Hechos 2:38 - Triqui de San Juan Copala

³⁸ Ga̱a ne̱ cataj Pedró rihaan nij soꞌ a: ―Ca̱nica̱j nimán cunuda̱nj soj ta̱náj soj chrej chiꞌi̱i̱, ne̱ cata̱ꞌ ne soj cheꞌé se‑chuvi̱i Jesucristó Si̱j Caꞌnéé Yaꞌanj, ne̱ tinavi̱j Yaꞌanj cacunꞌ tumé soj a. Ne̱ rque̱ Yaꞌanj Nimán Yaꞌanj catu̱u̱ soꞌ nimán soj ado̱nj.

Hechos 2:38 ပူးပေါင်းရင်းမြစ်များ

San Mateo 28:19

Cheꞌé dan caꞌa̱nj soj rihaan ꞌo̱ ꞌo̱ nij xꞌneꞌ yuvii̱ ino̱ vaa stucua̱nj, ne̱ ti̱haa̱n soj man nij soꞌ cheꞌé rej gu̱un nij soꞌ síí tucuꞌyón snana̱j, quiꞌya̱j soj á. Ne̱ cuta̱ꞌ ne soj man nij soꞌ, ne̱ cata̱ꞌ tuꞌva soj se‑chuvi̱i Réé ꞌu̱nj Yaꞌanj do̱ꞌ, se‑chu̱vií ꞌu̱nj Taꞌni̱j Yaꞌanj do̱ꞌ, se‑chuvi̱i Nimán Yaꞌanj do̱ꞌ, ga̱a cuta̱ꞌ ne soj man nij soꞌ á.

San Mateo 3:2

cataj soꞌ a: ―Nuchra̱nꞌ nimán soj, ne̱ ta̱náj soj chrej chiꞌi̱i̱ á. ꞌO̱ se a̱j nichrunꞌ se vaa gu̱un chij Yaꞌanj na̱nj ado̱nj ―taj soꞌ, aꞌmii natáj soꞌ a.

San Mateo 3:6

Dan me se nataꞌ ya̱ nij yuvii̱ cheꞌé nu̱ꞌ cacunꞌ tumé nij yuvii̱, ga̱a ne̱ cataꞌ ne nij yuvii̱ rá chráá Jordán, quiꞌyaj Juan ado̱nj.

San Mateo 4:17

Ga̱a ne̱ guun cheꞌe̱ Jesús caꞌmii natáj soꞌ rihaan yuvii̱, ne̱ cataj soꞌ a: ―Nuchra̱nꞌ nimán soj ne̱ ta̱náj soj chrej chiꞌi̱i̱ á. ꞌO̱ se a̱j nichrunꞌ se vaa gu̱un chij Yaꞌanj ado̱nj ―da̱nj caꞌmii natáj Jesús rihaan nij yuvii̱ a.

San Marcos 1:15

ne̱ cataj soꞌ a: ―A̱j quisíj güii, ne̱ a̱j nichrunꞌ se vaa gu̱un chij Yaꞌanj ado̱nj. Cheꞌé dan nuchra̱nꞌ nimán soj, ne̱ cuchuma̱n rá soj cuno̱ soj snana̱ Yaꞌanj nana̱ sa̱ꞌ á ―taj Jesús a.

San Marcos 16:16

Ne̱ me maꞌa̱n ꞌo̱ síí cuchuma̱n rá snana̱ soj ne̱ cata̱ꞌ ne, ne̱ soꞌ me síí nani̱i̱ rihaan sayuun ne̱ cavi̱i̱ sa̱ꞌ quiꞌya̱j Yaꞌanj, tza̱j ne̱ síí naꞌvej rá cuchuma̱n rá snana̱ soj me se quiꞌya̱j Yaꞌanj sayuun man soꞌ cheꞌé cacunꞌ tumé soꞌ ado̱nj.

