Hebreos 3:1 - Triqui de San Juan Copala

¹ Dan me se guun tuvi̱ꞌ soj ga̱ nij síí nacúún Yaꞌanj cheꞌé yan canoco̱ꞌ nij soj man Cristó, tinu̱j, nocoj. Cheꞌé dan xca̱j soj cuentá cheꞌé Jesús, ne̱ si̱j caꞌnéé Yaꞌanj rihaan níꞌ cataj xnaꞌanj soꞌ rihaan níꞌ nana̱ ya̱ cheꞌé Yaꞌanj, ne̱ ase vaa xrej ata̱ suun noco̱o doj vaa uún soꞌ, tinavij ya̱ soꞌ cacunꞌ tumé níꞌ rihaan Yaꞌanj ado̱nj. Ina̱nj da̱nj vaa nana̱ noco̱ꞌ níꞌ na̱nj á.

Hebreos 3:1 ပူးပေါင်းရင်းမြစ်များ

San Juan 17:3

Ne̱ síí ga̱a̱ iꞌna̱ꞌ nu̱ꞌ cavii nu̱ꞌ caꞌanj me se soꞌ me síí neꞌen mán so̱ꞌ do̱ꞌ, mán ꞌu̱nj do̱ꞌ a. Dan me se o̱rúnꞌ so̱ꞌ me Yaꞌanj ya̱, ne̱ ꞌu̱nj Jesús Si̱j Ti̱nanii man Yuvii̱ rihaan Sayuun me síí caꞌnéé so̱ꞌ ado̱nj.

San Juan 20:21

Dan me se caꞌmii uún Jesús rihaan nij soꞌ, cataj soꞌ a: ―Ga̱a̱ dínj nimán soj á. Ase vaa caꞌnéé Réj manj roꞌ, da̱nj ga̱a̱ caꞌne̱j ꞌu̱nj man soj ado̱nj ―taj Jesús rihaan nij soꞌ a.

San Juan 20:27

Ga̱a ne̱ cataj soꞌ rihaan Tomás a: ―Tu̱cuaꞌanj so̱ꞌ raꞌá so̱ꞌ nihánj, ga̱a ne̱ xca̱j so̱ꞌ cuentá da̱j vaa raꞌaj, ne̱ cuta̱ꞌ so̱ꞌ raꞌá so̱ꞌ xꞌnúú ꞌu̱nj nihánj rej catúj chruun lanzá, ga̱a ne̱ gu̱un ya̱ ya̱ rá so̱ꞌ se vaa cunuu iꞌna̱ꞌ uún ꞌu̱nj á. Cuchuma̱n rá so̱ꞌ, ni̱ꞌyaj so̱ꞌ manj á ―taj soꞌ rihaan Tomás a.

Hechos 1:15

Ne̱ güii dan me se canicunꞌ Pedró tanu̱u̱ nij tinu̱j nij soꞌ a. Dan me se cientó táá ico̱ (120) yuvii̱ me nij yuvii̱ cunuu chre̱ꞌ rej ma̱n nij soꞌ ta̱ꞌ asuun a. Dan me se cataj Pedró rihaan nij soꞌ a:

Romanos 11:17

Neꞌen soj se vaa ne cuchuma̱n rá taꞌa̱j nij yuvii̱ israelitá ni̱ꞌyaj nij soꞌ Yaꞌanj maꞌ. Cheꞌé dan, ase vaa ꞌyaj nii man taꞌa̱j nij raꞌa chruun olivó ne rii chruj roꞌ, da̱nj vaa quiꞌyaj Yaꞌanj man nij soꞌ, ne̱ quiriꞌíj yaníj Yaꞌanj man nij síí ne cuchuma̱n rá yoꞌ, ga̱a ne̱ nacaj Yaꞌanj man soj si̱j yaníj, ne̱ dan me se ase vaa raꞌa chruun olivó nicu̱nꞌ rcoꞌ quij vaa soj, tza̱j ne̱ nacaj Yaꞌanj man soj, notaꞌ Yaꞌanj man soj tacóó chruun olivó sa̱ꞌ, ne̱ guun soj ꞌo̱ chruun sa̱ꞌ vaa, ne̱ vaa iꞌna̱ꞌ soj, ꞌyaj yáá chruun yoꞌ na̱nj ado̱nj.

