Hechos 18:2 - Triqui de San Juan Copala

² Tiha̱j yu̱u̱n nariꞌ tuviꞌ soꞌ ga̱ ꞌo̱ síí israelitá cuꞌna̱j Aquila, ne̱ xa̱ꞌ soꞌ, tza̱j ne̱ si̱j cavii estadó cuꞌna̱j Ponto me soꞌ a. Ne̱ ga̱a cayáán soꞌ chumanꞌ Romá, ne̱ caꞌneꞌ síí nica̱j suun emperador cuꞌna̱j Claudio suun se vaa cavi̱i̱ cunuda̱nj nij yuvii̱ israelitá chumanꞌ Romá caꞌa̱nj yaníj nij soꞌ a. Cheꞌé dan cavii soꞌ ga̱ nica̱ soꞌ chana̱ cuꞌna̱j Priscila yoꞌóó noco̱o cuꞌna̱j Italia, ne̱ cheꞌé dan si̱j caꞌnaꞌ naca̱ chumanꞌ Corinto me ro̱j soꞌ a. Dan me se cuchiꞌ Pabló rihaan ro̱j soꞌ,

Hechos 18:2 ပူးပေါင်းရင်းမြစ်များ

Hechos 11:28

Ne̱ canicunꞌ ꞌo̱ nij síí nataꞌ snana̱ Yaꞌanj yoꞌ, ne̱ síí cuꞌna̱j Agabo me soꞌ a. Ne̱ nataꞌ soꞌ nana̱ rqué Nimán Yaꞌanj rihaan soꞌ se vaa vaa güii, ne̱ cache̱n xꞌnaa nu̱ꞌ chumanꞌ uun chij nij síí ma̱n Romá rihaan a. Ne̱ ga̱a cayáán síí cuꞌna̱j Claudio síí nica̱j suun emperador, ne̱ cachén ya̱ xꞌnaa nda̱a vaa cataj síí cuꞌna̱j Agabo a.

Hechos 18:18

Dan me se guun queꞌe̱e̱ doj güii guun ra̱a̱n Pabló ga̱ nij tinúú níꞌ síí ya̱nj chumanꞌ Corinto a. Ga̱a ne̱ cataj soꞌ se vaa caꞌa̱nj soꞌ, ne̱ cavii soꞌ rque rihoo chéé rihaan na, ne̱ caꞌanj soꞌ nda̱a estadó cuꞌna̱j Siria, ne̱ caꞌanj chana̱ cuꞌna̱j Priscila do̱ꞌ, síí cuꞌna̱j Aquila do̱ꞌ, ga̱ soꞌ a. Tza̱j ne̱ asino ya̱a̱n caca ca̱an nii raa̱ Pabló, quiꞌyaj Pabló, ga̱a va̱j nij soꞌ chumanꞌ Cencrea, cheꞌé se a̱j cataꞌ tuꞌva soꞌ ꞌo̱ nana̱ rihaan Yaꞌanj a.

Hechos 18:26

Dan me se guun cheꞌe̱ soꞌ veꞌé caꞌmii natáj soꞌ rá veꞌ tucuꞌyón nij yuvii̱ israelitá ma̱n chumanꞌ Éfeso stucua̱nj Moisés a. Ne̱ cuno chana̱ cuꞌna̱j Priscila do̱ꞌ, síí cuꞌna̱j Aquila do̱ꞌ, ga̱a ne̱ nica̱j tuviꞌ ro̱j soꞌ ga̱ soꞌ ꞌó rej yaníj, ne̱ nica̱ doj ne̱ sa̱ꞌ doj tucuꞌyón ro̱j soꞌ stucua̱nj Yaꞌanj man Apolos a.

Hechos 2:9

Dan me se maꞌa̱n níꞌ me síí cavii Partia do̱ꞌ, Media do̱ꞌ, Elam do̱ꞌ, Mesopotamia do̱ꞌ, Judea do̱ꞌ, Capadocia do̱ꞌ, Ponto do̱ꞌ, Asia do̱ꞌ,

Hechos 27:1

Dan me se guun ya̱ rá síí cuꞌna̱j Festo se vaa caꞌa̱nj núj nda̱a yoꞌóó noco̱o Italia a. Ga̱a ne̱ tacuachén soꞌ man Pabló do̱ꞌ, man ꞌó do̱j síí ꞌni̱j tagaꞌ do̱ꞌ, rihaan ꞌo̱ tanuu capitán ꞌni̱j raꞌa cientó tanuu, ne̱ Julió cuꞌna̱j soꞌ, ne̱ síí noco̱ꞌ xꞌneꞌ noco̱o tanuu cuꞌna̱j Augusta me soꞌ a.

Hechos 27:6

Ne̱ chumanꞌ yoꞌ roꞌ, nariꞌ tanuu capitán yoꞌ ꞌo̱ rihoo cavii chumanꞌ Alejandría, ne̱ rihoo caꞌa̱nj nda̱a Italia me yoꞌ a. Cheꞌé dan cavii núj rque rihoo yoꞌ quiꞌyaj soꞌ a.

1 Corintios 16:19

Nij xꞌneꞌ cunuda̱nj nij síí noco̱ꞌ man Cristó ma̱n estadó Asia roꞌ, me rá se vaa veꞌé cuma̱n nij soj, ga̱ síí cuꞌna̱j Aquila do̱ꞌ, chana̱ cuꞌna̱j Priscila do̱ꞌ, xꞌneꞌ ta̱ranꞌ nij síí noco̱ꞌ man Cristó nuu chre̱ꞌ tucuá ro̱j soꞌ do̱ꞌ a.

2 Timoteo 4:19

Cata̱j so̱ꞌ rihaan chana̱ cuꞌna̱j Prisca do̱ꞌ, nica̱ noꞌ síí cuꞌna̱j Aquila do̱ꞌ, nij tucua̱ síí cuꞌna̱j Onesíforo do̱ꞌ, se vaa me rá ꞌu̱nj veꞌé ca̱yáán nij soꞌ á.

Hebreos 13:24

Cata̱j soj rihaan ta̱ranꞌ nij síí tumé sa̱ꞌ rihaan Yaꞌanj man soj do̱ꞌ, rihaan ta̱ranꞌ nij síí noco̱ꞌ man Cristó do̱ꞌ, se vaa veꞌé ca̱yáán nij soꞌ raj ado̱nj. Nij tinúú níꞌ nij síí ma̱n yoꞌóó cuꞌna̱j Italia roꞌ, veꞌé ca̱yáán nij soj, rá nij soꞌ chugua̱nj.

1 Pedro 1:1

ꞌU̱nj roꞌ, me síí cuꞌna̱j Pedró, ne̱ síí cuneꞌ Jesucristó caꞌa̱nj nata̱ꞌ snana̱ soꞌ rihaan nij yuvii̱ mej a. Ne̱ qui̱ꞌyáá ꞌu̱nj yanj nihánj caꞌne̱j ꞌu̱nj rihaan soj si̱j narii Yaꞌanj man canoco̱ꞌ man soꞌ, soj si̱j chaꞌnuu̱ caꞌanj nij estadó cuꞌna̱j Ponto do̱ꞌ, Galacia do̱ꞌ, Capadocia do̱ꞌ, Asia do̱ꞌ, Bitinia do̱ꞌ, cheꞌé sayuun quiranꞌ soj a.