Hebreos 2:10 - Triqui de San Juan Copala

¹⁰ Dan me se Yaꞌanj me síí quiꞌyaj nu̱ꞌ rasu̱u̱n cheꞌé maꞌa̱n ina̱nj soꞌ chugua̱nj. Dan me se vaa güii, ne̱ nucui̱ꞌ ndoꞌo nij taꞌníí Yaꞌanj rihaan Yaꞌanj rej xta̱ꞌ, quiꞌya̱j Yaꞌanj, ne̱ Jesús me síí narqué chrej sa̱ꞌ canoco̱ꞌ nij taꞌníí Yaꞌanj, ne̱ nani̱i̱ nij soꞌ rihaan sayuun, ne̱ cavi̱i̱ sa̱ꞌ nij soꞌ quiꞌya̱j soꞌ chugua̱nj. Cheꞌé dan caꞌvej Yaꞌanj quira̱nꞌ Jesús sayuun ado̱nj. Ne̱ ma̱an cheꞌé sayuun quiranꞌ soꞌ roꞌ, cheꞌé dan me uun chij ndoꞌo soꞌ ado̱nj.

Hebreos 2:10 ပူးပေါင်းရင်းမြစ်များ

San Lucas 13:32

Ga̱a ne̱ cataj Jesús rihaan nij soꞌ a: ―Ase vaa chunee avii ndoꞌo raa̱ quiꞌya̱j sayuun vaa Herodes, ne̱ caꞌa̱nj soj, ne̱ cata̱j soj rihaan soꞌ se vaa ꞌu̱nj me se rii ꞌu̱nj nana̱ chre̱e nimán nij yuvii̱, ne̱ naquiꞌyaj sa̱ꞌ ꞌu̱nj man nij síí ranꞌ, ne̱ ꞌo̱ güii cuanꞌ ne̱ ꞌo̱ güii aꞌyuj ne̱ rque vaꞌnu̱j gue̱e̱ güii qui̱ꞌyáá ꞌu̱nj se‑su̱nj, ne̱ veé da̱nj quisi̱j se‑su̱nj, qui̱ꞌyáj na̱nj ado̱nj.

San Lucas 2:14

Niꞌndaj ya̱ sa̱ꞌ veꞌé vaa Yaꞌanj, cata̱j nij síí ma̱n xta̱ꞌ, ne̱ ga̱a̱ xe̱j nimán nij yuvii̱ si̱j sa̱ꞌ nimán ma̱n rihaan chumii̱ a, taj nij se‑mo̱zó Yaꞌanj rihaan nij síí tumé matzinj a.

San Lucas 24:26

ꞌO̱ se ne neꞌen ro̱j so̱j se vaa xa̱ꞌ Síí Caꞌnéé Yaꞌanj Ti̱nanii man Yuvii̱ rihaan Sayuun, tza̱j ne̱ vaa cheꞌé ndoꞌo quira̱nꞌ soꞌ sayuun ne̱ catu̱u̱ soꞌ rej niꞌndaj ya̱ sa̱ꞌ veꞌé vaa rej gu̱un chij soꞌ a ―taj Jesús rihaan ro̱j soꞌ a.

San Lucas 24:46

ne̱ cataj soꞌ rihaan nij soꞌ a: ―Veé da̱nj taj Danj Yaꞌanj se vaa xa̱ꞌ ꞌu̱nj Si̱j Caꞌnéé Yaꞌanj Ti̱nanii man Yuvii̱ rihaan Sayuun, tza̱j ne̱ vaa cheꞌé quira̱nꞌ ma̱ꞌanj sayuun, ne̱ cavi̱ꞌ ꞌu̱nj, ne̱ cache̱n vaꞌnu̱j güii, ga̱a ne̱ cunu̱u iꞌna̱ꞌ uún ꞌu̱nj a.

