Hebreos 8:2 - Triqui de San Juan Copala

² ne̱ nu̱u̱ soꞌ rihaan Yaꞌanj rá nuvií gue̱e̱ ya̱nj rej xta̱ꞌ, ne̱ né ꞌo̱ nuvií cuneꞌ yuvii̱ u̱u̱n me nuvií yoꞌ maꞌ. ꞌO̱ se nuvií cuneꞌ maꞌa̱n Síí ꞌNi̱j Raꞌa man níꞌ me nuvií yoꞌ ado̱nj.

Hebreos 8:2 ပူးပေါင်းရင်းမြစ်များ

San Lucas 24:44

Ga̱a ne̱ cataj soꞌ rihaan nij soꞌ a: ―Nihánj me nana̱ caꞌmii ꞌu̱nj rihaan nij soj ga̱a va̱j ꞌu̱nj ga̱ soj, se vaa cataj ꞌu̱nj vaa cheꞌé quisi̱j ya̱ nu̱ꞌ nana̱ aꞌmii cheꞌé ꞌu̱nj nana̱ no̱ rihaan yanj no̱ stucua̱nj Moisés do̱ꞌ, yanj no̱ snana̱ nij síí nataꞌ snana̱ Yaꞌanj ga̱a naá do̱ꞌ, yanj no̱ nij chraꞌ salmó do̱ꞌ a ―taj soꞌ rihaan nij soꞌ a.

Romanos 15:8

Dan me se cata̱j xnaꞌanj ꞌu̱nj rihaan nij soj cheꞌé suun quiꞌyaj Cristó cheꞌé nij yuvii̱ israelitá, ne̱ ga̱a naá me se cataj xnaꞌanj Yaꞌanj rihaan xi̱i nij yuvii̱ israelitá da̱j quiꞌya̱j Yaꞌanj cheꞌé nij soꞌ, ne̱ quisíj ya̱ nu̱ꞌ nana̱ yoꞌ, quiꞌyaj Cristó a.

2 Corintios 5:1

Dan me se neꞌen núj se vaa ase vaa ꞌo̱ veꞌ mantá utaꞌ u̱u̱n nii rque do̱j güii roꞌ, vaa nee̱ man núj, ne̱ ya̱nj nee̱ man núj ga̱a vaa iꞌna̱ꞌ núj rihaan chumii̱ nihánj a. Tza̱j ne̱ neꞌen núj se vaa caꞌve̱e navi̱j nee̱ man núj vaa güii, ne̱ asa̱ꞌ navij yoꞌ, ga̱a ne̱ rque̱ Yaꞌanj ꞌó nee̱ naca̱ cu̱nuû núj, ne̱ daj chiha̱a̱ míj se̱ navij nee̱ naca̱ yoꞌ a̱ maꞌ. Tana̱nj a̱ ca̱yáán núj rej xta̱ꞌ nu̱ꞌ cavii nu̱ꞌ caꞌanj ado̱nj.

Colosenses 2:11

Da̱nj na̱nj uún, ne̱ ma̱an cheꞌé se nuu rcuaꞌa̱a̱n soj ga̱ Cristó roꞌ, ma̱an cheꞌé dan a̱j ta̱j taꞌngaꞌ sa̱ꞌ ina̱nj man soj vaa ado̱nj. Né taꞌnga̱ꞌ ta̱j nee̱ man yuvii̱ me taꞌngaꞌ yoꞌ maꞌ. Taꞌngaꞌ ꞌyaj caꞌvee tanáj soj nu̱ꞌ rasu̱u̱n chiꞌi̱i̱ me yoꞌ ado̱nj. ꞌO̱ se cheꞌé yan tanáj soj nu̱ꞌ rasu̱u̱n chiꞌi̱i̱ roꞌ, cheꞌé dan ase vaa táá taꞌngaꞌ nee̱ man soj vaa ya̱ ado̱nj.

Hebreos 10:11

Ne̱ xa̱ꞌ ta̱ranꞌ nij xrej, tza̱j ne̱ ꞌo̱ nicunꞌ nij soꞌ ꞌyaj nij soꞌ se‑su̱u̱n Yaꞌanj da̱j a̱ güii, ne̱ na̱nj xcuu do̱ꞌ, ꞌnúú do̱ꞌ, rqué nij soꞌ rihaan Yaꞌanj, tza̱j ne̱ taj se qui̱ꞌyáꞌ xꞌne̱e̱ cacunꞌ xráá yuvii̱ quiꞌya̱j rasu̱u̱n yoꞌ maꞌ.

Hebreos 10:21

Ne̱ xrej sa̱ꞌ uxrá me uún Jesús cheꞌé níꞌ si̱j noco̱ꞌ man Yaꞌanj na̱nj á.

Hebreos 11:10

Da̱nj quiꞌyaj Abraham, cuno soꞌ rihaan Yaꞌanj, cheꞌé se si̱j naꞌvi̱j ndoꞌo ca̱yáán ꞌó chumanꞌ noco̱o chumanꞌ na̱j rej xta̱ꞌ me soꞌ a. Ne̱ né ve̱ꞌ mantá u̱u̱n mán chumanꞌ yoꞌ maꞌ. ꞌO̱ se xraan ndoꞌo vaa tacóó nu̱ꞌ veꞌ na̱j chumanꞌ yoꞌ ado̱nj. ꞌO̱ se maꞌa̱n Yaꞌanj cuchruj chumanꞌ yoꞌ, ne̱ maꞌa̱n Yaꞌanj quiꞌyaj nu̱ꞌ chumanꞌ yoꞌ ado̱nj.

Hebreos 9:1

Dan me se ga̱a caꞌmii Yaꞌanj rihaan Moisés asino ya̱a̱n, ne̱ caꞌneꞌ Yaꞌanj suun da̱j quiꞌya̱j nij yuvii̱ israelitá ga̱a aráj gue̱e̱ nij soꞌ rihaan Yaꞌanj, ne̱ caꞌneꞌ Yaꞌanj suun da̱j ga̱a̱ nuvií gue̱e̱ cune̱ꞌ nij yuvii̱ israelitá rihaan chumii̱ nihánj a.

Apocalipsis 21:3

Ga̱a ne̱ cunó ꞌu̱nj nana̱ caꞌmii síí ta̱j chruun xlá sa̱ꞌ, cataj soꞌ a: ―Ni̱ꞌyaj soj á. Nihánj me tucuá Yaꞌanj ca̱yáán rej ya̱nj yuvii̱, ne̱ ca̱yáán rcuaꞌa̱a̱n Yaꞌanj ga̱ nij soꞌ, ne̱ Taꞌanj nij soꞌ gu̱un soꞌ na̱nj ado̱nj.