Hechos 10:40 - Triqui de San Juan Copala

⁴⁰ Ga̱a ne̱ quisíj vaꞌnu̱j güii caviꞌ soꞌ, ga̱a ne̱ cunuu iꞌna̱ꞌ uún soꞌ, quiꞌyaj Yaꞌanj, ne̱ curuviꞌ soꞌ rihaan núj, quiꞌyaj Yaꞌanj ado̱nj.

Hechos 10:40 ပူးပေါင်းရင်းမြစ်များ

San Juan 14:22

Dan me se caꞌmii síí cuꞌna̱j Judas rihaan soꞌ a. Tza̱j ne̱ né si̱j cuꞌna̱j Judas Iscariote me soꞌ maꞌ. ꞌÓ síí cuꞌna̱j Judas me soꞌ a. Dan me se xnáꞌanj soꞌ man Jesús, cataj soꞌ a: ―Me cheꞌé cataj so̱ꞌ cuano̱ nihánj se vaa queneꞌe̱n núj mán so̱ꞌ qui̱ꞌyáá so̱ꞌ, tza̱j ne̱ se̱ queneꞌen nij síí noco̱ꞌ se‑chre̱j chumii̱ nihánj mán so̱ꞌ ga̱ ―taj Judas, xnáꞌanj soꞌ man Jesús a.

Hechos 17:31

Ne̱ dan me se cachrón Yaꞌanj ꞌo̱ güii caꞌne̱ꞌ nica̱ soꞌ cacunꞌ cheꞌé cunuda̱nj nij yuvii̱ ma̱n rihaan chumii̱ a. Ne̱ a̱j cuneꞌ soꞌ man ꞌo̱ snóꞌo guun síí caꞌne̱ꞌ cacunꞌ cheꞌé yuvii̱ a. Ne̱ cheꞌé se cunuu iꞌna̱ꞌ uún snóꞌo yoꞌ, quiꞌyaj Yaꞌanj, ga̱a caviꞌ soꞌ, ne̱ cheꞌé dan no̱ xcúún cunuda̱nj yuvii̱ cuchuma̱n rá nij yuvii̱ se vaa veé ya̱ snóꞌo yoꞌ me soꞌ ado̱nj ―taj Pabló rihaan nij síí ma̱n Atenas yoꞌ a.

Hechos 2:24

Tza̱j ne̱ cunuu iꞌna̱ꞌ uún soꞌ, quiꞌyaj Yaꞌanj, ne̱ tinanii Yaꞌanj man soꞌ rihaan sayuun se vaa caviꞌ soꞌ a. ꞌO̱ se ne caꞌve̱e yu̱u̱n cheꞌe̱ cavi̱ꞌ soꞌ daj chiha̱a̱ míj a̱ maan ado̱nj.

Hechos 2:32

’Dan me se ya̱ ya̱ cunuu iꞌna̱ꞌ uún Jesús, quiꞌyaj Yaꞌanj, ne̱ ta̱ranꞌ núj me síí queneꞌen se vaa cunuu iꞌna̱ꞌ uún soꞌ ado̱nj.

Romanos 1:4

Da̱nj ina̱nj uún ne̱ tihaa̱n Nimán Yaꞌanj síí sa̱ꞌ ina̱nj se vaa ya̱ Taꞌníí Yaꞌanj me Jesucristó cheꞌé se cunuu iꞌna̱ꞌ uún soꞌ scaꞌnúj nij síí caviꞌ quiꞌyaj se‑nucua̱j Yaꞌanj a.

Romanos 14:9

Dan me se me rá Cristó ni̱caj yuꞌunj soꞌ man yuvii̱ vaa iꞌna̱ꞌ do̱ꞌ, man yuvii̱ caviꞌ do̱ꞌ, ne̱ cheꞌé dan caviꞌ soꞌ, ne̱ cunuu iꞌna̱ꞌ uún soꞌ a.

Romanos 8:11

Ne̱ neꞌen soj se vaa cunuu iꞌna̱ꞌ uún Jesús ga̱a caviꞌ soꞌ, quiꞌyaj Yaꞌanj, ne̱ maꞌa̱n Nimán Yaꞌanj nuû nimán soj, ne̱ cheꞌé dan asa̱ꞌ caviꞌ soj, ne̱ cunu̱u naca̱ nee̱ man soj vaa güii, quiꞌya̱j uún Yaꞌanj a.

2 Corintios 4:14

cheꞌé se neꞌen núj se vaa Yaꞌanj me síí quiꞌyaj cunuu iꞌna̱ꞌ uún Jesús Si̱j ꞌNi̱j Raꞌa man níꞌ, ne̱ cheꞌé dan cunu̱u iꞌna̱ꞌ uún maꞌa̱n núj ga̱ Jesús, quiꞌya̱j uún Yaꞌanj, ga̱a ne̱ canicu̱nꞌ núj do̱ꞌ, maꞌa̱n soj do̱ꞌ, rihaan Jesús, quiꞌya̱j Yaꞌanj ado̱nj.

Hebreos 13:20

Dan me se Yaꞌanj si̱j ꞌyaj vaa xe̱j nimán níꞌ roꞌ, soꞌ me síí quiꞌyaj cunuu iꞌna̱ꞌ uún Jesús Si̱j ꞌNi̱j Raꞌa man níꞌ ga̱a caviꞌ soꞌ a. Ne̱ Jesús me se ase vaa síí tumé matzinj vaa soꞌ, ne̱ ase vaa daán soꞌ matzinj vaa níꞌ, ne̱ tumé soꞌ man níꞌ si̱j noco̱ꞌ man soꞌ, ne̱ síí sa̱ꞌ uxrá me soꞌ ado̱nj. Ne̱ cheꞌé ton cayanj man soꞌ me nica̱j níꞌ ꞌó tucuáán cuchruj soꞌ cheꞌé níꞌ se vaa canoco̱ꞌ níꞌ man Yaꞌanj a. Ne̱ me rá ꞌu̱nj

1 Pedro 1:21

Ne̱ cheꞌé se vaa quiꞌyaj Cristó cheꞌé soj roꞌ, cheꞌé dan amán rá soj niꞌya̱j soj man Yaꞌanj cheꞌé se soꞌ me síí naquiꞌyaj iꞌna̱ꞌ man Cristó, ne̱ soꞌ me síí quiꞌyaj se vaa taj yuvii̱ se vaa niꞌndaj ya̱ sa̱ꞌ cavii Cristó a. Ne̱ cheꞌé se da̱nj quiꞌyaj Yaꞌanj roꞌ, cheꞌé dan amán rá soj niꞌya̱j soj man Yaꞌanj, ne̱ naꞌvi̱j soj quisi̱j güii cavi̱i̱ sa̱ꞌ ndoꞌo soj quiꞌya̱j soꞌ a.