San Juan 11:52

Ne̱ né ina̱nj cheꞌé nij yuvii̱ israelitá me cavi̱ꞌ Jesús maꞌ. ꞌO̱ se cavi̱ꞌ soꞌ cheꞌé rej naquiꞌya̱j chre̱ꞌ soꞌ man cunuda̱nj nij taꞌníí Yaꞌanj nij síí ma̱n nu̱ꞌ rihaan chumii̱ nihánj, ga̱a ne̱ gu̱un nij soꞌ o̱rúnꞌ xꞌneꞌ yuvii̱ ado̱nj.

San Juan 19:30

Ne̱ ga̱a quisíj coꞌo Jesús na vinó yu̱u̱ nu̱u̱ rque yataa̱n yoꞌ, ne̱ cataj soꞌ a: ―Veé da̱nj quisíj se‑su̱u̱n ꞌu̱nj na̱nj á ―taj Jesús a. Ne̱ tacoꞌ ni̱j soꞌ cúú yave̱ soꞌ, ne̱ caꞌneꞌ rá soꞌ, ne̱ caviꞌ soꞌ a.

Hechos 3:15

Ne̱ ticaviꞌ soj man Jesús síí uun nucua̱j quiꞌya̱j ga̱a̱ iꞌna̱ꞌ nimán níꞌ a. Ne̱ Yaꞌanj roꞌ, quiꞌyaj cunuu iꞌna̱ꞌ uún Jesús, ne̱ maꞌa̱n núj me síí queneꞌen se vaa cunuu iꞌna̱ꞌ uún soꞌ na̱nj ado̱nj.

Hechos 5:31

Ga̱a ne̱ maꞌa̱n Yaꞌanj quiꞌyaj cavii Jesús xta̱ꞌ, ne̱ nicu̱nꞌ Jesús rej xꞌnu̱j Yaꞌanj rej nuva̱ꞌ Yaꞌanj a. Ne̱ guun Jesús Síí Uun Chij Ndoꞌo, ne̱ Síí Tinanii man Yuvii̱ rihaan Sayuun guun soꞌ, cheꞌé rej caꞌve̱e ca̱nica̱j nimán níꞌ si̱j israelitá ga̱a ne̱ navi̱j cacunꞌ tumé níꞌ ado̱nj.

Romanos 11:36

Dan me se maꞌa̱n Yaꞌanj quiꞌyaj cunuda̱nj rasu̱u̱n, ne̱ cheꞌé maꞌa̱n Yaꞌanj mán rasu̱u̱n rihaan chumii̱, ne̱ se rásuun Yaꞌanj me cunuda̱nj rasu̱u̱n a. Veꞌé uxrá caꞌmi̱i̱ cunuda̱nj yuvii̱ cheꞌé Yaꞌanj nu̱ꞌ cavii nu̱ꞌ caꞌanj ado̱nj. Veé da̱nj ga̱a̱ ya̱ ado̱nj.

Romanos 9:23

cheꞌé rej ti̱haa̱n Yaꞌanj rihaan nij yuvii̱ nu̱ꞌ nda̱a vaa quiꞌya̱j soꞌ cheꞌé ꞌó nij yuvii̱ a. Ne̱ ꞌó nij soꞌ me se a̱j guun rá Yaꞌanj se vaa gu̱un chij nij soꞌ ga̱ soꞌ, ne̱ cheꞌé dan cunu̱u ꞌe̱e̱ rá soꞌ man nij soꞌ, ga̱a ne̱ xca̱j cunuda̱nj nij yuvii̱ cuentá se vaa síí niꞌndaj ya̱ sa̱ꞌ veꞌé uun chij me Yaꞌanj na̱nj ado̱nj.