Romanos 15:27

Da̱nj me rá maꞌa̱n nij soꞌ quiꞌya̱j nij soꞌ ado̱nj. ꞌO̱ se yuvii̱ israelitá me nij síí ma̱n Jerusalén, ne̱ nij soꞌ roꞌ, quiꞌyaj nariꞌ yuvii̱ yaníj snana̱ Yaꞌanj, ne̱ cheꞌé dan cunuu sa̱ꞌ nimán nij yuvii̱ yaníj, taj nij síí yaníj ma̱n ro̱j estadó yoꞌ ado̱nj. Cheꞌé dan no̱ xcúún nij yuvii̱ yaníj ra̱cuíj nij soꞌ man nij yuvii̱ noco̱ꞌ man Cristó ma̱n Jerusalén, rá nij soꞌ a. ꞌO̱ se achiin saꞌanj man nij soꞌ, ne̱ cheꞌé dan caꞌne̱j nij yuvii̱ yaníj saꞌanj rihaan nij soꞌ ado̱nj.

Romanos 15:8

Dan me se cata̱j xnaꞌanj ꞌu̱nj rihaan nij soj cheꞌé suun quiꞌyaj Cristó cheꞌé nij yuvii̱ israelitá, ne̱ ga̱a naá me se cataj xnaꞌanj Yaꞌanj rihaan xi̱i nij yuvii̱ israelitá da̱j quiꞌya̱j Yaꞌanj cheꞌé nij soꞌ, ne̱ quisíj ya̱ nu̱ꞌ nana̱ yoꞌ, quiꞌyaj Cristó a.

Romanos 9:24

Maꞌa̱n níꞌ me nij yuvii̱ gu̱un chij ga̱ Yaꞌanj, ne̱ dan me se taꞌa̱j níꞌ me yuvii̱ israelitá, ne̱ ꞌó taꞌa̱j níꞌ me yuvii̱ yaníj, tza̱j ne̱ canacúún Yaꞌanj man ꞌo̱ ꞌo̱ níꞌ gu̱un chij níꞌ ga̱ soꞌ ado̱nj.

1 Corintios 1:2

ne̱ ꞌyaj núj yanj nihánj caꞌne̱j núj rihaan nij soj xꞌneꞌ nij síí noco̱ꞌ man Yaꞌanj ya̱nj chumanꞌ Corinto a. Dan me se narii Yaꞌanj man soj canoco̱ꞌ soj man Cristó Jesús, ne̱ canacúún Yaꞌanj man soj gu̱un soj síí nuu sa̱ꞌ nimán a. Ne̱ veé yanj nihánj caꞌne̱j cuchi̱ꞌ rihaan cunuda̱nj ꞌó nij síí ya̱nj me rej maꞌa̱n síí ataꞌ tuꞌva̱ se‑chuvi̱i Jesucristó Si̱j ꞌNi̱j Raꞌa man níꞌ a. Dan me se Síí ꞌNi̱j Raꞌa man nij soꞌ ne̱ Síí ꞌNi̱j Raꞌa man maꞌa̱n ya̱ níꞌ me ya̱ soꞌ a.

1 Corintios 10:17

Dan me se o̱rúnꞌ rachrúún vaa rihaan níꞌ chá cunuda̱nj níꞌ a. Cheꞌé dan me ase vaa o̱rúnꞌ yuvii̱ roꞌ, da̱nj vaa cunuda̱nj nij tinu̱j níꞌ a.

1 Corintios 9:23

Ina̱nj da̱nj ꞌyáá ꞌu̱nj ga̱ nana̱ sa̱ꞌ cheꞌé Cristó, ga̱a ne̱ cavi̱i̱ sa̱ꞌ ma̱ꞌanj, quiꞌya̱j nana̱ sa̱ꞌ yoꞌ, raj a.

2 Corintios 1:7

Dan me se ꞌo̱ nucua̱j ya̱ rá núj niꞌya̱j núj man soj cheꞌé se vaa ranꞌ soj na̱nj á. ꞌO̱ se nda̱ꞌ rá se vaa ꞌnaꞌ sayuun xráá soj roꞌ, veé da̱nj vaa aꞌnéé Yaꞌanj se nucua̱j nimán soj uún chugua̱nj. Ase vaa ranꞌ núj sayuun roꞌ, da̱nj vaa ranꞌ gue̱e̱ soj sayuun, ne̱ ase vaa nariꞌ nucuaj rá núj ꞌyaj Yaꞌanj roꞌ, da̱nj vaa nariꞌ nucuaj rá soj ꞌyaj uún Yaꞌanj a.

