Hebreos 8:5 - Triqui de San Juan Copala

⁵ Ne̱ nij xrej ma̱n rihaan chumii̱ nihánj roꞌ, ne ꞌyaj suun nij soꞌ ga̱ maꞌa̱n nij rasu̱u̱n ma̱n rej xta̱ꞌ maꞌ. Ma̱an se ase vaa se tinanga̱ꞌ u̱u̱n do̱ꞌ, ase vaa scachu̱nꞌ nij rasu̱u̱n ma̱n rej xta̱ꞌ do̱ꞌ, vaa suun ꞌyaj suun nij soꞌ na̱nj ado̱nj. Cheꞌé dan me asi̱j caꞌneꞌ Yaꞌanj suun rihaan síí cuꞌna̱j Moisés cune̱ꞌ soꞌ nuvií mantá xi̱j nuvií cara̱a̱ gue̱e̱ nij yuvii̱ israelitá rihaan Yaꞌanj, ne̱ nagoꞌ soꞌ chrej rihaan Moisés da̱j quiꞌya̱j soꞌ, cataj soꞌ a: “Xca̱j so̱ꞌ cuentá se vaa ase vaa nuvií tihaán ꞌu̱nj rihaan so̱ꞌ raa̱ quij roꞌ, da̱nj ga̱a̱ gue̱e̱ nuvií cune̱ꞌ so̱ꞌ á”, taj Yaꞌanj rihaan Moisés a.

Hebreos 8:5 ပူးပေါင်းရင်းမြစ်များ

San Mateo 2:12

Ne̱ rej nii̱ caꞌmii nej rihaan nij soꞌ, ne̱ cataj xnaꞌanj Yaꞌanj rihaan nij soꞌ se vaa se̱ canica̱j uún nij soꞌ caꞌa̱nj nij soꞌ rihaan síí nica̱j suun rey cuꞌna̱j Herodes, taj nej rihaan nij soꞌ a. Cheꞌé dan ꞌó chrej canica̱j nij soꞌ quinanꞌ nij soꞌ chiháán nij soꞌ a.

Hechos 7:44

’Dan me se nica̱j xi̱i níꞌ nuvií mantá rej ya̱nj Yaꞌanj rej xcaj nij xi̱i níꞌ cuentá cheꞌé soꞌ ga̱a va̱j nij soꞌ rej tacaan a. Ne̱ nuvií mantá yoꞌ roꞌ, quiꞌyaj Moisés man yoꞌ nda̱a vaa cataj xnaꞌanj Yaꞌanj rihaan soꞌ a. Dan me se ase vaa nuvií mantá tihaa̱n Yaꞌanj rihaan Moisés, da̱nj vaa quiꞌyaj soꞌ a.

Colosenses 2:17

Tucuáán tucuꞌyón nij yuvii̱ rihaan soj me tucuáán canocoꞌ nij yuvii̱ israelitá ga̱a naá a. Ne̱ a̱j tihaa̱n tucuáán yoꞌ do̱j tzínꞌ cheꞌé da̱j ga̱a̱ gu̱un vaa güii, tza̱j ne̱ ya̱j roꞌ, cheꞌé Cristó me se xcaj níꞌ cuentá sa̱ꞌ doj, se vaa maꞌa̱n soꞌ canoco̱ꞌ níꞌ a.

Hebreos 10:1

ꞌO̱ se ase vaa nij se sa̱ꞌ queneꞌe̱n níꞌ rej riha̱a̱n vaa stucua̱nj Moisés, tza̱j ne̱ né maꞌa̱n nij se sa̱ꞌ yoꞌ me tucuáán yoꞌ maꞌ. ꞌO̱ se ticaviꞌ nii man xcuu, ne̱ rqué nii xcuu yoꞌ rihaan Yaꞌanj, ne̱ ina̱nj da̱nj ꞌyaj nii ꞌo̱ ꞌo̱ yoꞌ na̱nj ado̱nj. Dan me se taj güii ꞌo̱ cunu̱u sa̱ꞌ ya̱ nij síí rqué rasu̱u̱n yoꞌ rihaan Yaꞌanj maꞌ.

