Hebreos 2:14 - Triqui de San Juan Copala

¹⁴ Dan me se cheꞌé se vaa nee̱ vaa ton man níꞌ si̱j taꞌníí Yaꞌanj roꞌ, cheꞌé dan ase vaa maꞌa̱n níꞌ roꞌ, da̱nj gaa gue̱e̱ Jesús, ne̱ caꞌnaꞌ soꞌ, ne̱ caviꞌ soꞌ a. Ne̱ ga̱a caviꞌ soꞌ me se quiꞌyaj canaán soꞌ rihaan síí ꞌyaj aviꞌ níꞌ a. Dan me se Síí Chre̱e me síí ꞌyaj aviꞌ níꞌ, ne̱ Jesús me síí caꞌvee quiꞌyaj canaán cheꞌé yan tiri̱ꞌ soꞌ man Síí Chre̱e ado̱nj.

Hebreos 2:14 ပူးပေါင်းရင်းမြစ်များ

San Mateo 16:17

Ga̱a ne̱ cataj Jesús rihaan Pedró a: ―Quiꞌyaj uxrá Yaꞌanj se lu̱j cheꞌé so̱ꞌ, Simón taꞌni̱j síí cuꞌna̱j Jonás ado̱nj. ꞌO̱ se né na̱na̱ cataj xnaꞌanj yuvii̱ rihaan so̱ꞌ me nana̱ caꞌmii so̱ꞌ cuano̱ maꞌ. ꞌO̱ se Réé ꞌu̱nj síí nicu̱nꞌ xta̱ꞌ me síí racuíj mán so̱ꞌ naríꞌ so̱ꞌ nana̱ yoꞌ na̱nj ado̱nj.

San Mateo 25:41

’Ga̱a ne̱ cata̱j ꞌu̱nj rihaan nij síí nicu̱nꞌ rej ni̱chruún ꞌu̱nj a: “Naxu̱u̱n soj man soj rihanj cuaj á. Ma̱an se cataj ya̱ Yaꞌanj se vaa ina̱nj sayuun quira̱nꞌ soj, caꞌa̱nj soj rihaan yaꞌan, caca̱a̱ soj nu̱ꞌ cavii nu̱ꞌ caꞌanj na̱nj á. Dan me se quiꞌyaj Yaꞌanj yaꞌan yoꞌ caca̱a̱ Síí Chre̱e caca̱a̱ nij nana̱ chre̱e caca̱a̱, ne̱ caca̱a̱ nij soj caca̱a̱ ga̱ soꞌ ado̱nj.

San Juan 1:14

Ga̱a ne̱ guun snana̱ Yaꞌanj yoꞌ yuvii̱, ne̱ cayáán soꞌ scaꞌnúj níꞌ, ne̱ queneꞌen núj se vaa niꞌndaj ya̱ sa̱ꞌ veꞌé vaa soꞌ, cheꞌé se o̱rúnꞌ Taꞌníí Rej soꞌ Yaꞌanj me soꞌ a. Ne̱ soꞌ me se uxrá ꞌyaj soꞌ se lu̱j do̱ꞌ, aꞌmii soꞌ nana̱ ya̱ do̱ꞌ ado̱nj.

San Juan 12:24

Ya̱ ya̱ cata̱j xnaꞌanj ꞌu̱nj rihaan soj cuano̱ se vaa ase vaa ꞌnúú vaa níꞌ a. Sese se̱ quinij ꞌnúú ya̱a̱n rihaan yoꞌóó ne̱ cavi̱ꞌ maꞌa̱n ꞌnúú ya̱a̱n yoꞌ, ne̱ navi̱j u̱u̱n ꞌnúú ya̱a̱n, tza̱j ne̱ sese cavi̱ꞌ ꞌnúú ya̱a̱n yoꞌ, ne̱ quisi̱j queꞌe̱e̱ doj ꞌnúú quiꞌya̱j yoꞌ na̱nj ado̱nj.

Romanos 14:9

Dan me se me rá Cristó ni̱caj yuꞌunj soꞌ man yuvii̱ vaa iꞌna̱ꞌ do̱ꞌ, man yuvii̱ caviꞌ do̱ꞌ, ne̱ cheꞌé dan caviꞌ soꞌ, ne̱ cunuu iꞌna̱ꞌ uún soꞌ a.