2 Corintios 9:13

Ne̱ queneꞌe̱n nij yuvii̱ se vaa ya̱ uno soj nana̱ sa̱ꞌ cheꞌé Cristó nana̱ sa̱ꞌ noco̱ꞌ níꞌ, ne̱ queneꞌe̱n nij yuvii̱ se vaa niha̱ꞌ rá soj rque̱ soj siꞌyaj soj man nij síí noco̱ꞌ man Cristó ya̱nj chumanꞌ Jerusalén do̱ꞌ, man ta̱ranꞌ nij tinúú níꞌ do̱ꞌ, ne̱ cheꞌé dan gu̱un ya̱ rá nij soꞌ se vaa ya̱ ya̱ si̱j noco̱ꞌ man Yaꞌanj me soj, ne̱ veꞌé uxrá caꞌmi̱i̱ nij soꞌ cheꞌé Yaꞌanj a.

Efesios 3:6

Dan me se tihaa̱n soꞌ nana̱ se vaa cuno̱ nij soj si̱j yaníj nana̱ sa̱ꞌ cheꞌé Cristó, ne̱ cunu̱u sa̱ꞌ nimán soj rihaan Yaꞌanj ga̱ núj si̱j israelitá ado̱nj. Ne̱ nana̱ cataꞌ tuꞌva Yaꞌanj cheꞌé nij síí canoco̱ꞌ man Cristó Jesús roꞌ, quisíj ya̱ nu̱ꞌ nana̱ yoꞌ cheꞌé nij soj si̱j yaníj ga̱ núj si̱j israelitá na̱nj chugua̱nj.

Efesios 4:1

Síí ꞌni̱j tagaꞌ cheꞌé se nocóꞌ ꞌu̱nj man Síí ꞌNi̱j Raꞌa man níꞌ mé ꞌu̱nj, ne̱ cheꞌé dan rqueé ꞌu̱nj man nij soj se vaa veꞌé canoco̱ꞌ soj man Yaꞌanj ga̱a chéé soj rihaan chumii̱ nihánj á. ꞌO̱ se Yaꞌanj me síí canacúún man soj canoco̱ꞌ soj man soꞌ a.

Efesios 4:4

Dan me se o̱rúnꞌ ya̱ yuvii̱ me níꞌ vaa, ne̱ o̱rúnꞌ ya̱ nimán níꞌ vaa, ne̱ dan me se o̱rúnꞌ ya̱ Nimán Yaꞌanj me nuû nimán ya̱ níꞌ ado̱nj. Ne̱ uun ya̱ rá ta̱ranꞌ níꞌ se vaa canacúún Yaꞌanj man ta̱ranꞌ níꞌ, ne̱ ꞌo̱ cuya̱a̱n cavi̱i̱ sa̱ꞌ ta̱ranꞌ níꞌ, quiꞌya̱j Yaꞌanj ado̱nj.

Filipenses 3:14

ꞌO̱ se rquee̱ uxrá ꞌu̱nj ꞌo̱ no̱coj man Cristó Jesús, ne̱ caꞌna̱ꞌ güii quiꞌya̱j canaán ꞌu̱nj, ne̱ cavi̱i̱ sa̱ꞌ ꞌu̱nj, quiꞌya̱j Yaꞌanj, ne̱ nacu̱nj Yaꞌanj manj cavi̱i̱ ꞌu̱nj rej xta̱ꞌ, cheꞌé se ꞌu̱nj me síí noco̱ꞌ man Cristó Jesús ado̱nj.

