꞌ, ne̱ cuano̱ nihánj me se ꞌyaj soꞌ nda̱a vaa me rá maꞌa̱n soꞌ quiꞌya̱j soꞌ man nij soꞌ ado̱nj.

Hebreos 10:10

Ne̱ cheꞌé se yu̱u̱n cheꞌe̱ nagoꞌ Jesucristó man maꞌa̱n soꞌ rihaan Yaꞌanj nda̱a vaa guun rá Yaꞌanj quiꞌya̱j soꞌ roꞌ, cheꞌé dan a̱j cunuu sa̱ꞌ nimán níꞌ rihaan Yaꞌanj ado̱nj.

Hebreos 10:14

ꞌO̱ se o̱rúnꞌ yu̱u̱n nagoꞌ soꞌ man maꞌa̱n soꞌ rihaan Yaꞌanj, ne̱ cheꞌé dan quisíj suun cunu̱u sa̱ꞌ nimán nij síí noco̱ꞌ man Yaꞌanj nu̱ꞌ cavii nu̱ꞌ caꞌanj na̱nj á.

Hebreos 11:6

Tza̱j ne̱ síí ne amán rá niꞌya̱j man Yaꞌanj roꞌ, daj chiha̱a̱ míj se̱ caranꞌ rá Yaꞌanj ni̱ꞌyaj Yaꞌanj man soꞌ a̱ maꞌ. ꞌO̱ se síí me rá cuchi̱ꞌ rihaan Yaꞌanj roꞌ, no̱ xcúún soꞌ cuchuma̱n rá soꞌ se vaa ya̱ vaa Yaꞌanj, ne̱ na̱ruꞌvee maꞌa̱n Yaꞌanj rihaan nij síí nano̱ꞌ ya̱ man Yaꞌanj na̱nj á.

Hebreos 9:15

Dan me se Cristó me se caviꞌ soꞌ cheꞌé se queneꞌen soꞌ se vaa ne gu̱un nucua̱j yuvii̱ canoco̱ꞌ nij yuvii̱ nu̱ꞌ tucuáán cuchruj Yaꞌanj asino ya̱a̱n rihaan síí cuꞌna̱j Moisés maꞌ. Cheꞌé dan Cristó me síí narqué tucuáán naca̱ cheꞌé níꞌ da̱j quiꞌya̱j níꞌ cavi̱i̱ sa̱ꞌ níꞌ rihaan Yaꞌanj a. Cheꞌé dan níꞌ si̱j canacúún Yaꞌanj man roꞌ, naca̱j níꞌ nu̱ꞌ se sa̱ꞌ cataꞌ tuꞌva Yaꞌanj se vaa rque̱ soꞌ rihaan níꞌ nu̱ꞌ cavii nu̱ꞌ caꞌanj ado̱nj.

Santiago 2:5

ꞌE̱e̱ raj man soj, tinu̱j, nocoj. Nano̱ xre̱j soj nana̱ caꞌmi̱j á. Narii Yaꞌanj man nij síí nique̱ gu̱un nij soꞌ síí amán uxrá rá niꞌya̱j man soꞌ ado̱nj. Nique̱ nij soꞌ rihaan yoꞌóó nihánj, tza̱j ne̱ ya̱ ca̱yáán nij soꞌ ga̱ Yaꞌanj asa̱ꞌ guun chij Yaꞌanj, nda̱a vaa cataꞌ tuꞌva Yaꞌanj quiꞌya̱j soꞌ ga̱ nij síí aráj cochro̱j rihaan soꞌ ado̱nj.

1 Pedro 1:4

Ne̱ dan me se vaa se sa̱ꞌ nica̱j Yaꞌanj rque̱ Yaꞌanj man soj asa̱ꞌ nucuiꞌ soj rihaan soꞌ, ne̱ daj chiha̱a̱ míj se̱ quiriꞌ se sa̱ꞌ yoꞌ, ne̱ ꞌo̱ ga̱a̱ sa̱ꞌ yoꞌ nu̱ꞌ cavii nu̱ꞌ caꞌanj na̱nj ado̱nj.

1 Pedro 2:25

Dan me se ase vaa matzinj chaꞌnuu̱ rcoꞌ roꞌ, vaa soj ga̱a naá, ne̱ ne canoco̱ꞌ soj man Yaꞌanj ga̱a naá maꞌ. Tza̱j ne̱ ya̱j roꞌ, canica̱j nimán soj, ne̱ guun cheꞌe̱ soj canocoꞌ soj man Cristó a. Ne̱ ase vaa síí veꞌé ndoꞌo tumé daán matzinj roꞌ, da̱nj vaa soꞌ ga̱ soj cuano̱, ne̱ veꞌé nica̱j yuꞌunj soꞌ man soj cuano̱ ado̱nj. Dan me se soꞌ me síí tumé sa̱ꞌ man nimán soj cuano̱ chugua̱nj.