1 Corintios 2:7

Tza̱j ne̱ aꞌmii núj snana̱ Yaꞌanj nana̱ cu̱u ado̱nj. Dan me se ga̱a ataa quiꞌya̱j Yaꞌanj chumii̱, ne̱ ꞌo̱ guun rá Yaꞌanj se vaa cuno̱ yuvii̱ nana̱ cu̱u yuve̱ yoꞌ, ne̱ cavi̱i̱ sa̱ꞌ níꞌ, ne̱ veꞌé ndoꞌo ga̱a̱ níꞌ, tza̱j ne̱ nij síí ma̱n ga̱a naá roꞌ, ne queneꞌe̱n nij soꞌ nana̱ yoꞌ maꞌ. Nda̱a ya̱j me tihaa̱n Yaꞌanj nana̱ cu̱u yuve̱ yoꞌ rihaan yuvii̱ na̱nj ado̱nj.

1 Corintios 8:6

Ne̱ xa̱ꞌ níꞌ, tza̱j ne̱ neꞌen níꞌ se vaa o̱rúnꞌ ya̱ Yaꞌanj á. Rej níꞌ Yaꞌanj me soꞌ, ne̱ o̱rúnꞌ soꞌ me síí quiꞌyaj cunuda̱nj rasu̱u̱n ma̱n rihaan chumii̱ nihánj, ne̱ ina̱nj cheꞌé maꞌa̱n soꞌ vaa iꞌna̱ꞌ níꞌ a. Ne̱ vaa o̱rúnꞌ Síí ꞌNi̱j Raꞌa man níꞌ, ne̱ Jesucristó cuꞌna̱j soꞌ, ne̱ cheꞌé soꞌ curuviꞌ nu̱ꞌ rasu̱u̱n ma̱n rihaan chumii̱ nihánj, ne̱ cheꞌé soꞌ ya̱ vaa iꞌna̱ꞌ níꞌ ado̱nj.

2 Corintios 3:18

Ne̱ taj se aráán rihaan ta̱ranꞌ níꞌ maꞌ. ꞌO̱ se uun nucua̱j níꞌ neꞌen níꞌ man Síí ꞌNi̱j Raꞌa man níꞌ, se vaa niꞌndaj ya̱ veꞌé vaa soꞌ, ne̱ ase vaa soꞌ roꞌ, da̱nj ga̱a̱ uún maꞌa̱n níꞌ, cheꞌé se niꞌya̱j níꞌ man soꞌ ado̱nj. Dan me se do̱ꞌ do̱ꞌ naquiꞌyaj sa̱ꞌ Nimán Yaꞌanj Si̱j ꞌNi̱j Raꞌa man níꞌ nimán níꞌ, ne̱ dan me se ne̱ soꞌ nimán níꞌ, ne̱ ase vaa maꞌa̱n soꞌ roꞌ, da̱nj ga̱a̱ ta̱ranꞌ níꞌ uún ado̱nj.

2 Corintios 4:17

Cuano̱ ya̱j me se vaa do̱j sayuun ranꞌ núj, tza̱j ne̱ raꞌya̱nj cache̱n nu̱ꞌ sayuun yoꞌ, ne̱ cheꞌé sayuun roꞌ, cavi̱i̱ sa̱ꞌ uxrá núj nu̱ꞌ cavii nu̱ꞌ caꞌanj na̱nj á.

2 Corintios 5:18

Ne̱ Yaꞌanj me síí ꞌyaj nu̱ꞌ nihánj cheꞌé yuvii̱, ne̱ soꞌ me síí quiꞌyaj naꞌmii sa̱ꞌ níꞌ ga̱ maꞌa̱n soꞌ cheꞌé se vaa quiꞌyaj Cristó, ne̱ caꞌneꞌ maꞌa̱n Yaꞌanj suun rihaan núj cata̱j xnaꞌanj núj rihaan yuvii̱ se vaa caꞌve̱e naꞌmi̱i̱ sa̱ꞌ nij yuvii̱ ga̱ Yaꞌanj ado̱nj.

2 Corintios 6:18

Ne̱ gu̱un Re̱j soj manj, ne̱ gu̱un soj taꞌníj, taj ꞌu̱nj Si̱j ꞌNi̱j Raꞌa man soj Síí Uun Nucua̱j ꞌYaj Cunuda̱nj a. Da̱nj taj uún Yaꞌanj rihaan níꞌ a.