Colosenses 1:12

ne̱ cata̱j soj guun niꞌya̱j níꞌ rihaan Yaꞌanj Rej Jesucristó á. Nu̱ꞌ dan achíín niꞌya̱j rój rihaan Yaꞌanj cheꞌé soj, ne̱ neꞌen soj se vaa a̱j cunuu sa̱ꞌ níꞌ quiꞌyaj Yaꞌanj, ne̱ cheꞌé dan me vaa güii quiri̱ꞌ níꞌ se sa̱ꞌ rque̱ Yaꞌanj man ta̱ranꞌ nij síí noco̱ꞌ man soꞌ, cheꞌé se yuvii̱ xcaj cuentá chéé rej ranga̱ꞌ me níꞌ chugua̱nj.

Colosenses 1:22

Tza̱j ne̱ guun Cristó yuvii̱, ne̱ caviꞌ soꞌ, ne̱ cheꞌé dan cunuu rcuaꞌa̱a̱n soj ga̱ Yaꞌanj, quiꞌyaj soꞌ, ne̱ vaa güii canicu̱nꞌ soj rihaan Yaꞌanj, quiꞌya̱j Cristó, ne̱ si̱j nuu sa̱ꞌ nimán rihaan Yaꞌanj gu̱un soj, ne̱ taj cacunꞌ tu̱mé soj a̱ maꞌ.

Colosenses 3:12

Dan me se narii Yaꞌanj man soj canoco̱ꞌ soj man soꞌ, ne̱ cunuu sa̱ꞌ nimán soj rihaan Yaꞌanj, ne̱ ꞌe̱e̱ rá Yaꞌanj man soj, ne̱ cheꞌé dan cunu̱u ꞌe̱e̱ rá soj tuviꞌ soj chugua̱nj. Dan me se ga̱a̱ sa̱ꞌ nimán soj, ne̱ ga̱a̱ nica̱ꞌ nimán soj, ne̱ se̱ guun yuva̱a̱ soj man tuviꞌ soj maꞌ. Tana̱nj ga̱a̱ ina̱j nimán soj na̱nj á.

1 Tesalonicenses 2:12

se vaa quiꞌya̱j soj se vaa no̱ xcúún soj quiꞌya̱j soj cheꞌé se narii Yaꞌanj man soj ca̱yáán soj ga̱ Yaꞌanj güii niꞌndaj ya̱ veꞌé gu̱un chij Yaꞌanj a.

1 Tesalonicenses 5:27

Ma̱an cheꞌé se Síí ꞌNi̱j Raꞌa man níꞌ rqué suun manj, cheꞌé dan me no̱ xcúnj cata̱j xnaꞌanj ꞌu̱nj rihaan soj se vaa naya̱a̱ soj yanj cartá nihánj rihaan cunuda̱nj nij tinúú níꞌ síí noco̱ꞌ man Cristó ado̱nj.

2 Tesalonicenses 1:11

Cheꞌé dan niga̱nj achíín niꞌya̱j núj rihaan Yaꞌanj cheꞌé soj se vaa caꞌve̱e quisi̱j soj gu̱un soj nu̱ꞌ nda̱a vaa me rá Yaꞌanj gu̱un soj ga̱a canacúún Yaꞌanj man soj canoco̱ꞌ soj man soꞌ a. Ne̱ achíín niꞌya̱j núj se vaa ra̱cuíj ndoꞌo Yaꞌanj man soj quiꞌya̱j soj nu̱ꞌ suun sa̱ꞌ me rá soj quiꞌya̱j soj, cheꞌé se si̱j amán rá niꞌya̱j man Cristó me soj a.

2 Tesalonicenses 2:14

Dan me se ga̱a nataꞌ núj nana̱ sa̱ꞌ cheꞌé Cristó rihaan soj, ne̱ canacúún Yaꞌanj man soj se vaa cavi̱i̱ sa̱ꞌ soj ga̱ soꞌ, ne̱ cheꞌé dan da̱j se niꞌndaj ya̱ veꞌé vaa Jesucristó Si̱j ꞌNi̱j Raꞌa man níꞌ roꞌ, da̱nj quisi̱j soj ga̱a̱ soj uún ado̱nj.