Romanos 8:3

Ne gu̱un nucua̱j nee̱ man níꞌ canoco̱ꞌ yoꞌ nu̱ꞌ stucua̱nj Moisés, ne̱ cheꞌé dan se̱ guun nucua̱j níꞌ nani̱i̱ maꞌa̱n níꞌ rihaan cacunꞌ tumé níꞌ maꞌ. Tza̱j ne̱ Yaꞌanj me síí tinanii man níꞌ rihaan cacunꞌ yoꞌ, ne̱ caꞌnéé Yaꞌanj maꞌa̱n Taꞌníí Yaꞌanj rihaan chumii̱, ne̱ ase vaa nee̱ man níꞌ roꞌ, da̱nj vaa nee̱ man soꞌ uún a. Dan me se caviꞌ soꞌ cheꞌé níꞌ, ne̱ cheꞌé se taj cacunꞌ tumé maꞌa̱n soꞌ, ne̱ cheꞌé dan taj cheꞌé quiꞌya̱j níꞌ cacunꞌ ya̱j maꞌ.

1 Corintios 1:28

Ne̱ taj se gúnꞌ ne̱ taj yuꞌvee nó nij síí narii Yaꞌanj man maꞌ, taj nij yuvii̱ ma̱n rihaan chumii̱ nihánj, tza̱j ne̱ nacaj Yaꞌanj man nij soꞌ, ne̱ quiꞌya̱j canaán nij soꞌ rihaan nij síí guun chij doj ma̱n rihaan chumii̱ nihánj ado̱nj.

1 Corintios 15:50

Cuano̱ nihánj me se cata̱j xnaꞌanj ꞌu̱nj rihaan nij soj se vaa se̱ guun nucua̱j nee̱ man níꞌ do̱ꞌ, ton man níꞌ do̱ꞌ, cúú man níꞌ do̱ꞌ, ca̱yáán yoꞌ ga̱ Yaꞌanj asa̱ꞌ guun chij Yaꞌanj, maan tinu̱j, maan nocoj. ꞌO̱ se se̱ guun cuma̱n rasu̱u̱n cuchru̱u̱ ga̱ rasu̱u̱n ne uchruu̱ maꞌ.

Gálatas 4:4

Tza̱j ne̱ ga̱a quisíj güii a̱j narii Yaꞌanj asi̱j naá, ne̱ caꞌnéé Yaꞌanj Taꞌníí soꞌ caꞌnaꞌ Taꞌníí soꞌ rihaan chumii̱ nihánj, ne̱ cuchruj ꞌo̱ chana̱ man Taꞌníí Yaꞌanj, ne̱ síí noco̱ꞌ stucua̱nj Moisés me nu̱ꞌ nij tuvi̱ꞌ soꞌ ga̱a cayáán soꞌ rihaan chumii̱ nihánj ado̱nj.

Colosenses 2:15

Dan me se cheꞌé se caviꞌ Cristó rihaan rcutze̱ roꞌ, cheꞌé dan quiꞌyaj canaán Yaꞌanj man da̱j a̱ nij nana̱ chre̱e uun chij do̱ꞌ, da̱j a̱ nij nana̱ chre̱e nica̱j suun do̱ꞌ, ne̱ caxríj naꞌa̱j ranga̱ꞌ Yaꞌanj man nij soꞌ a.

1 Timoteo 3:16

Neꞌen cunuda̱nj níꞌ se vaa noco̱o uxrá vaa nana̱ sa̱ꞌ yuve̱ tihaa̱n naca̱ Yaꞌanj man níꞌ nana̱ canocoꞌ níꞌ, ne̱ nihánj me nana̱ yoꞌ a: Curiha̱nj Yaꞌanj rihaan chumii̱, ne̱ guun soꞌ yuvii̱ a. Veꞌé ndoꞌo quiꞌyaj soꞌ, cataj Nimán Yaꞌanj a. Queneꞌen nij se‑mo̱zó Yaꞌanj man soꞌ a. Nataꞌ nii cheꞌé soꞌ rihaan nij yuvii̱ yaníj a. Cuchumán rá taꞌa̱j nij síí ma̱n rihaan chumii̱ nihánj niꞌya̱j nij soꞌ man soꞌ a. Quinanꞌ soꞌ xta̱ꞌ, ne̱ niꞌndaj ya̱ veꞌé nacaj nij síí ma̱n xta̱ꞌ man soꞌ a. Yoꞌ me nana̱ noco̱ꞌ níꞌ a.