Gálatas 3:26

Cheꞌé se amán rá nij soj niꞌya̱j soj man Cristó Jesús roꞌ, cheꞌé dan taꞌníí Yaꞌanj me ta̱ranꞌ soj cuano̱ na̱nj ado̱nj.

Efesios 2:7

Nda̱a síj, ga̱a ne̱ nu̱ꞌ cavii nu̱ꞌ caꞌanj ti̱haa̱n Yaꞌanj man nij yuvii̱ se vaa quiꞌyaj ndoꞌo Yaꞌanj se lu̱j cheꞌé níꞌ, ne̱ dan me se queneꞌe̱n nij yuvii̱ se vaa cunuu ꞌe̱e̱ ndoꞌo rá Yaꞌanj man níꞌ cheꞌé se síí noco̱ꞌ man Cristó Jesús me níꞌ na̱nj ado̱nj.

Efesios 3:10

Tza̱j ne̱ da̱j a̱ nij síí uun chij rej xta̱ꞌ do̱ꞌ, da̱j a̱ nij síí nica̱j suun rej xta̱ꞌ do̱ꞌ roꞌ, me rá Yaꞌanj xca̱j nij soꞌ cuentá cuano̱ se vaa ina̱nj nana̱ cu̱u sa̱ꞌ ndoꞌo avii raa̱ Yaꞌanj, ne̱ queneꞌe̱n nij soꞌ man xꞌneꞌ ta̱ranꞌ níꞌ si̱j noco̱ꞌ man Cristó, ne̱ xca̱j nij soꞌ cuentá se vaa avii ndoꞌo raa̱ Yaꞌanj ado̱nj.

Colosenses 3:4

Ne̱ Cristó me síí ꞌyaj vaa iꞌna̱ꞌ nimán soj, ne̱ vaa güii caꞌna̱ꞌ uún soꞌ rihaan chumii̱ nihánj, ne̱ niꞌndaj ya̱ veꞌé ga̱a̱ curuvi̱ꞌ soj ga̱ soꞌ na̱nj ado̱nj.

2 Timoteo 2:10

Cheꞌé dan uun nu̱cuáá ꞌu̱nj rihaan me maꞌa̱n sayuun cheꞌé se ꞌe̱e̱ rá ꞌu̱nj man nij síí narii Yaꞌanj man a. ꞌO̱ se da̱nj ga̱a̱ qui̱ránꞌ ꞌu̱nj, ga̱a ne̱ caꞌve̱e nani̱i̱ nij soꞌ ga̱ ꞌu̱nj rihaan sayuun cheꞌé se vaa quiꞌyaj Cristó Jesús cheꞌé níꞌ, ne̱ niꞌndaj ya̱ veꞌé ga̱a̱ níꞌ ga̱ Yaꞌanj nu̱ꞌ cavii nu̱ꞌ caꞌanj na̱nj ado̱nj.

Hebreos 12:2

Ma̱an se ꞌo̱ ni̱ꞌyaj níꞌ man Jesús á. Maꞌa̱n soꞌ me se síí cuchruj tucuáán amán rá niꞌya̱j man Yaꞌanj ado̱nj. Ne̱ veé soꞌ me síí quisíj quiꞌyaj ya̱ nu̱ꞌ suun cheꞌé rej canoco̱ꞌ níꞌ man Yaꞌanj ado̱nj. Dan me se neꞌen soꞌ se vaa rej riha̱a̱n gu̱un niha̱ꞌ uxrá rá nimán soꞌ sese quiꞌya̱j soꞌ se vaa me rá Yaꞌanj, ne̱ cheꞌé dan guun nucua̱j soꞌ caviꞌ soꞌ rihaan rcutze̱, ne̱ ne cara̱yaꞌa̱nj soꞌ se vaa caꞌngaꞌ naco̱o̱ yuvii̱ niꞌya̱j yuvii̱ man soꞌ maꞌ. Síj ga̱a ne̱ caꞌanj ca̱yáán soꞌ rej nuva̱ꞌ xrúún Yaꞌanj, chruun xlá sa̱ꞌ uxrá ado̱nj.