Hebreos 11:7

Dan me se xa̱ꞌ síí cuꞌna̱j Noé, tza̱j ne̱ cheꞌé se amán rá soꞌ niꞌya̱j soꞌ Yaꞌanj roꞌ, cheꞌé dan, nda̱ꞌ se ataa queneꞌe̱n soꞌ da̱j ga̱a̱ sayuun quiꞌya̱j Yaꞌanj man chumii̱ nihánj, tza̱j ne̱ ma̱an cheꞌé se veꞌé cuno soꞌ nana̱ cataj xnaꞌanj Yaꞌanj rihaan soꞌ, ne̱ cheꞌé dan quiꞌyaj soꞌ rihoo xi̱j chéé rihaan na, ne̱ cheꞌé dan me nanii nij tucua̱ soꞌ rihaan sayuun yoꞌ ado̱nj. Ne̱ ma̱an cheꞌé se amán ya̱ rá soꞌ niꞌya̱j soꞌ Yaꞌanj, cheꞌé dan cutaꞌ soꞌ cacunꞌ ya̱ xráá nij yuvii̱ ma̱n rihaan chumii̱ se vaa ne caꞌve̱j rá nij yuvii̱ cuno̱ nij yuvii̱ snana̱ Yaꞌanj, ne̱ guun maꞌa̱n soꞌ síí sa̱ꞌ niꞌya̱j Yaꞌanj ado̱nj.

Hebreos 12:25

Ta̱dó uxrá soj se̱ nachriꞌ soj ni̱ꞌyaj soj man Yaꞌanj si̱j narqué chrej sa̱ꞌ man soj maꞌ. ꞌO̱ se nij síí ne caꞌve̱j rá cuno̱ rihaan síí cataj xnaꞌanj snana̱ Yaꞌanj rihaan nij soꞌ rihaan chumii̱ nihánj ga̱a naá me se ne nani̱i̱ nij soꞌ maꞌ. Táá a̱ níꞌ si̱j ma̱n cuano̱, ne̱ aꞌmii síí nicu̱nꞌ rej xta̱ꞌ rihaan níꞌ, ne̱ sese nachri̱ꞌ níꞌ ni̱ꞌyaj níꞌ síí narqué chrej man níꞌ, ne̱ daj chiha̱a̱ míj se̱ nanii níꞌ a̱ maꞌ.

Hebreos 13:10

Dan me se ase vaa síí nicu̱nꞌ mesá altar rihaan, ne̱ ma̱n rasu̱u̱n sa̱ꞌ rihaan ꞌyaj Yaꞌanj roꞌ, da̱nj vaa níꞌ chugua̱nj. Ne̱ o̱rúnꞌ níꞌ me síí no̱ xcúún cha̱ rasu̱u̱n ta̱j rihaan mesá altar yoꞌ ado̱nj. Ne̱ nij síí ꞌyaj suun cheꞌé tucuáán nga̱ tucuáán noco̱ꞌ nii rá nuvií noco̱o roꞌ, ne nó xcúún nij soꞌ cha̱ nij soꞌ nij rasu̱u̱n sa̱ꞌ ta̱j rihaan se‑mesa̱ níꞌ a̱ maꞌ.

Hebreos 9:9

Ne̱ ase vaa rej gue̱e̱ roꞌ, vaa ya̱j ado̱nj. Dan me se se̱ cunuu sa̱ꞌ ina̱nj yuvii̱ rihaan Yaꞌanj quiꞌya̱j rej gue̱e̱ yoꞌ maꞌ. Ne̱ ya̱j me se rqué yuvii̱ rasu̱u̱n do̱ꞌ, xcuu caca̱a̱ do̱ꞌ, rihaan Yaꞌanj, tza̱j ne̱ taj se quiꞌyáꞌ cunuu sa̱ꞌ ina̱nj nimán yuvii̱ rihaan Yaꞌanj quiꞌyaj rasu̱u̱n yoꞌ a̱ maꞌ.

Apocalipsis 15:5

Ga̱a ne̱ niꞌya̱j ꞌu̱nj, ne̱ dan me se naxraꞌ taꞌyaa rihaan nuvií noco̱o rej ya̱nj Yaꞌanj rej xta̱ꞌ rej xcaj yuvii̱ cuentá cheꞌé soꞌ a.