1 Timoteo 6:12

Quiꞌya̱j uxrá so̱ꞌ suun sca̱ꞌ sa̱ꞌ caꞌneꞌ Yaꞌanj rihaan níꞌ si̱j noco̱ꞌ man soꞌ, ga̱a ne̱ ca̱yáán so̱ꞌ ga̱ Yaꞌanj nu̱ꞌ cavii nu̱ꞌ caꞌanj a. Cheꞌé dan cuneꞌ Yaꞌanj mán so̱ꞌ qui̱ꞌyáá so̱ꞌ se‑su̱u̱n soꞌ, ne̱ cataj yá so̱ꞌ cuno queꞌe̱e̱ tinúú níꞌ se vaa ya̱ qui̱ꞌyáá so̱ꞌ se‑su̱u̱n Yaꞌanj ca̱nocóꞌ so̱ꞌ man soꞌ á.

1 Timoteo 6:2

Ne̱ sese síí noco̱ꞌ man Yaꞌanj me ruꞌvee, ne̱ se̱ guun cata̱j mozó a: “Tinúú ꞌu̱nj me se‑ruꞌve̱e̱ ꞌu̱nj, ne̱ taj cheꞌé quiꞌya̱j suun nu̱cuáá ꞌu̱nj rihaan soꞌ maꞌ.” Se̱ guun caꞌmi̱i̱ mozó da̱nj maꞌ. Tana̱nj veꞌé quiꞌya̱j suun soꞌ rihaan se‑ruꞌve̱e̱ soꞌ, ne̱ ga̱a̱ ꞌe̱e̱ rá soꞌ se‑ruꞌve̱e̱ soꞌ á. ꞌO̱ se neꞌen mozó se vaa si̱j noco̱ꞌ man Yaꞌanj me se‑ruꞌve̱e̱ mozó, ne̱ gu̱un niha̱ꞌ rá mozó se vaa doj a̱ cavi̱i̱ sa̱ꞌ ꞌo̱ tinúú soꞌ cheꞌé suun ꞌyaj suun soꞌ ado̱nj. Nana̱ nihánj me chrej nucua̱j nago̱ꞌ so̱ꞌ man nij yuvii̱ a.

2 Timoteo 1:9

Ne̱ Yaꞌanj me síí tinanii man níꞌ rihaan chrej chiꞌi̱i̱ do̱ꞌ, rihaan sayuun do̱ꞌ, ne̱ canacúún soꞌ man níꞌ cunu̱u sa̱ꞌ nimán níꞌ ne̱ canoco̱ꞌ xraan níꞌ man soꞌ a. Né cheꞌe̱ suun quiꞌyaj maꞌa̱n níꞌ me quiꞌyaj Yaꞌanj da̱nj maꞌ. Tana̱nj da̱nj guun rá maꞌa̱n soꞌ quiꞌya̱j soꞌ, ne̱ guun rá soꞌ quiꞌya̱j u̱u̱n soꞌ se lu̱j cheꞌé níꞌ ado̱nj. Asi̱j ataa quiꞌya̱j soꞌ chumii̱, ne̱ quiꞌyaj soꞌ se lu̱j cheꞌé níꞌ cheꞌé se vaa quiꞌyaj Cristó Jesús cheꞌé níꞌ a.

2 Timoteo 2:7

Cu̱nó so̱ꞌ nana̱ nihánj, ne̱ ra̱cuíj Síí ꞌNi̱j Raꞌa man níꞌ mán so̱ꞌ nari̱ꞌ so̱ꞌ cunuda̱nj nij nana̱ chugua̱nj.

Hebreos 10:19

Dan me se cheꞌé se cayanj ton man Jesús roꞌ, cheꞌé dan nucua̱j rá níꞌ catu̱u̱ níꞌ rá Rej Gue̱e̱ Ya̱ Doj rej ya̱nj maꞌa̱n Yaꞌanj, tinu̱j, nocoj.

Hebreos 10:21

Ne̱ xrej sa̱ꞌ uxrá me uún Jesús cheꞌé níꞌ si̱j noco̱ꞌ man Yaꞌanj na̱nj á.

Hebreos 10:23

Ne̱ ꞌo̱ cuchuma̱n rá níꞌ se vaa ya̱ cavi̱i̱ sa̱ꞌ níꞌ, ne̱ se̱ guun vi̱j rá níꞌ daj chiha̱a̱ míj maꞌ. ꞌO̱ se vaa cheꞌé ga̱a̱ nucua̱j rá níꞌ man síí cataꞌ tuꞌva se vaa sa̱ꞌ quiꞌya̱j soꞌ cheꞌé níꞌ na̱nj á.