1 Pedro 2:9

Xa̱ꞌ soj, tza̱j ne̱ si̱j narii Yaꞌanj me soj, ne̱ xrej uun chij ya̱ nu̱u̱ rihaan Yaꞌanj me soj, ne̱ xꞌneꞌ nij síí cunuu sa̱ꞌ nimán uun chij Yaꞌanj rihaan me soj ado̱nj. Cheꞌé se me rá Yaꞌanj nata̱ꞌ soj cheꞌé se sa̱ꞌ uxrá quiꞌyaj soꞌ roꞌ, cheꞌé dan narii soꞌ man soj ado̱nj. Dan me se si̱j noco̱ꞌ tucuáán rmi̱ꞌ me soj ga̱a naá, tza̱j ne̱ canacúún Yaꞌanj man soj xca̱j soj cuentá, ne̱ cuna̱j uxrá vaa stucua̱nj Yaꞌanj tucuáán noco̱ꞌ soj cuano̱ na̱nj á.

1 Juan 1:9

Tza̱j ne̱ sese nata̱ꞌ ya̱ níꞌ rihaan Yaꞌanj cheꞌé cacunꞌ tumé níꞌ, ne̱ nica̱ quiꞌya̱j Yaꞌanj cheꞌé níꞌ, ne̱ dan me se cata̱j soꞌ se vaa navij cacunꞌ tumé níꞌ, ne̱ tinavi̱j soꞌ nu̱ꞌ se chiꞌi̱i̱ ma̱n nimán níꞌ ado̱nj.

1 Juan 2:12

Dan me se achrón ꞌu̱nj nu̱ꞌ nana̱ nihánj naya̱a̱ soj xni̱i, cheꞌé se navij cacunꞌ tumé soj rihaan Yaꞌanj cheꞌé se noco̱ꞌ soj man Cristó ado̱nj.

1 Juan 3:8

Ne̱ síí ꞌyaj cacunꞌ me se síí noco̱ꞌ stucua̱nj Síí Chre̱e me soꞌ na̱nj ado̱nj. ꞌO̱ se asi̱j guun cheꞌe̱ Yaꞌanj quiꞌyaj Yaꞌanj chumii̱ nihánj, ne̱ si̱j ꞌyaj ina̱nj cacunꞌ me Síí Chre̱e na̱nj ado̱nj. Ne̱ caꞌnaꞌ Taꞌníí Yaꞌanj rihaan chumii̱ nihánj, cheꞌé rej caꞌve̱e tiri̱ꞌ soꞌ nu̱ꞌ se vaa ꞌyaj Síí Chre̱e yoꞌ ado̱nj.

1 Juan 5:19

Ne̱ neꞌen níꞌ se vaa síí caꞌngaa naca̱ nimán quiꞌyaj Yaꞌanj me níꞌ ado̱nj. Tza̱j ne̱ cunuda̱nj nij yuvii̱ ma̱n rihaan chumii̱ nihánj roꞌ, ꞌni̱j raꞌa Síí Chre̱e man nij soꞌ na̱nj ado̱nj.

Judas 1:1

ꞌU̱nj roꞌ, me síí cuꞌna̱j Judas nu̱u̱ rihaan Jesucristó, ne̱ tinúú Jacobo mej a. Cachro̱nj nana̱ nihánj rihaan yanj caꞌne̱j ꞌu̱nj rihaan soj si̱j canacúún Yaꞌanj man canoco̱ꞌ man soꞌ a. Dan me se ꞌe̱e̱ rá Rej níꞌ Yaꞌanj man soj, ne̱ nica̱j yuꞌunj Jesucristó man soj se̱ gaa na̱nj ta̱náj soj snana̱ Yaꞌanj a.

Apocalipsis 21:27

Tza̱j ne̱ taj va̱j a̱ doj se chiꞌi̱i̱ catu̱u̱ rque chumanꞌ yoꞌ maꞌ. ꞌO̱ se síí ꞌyaj se chiꞌi̱i̱ do̱ꞌ, síí aꞌmii ne̱ do̱ꞌ, se̱ catúj nij soꞌ daj chiha̱a̱ míj rque chumanꞌ yoꞌ a̱ maan ado̱nj. Tza̱j ne̱ ina̱nj nij síí no̱ se‑chuvi̱i rihaan danj Matzinj Leꞌe̱j yanj libró no̱ se‑chuvi̱i nij síí ga̱a̱ iꞌna̱ꞌ ga̱ Yaꞌanj nu̱ꞌ cavii nu̱ꞌ caꞌanj roꞌ, ina̱nj nij soꞌ me nij síí catu̱u̱ rque chumanꞌ yoꞌ na̱nj ado̱nj.