Hebreos 6:20

Dan me se a̱j quitáá ya̱a̱n Jesús rihaan níꞌ quinanꞌ soꞌ rihaan Yaꞌanj cheꞌé níꞌ, ne̱ soꞌ me síí guun xrej ata̱ suun noco̱o doj, ne̱ ase vaa síí cuꞌna̱j Melquisedec síí cayáán ga̱a naá roꞌ, da̱nj ga̱a̱ gue̱e̱ soꞌ nu̱ꞌ cavii nu̱ꞌ caꞌanj ado̱nj.

Hebreos 7:26

Dan me se vaa cheꞌé ndoꞌo guun soꞌ xrej ata̱ suun noco̱o doj cheꞌé níꞌ ado̱nj. ꞌO̱ se síí gue̱e̱ ya̱ me soꞌ, ne̱ taj va̱j a̱ doj cacunꞌ tumé soꞌ maꞌ. ꞌO̱ se síí sa̱ꞌ ina̱nj nimán me soꞌ, ne̱ ga̱nꞌ uxrá yáán soꞌ ga̱ níꞌ si̱j tumé cacunꞌ na̱nj ado̱nj. Dan me se xta̱ꞌ doj yáán soꞌ rihaan nu̱ꞌ rej xta̱ꞌ na̱nj ado̱nj.

Hebreos 7:28

Ne̱ stucua̱nj Moisés taj se vaa cune̱ꞌ yuvii̱ man na̱nj yuvii̱ gu̱un nij soꞌ xrej, ne̱ cheꞌé dan na̱nj síí tumé cacunꞌ me nij xrej yoꞌ na̱nj ado̱nj. Tza̱j ne̱ navij tucuáán nga̱ yoꞌ, ga̱a ne̱ cutaꞌ Yaꞌanj raa̱ maꞌa̱n Yaꞌanj, ne̱ cuneꞌ Yaꞌanj man Taꞌníí Yaꞌanj, ne̱ síí sa̱ꞌ ina̱nj me soꞌ nu̱ꞌ cavii nu̱ꞌ caꞌanj na̱nj ado̱nj.

1 Pedro 1:12

Dan me se cataj xnaꞌanj Yaꞌanj rihaan nij soꞌ se vaa né maꞌa̱n nij soꞌ me nij síí queneꞌe̱n caꞌna̱ꞌ síí caꞌne̱j Yaꞌanj maꞌ. Tana̱nj nu̱ꞌ nij soj me nij síí queneꞌe̱n man síí caꞌne̱j Yaꞌanj, asa̱ꞌ caꞌnaꞌ soꞌ, taj Yaꞌanj rihaan nij síí nataꞌ snana̱ Yaꞌanj ga̱a naá yoꞌ a. Ne̱ nihánj me se nij síí caꞌmii natáj nana̱ sa̱ꞌ cheꞌé Cristó rihaan soj ya̱j roꞌ, caꞌnéé Yaꞌanj Nimán Yaꞌanj rihaan nij soꞌ, ne̱ a̱j nataꞌ nij soꞌ nu̱ꞌ se vaa quiꞌyaj Cristó síí caꞌnéé Yaꞌanj rihaan chumii̱ nihánj cuno soj a. Ne̱ nda̱a nij se‑mo̱zó Yaꞌanj síí ya̱nj xta̱ꞌ me rá queneꞌe̱n da̱j ga̱a̱ cavi̱i̱ sa̱ꞌ níꞌ quiꞌya̱j Cristó ado̱nj.