2 Timoteo 1:10

Ne̱ ya̱j me se tihaa̱n Yaꞌanj rihaan níꞌ nu̱ꞌ se sa̱ꞌ nu̱u̱ nimán soꞌ, se vaa caꞌnaꞌ Cristó Jesús Si̱j Tinanii man níꞌ rihaan Sayuun, quiꞌyaj Yaꞌanj a. Ya̱j me se cheꞌé se vaa quiꞌyaj Cristó me se se̱ caꞌvee cavi̱ꞌ níꞌ maꞌ. Tana̱nj ꞌo̱ ga̱a̱ iꞌna̱ꞌ nimán níꞌ ga̱ Yaꞌanj nu̱ꞌ cavii nu̱ꞌ caꞌanj, quiꞌyaj soꞌ, taj nana̱ sa̱ꞌ cheꞌé soꞌ ado̱nj.

Hebreos 10:10

Ne̱ cheꞌé se yu̱u̱n cheꞌe̱ nagoꞌ Jesucristó man maꞌa̱n soꞌ rihaan Yaꞌanj nda̱a vaa guun rá Yaꞌanj quiꞌya̱j soꞌ roꞌ, cheꞌé dan a̱j cunuu sa̱ꞌ nimán níꞌ rihaan Yaꞌanj ado̱nj.

Hebreos 10:5

Cheꞌé dan caꞌnaꞌ Cristó rihaan chumii̱ nihánj, ne̱ caꞌmii soꞌ rihaan Yaꞌanj, cataj soꞌ a: Taj se uun xcuu rque̱ yuvii̱ cavi̱ꞌ rihaan so̱ꞌ a̱ maꞌ. Taj se uun nu̱ꞌ rasu̱u̱n rque̱ yuvii̱ rihaan so̱ꞌ a̱ maꞌ. Tza̱j ne̱ nee̱ manj roꞌ, vaa se uun rihaan so̱ꞌ, ne̱ cheꞌé dan quiꞌyáá so̱ꞌ nee̱ manj ado̱nj.

Hebreos 2:17

Cheꞌé dan me naquiꞌyaj soꞌ man soꞌ nda̱a rá se vaa gue̱e̱ nij tinúú ya̱ soꞌ ado̱nj. Da̱nj quiꞌyaj soꞌ cheꞌé rej caꞌve̱e cunu̱u ꞌe̱e̱ rá soꞌ man níꞌ, ne̱ gu̱un soꞌ xrej sa̱ꞌ rá ata̱ suun noco̱o doj rihaan Yaꞌanj cheꞌé níꞌ, ne̱ gu̱un nucua̱j rá níꞌ ni̱ꞌyaj níꞌ man soꞌ, ne̱ tinavi̱j soꞌ cacunꞌ tumé níꞌ si̱j noco̱ꞌ man Yaꞌanj ado̱nj.

Hebreos 2:18

ꞌO̱ se cheꞌé se quiranꞌ maꞌa̱n ya̱ soꞌ sayuun se vaa guun rá Síí Chre̱e caxri̱i̱ Síí Chre̱e chrej chiꞌi̱i̱ rque soꞌ roꞌ, cheꞌé dan gu̱un nucua̱j soꞌ ra̱cuíj soꞌ man níꞌ ga̱a uun rá Síí Chre̱e caxri̱i̱ Síí Chre̱e chrej chiꞌi̱i̱ rque maꞌa̱n níꞌ ado̱nj.

Hebreos 4:15

ꞌO̱ se né xre̱j ne neꞌen da̱j vaa sayuun ranꞌ níꞌ me soꞌ maꞌ. ꞌO̱ se a̱j neꞌen soꞌ da̱j vaa chrej chiꞌi̱i̱ ꞌnaꞌ rihaan níꞌ ado̱nj. Cheꞌé dan cunuu ꞌe̱e̱ rá soꞌ man níꞌ ga̱a nina̱j níꞌ rihaan sayuun ado̱nj. Dan me se ase vaa maꞌa̱n níꞌ roꞌ, vaa soꞌ, ne̱ ase vaa sayuun ꞌnaꞌ rihaan níꞌ roꞌ, da̱nj vaa sayuun caꞌnaꞌ rihaan soꞌ, tza̱j ne̱ ne quiꞌya̱j soꞌ a̱ ꞌó xcoꞌ cacunꞌ maꞌ.