Hebreos 13:22

Cuano̱ nihánj me se rqueé ꞌu̱nj man soj se vaa veꞌé cuno̱ soj nana̱ nihánj, tinu̱j, nocoj. ꞌO̱ se chrej nucua̱j narqué ꞌu̱nj man soj me nana̱ nihánj, ne̱ do̱j vaa nana̱ nihánj nana̱ cachrón ꞌu̱nj rihaan yanj cartá nihánj naya̱a̱ soj á.

Hebreos 2:11

Dan me se Taꞌni̱j Yaꞌanj me Jesús si̱j naquiꞌyaj sa̱ꞌ nimán yuvii̱, ne̱ taꞌni̱j Yaꞌanj me níꞌ yuvi̱i̱ cunuu sa̱ꞌ nimán rihaan Yaꞌanj cheꞌé Jesús, ne̱ cheꞌé dan ne gu̱un naꞌa̱j Jesús cata̱j soꞌ se vaa tinúú soꞌ do̱ꞌ, raꞌvij soꞌ do̱ꞌ, me níꞌ maꞌ.

Hebreos 2:17

Cheꞌé dan me naquiꞌyaj soꞌ man soꞌ nda̱a rá se vaa gue̱e̱ nij tinúú ya̱ soꞌ ado̱nj. Da̱nj quiꞌyaj soꞌ cheꞌé rej caꞌve̱e cunu̱u ꞌe̱e̱ rá soꞌ man níꞌ, ne̱ gu̱un soꞌ xrej sa̱ꞌ rá ata̱ suun noco̱o doj rihaan Yaꞌanj cheꞌé níꞌ, ne̱ gu̱un nucua̱j rá níꞌ ni̱ꞌyaj níꞌ man soꞌ, ne̱ tinavi̱j soꞌ cacunꞌ tumé níꞌ si̱j noco̱ꞌ man Yaꞌanj ado̱nj.

Hebreos 3:12

Dan me se tu̱mé uxrá soj man soj se̱ gaa na̱nj ga̱a̱ qui̱j nimán ꞌo̱ tuviꞌ soj, ne̱ se̱ caꞌvej rá soꞌ cuchuma̱n rá soꞌ ni̱ꞌyaj soꞌ Yaꞌanj, maan tinu̱j, maan nocoj. Ta̱dó soj se̱ gaa na̱nj ta̱náj xco̱ ꞌo̱ tuviꞌ soj man Yaꞌanj si̱j vaa iꞌna̱ꞌ ya̱ maꞌ.

Hebreos 3:14

ꞌO̱ se ya̱j me se guun níꞌ síí cavi̱i̱ sa̱ꞌ ga̱ Cristó, ne̱ cavi̱i̱ sa̱ꞌ ya̱ níꞌ ga̱ soꞌ sese ꞌo̱ cuchuma̱n rá níꞌ cuno̱ níꞌ nana̱ ya̱, nda̱a vaa quiꞌyaj níꞌ ga̱a guun cheꞌe̱ níꞌ canocoꞌ níꞌ man Cristó chugua̱nj.

Hebreos 6:20

Dan me se a̱j quitáá ya̱a̱n Jesús rihaan níꞌ quinanꞌ soꞌ rihaan Yaꞌanj cheꞌé níꞌ, ne̱ soꞌ me síí guun xrej ata̱ suun noco̱o doj, ne̱ ase vaa síí cuꞌna̱j Melquisedec síí cayáán ga̱a naá roꞌ, da̱nj ga̱a̱ gue̱e̱ soꞌ nu̱ꞌ cavii nu̱ꞌ caꞌanj ado̱nj.

Hebreos 7:26

Dan me se vaa cheꞌé ndoꞌo guun soꞌ xrej ata̱ suun noco̱o doj cheꞌé níꞌ ado̱nj. ꞌO̱ se síí gue̱e̱ ya̱ me soꞌ, ne̱ taj va̱j a̱ doj cacunꞌ tumé soꞌ maꞌ. ꞌO̱ se síí sa̱ꞌ ina̱nj nimán me soꞌ, ne̱ ga̱nꞌ uxrá yáán soꞌ ga̱ níꞌ si̱j tumé cacunꞌ na̱nj ado̱nj. Dan me se xta̱ꞌ doj yáán soꞌ rihaan nu̱ꞌ rej xta̱ꞌ na̱nj ado̱nj.