San Lucas 24:47

Ga̱a ne̱ vaa cheꞌé caꞌmi̱i̱ natáj nii se vaa cheꞌé se‑chuvi̱i Síí Caꞌnéé Yaꞌanj Ti̱nanii man Yuvii̱ rihaan Sayuun roꞌ, no̱ xcúún yuvii̱ ca̱nica̱j nimán yuvii̱ ne̱ ta̱náj yuvii̱ chrej chiꞌi̱i̱, ne̱ tinavi̱j Yaꞌanj cacunꞌ tumé nij soꞌ a. Asino ya̱a̱n vaa cheꞌé caꞌmi̱i̱ natáj nii chumanꞌ Jerusalén, ga̱a ne̱ caꞌmi̱i̱ natáj nii rihaan ta̱ranꞌ nij xꞌneꞌ yuvii̱ ino̱ vaa stucua̱nj ado̱nj.

San Lucas 3:10

Ga̱a ne̱ xnáꞌanj nij yuvii̱ man Juan, cataj nij yuvii̱ a: ―Sese da̱nj vaa, ne̱ da̱j quiꞌya̱j núj, rá so̱ꞌ ga̱ ―taj nij soꞌ rihaan Juan a.

Hechos 10:43

Ne̱ cunuda̱nj nij síí nataꞌ snana̱ Yaꞌanj ga̱a naá roꞌ, cataj xnaꞌanj nij soꞌ cheꞌé Jesús yoꞌ, ne̱ cataj nij soꞌ se vaa cheꞌé se‑chuvi̱i soꞌ me se tinavi̱j Yaꞌanj cacunꞌ tumé cunuda̱nj nij síí amán rá niꞌya̱j man Jesús a ―taj Pedró rihaan nij tuvi̱ꞌ Cornelió a.

Hechos 10:48

Ga̱a ne̱ caꞌneꞌ Pedró suun se vaa cata̱ꞌ ne nij soꞌ cheꞌé se‑chuvi̱i Jesucristó a. Da̱nj quiꞌyaj nij soꞌ, ga̱a ne̱ cachíín niꞌya̱j nij soꞌ rihaan Pedró se vaa gu̱un ra̱a̱n soꞌ queꞌe̱e̱ doj güii ga̱ nij soꞌ a.

Hechos 13:38

’Xca̱j nij soj cuentá se vaa cuano̱ nihánj me se nataꞌ núj nana̱ rihaan soj se vaa cheꞌé se vaa quiꞌyaj Jesús roꞌ, cheꞌé dan caꞌve̱e tinavi̱j Yaꞌanj cacunꞌ tumé níꞌ, tinu̱j.

Hechos 16:15

Ga̱a ne̱ cataꞌ ne nij tucua̱ noꞌ a. Ga̱a ne̱ canacúún noꞌ man núj, cataj noꞌ a: ―Sese ꞌu̱nj me chana̱ amán ya̱ rá niꞌya̱j man Jesucristó Si̱j ꞌNi̱j Raꞌa man níꞌ, rá nij soj, ne̱ cara̱nꞌ soj veꞌ tucuaj do̱j güii á ―taj chana̱ Lidia rihaan núj a. Ne̱ rquee̱ ndoꞌo noꞌ man núj, ne̱ caranꞌ núj veꞌ tucuá noꞌ a.

Hechos 17:30

’Dan me se asi̱j rque̱ me se ne quiꞌya̱j Yaꞌanj sayuun man nij síí aráj gue̱e̱ rihaan agaꞌ do̱ꞌ, rihaan yahij do̱ꞌ maꞌ. ꞌO̱ se ne caꞌve̱e xca̱j nij yuvii̱ cuentá maꞌ. Tza̱j ne̱ ya̱j me se cataj xnaꞌanj Yaꞌanj rihaan nij yuvii̱ ma̱n cunuda̱nj nij chumanꞌ na̱j rihaan chumii̱ se vaa ca̱nica̱j nimán nij yuvii̱ canoco̱ꞌ nij yuvii̱ tucuáán sa̱ꞌ ado̱nj.