Hebreos 9:15

Dan me se Cristó me se caviꞌ soꞌ cheꞌé se queneꞌen soꞌ se vaa ne gu̱un nucua̱j yuvii̱ canoco̱ꞌ nij yuvii̱ nu̱ꞌ tucuáán cuchruj Yaꞌanj asino ya̱a̱n rihaan síí cuꞌna̱j Moisés maꞌ. Cheꞌé dan Cristó me síí narqué tucuáán naca̱ cheꞌé níꞌ da̱j quiꞌya̱j níꞌ cavi̱i̱ sa̱ꞌ níꞌ rihaan Yaꞌanj a. Cheꞌé dan níꞌ si̱j canacúún Yaꞌanj man roꞌ, naca̱j níꞌ nu̱ꞌ se sa̱ꞌ cataꞌ tuꞌva Yaꞌanj se vaa rque̱ soꞌ rihaan níꞌ nu̱ꞌ cavii nu̱ꞌ caꞌanj ado̱nj.

1 Pedro 1:20

Dan me se asi̱j ataa quiꞌya̱j Yaꞌanj chumii̱, ne̱ a̱j neꞌen Yaꞌanj se vaa cavi̱ꞌ Cristó cheꞌé níꞌ, ne̱ cuano̱ ga̱a nichrunꞌ navi̱j chumii̱ nihánj me se curuviꞌ Cristó rihaan chumii̱ nihánj cheꞌé maꞌa̱n nij soj ado̱nj.

Apocalipsis 1:18

Ne̱ síí vaa iꞌna̱ꞌ mej a. Dan me se cavíꞌ ꞌu̱nj, tza̱j ne̱ cuano̱ nihánj me se vaa iꞌna̱ꞌ uún ꞌu̱nj, ne̱ dan me se ꞌo̱ ga̱a̱ iꞌna̱ꞌ ꞌu̱nj nu̱ꞌ cavii nu̱ꞌ caꞌanj ado̱nj. Ne̱ ꞌu̱nj roꞌ, me síí ata̱ suun cata̱j me síí cavi̱ꞌ ne̱ me síí caꞌa̱nj rej ma̱n nimán nij síí caviꞌ ado̱nj.

Apocalipsis 12:9

Ne̱ xcuáá tuꞌvi̱i yoꞌ roꞌ, xcuáá cayáán asi̱j naá tiempó me soꞌ, ne̱ Síí Chre̱e do̱ꞌ, Satanás do̱ꞌ, cuꞌna̱j soꞌ, ne̱ síí tihaꞌ yuꞌunj man cunuda̱nj nij yuvii̱ ma̱n rihaan chumii̱ me uún soꞌ na̱nj ado̱nj. Ne̱ tagüéj nii man xcuáá tuꞌvi̱i xi̱j yoꞌ rihaan chumii̱ ga̱ nij se‑mo̱zó soꞌ a.

Apocalipsis 2:10

’Tza̱j ne̱ a̱ doj se̱ cuchuꞌviꞌ soj cheꞌé sayuun quira̱nꞌ soj maꞌ. Dan me se Síí Chre̱e roꞌ, caxri̱i̱ soꞌ tagaꞌ man taꞌa̱j soj, cheꞌé rej cuchuꞌvi̱ꞌ soj ne̱ ta̱náj soj tucuáán sa̱ꞌ ado̱nj. Ne̱ chi̱ꞌ güii quira̱nꞌ soj sayuun da̱nj chugua̱nj. Dan me se nda̱ꞌ se ticavi̱ꞌ nii man soj, tza̱j ne̱ ꞌo̱ canoco̱ꞌ soj manj, ne̱ vaa güii rque̱ ꞌu̱nj ꞌo̱ cachriin cu̱nuû raa̱ soj, cheꞌé se si̱j ga̱a̱ iꞌna̱ꞌ nu̱ꞌ cavii nu̱ꞌ caꞌanj ga̱ Yaꞌanj gu̱un soj na̱nj á.

Apocalipsis 20:2

Ga̱a ne̱ taꞌaa soꞌ xcuáá tuꞌvi̱i xcuáá cayáán asi̱j naá a. Ne̱ xcuáá tuꞌvi̱i yoꞌ roꞌ, me Síí Chre̱e, ne̱ Satanás cuꞌna̱j soꞌ a. Dan me se nica̱j se‑mo̱zó Yaꞌanj agaꞌ ne̱ꞌ numíj se‑mo̱zó Yaꞌanj man soꞌ rque ꞌo̱ míj ya̱ yoꞌ a.