Hebreos 7:28

Ne̱ stucua̱nj Moisés taj se vaa cune̱ꞌ yuvii̱ man na̱nj yuvii̱ gu̱un nij soꞌ xrej, ne̱ cheꞌé dan na̱nj síí tumé cacunꞌ me nij xrej yoꞌ na̱nj ado̱nj. Tza̱j ne̱ navij tucuáán nga̱ yoꞌ, ga̱a ne̱ cutaꞌ Yaꞌanj raa̱ maꞌa̱n Yaꞌanj, ne̱ cuneꞌ Yaꞌanj man Taꞌníí Yaꞌanj, ne̱ síí sa̱ꞌ ina̱nj me soꞌ nu̱ꞌ cavii nu̱ꞌ caꞌanj na̱nj ado̱nj.

Hebreos 9:11

Dan me se guun Cristó xrej ata̱ suun noco̱o doj, ne̱ cavii sa̱ꞌ uxrá níꞌ, quiꞌyaj soꞌ, ne̱ ꞌyaj soꞌ se-su̱u̱n soꞌ ꞌó rej gue̱e̱, tza̱j ne̱ né nu̱vií cuneꞌ yuvii̱ rihaan chumii̱ nihánj me ꞌó rej gue̱e̱ yoꞌ maꞌ.

Hebreos 9:15

Dan me se Cristó me se caviꞌ soꞌ cheꞌé se queneꞌen soꞌ se vaa ne gu̱un nucua̱j yuvii̱ canoco̱ꞌ nij yuvii̱ nu̱ꞌ tucuáán cuchruj Yaꞌanj asino ya̱a̱n rihaan síí cuꞌna̱j Moisés maꞌ. Cheꞌé dan Cristó me síí narqué tucuáán naca̱ cheꞌé níꞌ da̱j quiꞌya̱j níꞌ cavi̱i̱ sa̱ꞌ níꞌ rihaan Yaꞌanj a. Cheꞌé dan níꞌ si̱j canacúún Yaꞌanj man roꞌ, naca̱j níꞌ nu̱ꞌ se sa̱ꞌ cataꞌ tuꞌva Yaꞌanj se vaa rque̱ soꞌ rihaan níꞌ nu̱ꞌ cavii nu̱ꞌ caꞌanj ado̱nj.

1 Pedro 2:9

Xa̱ꞌ soj, tza̱j ne̱ si̱j narii Yaꞌanj me soj, ne̱ xrej uun chij ya̱ nu̱u̱ rihaan Yaꞌanj me soj, ne̱ xꞌneꞌ nij síí cunuu sa̱ꞌ nimán uun chij Yaꞌanj rihaan me soj ado̱nj. Cheꞌé se me rá Yaꞌanj nata̱ꞌ soj cheꞌé se sa̱ꞌ uxrá quiꞌyaj soꞌ roꞌ, cheꞌé dan narii soꞌ man soj ado̱nj. Dan me se si̱j noco̱ꞌ tucuáán rmi̱ꞌ me soj ga̱a naá, tza̱j ne̱ canacúún Yaꞌanj man soj xca̱j soj cuentá, ne̱ cuna̱j uxrá vaa stucua̱nj Yaꞌanj tucuáán noco̱ꞌ soj cuano̱ na̱nj á.

1 Pedro 3:5

Da̱nj quiꞌyaj nij chana̱ canocoꞌ man Yaꞌanj cumán ga̱a naá, ne̱ nucua̱j rá nij noꞌ man Yaꞌanj, ne̱ veꞌé cuno nij noꞌ rihaan nica̱ nij noꞌ, cheꞌé rej veꞌé ga̱a̱ nij noꞌ a.

1 Pedro 5:1

Rihaan soj si̱j tumé sa̱ꞌ rihaan Yaꞌanj man nij síí noco̱ꞌ man Cristó ma̱n da̱j a̱ chumanꞌ caꞌmi̱i̱ nu̱cuáj cuano̱ a. ꞌO̱ se síí tumé sa̱ꞌ rihaan Yaꞌanj man yuvii̱ mé ꞌu̱nj ga̱ soj, ne̱ síí queneꞌen sayuun se vaa quiranꞌ Cristó mé ꞌu̱nj, ne̱ dan me se veꞌé gu̱un chij ꞌu̱nj ga̱ Cristó asa̱ꞌ curuviꞌ uún soꞌ rihaan chumii̱ nihánj, raj a.