Hechos 20:21

Ne̱ ꞌo̱ xraan ina̱nj cataj xnaꞌanj ꞌu̱nj rihaan nij yuvii̱ israelitá do̱ꞌ, rihaan nij yuvii̱ yaníj aꞌmii xnaꞌánj griego do̱ꞌ, se vaa no̱ xcúún nij soꞌ ca̱nica̱j nimán nij soꞌ canoco̱ꞌ nij soꞌ man Yaꞌanj ne̱ cuchuma̱n rá nij soꞌ ni̱ꞌyaj nij soꞌ man Jesús Si̱j ꞌNi̱j Raꞌa man níꞌ a.

Hechos 22:16

Ne̱ nihánj me se se̱ guun ra̱a̱n so̱ꞌ doj a̱ maꞌ. Ma̱an se na̱xuma̱a̱n so̱ꞌ, ne̱ cata̱ꞌ ne so̱ꞌ, ne̱ cachi̱nj ni̱ꞌyáá so̱ꞌ rihaan Jesús cheꞌé rej ti̱naruvii Yaꞌanj nu̱ꞌ cacunꞌ xráá so̱ꞌ á”, taj Ananías rihanj a.

Hechos 26:18

cheꞌé rej naxra̱ꞌ rihaan nij soꞌ ne̱ xca̱j nij soꞌ cuentá qui̱ꞌyáá so̱ꞌ ado̱nj. Ga̱a ne̱ ta̱náj xco̱ nij soꞌ rej rmi̱ꞌ rej uun chij Síí Chre̱e rihaan nij soꞌ, ne̱ ca̱nica̱j nij soꞌ rihaan Yaꞌanj rej ranga̱ꞌ rej gu̱un nucua̱j nij soꞌ xca̱j nij soꞌ cuentá a. Ga̱a ne̱ caꞌve̱e navi̱j nu̱ꞌ cacunꞌ tumé nij soꞌ, ne̱ caꞌve̱e cavi̱i̱ sa̱ꞌ nij soꞌ ga̱ nij síí cunuu sa̱ꞌ nimán rihaan Yaꞌanj, sese cuchuma̱n rá nij soꞌ ni̱ꞌyaj nij soꞌ mán ꞌu̱nj, qui̱ꞌyáá so̱ꞌ á”, taj Síí ꞌNi̱j Raꞌa man níꞌ rihanj a.

Hechos 26:20

Asino ya̱a̱n natáꞌ ꞌu̱nj chumanꞌ Damasco do̱ꞌ, chumanꞌ Jerusalén do̱ꞌ, nu̱ꞌ estadó Judea do̱ꞌ, ga̱a ne̱ natáꞌ ꞌu̱nj nda̱a rej ma̱n nij síí yaníj uún a. Natáꞌ ꞌu̱nj rihaan cunuda̱nj nij yuvii̱ se vaa ca̱nica̱j nimán nij yuvii̱ canoco̱ꞌ nij soꞌ Yaꞌanj, ne̱ veꞌé quiꞌya̱j nij soꞌ nda̱a vaa ꞌyaj síí canica̱j ya̱ nimán na̱nj ado̱nj.

Hechos 3:19

’Cheꞌé dan ca̱nica̱j nimán soj canoco̱ꞌ soj chrej sa̱ꞌ, ga̱a ne̱ caꞌve̱e tinavi̱j Yaꞌanj cacunꞌ tumé soj á. Ga̱a ne̱ caꞌve̱e quisi̱j güii cunu̱u cui̱j rá ta̱ranꞌ níꞌ si̱j israelitá, quiꞌya̱j Síí ꞌNi̱j Raꞌa man níꞌ a.

Hechos 5:31

Ga̱a ne̱ maꞌa̱n Yaꞌanj quiꞌyaj cavii Jesús xta̱ꞌ, ne̱ nicu̱nꞌ Jesús rej xꞌnu̱j Yaꞌanj rej nuva̱ꞌ Yaꞌanj a. Ne̱ guun Jesús Síí Uun Chij Ndoꞌo, ne̱ Síí Tinanii man Yuvii̱ rihaan Sayuun guun soꞌ, cheꞌé rej caꞌve̱e ca̱nica̱j nimán níꞌ si̱j israelitá ga̱a ne̱ navi̱j cacunꞌ tumé níꞌ ado̱nj.