1 Pedro 5:1

Rihaan soj si̱j tumé sa̱ꞌ rihaan Yaꞌanj man nij síí noco̱ꞌ man Cristó ma̱n da̱j a̱ chumanꞌ caꞌmi̱i̱ nu̱cuáj cuano̱ a. ꞌO̱ se síí tumé sa̱ꞌ rihaan Yaꞌanj man yuvii̱ mé ꞌu̱nj ga̱ soj, ne̱ síí queneꞌen sayuun se vaa quiranꞌ Cristó mé ꞌu̱nj, ne̱ dan me se veꞌé gu̱un chij ꞌu̱nj ga̱ Cristó asa̱ꞌ curuviꞌ uún soꞌ rihaan chumii̱ nihánj, raj a.

1 Pedro 5:10

Dan me se Yaꞌanj roꞌ, me síí ꞌyaj da̱j a̱ se lu̱j cheꞌé soj, ne̱ soꞌ me síí canacúún man soj cavi̱i̱ sa̱ꞌ uxrá soj ga̱ soꞌ nu̱ꞌ cavii nu̱ꞌ caꞌanj cheꞌé Cristó ado̱nj. Asa̱ꞌ quisíj quiranꞌ soj sayuun do̱j güii rihaan chumii̱ nihánj, ga̱a ne̱ naquiꞌya̱j sa̱ꞌ Yaꞌanj man soj, ne̱ naquiꞌya̱j sca̱ꞌ soꞌ man soj, ne̱ ga̱a̱ nucua̱j ina̱nj rá soj, quiꞌya̱j soꞌ, ne̱ cune̱ꞌ sa̱ꞌ soꞌ man soj ado̱nj.

Apocalipsis 4:11

No̱ xcúún ndoꞌo so̱ꞌ Yaꞌa̱nj Si̱j ꞌNi̱j Raꞌa man núj cata̱j núj se vaa niꞌndaj ya̱ sa̱ꞌ veꞌé vaa so̱ꞌ do̱ꞌ, cara̱a̱ cochro̱j núj mán so̱ꞌ do̱ꞌ, gu̱un chij ndoꞌo so̱ꞌ do̱ꞌ á. ꞌO̱ se so̱ꞌ me síí quiꞌyaj cunuda̱nj rasu̱u̱n, ne̱ ma̱an cheꞌé se guun rá so̱ꞌ cuma̱n nij rasu̱u̱n yoꞌ roꞌ, cheꞌé dan guun cunuda̱nj nij rasu̱u̱n, quiꞌyáá so̱ꞌ ado̱nj taj ico̱ caꞌa̱nj nij síí uun chij yoꞌ rihaan Yaꞌanj a.

Apocalipsis 7:9

Veé dan, ga̱a ne̱ niꞌya̱j ꞌu̱nj, ne̱ dan me se ri̱i̱ uxrá yuvii̱, ne̱ taj va̱j síí gu̱un nucua̱j quiꞌya̱j contá man nij yuvii̱ a̱ maan chugua̱nj. Ne̱ yuvii̱ ma̱n da̱j a̱ yoꞌóó noco̱o do̱ꞌ, yuvii̱ ma̱n da̱j a̱ xꞌneꞌ yuvii̱ ino̱ vaa stucua̱nj do̱ꞌ, yuvii̱ ma̱n da̱j a̱ chumanꞌ do̱ꞌ, yuvii̱ ma̱n da̱j a̱ xꞌneꞌ yuvii̱ aꞌmii ꞌo̱ ꞌo̱ xnaꞌánj do̱ꞌ, me uún nij soꞌ, ne̱ dan me se canicunꞌ nij soꞌ rihaan chruun xlá sa̱ꞌ yoꞌ do̱ꞌ, rihaan Matzinj Leꞌe̱j yoꞌ do̱ꞌ a. Ne̱ yatzíj xca̱a̱n catzi̱i̱ nuû nij soꞌ, ne̱ nica̱j nij soꞌ raꞌa chruun yuun a.