1 Pedro 5:10

Dan me se Yaꞌanj roꞌ, me síí ꞌyaj da̱j a̱ se lu̱j cheꞌé soj, ne̱ soꞌ me síí canacúún man soj cavi̱i̱ sa̱ꞌ uxrá soj ga̱ soꞌ nu̱ꞌ cavii nu̱ꞌ caꞌanj cheꞌé Cristó ado̱nj. Asa̱ꞌ quisíj quiranꞌ soj sayuun do̱j güii rihaan chumii̱ nihánj, ga̱a ne̱ naquiꞌya̱j sa̱ꞌ Yaꞌanj man soj, ne̱ naquiꞌya̱j sca̱ꞌ soꞌ man soj, ne̱ ga̱a̱ nucua̱j ina̱nj rá soj, quiꞌya̱j soꞌ, ne̱ cune̱ꞌ sa̱ꞌ soꞌ man soj ado̱nj.

1 Juan 1:3

Dan me se nataꞌ núj rihaan maꞌa̱n nij soj cheꞌé se vaa queneꞌen núj do̱ꞌ, cheꞌé se vaa cuno núj do̱ꞌ, cheꞌé rej caꞌve̱e cunu̱u rcuaꞌa̱a̱n soj ga̱ núj, ne̱ dan me se cunu̱u rcuaꞌa̱a̱n níꞌ ga̱ Rej níꞌ Yaꞌanj ga̱ Taꞌníí soꞌ Jesucristó a.

Judas 1:1

ꞌU̱nj roꞌ, me síí cuꞌna̱j Judas nu̱u̱ rihaan Jesucristó, ne̱ tinúú Jacobo mej a. Cachro̱nj nana̱ nihánj rihaan yanj caꞌne̱j ꞌu̱nj rihaan soj si̱j canacúún Yaꞌanj man canoco̱ꞌ man soꞌ a. Dan me se ꞌe̱e̱ rá Rej níꞌ Yaꞌanj man soj, ne̱ nica̱j yuꞌunj Jesucristó man soj se̱ gaa na̱nj ta̱náj soj snana̱ Yaꞌanj a.

Apocalipsis 17:14

Ga̱a ne̱ cunu̱ꞌ ta̱ranꞌ nij soꞌ ga̱ Matzinj Leꞌe̱j, tza̱j ne̱ quiꞌya̱j canaán doj Matzinj Leꞌe̱j rihaan nij soꞌ ado̱nj. ꞌO̱ se Matzinj Leꞌe̱j roꞌ, me síí nica̱j suun noco̱o doj rihaan ꞌó da̱nj nij síí nica̱j suun, ne̱ rey uun chij doj rihaan ꞌó da̱nj nij rey me uún soꞌ ado̱nj. Ne̱ nij tuviꞌ soꞌ roꞌ, me nij síí canacúún soꞌ canoco̱ꞌ man soꞌ, ne̱ dan me se a̱j narii soꞌ man nij soꞌ, ne̱ ꞌo̱ amán rá nij soꞌ niꞌya̱j nij soꞌ man soꞌ na̱nj ado̱nj ―taj se‑mo̱zó Yaꞌanj rihanj a.

Apocalipsis 18:20

Ne̱ cataj ꞌo̱ síí ma̱n rej xta̱ꞌ a: “Gu̱un niha̱ꞌ rá nij soj si̱j ya̱nj rej xta̱ꞌ do̱ꞌ, si̱j noco̱ꞌ man Yaꞌanj do̱ꞌ, si̱j ata̱ suun caꞌa̱nj nata̱ꞌ snana̱ Jesucristó do̱ꞌ, si̱j nataꞌ snana̱ Yaꞌanj do̱ꞌ, ni̱ꞌyaj soj chumanꞌ yoꞌ á. ꞌO̱ se quiꞌyaj Yaꞌanj sayuun man chumanꞌ yoꞌ cheꞌé cacunꞌ quiꞌyaj chumanꞌ yoꞌ man soj ado̱nj.”