Hechos 8:12

Dan me se ga̱a nataꞌ Felipé snana̱ Yaꞌanj nana̱ sa̱ꞌ cheꞌé da̱j vaa uun chij Yaꞌanj do̱ꞌ, nana̱ cheꞌé se‑chuvi̱i Jesucristó do̱ꞌ, ne̱ cuchumán rá nij yuvii̱ nana̱ yoꞌ, ne̱ cataꞌ ne snóꞌo do̱ꞌ, chana̱ do̱ꞌ, cheꞌé Jesucristó a.

Hechos 8:20

Ga̱a ne̱ cataj Pedró rihaan soꞌ a: ―Ta̱dó so̱ꞌ se̱ cacaa so̱ꞌ rihaan yaꞌan ga̱ se‑saꞌa̱nj so̱ꞌ á. Me cheꞌé guun rá so̱ꞌ se vaa aneꞌ se rqué u̱u̱n Yaꞌanj ga̱.

Romanos 6:3

ꞌO̱ se a̱j neꞌen ya̱ soj se vaa ga̱a cataꞌ ne níꞌ ne̱ tihaa̱n níꞌ se vaa a̱j uun rcuaꞌa̱a̱n níꞌ ga̱ Cristó Jesús, ne̱ ase vaa caviꞌ soꞌ rihaan chumii̱ nihánj roꞌ, da̱nj caviꞌ níꞌ rihaan tucuáán chiꞌi̱i̱, ne̱ se̱ caꞌvee canoco̱ꞌ níꞌ tucuáán chiꞌi̱i̱ cuano̱ a̱ maꞌ.

Efesios 1:7

Ne̱ cheꞌé ton cayanj man Cristó ga̱a caviꞌ soꞌ cheꞌé níꞌ roꞌ, cheꞌé dan navij cacunꞌ xráá níꞌ, cheꞌé se sa̱ꞌ uxrá vaa rá Yaꞌanj niꞌya̱j Yaꞌanj man níꞌ a.

Tito 3:5

Dan me se tinanii Yaꞌanj man níꞌ rihaan chrej chiꞌi̱i̱ do̱ꞌ, rihaan sayuun do̱ꞌ ado̱nj. Né cheꞌe̱ se sa̱ꞌ quiꞌyaj maꞌa̱n níꞌ me tinanii Yaꞌanj man níꞌ rihaan sayuun maꞌ. Tana̱nj cunuu ꞌe̱e̱ rá maꞌa̱n Yaꞌanj niꞌya̱j soꞌ man níꞌ, ne̱ rqué Yaꞌanj Nimán Yaꞌanj rihaan níꞌ, dan cunuu naca̱ nimán níꞌ ne̱ cunuu sa̱ꞌ nimán níꞌ ado̱nj.

1 Pedro 3:21

Ne̱ veé na me se ꞌyaj nanii níꞌ rihaan sayuun yoꞌ ya̱j ado̱nj. Na ataꞌ ne níꞌ me yoꞌ chugua̱nj. Né cheꞌe̱ rej güe̱j nacaj xráá níꞌ cataꞌ ne níꞌ maꞌ. Cheꞌé se cataj níꞌ rihaan Yaꞌanj se vaa guun rá níꞌ se vaa navi̱j chrej chiꞌi̱i̱ uun chij nimán níꞌ ne̱ ina̱nj se sa̱ꞌ guun rá níꞌ quiꞌya̱j níꞌ rej rihaan níꞌ me se cheꞌé dan cataꞌ ne níꞌ ado̱nj. Ne̱ ina̱nj cheꞌé se cunuu iꞌna̱ꞌ uún Jesucristó ga̱a caviꞌ soꞌ roꞌ, cheꞌé dan caꞌve̱e nani̱i̱ níꞌ si̱j cataꞌ ne rihaan sayuun ne̱ cavi̱i̱ sa̱ꞌ níꞌ chugua̱nj.